Ka sé 2 lèt-la Pyè maké la pé aprann-nou ?

1. Jéova voyé lèspri sen a-y asi lapòt Pyè pou i maké on biten tibwen tan avan i mò. Ki biten ésa ?

LAPÒT Pyè sèvi Jéova fidèlman pannan bon enpé lanné. I préché èvè Jézi é sé-y osi ki koumansé préché ba moun ki pa té juif. Plita i vin ka fè pawti a komité santral la. Lèwvwè i vin sav kè i té kay mò adan on ti moman, Jéova ba-y ondòt travay pou i fè. Ant lan 62 é lan 64 apépré, Jéova voyé lèspri sen a-y asi-y pou i maké 2 lèt kè yo ka kriyé adan Bib-la 1 Pyè é 2 Pyè. Lapòt Pyè di kè i té ka èspéré kè sé lèt-lasa té’é édé sé krétyen-la lèwvwè i té’é mò (2 Pyè 1:12-15).

2. Poukwa sé lèt-la Pyè maké la té itil konsa ?

² A épòk-la Pyè maké sé 2 lèt-lasa, sé frè é sè la té ka jwenn ‘diféran kalté éprèv ki té ka fè-yo lapenn’ (1 Pyè 1:6). Ni sèwten moun ki té ka éséyé rantré adan lasanblé-la é sé moun-lasa té méchan. Yo té ka simé fo ansègnman é yo té ka fè dé biten ki pa té bon menm (2 Pyè 2:1, 2, 14). Anplisdisa, ‘tout biten té toupré fin’ pou sé krétyen-la ki té ka viv Jérizalèm la, piskè adan on ti moman sé Women-la té’é vin pou détwi vil-lasa é yo té’é détwi tanp a-y osi (1 Pyè 4:7). Sèten sé lèt-la Pyè maké la édé sé krétyen-la ki té ka viv a épòk a-y la sav ka pou yo té fè pou andiré sé éprèv-lasa é kijan yo té’é pé préparé-yo pou sé difikilté-la yo té kay jwenn lab.

3. Poukwa fò-nou ègzaminé sé lèt-la Pyè maké la ?

³ Sé vré, sé lèt-la Pyè maké la sé té pou sé 1^é krétyen-la. Men Jéova fè ansòt pou sé lèt-lasa adan Pawòl a-y osi. Kifè, nou pé pwofité dè sa (Wom. 15:4). Adan mond-la nou ka viv adan-y la, ni onlo moun ki ka fè mové biten kon an tan a sé 1^é krétyen-la. Anplisdisa, fò-nou goumé pou nou pé sa rété fidèl a Jéova kon sé 1^é krétyen-la. Ondòt biten ankò, sé kè talè ké ni on gwo tribilasyon é sa ké pi mové ki sa ki rivé sé Juif-la. Adan sé 2 lèt-la Pyè maké la, nou ka touvé onpakèt konsèy ki ni onlo valè pou nou. Yo ké édé-nou pou nou pé sa kontinyé atann jou a Jéova, pou nou pa pè moun ankò é pou yonn enmé lòt fò adan lasanblé-la. Anplisdisa, sé konsèy-lasa ké itil pou sé ansyen-la. Sa ké pèwmèt-yo vwè kijan yo pé édé frè é sè a yo pou yo rété fò adan lasanblé-la.

AN-NOU KONTINYÉ ATANN

4. Dapré 2 Pyè 3:3, 4, ka ki té’é pé fébli fwa an nou ?

⁴ Alantou an nou ni onlo moun ki pa’a kwè adan sé pwofési-la ki an Bib-la. Ni sèwten moun ki ka fè jé èvè nou pas ni lanné é lanné nou ka anonsé kè mond-lasa kay bout. Pou yo, sa pé’é jen fèt (li 2 Pyè 3:3, 4). Lèwvwè on moun an fanmi an nou, on kolèg-travay an nou oben on moun nou ka préché ba-y ka di-nou sa, sa pé fè fwa an nou fébli. Men lapòt Pyè èspliké ka ki pé édé-nou.

5. Si nou ka pansé kè Jéova ka pran tan pou i pé sa détwi mond méchan lasa, ka ki ké édé-nou atann èvè pasyans ? (2 Pyè 3:8, 9).

