On pwomès ki sèten a san pou san !

1. Ki mésaj pwofèt Izayi ba sé Izraélit-la ?

POU palé dè Jéova, pwofèt Izayi sèvi èvè èksprésyon-lasa : « Bondyé a vérité-la ». Mo-la yo tradui la é ki bay « vérité » vé di « amèn » (Iz. 65:16, nòt). « Amèn » vlé di « sé konsa menm pou sa fèt » oben « asirésèten ». Adan Labib, lèwvwè yo ka sèvi èvè lèmo « amèn » anrapò èvè Jéova oben Jézi, sé pou bay lagaranti kè yo ka palé dè on biten ki vré. Alò, mésaj-la Izayi ba sé Izraélit-la sé té : Dépi ou vwè Jéova ka anonsé on biten, nou pé sèten kè sa ké fèt. Dayè Jéova montré sa lèwvwè i réyalizé tout sé pwomès-la i fè la é pa menm onsèl pa rété atè.

2. Poukwa nou pé kwè adan sa Jéova pwomèt-nou pou dèmen é a ki kèsyon nou ké réponn adan awtik-lasa ?

² Jéova pwomèt-nou bèl biten pou dèmen. Men ès nou pé fè sé pwomès-lasa konfyans a san pou san ? 800 lanné apré épòk a Izayi apépré, lapòt Pòl èspliké poukwa nou pé sèten kè pwomès a Bondyé ké toujou réyalizé. Mi sa i di : « Pa ni mwayen Bondyé manti » (Ébr. 6:18). Menmjan on pyé-mango pé pa bay zoranj, sé menmjan Jéova, Sous a vérité-la, pé pa manti. Sé pousa, nou pé fè tousa i ka di-nou konfyans a san pou san. Sa vé di kè nou pé ni konfyans adan tousa i pwomèt pou dèmen. Adan awtik-lasa nou ké ègzaminé sé kèsyon-lasa : Ka Jéova pwomèt i ké ban-nou dèmen ? É ki garanti i ka ban-nou kè pwomès-lasa ké réyalizé ?

KA JÉOVA PWOMÈT-NOU ?

3. a) Ki pwomès ki ni onlo valè pou tout sèwvitè a Bondyé ? (Révélasyon 21:3, 4). b) Kijan sèwten moun ka réyaji lèwvwè yo ka tann pwomès-lasa ?

³ Nou kay ègzaminé on pwomès ki ni onlo valè pou tout sèwvitè a Bondyé ki toupatou asi latè (li Révélasyon 21:3, 4). Jéova pwomèt kè on jou « lanmò pé ké la ankò ; pé ké tini ni dèy, ni kri, ni doulè ankò ». Sé vèwsé-lasa ka montré kijan lavi ké yé adan paradi-la. É onlo adan nou enmé sèvi èvè yo pou konsolé moun lè nou ka préché. Kijan sèwten adan yo ka réyaji lèwvwè yo ka tann pwomès-lasa ? Ni sa ki ka di : « Sa zò ka di la byen bèl, men an pa’a kwè sa ké fèt ! »

4. a) Lè Jéova pwomèt-nou paradi-la, ka i té ja konnèt anrapò èvè épòk an nou ? b) Kidòt biten Jéova ban-nou anplis dè pwomès-la i fè-nou la ?

⁴ Lèwvwè Jéova sèvi èvè lèspri sen a-y pou fè lapòt Jan maké pwomès-lasa, i té sav kè toupannan nou té’é ka préché bon nouvèl a Wayòm-la jòdila, nou té’é fè moun konnèt èspérans-lasa. Jéova té sav osi kè té’é ni onlo moun ki té’é ni dimal a kwè adan sé pwomès-la i té fè la pou dèmen (Iz. 42:9 ; 60:2 ; 2 Kor. 4:3, 4). Alò, kijan nou pé édé sé moun-la pou yo sèten kè sé bénédisyon-la yo ka palé la an Révélasyon 21:3, 4 ké réyalizé ? É ka nou pé fè pou noumenm an nou pi sèten dè sa osi ? Jéova pa enki ban-nou sé bèl pwomès-lasa, men i ban-nou plizyè rézon osi pou nou pé sa fè sé pwomès-lasa konfyans. Ki rézon ésa ?

