Ès ou ka sonjé ?

Ès ou pa pèd on may adan sé Tou dè Gad la ki sòti an 2023 la ? Si sé sa, gadé si ou ka rivé réponn a sé kèsyon-lasa :

Pou nou ‘chanjé mantalité an nou’, ka sa ka mandé ? (Wom. 12:2).

Sa pa vé di fè déotwa bon biten tousèl. Men lè on moun ka chanjé mantalité a-y, i ka pran tan gadé ki jan dè moun i yé vréman é i ka fè tout sé chanjman-la ki fo la pou vi a-y annakò èvè prensip a Jéova (w23.01, p. 8-9).

Kijan nou pé kontinyé ni bon jijman lè nou ka vwè tousa ki ka fèt adan mond-lasa ?

Nou ka rété véyatif pou vwè kijan sèwten biten ki an mond-lasa ka réyalizé sèwten pwofési ki adan Labib. Men nou pa ka pran asi nou pou nou di kijan sa ké fèt paskè si nou pa’a fè atansyon, lasanblé-la pé’é soudé ankò akòz dè sa nou ké di. Lèwvwè nou ka palé èvè lézòt, nou ké bazé sa nou ka di asi sé dènyé enfòwmasyon-la òwganizasyon a Jéova ka ban-nou la (1 Kor. 1:10) (w23.02, p. 16).

Ki diférans ki ni antrè batèm-la Jézi pran la é batèm a sé disip-la ?

Jézi pa té bizwen ba Jéova vi a-y kon nou nou ka fè-y, pas i fèt adan nasyon a Izrayèl é lè on moun té ka fèt adan nasyon-lasa, vi a-y sé té ta Jéova. Jézi pa té bizwen rèpanti-y pou péché a-y pas i té pawfè é i pa té ni pon péché (w23.03, p. 5).

Lèwvwè nou an réinyon, kijan nou pé ankourajé lézòt pou yo pé sa bay komantè a yo ?

Nou ké fè ansòt pou nou fè komantè ki toukout. Konsa dòt moun ké pé réponn. Nou ké fè atansyon osi pou nou pa palé dè twòp lidé. Siwvwè nou fè sa, sa ké pèwmèt sé moun-la ki la la palé dè sélézòt lidé-la ki adan paragraf-la (w23.04, p. 23).

Lè Izayi 35:8 ka palé dè « Chimen-la ki sakré la », dè ki biten i ka palé ojis ?

An tan a Labib sé té on senbòl ki té ka rèprézanté gran chimen-la sé Juif-la té pran la lè yo té sòti Babilòn pou ay an Izrayèl. É jòdijou, ka chimen-lasa ka rèprézanté ? Onpakèt lanné avan 1919, yo té ja koumansé préparé chimen-la lèwvwè yo tradui Bib-la é lèwvwè yo enprimé-y. Sèwvitè a Bondyé ka maché asi chimen-la ki sakré la é chimen-lasa ka menné-yo adan on paradi èspirityèl. Adan paradi-lasa, yo ka pwofité dépi konnyéla dè bénédisyon Wayòm-la ka pòté (w23.05, p. 15-19).

Adan chapit 9 a Pwovèb yo ka palé dè 2 madanm ki sé dé senbòl. Ka yo ka rèprézanté ?

Chapit-lasa ka palé dè on « madanm ki sòt ». I ka envité moun asi chimen a « Tonm-la ». Chapit-lasa ka palé osi dè ondòt madanm ki ka rèprézanté « vré sajès-la ». Madanm-lasa, li kanta-y, ka envité moun asi « chimen a moun ki entélijan » é asi chimen a lavi (Pwov. 9:1, 6, 13, 18) (w23.06, p. 22-24).

Kijan Jéova montré kè i ni imilité é kè i rézonab adan mannyè i aji èvè Lòt ?

Jéova té mandé Lòt chapé kò a-y pou ay adan sé montangn-la. Men lè i sipliyé Jéova pou i lésé-y ay adan on ti vil yo té ka kriyé Zoaw, Jéova pèwmèt-li ay adan vil-lasa (w23.07, p. 21).

Ka on madanm pé fè si mari a-y ka gadé biten pòwno ?

Fò i sonjé kè a pa fòt a-y si mari a-y ka fè sa. Fò i konsantré-y asi lanmityé a-y èvè Jéova é médité asi istwa ki adan Labib é ki ka palé dè madanm tchè a yo té an bobo. Sé madanm-lasa wouvè tchè a yo pou Jéova é i konsolé-yo toubònman. Ondòt biten madanm-la pé fè ankò, sé édé mari a-y pou i pa touvé-y douvan pon tantasyon (w23.08, p. 14-17).

Lè nou ni bon jijman, kijan sa pé édé-nou aji èvè dousè épi moun ki ka kritiké kwayans an nou ?

Olyé nou pansé kè lèwvwè on moun ka pozé-nou on kèsyon sé pou chèché-nou tren, an-nou éséyé konprann ka i ka pansé é poukwa sijé-lasa enpòwtan pou-y. Si nou ka fè sa, nou ké pé réponn-li èvè dousè (w23.09, p. 17).

Kijan Mari fè pou ni fòs-la i té bizwen la é ka sa ka aprann-nou ?

Lè Mari vin sav kè sé-y ki té’é manman a Mési-la, i pran fòs owa dòt sèwvitè a Bondyé. Gabriyèl é Élizabèt édé-y rété bon bon zanmi èvè Bondyé. Nou osi, nou pé touvé fòs owa dòt sèwvitè a Jéova (w23.10, p. 15).

Kijan Jéova ka réponn a priyè an nou ?

Jéova ka pwomèt-nou kè i ké kouté priyè an nou (Jér. 29:12). Lè Jéova ka kouté priyè an nou, i ka tchenn kont dè pwojé a-y. Menmsi plizyè adan nou ka mandé-y menm biten-la, i pa oblijé réponn-nou menmjan-la, men i toujou ka soutyenn-nou (w23.11, p. 21-22).

Women 5:2 ka palé dè « èspérans-la », alò poukwa yo ka woupalé dè sa adan vèwsé 4 la ?

Lè on moun ka tann palé dè bon nouvèl-la, pétèt sa pé ba-y lèspwa dè viv adan on paradi asi latè. Men chakfwa i ka jwenn éprèv, kè i ka andiré-yo, é kè i ka vin sèten kè i ka fè Bondyé plézi, èspérans-la ka vin èspérans a-y ki ta-y é èspérans a-y ka vin pi solid (w23.12, p. 12-13).