⁵ Pétèt nou pé rivé a pansé kè Jéova ka pran tan pou i pé sa détwi mond méchan lasa. Men sé pawòl-la Pyè di la pé édé-nou pas yo ka fè-nou sonjé kè Jéova pa’a vwè tan-la kon nou (li 2 Pyè 3:8, 9). Pou Jéova, 1000 an, sé konsi sé té onsèl jouné. Jéova ni pasyans é i vé pa ponmoun détwi. Pawkont, lèwvwè jou a-y ké rivé, mond-lasa ké disparèt. Annatandan nou ni on bèl lonnè toubònman : préché ba tout kalté moun.

6. Ka nou pé fè pou nou ‘toujou sonjé jou a Jéova’ ? (2 Pyè 3:11, 12).

⁶ Pyè ka di-nou kè sa enpòwtan kè nou ‘toujou sonjé jou a Jéova’ (li 2 Pyè 3:11, 12). Kijan nou ké rivé fè sa ? Chakjou Bondyé fè jou, nou pé éséyé réfléchi asi sé byenfé-la nouvo mond-la ké pòté ban nou la. Pa ègzanp, nou pé imajiné kijan lèw-la nou ké rèspiré la ké pwòp é kijan pé’é ni pon vyé biten adan sé manjé-la nou ké manjé la. Nou pé imajiné osi jan nou ké akéyi fanmi an nou é zanmi an nou lèwvwè Bondyé ké résisité-yo é jan nou ké èspliké sé moun-la ki viv an tan lontan la kijan sé pwofési-la ki an Bib-la réyalizé. Si nou ka sonjé sé biten-lasa, nou ké présé vwè moman-lasa rivé é sa ké édé-nou pou nou pi sèten ankò kè nou ka viv pannan sé dènyé jou-la. Konm nou ja sav ka dèmen ké pòté, nou pé ké lésé pon fo ansègnman fè-nou fè chimen kochi (2 Pyè 3:17).

SI OU PÈ MOUN, PA LÉSÉ SA PRAN LANMEN ASI-W

7. Siwvwè nou pè moun, kijan sa pé aji asi nou ?

⁷ Konm nou toujou ka sonjé jou a Jéova, a pa ti anvi nou anvi préché bon nouvèl-la. Men délè, pétèt nou on ti jan pè préché. Poukwa ? Pas nou pè sa moun pé rivé a pansé asi nou oben sa yo pé rivé a fè-nou. Sé sa ki rivé Pyè. Jou-la yo jijé Jézi la, Pyè touvé-y pè é i pa di kè i sé on disip a Jézi. I jous di a plizyè rèpriz kè i pa konnèt Jézi ni an blan ni an nwè (Mat. 26:69-75). Men kèlkètan apré, konm i pa lésé lapè pran lanmen asi-y, mi sa i di : « Pa pè sa ki ka fè-yo pè é pa chouboulé lèspri a zòt » (1 Pyè 3:14). Sé pawòl-la Pyè di la ka ban-nou lagaranti kè siwvwè nou pè moun, nou osi nou pé rivé about a sa.

8. Ka ki pé édé-w pou ou pa pè moun ankò ? (1 Pyè 3:15).

⁸ Siwvwè nou ka rann-nou kont kè nou pè moun, ka ki ké édé-nou pou nou pa lésé sa pran lanmen asi nou ? Mi sa lapòt Pyè ka di-nou fè : « Rèkonnèt an tchè a zòt kè Kris sé on Ségnè é kè i sen » (li 1 Pyè 3:15). Sa vé di osi kè fò-nou médité asi lèfètkè Jézikris sé Wa an nou é kè i ni onlo onlo pouvwa. Siwvwè ou ka santi-w istrésé lè ou k’ay palé on moun dè bon nouvèl-la, sonjé Wa an nou. Éséyé imajiné jan i ka gouvèné an syèl-la èvè tout sé milyon zanj-la ki ka lantouré-y la. Sonjé kè i ni « tout pouvwa an syèl-la é asi latè » é kè i ké èvè-w « touléjou, jiskatan fen a mond-la rivé » (Mat. 28:18-20). Pyè di-nou konsa kè ‘fò-nou toujou paré’ pou nou défann fwa an nou. Ès ou té’é enmé palé dè bon nouvèl-la adan travay a-w, lè ou lékòlc oben adan alé-é-vini a-w ? Si ou anvi fè sa, réfléchi alavans pou vwè a ki moman ou té’é pé fè sa. Aprésa, préparé sa ou ké di é mandé Jéova ba-w kouraj. Ou pé sèten kè i ké édé-w pou-w pa pè moun ankò (Akt 4:29).