JÉOVA KA BAN-NOU LAGARANTI KÈ PWOMÈS A-Y KÉ RÉYALIZÉ

5. Nou pé kwè adan pwomès-la Bondyé fè-nou la pou plizyè rézon. Kilès é ola nou ka touvé-yo ?

⁵ Apré yo palé dè pwomès a paradi-la adan liv a Larévélasyon, yo ka ban-nou plizyè rézon pou nou kwè adan pwomès-lasa adan sé vèwsé-la ki ka vin apré la. Mi sa nou ka li : « Sila ki sizé anlè twòn-la di konsa : “Gadé ! Konnyéla la, an ka fè tout biten vin nèf.” I di osi : “Maké sa, pas zò pé ni konfyans adan sé pawòl-lasa é yo vré.” É i di-mwen : “Yo réyalizé ! Sé mwen ki Alfa-la é sé mwen ki Oméga-la, koumansman-la é fen-la” » (Rév. 21:5, 6a).

6. Sa nou ka li an Révélasyon 21:5, 6 ka édé-nou kwè pi fò ankò adan pwomès-la Bondyé fè-nou la. Poukwa nou ka di sa ?

⁶ Poukwa nou pé di kè sé pawòl-lasa ka édé-nou kwè pli fò ankò adan pwomès a Bondyé ? Mi sa liv-la Révélation. Dénouement ka èspliké : « Sé konsi Jéova té ka ba moun ki fidèl on lak-a-tè é sé limenm ki ka signé dokiman-lasa. Grasa dokiman-lasa, yo ni dwa bénéfisyé dè bon biten Bondyé pwomèt pou dèmenb. » Nou ka touvé pwomès-lasa an Révélasyon 21:3, 4. Men apré, adan sé vèwsé 5 é 6 la, sé konsi Jéova té ka signé pwomès-lasa pou ban-nou lagaranti kè pwomès a-y ké réyalizé poudèbon. Jéova ban-nou lagaranti kè nou pé fè-y konfyans. An-nou pran on ti tan pou nou gadé sa pibyen.

7. Kimoun ki ka koumansé palé an vèwsé 5 la é poukwa sa èspésyal ?

⁷ Mi sa nou ka li jis avan garanti-la Jéova ka ban-nou la : « Sila ki sizé anlè twòn-la di konsa » (Rév. 21:5a). Sé pawòl-lasa vréman èspésyal, pas adan vèwsé-lasa sé Jéova limenm ki ka palé é i ka fè sa enki 3 fwa adan liv a Larévélasyon. A pa on zanj ki bay garanti-lasa ni Jézi, men sé Jéova limenm a-y ! Sa ka montré jan nou pé fè sé pawòl-la i di la apré konfyans. Poukwa nou ka di sa ? Paskè Jéova « pé pa manti » (Tit 1:2). Alò, nou pé kwè sé pawòl-la nou ka touvé adan Révélasyon 21:5, 6 a san pou san.

« GADÉ ! AN KA FÈ TOUT BITEN VIN NÈF »

8. Asirésèten pwomès a Jéova ké réyalizé. Ka i ka di pou montré sa ? (Izayi 46:10).

⁸ Aprésa, mi sa Jéova di : « Gadé ! » (Rév. 21:5). Sé on mo grèk ki bay èksprésyon-lasa é nou ka touvé-y onlo fwa adan liv a Larévélasyon. Dapré on liv ki ka palé dè Labib, yo ka sèvi èvè mo-lasa « pou ankourajé moun-la ki ka li la a fè atansyon a sa yo ké di apréc ». Men ka Bondyé ka di apré ? Mi sa i ka di : « An ka fè tout biten vin nèf. » Jéova ké fè sé chanjman-lasa talè. Men konm i sèten i ké réyalizé pwomès a-y, i ka montré sa adan jan-la i ka palé la. I ka palé konsi i té ja ka fè sé chanjman-lasa (li Izayi 46:10).

9. a) Lè Jéova ka di « an ka fè tout biten vin nèf », an réyalité ni 2 biten i kay fè. Kilès ? b) Ka ki ké rivé syèl-la é tè-la ki ka ègzisté alèkilé ?

