Évanjil a Jan
16 « An di-zòt sé biten-lasa pou zò pa tribiché. 2 Yo ké mèt-zòt déwò an sinagòg-la. Rivé onlè, kèlkèswa moun-la ki ké tchouyé-zòt la, i ké konpranndèdi sé adoré i ka adoré Bondyé lè i ka fè sa. 3 Pawkont, yo ké fè sé biten-lasa pas yo pa rivé konnèt ni mwen, ni Papa-la. 4 Men an di-zòt sé biten-lasa, konsa lè yo ké fèt, zò ké sonjé kè an té ja palé-zòt dè sa.
« An pa di-zòt sa dépi odépa, pas an té èvè zòt. 5 Men konnyéla, an k’ay owa Sila ki voyé-mwen la ; é magrésa, ponyonn adan zòt pa’a mandé-mwen : “Kikoté ou k’ay ?” 6 Men konm an di-zòt sé biten-lasa, zò tris toubònman. 7 Sèlman, sé lavérité an ka di-zòt : Si an pati, sé bon biten sa ké menné ba zòt. Paskè si an pa alé, èd-la* pé’é vin owa a zòt, men si an pati, an ké voyé-y ba zòt. 8 É lè èd-la ké vin, i ké mèt péché a mond-la déwò, i ké montré kè an ka fè sa ki jis, é i ké montré kimoun Bondyé ka jijé. 9 Prèmyèwman, i ké mèt péché a mond-la déwò pas mond-la ka montré kè i pa ni fwa adan mwen. 10 Aprésa, i ké montré mond-la kè an ka fè sa ki jis, pas an k’ay owa Papa-la. Kifè, zò pé’é vwè-mwen ankò. 11 Anplisdisa, i ké montré on mannyè ki klè kimoun Bondyé ka jijé, pas i ja jijé chèf a mond-lasa.
12 An ni onlo biten a di-zòt toujou men zò pé pa konprann-yo konnyéla la. 13 Men lè èd-la* ké vin, kivédi lèspri a lavérité, i ké gidé-zòt pou zò konprann lavérité byen konm i fo, pas i pé’é pran asi-y pou i palé. Men sa i ké di, sé sa i ka tann Bondyé di, é i ké anonsé-zòt sa ki ké rivé. 14 Èd-lasa ké ban-mwen glwa, pas i ké fè-zòt sav sa an di. 15 Tousa ki ta Pap’an mwen sé tan mwen. Sé pousa an di-zòt kè i ké fè-zòt sav sa an di. 16 Adan on ti moman zò pé’é vwè-mwen ankò, é adan on ti moman ankò, zò ké vwè-mwen. »
17 Lèwgadé, pawmi disip a-y, sèwten adan yo mèt-yo ka palé. Yonn té ka di lòt : « Ka i vlé di pa la lè i ka di-nou : “Adan on ti moman zò pé’é vwè-mwen ankò, é adan on ti moman ankò, zò ké vwè-mwen” ? É ka i vlé di lè i ka di-nou : “Pas an k’ay owa Papa-la” ? » 18 Alò yo té ka di : « Lè i ka di “adan on ti moman”, ka sa vlé di ? Nou pa sav dè kibiten i ka palé. » 19 Konm Jézi té sav kè yo té vlé pozé-y kèsyon, i di-yo : « Alò pas an di : “Adan on ti moman, zò pé’é vwè-mwen ankò, é adan on ti moman ankò, zò ké vwè-mwen”, zò la ka diskité antrè zòt ? 20 Zò pé kwè-mwen : zò ké pléré é zò ké hélé tèlman zò ké tris, men mond-la ké ni tchè-kontan ; zò ké tris, men tout tris zò ké tris, tristès-lasa ké touné an jwa. 21 Lè on madanm ka akouché, i tris pas lè-la rivé pou i soufè, men lè timoun-la fèt, i pa’a sonjé tout soufè i ja soufè davwa i kontan i mèt on timoun si tè. 22 Alò zòt osi, zò tris konnyéla ; men lè zò ké wouvwè-mwen ankò, tchè a zòt ké kontan é ponmoun pé’é woté jwa-lasa an tchè a zòt. 23 Jou-lasa, zò pé ké pozé-mwen pon kèsyon. Zò pé kwè-mwen : si zò mandé Papa-la on biten, i ké ba-zòt li an non an mwen. 24 Jousalè, zò po’o mandé ayen an non an mwen. Mandé é zò ké risivwè. Konsa, zò ké ni lajwa adébòdé.
25 « An sèvi èvè plizyè ègzanp pou an té di-zòt sé biten-lasa. Rivé onlè, an pé’é sèvi èvè ègzanp ankò pou palé ba zòt, men an ké palé-zòt dè Papa-la on mannyè ki klè. 26 Lèwvwè jou-lasa ké rivé, zò ké mandé Papa-la sèwten biten an non an mwen ; é lè an ka di sa, sa pa vé di kè sé mwen ki ké mandé sé biten-lasa ba zòt. 27 Pas Papa-la limenm a-y enmé-zòt onlo, davwa zò té enmé-mwen onlo é davwa zò té sèten kè lè an vin, sé Bondyé ki té voyé-mwen. 28 An vin an mond-la é sé Papa-la ki voyé-mwen. Konnyéla, an kay kité mond-la pou viré owa Papa-la. »
29 Disip a Jézi di-y : « Ségnè, alèla ou ka palé on mannyè ki klè, é ou pa’a pran pon ègzanp ! 30 Konnyéla, nou sav kè ou konnèt tout biten é kè ou pa bizwen ponmoun pozé-w kèsyon. Grasa sa, nou ka kwè kè sé Bondyé ki voyé-w. » 31 Jézi réponn-yo : « Ès zò ka kwè oséryé konnyéla ? 32 Gadé ! Lè-la ka vin, é i ja jous rivé ; é a moman-lasa zò ké payé an tout sans. Chakmoun ké pati akaz a-y, é zò ké lésé-mwen tousèl. Men an pa tousèl, pas Papa-la èvè mwen. 33 An di-zòt sé biten-lasa pou zò pé sa ni lapé gras’an mwen. Adan mond-la, zò ké jwenn éprèv, men pran kouraj ! An rivé about a mond-la. »