« FÒ ZÒ NI ON LANMOU KI FÒ TOUBÒNMAN YONN POU LÒT »

9. On jou, Pyè pa aji èvè lanmou. Poukwa nou ka di sa ? (gadé imaj-la osi).

⁹ Pyè aprann kijan pou i té montré lézòt kè i enmé-yo. I té la lè Jézi di : « An ka ba-zòt on nouvo komandman : fò yonn enmé lòt ; menmjan an enmé-zòt, zòt osi fò yonn enmé lòt » (Jan 13:34). Men poutan, on jou, lèwvwè i touvé-y anba présyon, i arété manjé èvè frè é sè a-y ki pa té juif. Lè lapòt Pòl palé dè konpòwtasyon a Pyè, i di kè i té ka fè sinéma é kè i té ka aji kon on ipokrit (Gal. 2:11-14). Lè lapòt Pòl woupran Pyè, ès i aksèpté sa ? Wi. Sa jous sèvi-y lèson piskè adan sé 2 lèt-la i maké la, i montré kè non sèlman fò-nou enmé frè é sè an nou men fò-nou montré-yo kè nou enmé-yo osi.

10. Nou « ni on lanmou ki pa ipokrit » pou frè é sè an nou. Grasa kibiten nou ni lanmou-lasa ? (1 Pyè 1:22).

¹⁰ Lapòt Pyè di kè fò-nou ‘ni on lanmou ki pa ipokrit pou frè é sè an nou’ (li 1 Pyè 1:22). I di osi kè si nou ni lanmou-lasa, sé pas nou ka suiv tousa nou aprann adan « lavérité ». É adan Pawòl a Bondyé nou dékouvè kè « Bondyé pa ka fè préférans » (Akt 10:34, 35). Alò, si nou ka aji épi lanmou enki èvè sèwten moun adan lasanblé-la, an réyalité, nou pa ka suiv komandman a Jézi. Sé vré, menmjan ki Jézi, sa pé rivé kè nou antann-nou pibyen èvè sèwten moun ki èvè dòt moun (Jan 13:23 ; 20:2). Men Pyè ka fè-nou sonjé kè fò-nou fè éfò pou nou enmé toutmoun adan lasanblé-la, kivédi, fò-nou enmé tout frè é sè an nou pas yo sé fanmi an nou (1 Pyè 2:17).

11. Lè Pyè di « fò-zòt enmé-zòt fò toubònman, èvè tout tchè a zòt », ka i té vlé di pa la ?

¹¹ Pyè di-nou kè ‘fò yonn enmé lòt fò toubònman, èvè tout tchè a-y’. Adan vèwsé-lasa, lè Pyè di kè fò yonn enmé lòt « fò toubònman », i té vé di kè fò yonn enmé lòt, menm lèwvwè sa pa fasil. Pa ègzanp, vinvwè on frè oben on sè di-nou oben fè-nou on biten ki fè-nou mal. Pétèt prèmyé biten nou ké anvi fè, sé ké aji èvè-y kon i aji èvè nou olyé nou montré-y kè nou enmé-y. Men poutan, Jézi aprann Pyè kè lèwvwè nou ka vanjé-nou noumenm an nou sa pa ka fè Bondyé plézi (Jan 18:10, 11). Mi sa Pyè maké : « Pa rann lèmal pou lèmal, oben pa jiré pas yo jiré-zòt. Men okontrè, réponn èvè on bénédisyon » (1 Pyè 3:9). Siwvwè nou enmé frè é sè an nou fò toubònman, nou ké montré-nou janti èvè yo é nou ké kontinyé rèspèkté-yo menmsi yo fè-nou lapenn.

