Vin pi bon zanmi èvè frè é sè an nou, sa bon ban nou !

1-2. Ki biten ki enpòwtan toubònman ba Jéova, é ka i ka mandé-nou fè ?

POU JÉOVA, jan-la nou ka aji èvè lézòt, sa enpòwtan toubònman. É Jézi anségné kè fò nou enmé pwochen an nou kon noumenm (Mat. 22:37-39). Sa vé di kè menm èvè moun ki pa ka sèvi Jéova, fò nou aji byen. Lè nou ka fè sa nou ka imité Bondyé, ki ‘ka fè solèy-la lévé asi moun ki méchan é asi moun ki bon, é ki ka fè lapli tonbé asi moun ki jis é asi moun ki pa jis’ (Mat. 5:45).

² Menmsi Jéova enmé toutmoun asi latè, moun i enmé menm, sé moun ki ka fè sa ki byen (Jan 14:21). É i vlé nou fè menm biten. Sé pousa i ka mandé-nou ni on « lanmou ki fò toubònman » pou frè é sè an nou, é i vlé osi nou ni on « lanmou ki plen tendrès » pou yo (1 Pyè 4:8 ; Wom. 12:10). Lanmou-lasa ka fè-nou sonjé jan yonn enmé lòt adan on fanmi oben jan 2 zanmi enmé-yo.

3. Ka pou nou fè pou lanmou an nou kontinyé grandi ?

³ Menmjan fò nou pran swen a plant an nou ki an jaden an nou pou yo kontinyé grandi, menmjan-la osi, fò nou kontinyé travay pou lanmou an nou pou frè é sè an nou vin pi fò. Sé pousa lapòt Pòl ba sé krétyen-la konsèy-lasa : « Kontinyé ni lanmou pou frè é sè a zòt » (Ébr. 13:1). Jéova vlé nou kontinyé travay pou nou ni lanmou pou frè é sè an nou. Adan awtik-lasa, nou ké vwè poukwa fò nou vin pi bon zanmi ankò èvè frè é sè an nou é kijan nou ké pé kontinyé fè sa.

POUKWA FÒ NOU VIN PI BON ZANMI ÈVÈ FRÈ É SÈ AN NOU

4. Sòm 133:1 ka di kè pèp a Bondyé soudé. Ka nou pé fè pou nou montré kè sa ni onlo valè pou nou ? (gadé sé imaj-la osi).

⁴ (Li Sòm 133:1.) Nou dakò èvè nonm-la ki maké Sòm 133:1 lè i di kè sa « bèl » é sa « agréyab » lèwvwè nou ni vré zanmi ki enmé Jéova. Pa ègzanp, on moun pé pasé douvan on bèl ti montangn touléjou é afòs i pasé douvan-y, i pa menm ka vwè bèltè a-y ankò. Menmjan-la, adan lasanblé-la, nou adan on bèl ti fanmi ki soudé é si nou pa fè atansyon, nou pé rivé a oubliyé sa. Nou ka vwè frè é sè an nou souvan é pétèt menm plizyè fwa adan on simenn. Kijan nou pé kontinyé enmé-yo ? Lanmou an nou pou frè é sè an nou ké kontinyé grandi si nou ka pran tan réfléchi asi jan yochak ni valè adan lasanblé-la é asi jan yochak ni valè ban nou.

5. Lè sèwten ka konstaté jan nou ni lanmou yonn pou lòt, ka sa ka fè-yo ?

⁵ Lè sèwten moun ka vin lasal pou prèmyé fwa, é kè yo ka vwè jan yonn enmé lòt, sa ka touché-yo onlo menm. É délè, tèlman lanmou-lasa ka touché-yo, yo ka sèten yo touvé lavérité. Mi sa Jézi di anrapò èvè sa : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:35). An-nou gadé sa ki rivé on jennmoun ki té ka étidyé Labib non a-y sé Chaithra. Lèwvwè yo envité-y vin lasanblé réjyonal, i aksèpté. Mi sa i di moun-la ki té ka étidyé Labib èvè-y la an fen a 1^é jouné-la : « Pap’an-mwen é manman-mwen po’o jen séré-mwen an 2 bra a yo. Men la, pannan lasanblé-la, 52 moun ja pran-mwen an 2 bra a yo alòskè an fè on jouné lasanblé tousèl. An ka santi kè Jéova ka sèvi èvè yo pou montré-mwen lanmou a-y. Yotout ka fè pawti a on bèl fanmi é an vé fè pawti a fanmi-lasa. » Chaithra kontinyé fè pwogré é i pran lèbatèm an 2024. Lè sé moun-la ki ka vin pou prèmyé fwa ka vwè jan nou ka aji byen, byensouvan sa ka ba-yo anvi sèvi Jéova (Mat. 5:16).

