Ka pou-w fè pou-w préparé sé réinyon-la byen ?

Si ou ka étidyé Labib èvè on Témwen a Jéova, sèten ou ka fè on éfò pou-w préparé chak lèson alavans. Sa té ké byen si ou té ka fè menm biten-la avan ou ay réinyon ; konsa ou ké pé pwofité dè réinyon-la o maksimòm. Méyè biten a fè, sé prévwa on bon pwogram pou sa.

Chwazi bon moman-la é bon koté-la. A ki moman ou ka rivé konsantré-w pli byen ? Lèmaten avan ou komansé travay, oben lèswa apré sé timoun-la ay dòmi ? Menmsi ou pé pa étidyé lontan, désidé alavans konmen tan ou ké pasé ka étidyé é, toutotan ou pé, pa lésé ayen déranjé pwogram a-w. Chèché on ti koté trankil, é pa lésé ayen distrè-w, sa vé di étenn radio-la, télé-la é téléfòn-la. Priyé avan ou komansé étidyé, sa ké édé-w libéré lèspri a-w dè tousa ki trakasé-w an jouné-la ; konsa ou ké pé konsantré-w asi Pawòl a Bondyé (Filipyen 4:6, 7).

Souligné sa ki enpòwtan é préparé déotwa komantè. Pou komansé, jété on koudèy asi sa nou ké étidyé an réinyon-la. Réfléchi asi tit a awtik-la oben tit a chapit-la, é chèché ki rapò ki ni ant tèm-la yo ka trété la é chak soutit. Gadé sé imaj-la. Ni dé kèsyon ki la pou édé-w rètyenn sa ki pli enpòwtan, li-yo. Apré, li chak paragraf é chèché répons a kèsyon-la ki kay èvè-y la. Li sé vèwsé-la adan bib a-w é chèché ki rapò yo ni èvè sijé-la yo ka trété la (Akt 17:11). Lè ou touvé répons a kèsyon a paragraf-la, souligné déotwa mo, oben on lidé ki ké fè-w sonjé-y. Si ou vlé, pannan réinyon-la, ou ké pé bay on komantè toukout, èvè mo a-w ki ta-w.

Lè ou pran tan ègzaminé sé sijé-la nou kay étidyé an simenn-la, ou ka anrichi konésans biblik a-w, é sé konsi ou té ka mété dòt pèwl adan trézò èspirityèl a-w (Matyé 13:51, 52).

• Ki pwogram ou té ké pé mèt an plas pou-w pé sa préparé sé réinyon-la ?

• Kijan ou pé préparé-w pou-w bay on komantè adan on réinyon ?