Évanjil a Jan

15 An sé vré pyé-rézen-la, é Pap’an mwen sé agrikiltè-la. 2 Dépi on branch an mwen pa’a pòté fwi, i ka woté-y, é tout branch ki ka pòté fwi, i ka tayé-y pou i pòté plis fwi ankò. 3 Konm zò kouté pawòl-la an di-zòt la, zò ja pwòp. 4 Rété soudé èvè mwen, é an ké rété soudé èvè zòt. On branch pé pa pòté fwi tousèl a-y. I ké pòté fwi yenki si i rété an pyé-la. Menmjan-la, zò pé pa pòté fwi si zò pa’a rété soudé èvè mwen. 5 An sé pyé-rézen-la ; sé branch-la sé zòt. Si on moun ka rété soudé èvè mwen, é mwen an ka rété soudé èvè-y, moun-lasa ka pòté onlo fwi ; pas san mwen, zò pé pa fè ayen. 6 Si on moun pa’a rété soudé èvè mwen, i ké kon on branch yo koupé é ki ka vin sèk. Lèwgadé yo ka ranmasé sé branch-la, yo ka lagé-yo an difé, é sé branch-la ka brilé. 7 Si zò ka rété soudé èvè mwen é zò ka fè sa an ka di, kèlkanswa sa zò mandé, yo ké ba-zòt li. 8 Lè zò ka kontinyé pòté onlo fwi é lè zò ka montré zò sé disip an mwen, sa ka ba Pap’an mwen glwa. 9 Kon Papa-la enmé-mwen, sé konsa an enmé-zòt. Rété soudé èvè mwen, pou an pé sa kontinyé enmé-zòt. 10 An fè sa Papa-la mandé-mwen, é i kontinyé enmé-mwen. Menmjan-la, si zò ka fè sa an ka mandé-zòt, an ké kontinyé enmé-zòt.

11 « An di-zòt sé biten-lasa pou tchè a zòt kontan menmjan ki tan mwen, é pou zò ni jwa-lasa adébòdé. 12 Mi sa an ka mandé-zòt fè : fò yonn enmé lòt kon an montré-zòt kè an enmé-zòt. 13 Pa ni ponmoun ki ni plis lanmou ki on moun ki ka bay vi* a-y pou zanmi a-y. 14 Si zò ka fè sa an ka mandé-zòt, zò sé zanmi an mwen. 15 An pa’a kriyé-zòt èsklav ankò, pas on èsklav pa sav sa mèt a-y ka fè. Men an kriyé-zòt zanmi, pas an fè-zòt sav tousa an tann Pap’an mwen di. 16 Zò pa chwazi-mwen, men an chwazi-zòt pou zò kontinyé pòté fwi ki ké rété la pou touttan ; konsa tousa zò ké mandé Papa-la an non an mwen, i ké ba-zòt li.

17 « An ka mandé-zòt fè sé biten-lasa pou yonn enmé lòt. 18 Si mond-la hay-zòt, zò sav kè i té hay-mwen avan i té hay-zòt. 19 Si zò té kon sé moun-la ki an mond-la, sé moun-lasa té’é enmé sa ki ta yo. Konm zò pa kon sé moun-la ki an mond-la, men kè an chwazi-zòt pawmi yo, sé pousa yo hay-zòt. 20 Sonjé sa an di-zòt : on èsklav pa pi enpòwtan ki mèt a-y. Si yo pèwsékité-mwen, yo ké pèwsékité-zòt osi. Si yo fè sa an di-yo, yo ké fè sa zò ka di-yo osi. 21 Men yo ké pèwsékité-zòt akòz dè non an mwen, pas yo pa konnèt Sila ki voyé-mwen la. 22 Si an pa té vin, é si an pa té palé ba yo, yo pa té’é koupab*. Men konnyéla, yo pé pa di kè a pa péché yo péché. 23 Si on moun hay-mwen, i hay Pap’an mwen osi. 24 Si an pa té fè sèwten biten douvan yo, dé biten kè pondòt moun pa jen fè, yo pa té’é koupab*. Men konnyéla, non sèlman yo vwè-mwen, men anplisdisa, yo touvé-yo hay ki mwen ki Pap’an mwen. 25 Men sa rivé pou sa ki maké adan Lwa a yo réyalizé. Mi sa ki maké : “Yo té hay-mwen alòskè yo pa té ni pon rézon pou fè sa.” 26 An ké voyé on èd pou zòt é sé Pap’an mwen ki ka ba-zòt li. Èd-lasa, sé lèspri a lavérité ki ka vin dè Pap’an mwen. Lè i ké vin, i ké pèwmèt-zòt konprann sèwten biten anrapò èvè mwen on mannyè ki klè. 27 É zòt a tou a zòt, zò ké fè dòt moun konnèt sé biten-lasa, pas zò té èvè mwen dépi odépa.