12. a) Lèwvwè nou enmé frè é sè an nou fò toubònman, ka sa ka pousé-nou a fè ? b) Dapré sa vidéo-la Nou ini : an-nou pwotéjé bèl kado-lasa ka montré, ka fò ou byen désidé a fè ?

¹² Adan 1^é lèt-la Pyè maké la, i di kè fò-nou ni « on lanmou ki fò toubònman ». On lanmou konsa, a pa déotwa péché i ka kouvè tousèl, men i « ka kouvè onpakèt péché » (1 Pyè 4:8). Kèlkè lanné avan, Jézi té di Pyè kijan sa enpòwtan kè yonn padonné lòt é pétèt Pyè té ka sonjé sa. Pyè té di Jézi kè on moun pé padonné ondòt moun « jiska 7 fwa », é pou-y, i té donan lèwvwè i té ka di sa. Men Jézi té èspliké-y kè fò i té padonné frè a-y « jiska 77 fwa », kivédi a pa on biten moun dwètèt konté (Mat. 18:21, 22). Si ou ka touvé kè pou apliké konsèy-lasa, sa on ti jan rèd, pa dékourajé-w. Délè, noutout ni dimal a padonné. Men aprézan, sa ki ka konté, sé kè ou fè tousa ou pé pou-w padonné frè a-w é pou-w wouvin byen èvè-yd.

SÉ ANSYEN-LA, PRAN SWEN A TWOUPO A BONDYÉ

13. Délè, poukwa sé ansyen-la pé ni dimal a touvé on tan pou ankourajé frè é sè a yo ?

¹³ Apré rézirèksyon a-y, Jézi di Pyè : « Pran swen a timouton an mwen » (Jan 21:16). Sèten Pyè pa jen oubliyé sé pawòl-lasa ! Si ou ansyen, ou sav kè sé pawòl-lasa, sé pou-w osi. Sé on gwo rèsponsabilité. Men pou on ansyen touvé tan pou fè travay-lasa, sa pé rèd toubònman. An réyalité, sa pou sé ansyen-la fè an prèmyé, sé ba fanmi a yo sa yo bizwen pou viv, montré chakmoun adan fanmi-la kè i enmé-y é édé fanmi a-y rété bon bon zanmi èvè Jéova. Anplisdisa, fò-yo pòté bon mannèv an prédikasyon, fò-yo préparé sé sijé-la é sé diskou-la yo ni la pou yo pé sa fè-yo an réinyon oben lèwvwè yo lasanblé. Ni sèwten ansyen osi ki ka fè pawti a sé komité pou fè lyannaj èvè sé lopital-la é èvè sèwvis lokal la pou dévlopé é konstwi. Sé ansyen-la, sé dé moun ki okipé toubònman !

14. Ola sé ansyen-la pé touvé fòs pou pran swen a twoupo a Bondyé ? (1 Pyè 5:1-4).

¹⁴ « Pran swen a twoupo a Bondyé ». Sé sé Pawòl-lasa Pyè maké pou sé ansyen-la ki té ka viv a épòk a-y la (li 1 Pyè 5:1-4). Si ou sé on ansyen, nou sav kè ou enmé frè é sè a-w é kè ou vé pran swen a yo. Men, pétèt délè ou ni tèlman biten a fè oben ou ka santi-w tèlman fatigé kè ou pa’a vwè kijan ou ké fè sa. Alò, ka ou pé fè ? Wouvè tchè a-w ba Jéova é di-y tousa ou ka rèsanti. Mi sa Pyè maké : « Si on moun ka sèvi lézòt, fò i konté asi fòs-la Bondyé ka bay la » (1 Pyè 4:11). Pétèt frè é sè a-w ka jwenn sèwten pwoblèm kè ponmoun pé’é pé réglé adan mond-lasa. Men sonjé kè Jézikris sé « chèf a sé bèwjé-la » é kè i pé édé-yo pibyen ki pondòt moun. I pé fè sa dépi jòdila é i ké pé fè sa adan nouvo mond-la osi. Sa Jéova vé, sé kè sé ansyen-la enmé frè é sè a yo, kè yo pran swen a yo é kè yo « vin dé ègzanp pou twoupo-la. »

