Évanjil a Jan

13 Dépi avan fèt a Lapak, Jézi té sav kè lè a-y té rivé pou lésé mond-lasa, pou i ay owa Papa-la. Konm i té enmé disip a-y, i kontinyé enmé-yo jistan i mò. 2 Lèswa-la, Jézi é apòt a-y té ka manjé ti manjé a yo, é Dyab-la té ja mèt an tchè a Jida Iskaryòt, gason a Simon, kè fò i té trayi Jézi. 3 É konm Jézi té sav kè Papa-la té mèt tout biten an men a-y, kè sé Bondyé ki té voyé-y é kè i té kay rètouné owa Bondyé, 4 i lévé pannan yo té ka manjé toujou, é lenj-la yo té ka mèt asi sélézòt lenj-la, i woté-y anlè-y. I pran on sèwvyèt, é i mété-y alantou a ren a-y. 5 Aprésa, i mèt dlo adan on basin. I koumansé lavé pyé a disip a-y, é i suiyé pyé a yo èvè sèwvyèt-la ki té alantou a ren a-y la. 6 Lè i vin owa Simon Pyè, Simon Pyè di-y : « Ségnè, ou ni lentansyon lavé pyé an mwen ? » 7 Jézi réponn-li : « Konnyéla ou pa’a konprann sa an ka fè, men ou ké konprann sa pita. » 8 Pyè di-y : « An pé’é jen lésé-w lavé pyé an mwen. » Jézi réponn-li : « Siwvwè an pa ka lavé pyé a-w, ou pé’é ni ayen adan sa yo ké ban-mwen la. » 9 Simon Pyè di Jézi : « Ében Ségnè, si sé sa, a pa enki pyé an mwen pou ou lavé, men lavé men an mwen é tèt an mwen osi. » 10 Jézi di-y : « Si on moun bengné, i pa bizwen lavé dòt biten ki pyé a-y, pas tout kò a-y pwòp. É zòt, zò pwòp, men a pa zòtout. » 11 Pas i té sav kimoun ki té kay trayi-y. Sé pousa i di : « A pa zòtout ki pwòp. »

12 Lè i lavé pyé a yo é lè i viré mèt lenj-la i té woté asi-y la, i wousizé alantou a tab-la èvè yo, é i di-yo : « Ès zò sav poukwa an lavé pyé a zòt ? 13 Zò ka kriyé-mwen “Anségnan” é “Ségnè”, é zò ni rézon, pas sé sa an yé. 14 Alò si mwen, an sé Ségnè-la é Anségnan-la, é an lavé pyé a zòt, fò yonn lavé pyé a lòt osi*. 15 Pas an ba-zòt on modèl, pou zòt osi, zò fè kon an fè pou zòt. 16 Zò pé kwè-mwen : on èsklav pa pi enpòwtan ki mèt a-y, é sila yo voyé la pa pi enpòwtan ki moun-la ki voyé-y la nonplis. 17 Si zò konnèt sé biten-lasa, é si zò ka fè-yo, tchè a zòt ké kontan. 18 A pa dè zòtout an ka palé ; an konnèt séla an chwazi la. Men sa fèt konsa pou on pasaj a Lézékriti pé sa réyalizé. Mi sa pasaj-lasa ka di : “Sila ki té ka manjé pen an mwen vin lènmi èvè mwen*.” 19 An ka di-zòt sa dépi konnyéla é avan sa rivé. Konsa, lè sa ké fèt, zò ké pé kwè kè an sé sila an ka di an yé la. 20 Zò pé kwè-mwen : si on moun ka rèsèvwa on moun an voyé, i ka rèsèvwa-mwen osi. É si on moun ka rèsèvwa-mwen, i ka rèsèvwa Sila ki voyé-mwen la osi. »

21 Apré Jézi di sé biten-lasa, i té angwasé toubònman, é i palé ba sé disip-la franchman. I di-yo : « Zò pé kwè-mwen : yonn adan zòt ké trayi-mwen. » 22 Yonn koumansé gadé lòt pas yo pa té sav dè kimoun i té ka palé. 23 Yonn adan sé disip-la, sila Jézi té enmé la, té sizé owa* Jézi. 24 Alò Simon Pyè fè-y sign é i di-y : « Di-nou dè kimoun i ka palé. » 25 Jan panché tèt a-y pa dèyè asi lèstonmak a Jézi, é i mandé-y : « Ségnè, dè kimoun ou ka palé ? » 26 Jézi réponn : « Sé sila an ké bay mòso pen la an ka tranpé la. » Alò i tranpé pen-la, é aprésa i ba Jida li. Sé té gason a Simon Iskaryòt. 27 Jida pran mòso pen la, é aprésa, Satan rantré anlè-y. Alò Jézi di-y : « Sa ou ka fè la, fè-y pi vit. » 28 Men pawmi séla ki té sizé òbò tab-la, pa ni ponyonn ki té sav poukwa Jézi té di-y sa. 29 Ni déotwa ki té ka pansé kè konm sé Jida ki té ni kès a lajan-la, swa Jézi té ka mandé-y achté sa yo té bizwen pou fèt-la, oswa i té ka mandé-y ba sé maléré-la on biten. 30 Alò apré i ba Jida mòso pen la, Jida sòti tousuit. A moman-lasa, té ka fè nwè.

31 Lèwgadé, apré Jida pati, Jézi di : « Konnyéla, yo ka ba Gason a lòm glwa é grasa-y, yo ka ba Bondyé glwa osi. 32 Bondyé limenm a-y ké ba-y glwa, é i ké ba-y glwa san pèd tan. 33 Zanmi an mwen*, an èvè zòt pou on ti moman ankò. Zò ké chèché-mwen, é sa an di sé Juif-la, an ka di-zòt li konnyéla osi : “La an k’ay la, zò pé pa vin.” 34 An ka ba-zòt on nouvo komandman : fò yonn enmé lòt ; fò yonn enmé lòt menmjan an montré-zòt kè an enmé-zòt. 35 Si antrè zòt, yonn enmé lòt, sé konsa toutmoun ké sav kè zò sé disip an mwen. »

36 Simon Pyè mandé Jézi : « Ségnè, ola ou k’ay ? » Jézi réponn-li : « La an k’ay la, ou pé pa suiv-mwen aprézan, men ou ké suiv-mwen pita. » 37 Pyè di-y : « Ségnè, poukwa an pé pa suiv-vou konnyéla la ? An paré a bay vi* an mwen pou-w ! » 38 Jézi réponn : « Ou paré a mò pou mwen ? Ou pé kwè-mwen : avan on kòk chanté, ou ké ja rènyé-mwen 3 fwa. »