6. Lèwvwè nou ka rété bon zanmi èvè frè é sè an nou, poukwa nou pé di kè sa ka pwotéjé-nou ?

⁶ Lè nou ka fè ansòt pou nou bon zanmi èvè frè é sè an nou, sa pé pwotéjé-nou. Mi konsèy-lasa Pòl ba frè é sè a-y : « Fò yonn kontinyé ankourajé lòt chak jou, toutotan jouné-la ka diré, pou tèt a ponyonn adan zòt pa vin rèd akòz dè pouvwa-la péché-la ni asi moun pou kouyonné-yo » (Ébr. 3:13). Si délè nou dékourajé oben kè nou ka fè chimen kochi, Jéova pé fè ansòt pou on frè oben on sè vwè sa é kè i ban-nou èd-la nou bizwen la (Sòm 73:2, 17, 23). Lè yo ka ankourajé-nou konsa, sa ka fè-nou dibyen.

7. Poukwa nou pé di kè lanmou lyanné èvè linité ? (Kolosyen 3:13, 14).

⁷ Nou ka fè pawti a on gwoupmoun, é nouchak ka fè tousa nou pé pou montré lézòt kè nou enmé-yo. Lèwvwè nou ka fè sa, sa ka pwokiré-nou onlo byenfé (1 Jan 4:11). Pa ègzanp, davwa ni lanmou adan lasanblé-la, yonn ka sipòté lòt é sa ka édé-nou rété ini (li Kolosyen 3:13, 14 ; Éféz. 4:2-6). Lanmou-la é bon ti anbyans-la nou ka touvé adan lasanblé-la, nou pé’é jen touvé-yo adan pondòt gwoup asi latè.

FÒ YONN BA LÒT LONNÈ

8. Kijan Jéova ka édé-nou rété soudé èvè frè é sè an nou ?

⁸ Lèfètkè noutout soudé èvè frè é sè an nou ki toupatou asi latè, sé enki grasa Jéova. I ka rivé fè sa magré noutout enpawfè (1 Kor. 12:25). Labib ka di kè Jéova ‘ka anségné-nou pou yonn pé sa enmé lòt’ (1 Tés. 4:9). Sa vé di kè Jéova ka sèvi èvè Pawòl a-y pou di-nou ka nou bizwen ègzaktèman pou yonn pé sa bon zanmi èvè lòt. Nou pé lésé Jéova anségné-nou siwvwè nou ka pran tan étidyé tousa i ka di-nou adan Pawòl a-y é siwvwè nou ka mété-y an pratik adan vi an nou (Ébr. 4:12 ; Jak 1:25). É Témwen a Jéova ka travay rèd pou yo fè sa.

9. Kijan Women 12:9-13 ka édé-nou montré lézòt kè nou ka ba-yo lonnè ?

⁹ Kijan Pawòl a Bondyé ka édé-nou vin pi bon zanmi èvè frè é sè an nou ? An-nou li Women 12:9-13 é nou ké vwè ka Pòl di asi sa (li-y). Si ou byen gadé, vèwsé-la ka di : « Fò zò toujou prèmyé douvan lè sé pou yonn ba lòt lonnè ». Ka sa vé di ? Ében sa vé di kè fò nou chèché tout ti lokazyon pou nou aji èvè lézòt èvè on konpasyon ki plen tandrès. Nou pé fè sa dè diféran mannyè. Pa ègzanp, sé pé lè nou ka padonné-yo, lèwvwè nou ka akéyi-yo bra gran wouvè oben lèwvwè nou donan èvè yo (Éféz. 4:32). Nou pa bizwen atann kè frè é sè an nou vin vwè-nou pou nou vin bon zanmi èvè yo. Noumenm an nou pé ay vwè-yo. É siwvwè nou ka fè sa, nou ké vwè kijan sa Jézi di vré toubònman. Mi sa i di : « On moun ka pli kontan lè i ka bay ki lè i ka rèsèvwa » (Akt 20:35).