15. Ka on ansyen ka fè pou pran swen a mouton a Jéova ? (gadé imaj-la osi).

¹⁵ William, on frè ki ansyen dépi onpakèt lanné, sav jan sa enpòwtan dè pran swen a twoupo a Jéova. Koumansé pandémi a Covid-19 la koumansé, li é sé ansyen-la ki adan lasanblé a-y la chèché a ni nouvèl a chakmoun ki adan gwoup a prédikasyon a yo é yo té ka fè sa chak simenn. Pou yo, sé té biten-la ki té pi enpòwtan la. William ka èspliké poukwa sa té enpòwtan konsa. Mi sa i ka di : « Ni onlo frè é sè ki tousèl akaz a yo, é afòs yo réfléchi asi tousa ki ka fèt, dé lidé négatif pé rantré an tèt a yo é pou sa sòti an lèspri a yo, sa pa mòl. » Lèwvwè on frè oben on sè ka jwenn difikilté, William ka pran tan kouté-y pou i byen konprann sa ki ka enkyété-y é sa i bizwen. Aprésa, i ka chèché adan piblikasyon an nou é adan sé vidéo-la ki anlè sit an nou ka ki té’é pé ankourajé frè a-y oben sè a-y. Mi sa i ka di : « Konnyéla, pa ni biten ki pi enpòwtan ki pran swen a twoupo a Jéova. Nou ka fè onlo éfò pou édé moun an téritwa-la konnèt Jéova, alò, fò-nou fè menm biten-la pou pran swen a mouton a Jéova é pou édé-yochak rété adan lavérité. »

LÉSÉ JÉOVA FIN FÒWMÉ-ZÒT

16. Kijan nou pé apliké sa nou aprann adan sé lèt-la Pyè maké la ?

¹⁶ Sé 2 lèt-la Pyè maké la pé aprann-nou onlo biten men sé enki déotwa biten nou ègzaminé. Pétèt ou vwè kè ou té’é pé vin pi filé adan on domenn. Pa ègzanp, ès ou té’é enmé médité pli souvan asi sé bénédisyon-la nouvo mond-la ké pòté pou nou la ? Ès sa ba-w anvi préché ba kolèg-travay a-w, oben ba kanmarad-lékòl a-w, oben adan alé-é-vini a-w ? Ès sa édé-w réfléchi pou vwè kijan ou té’é montré frè é sè a-w kè ou enmé-yo fò toubònman ? Sé ansyen-la, ès zò byen désidé a pran swen a mouton a Jéova ? Ès zò paré a fè sa èvè tout tchè a zòt é ès zò paré a fè sa èvè onlo balan ? Lè ou ka pran tan analizé-w konsa, fò ou gadé laréyalité anfas. Si ou fè sa, sèten ou ké vwè kè ou ni onlo travay a fè toujou adan sèwten domenn, men pa lésé sa dékourajé-w. « Ségnè-la bon » é i ké édé-w pwogrésé (1 Pyè 2:3). Mi garanti-lasa Pyè ka ban-nou : « Bondyé […] ké fin fòwmé-zòt limenm a-y. I ké fè-zòt vin solid, i ké fè-zòt vin fò, ayen pé’é pé déchouké-zòt » (1 Pyè 5:10).

17. Si nou pa’a lagé é si nou ka lésé Jéova fòwmé-nou, ki rékonpans nou ké ni ?

¹⁷ Odépa, Pyè té ni lenprésyon kè on moun kon-y pa té pé rété owa Jézi (Lik 5:8). Men konm Jéova é Jézi té ka soutyenn-li èvè onlo lanmou, i pa lagé é i kontinyé suiv Jézikri. Sé konsa yo pèwmèt-li « rantré volontyé adan wayòm étèwnèl a Ségnè é Sovè an nou, Jézikri » (2 Pyè 1:11). Mi on bèl rékonpans mi ! Menmjan ki Pyè, si ou pa’a lagé é si ou ka lésé Jéova fòwmé-w, i ké rékonpansé-w é ou ké viv pou touttan. Ou ké ‘atenn òbjèktif a fwa a-w : délivrans a-w’ (1 Pyè 1:9).