10. Kijan nou pé travay rèd pou nou montré lézòt kè nou ka ba-yo lonnè ? (gadé imaj-la osi).

¹⁰ Ni on biten ki entérésan ankò : lè nou ka gadé sé vèwsé-la, nou ka vwè kè jous apré kè Pòl di kè fò nou pran douvan pou nou ba lézòt lonnè, i ka di kè fò nou travay rèd é kè fò pa nou fè fengnan. On moun ki ka travay rèd ka pòté bon mannèv é lèwvwè yo ka bay on biten a fè, i ka fè travay-lasa byen menm. Pwovèb 3:27, 28 ka di : « Pa rèfizé fè moun dibyen lè yo bizwen sa, si janmen ou pé édé-yo. » Sa vé di kè lè nou ka vwè kè on moun bizwen on pal, tousuit nou ka éséyé vwè ka nou pé fè ba-y. Nou pa’a di kè nou ké fè sa plita oben nou pa’a mèt an tèt an nou kè ondòt moun ké fè sa ba-y (1 Jan 3:17, 18).

11. Ka ki pé édé-nou vin pi bon zanmi èvè frè é sè an nou ?

¹¹ Ondòt biten nou pé fè pou nou montré lézòt kè nou ka ba-yo lonnè, sé lèwvwè nou pa’a pèd tan pou nou padonné-yo lè yo fè on érè. Adan Éfézyen 4:26, mi sa nou ka li : « Penga solèy-la kouché é zò kòlè toujou. » Poukwa fò pa nou rété kòlè ? Adan vèwsé 27 la, yo ka di-nou kè si nou pa’a padonné, nou ‘ka lésé Dyab-la pran lanmen asi nou’. Adan Pawòl a-y, Jéova pa’a las di-nou kè fò yonn padonné lòt. Kolosyen 3:13 ka di : « Fò yonn kontinyé padonné lòt volontyé. » Pibèl biten nou pé fè pou nou vin bon zanmi èvè on moun, sé lèwvwè nou ka padonné-y lè i fè-nou on biten. Lè nou ka fè sa, nou ka ‘fè bon éfò pou kenbé inité a lèspri adan chenn a lapé, ki ka lyanné-nou’ (Éféz. 4:3). Alò sa ka montré byen kè lè nou ka padonné lézòt, nou ka fè ansòt pou pèp a Bondyé pé sa rété soudé é pou yonn anpé èvè lòt.

12. Kijan Jéova pé édé-nou padonné lézòt ?

¹² Délè, nou pé ni dimal a padonné on moun ki fè-nou on biten ki fè-nou mal. Men grasa lèspri sen a Bondyé, nou pé rivé fè sa. Jis apré kè Pòl di-nou kè « fò nou ni on lanmou ki plen tandrès » é kè « fò-nou travay rèd », mi sa i di : « Pòté bon mannèv grasa lèspri sen » (Women 12:11). Sa vé di kè lèspri sen pé édé-nou montré lézòt kè nou enmé-yo é i pé édé-nou padonné lézòt volontyé. Sé pousa fò nou sipliyé Jéova èvè tout tchè an nou pou i édé-nou (Lik 11:13).

« FÒ PA I NI DÉZÒD ANTRÈ ZÒT »

13. Ki biten ki té’é pé mèt dézòd antrè nou ?

¹³ Adan lasanblé-la, ni tout kalité moun kivédi moun ki sòti diféran koté (1 Tim. 2:3, 4). Kifè jan nou ka abiyé, jan nou ka pengné, sa nou ka pran pou santé an nou é jan nou ka anmizé-nou pa oblijé menm biten. Si nou pa’a fè atansyon, sé biten-lasa pé rivé a mèt dézòd adan lasanblé-la (Wom. 14:4 ; 1 Kor. 1:10). Men konm ‘Bondyé ka anségné-nou pou yonn pé sa enmé lòt’, nou ka fè atansyon pou nou pa tèsté èvè lézòt é fè-yo konprann kè chwa an nou pibon ki ta yo (Filip. 2:3).

14. Kijan fò nou aji èvè lézòt é pou ki rézon ?

¹⁴ Ondòt biten nou pé fè pou nou pa mèt dézòd adan lasanblé-la, sé toujou ankourajé lézòt (1 Tés. 5:11). Dépi déotwa tan, ni onlo frè é sè ki inaktif ki ka wouviré adan sé réinyon-la é onlo moun yo woté adan lasanblé-la ka wouviré owa Jéova. Nou vé akéyi-yo bra gran wouvè ! (2 Kor. 2:8). An-nou vwè sa ki rivé on sè ki viré lasal apré i rété inaktif pannan 10 an. Mi sa i ka di : « Toutmoun té ka souri ban mwen é yo té ka ban-mwen lanmen » (Akt 3:19). Lèfètkè yo akéyi-y èvè jantiyès, kijan sa aji asi-y ? Mi sa i ka di : « Sé té konsi Jéova té ka édé-mwen pou an ni jwa an tchè an mwen kon avan ». Si nou ka fè éfò pou nou ankourajé lézòt, Jézi ké pé itilizé-nou pou nou édé moun ki las é ki ka pòté on chaj ki lou (Mat. 11:28, 29).

15. Ka nou pé fè ankò pou lasanblé-la rété soudé ? (gadé imaj-la osi).

¹⁵ Ondòt jan nou pé travay pou lasanblé-la rété soudé, sé lè nou ka fè atansyon a sa nou ka di. Jòb 12:11 ka di : « Èskè zòrèy-la pa ka pran valè a sé pawòl-la, menmjan lang-la ka pran gou a manjé-la ? » An jénéral, on moun ki ka kuit manjé byen toujou ka gouté manjé-la avan i sèvi-y pou i sèten manjé-la agou a-y, menmjan-la fò nou touné lang an nou 7 fwa an bouch an nou avan nou palé (Sòm 141:3). An-nou toujou véyé-nou pou sa nou kay di toujou ankourajé lézòt é pou pawòl an nou ba lézòt fòs « pou nou ba sa ki ka tann sé pawòl-lasa on biten ki ka fè-yo dibyen » (Éféz. 4:29).

16. Kimoun an pawtikilyé ki dwètèt ni dé pawòl ki ka ankourajé lézòt ?

¹⁶ Fò sé mari-la é sé paran-la siwtou fè ansòt pou yo toujou ni dé ti pawòl ki ka ankourajé fanmi a yo (Kol. 3:19, 21 ; Tit 2:4). Sé menm biten pou sé ansyen-la. Konm yo sé dé bèwjé é kè yo ka okipé dè twoupo a Jéova, sa enpòwtan kè yo sé dé moun ki ka ankourajé lézòt osi (Iz. 32:1, 2 ; Gal. 6:1). Mi sa on pwovèb ki adan Labib ka di : « Lè on nonm ka di on pawòl a moman-la ki fo la, a pa ti bèl sa bèl ! » (Pwov. 15:23).

‘MONTRÉ ÈVÈ AKSYON A-W KÈ OU SENSÈ’

17. Kijan nou pé sèten kè lanmou an nou pou frè é sè an nou ka sòti anfon a tchè an nou ?

¹⁷ Lapòt Pòl ni lokazyon di kè « a pa yenki an bouch oben èvè bèl pawòl pou nou enmé, men sé èvè aksyon an nou kè nou ké montré kè lanmou an nou sensè » (1 Jan 3:18). Nou vé lanmou-la nou ni pou frè é sè an nou sòti anfon a tchè an nou. Kijan nou pé fè sa ? Ében pi nou ké pasé tan èvè frè é sè an nou, pi nou ké vin bon zanmi èvè yo é pi yonn ké enmé lòt fò. Alò fè ansòt pou pasé tan èvè frè é sè a-w, ki sé lè ou k’ay réinyon ki sé lè ou ka préché èvè yo. Pasé vwè-yo akaz a yo. Lè nou ka fè sa, nou ka montré kè ‘Bondyé ka anségné-nou pou yonn enmé lòt’ (1 Tés. 4:9). É si nou ka kontinyé fè sa, mi sa nou osi nou ké di : « A pa ti bèl sa bèl é a pa ti agréyab sa agréyab pou dé frè dè viv soudé ansanm-ansanm ! » (Sòm 133:1).