⁹ An-nou gadé ondòt mòso a vèwsé-lasa, sila ki ka vin apré la : « An ka fè tout biten vin nèf. » Ka sa vé di ? Adan chapit-lasa, yo ka sèvi èvè èksprésyon-lasa pou palé dè 2 biten diféran kè Jéova ké fè : 1) Jéova ké détwi vyé mond-lasa é 2) i ké woumèt on nouvo mond anplas. Adan Révélasyon 21:1, mi sa nou ka li : « Ansyen syèl-la é ansyen tè-la té disparèt. » Lè yo ka di « ansyen syèl-la », sé pou palé dè sé gouvènman-la ki anba dominasyon a Dyab-la é anba dominasyon a sé démon-la (Mat. 4:8, 9 ; 1 Jan 5:19). Adan Labib, lè yo ka palé dè « tè-la », délè sé pou palé dè sé moun-la ki ka viv asi-y la (Jén. 11:1, nòt an fransé ; Dét. 32:1). Sa vé di kè « ansyen tè-la » sé sé moun-la ki ka viv asi latè jòdijou é ki méchan. Jéova té’é pé ranjé déotwa biten adan syèl-la é asi tè-la ki la la aprézan. Men a pa sa i ké fè. Non, i k’ay pi lwen ki sa. I ké ranplasé ansyen syèl-la é ansyen tè-la èvè on nouvo syèl é on nouvo tè kivédi on nouvo gouvènman ki ké gouvèné asi dé moun ki jis.

10. Ki biten Jéova ké fè wouvin nèf ?

¹⁰ An Révélasyon 21:5, Jéova ka di : « An ka fè tout biten vin nèf. » Men kijan i ké fè sa ankò ? Jéova ké pasé men a-y asi latè é asi lézimen pou géri-yo é lèwvwè i ké fè sa, tout biten é toutmoun ké vin pawfè. Kon Izayi té ja anonsé, Jéova ké fè tout latè vin on bèl jaden toubònman kon Jadendédèn-la té yé avan. Jéova ké géri-nouchak. A moman-lasa, sé konsi nouchak ké vin nèf. I ké géri moun ki ka bwété, moun ki avèg, moun ki soud é i ké fè moun ki mò wouvin a lavi (Iz. 25:8 ; 35:1-7).

« ZÒ PÉ NI KONFYANS ADAN SÉ PAWÒL-LASA É YO VRÉ, YO RÉYALIZÉ ! »

11. Ka Jéova mandé Jan fè é poukwa i mandé-y fè sa ?

¹¹ Ka nou ka touvé ankò adan garanti-la Bondyé ban-nou la ? Mi sa Jéova di Jan : « Maké sa, pas zò pé ni konfyans adan sé pawòl-lasa é yo vré » (Rév. 21:5). Jéova pa enki di Jan maké sé pawòl-lasa. I di-y pou ki rézon fò i té fè sa osi. Dayè mi sa i di apré : « Pas zò pé ni konfyans adan sé pawòl-lasa é yo vré. » Érèzman Jan kouté Jéova é i maké sa i té di-y la. Grasa sa, nou pé li pwomès-la Jéova ban-nou la ki ka konsèwné paradi-la é nou pé pran on ti tan pou réfléchi asi tout sé bèl biten-la ki ka atann-nou la.

12. Poukwa Jéova pé di : « Yo réyalizé ! » ?

¹² Ka Bondyé ka di aprésa ? « Yo réyalizé ! » (Rév. 21:6). Aprézan, Jéova ka palé konsi tousa i pwomèt anrapò èvè paradi-la té ja réyalizé. Si ni on moun ki pé palé konsa, sé Jéova, pas pa ni ayen ni ponmoun ki pé anpéché-y réyalizé pwojé a-y. Men Jéova ka di ondòt biten ki ka rann-nou sèten kè pwomès a-y ké réyalizé poudèbon. Ki biten ésa ?

« SÉ MWEN KI ALFA-LA É SÉ MWEN KI OMÉGA-LA »

13. Lèwvwè Jéova ka di kè sé-y ki sé ‘Alfa-la é Oméga-la’, ka i vé di pa la ?

¹³ Kon nou vwè-y pli ho, adan sé vizyon-la Jan vwè la, Jéova ka palé limenm a-y 3 fwa (Rév. 1:8 ; 21:5, 6 ; 22:13). É chakfwa i ka palé i ka di menm biten-la : « Sé mwen ki Alfa-la é sé mwen ki Oméga-la. » Alfa-la, sé prèmyé lèt a lalfabé grèk la, é oméga-la, sé dènyé-la. Lèwvwè Jéova ka di konsa kè i sé ‘Alfa-la é kè i sé Oméga-la’, sé pou montré kè lèwvwè i ka koumansé on biten i toujou k’ay an bout a-y.

14. a) Bay on ègzanp ki ka montré a ki moman Jéova di « Alfa » é a ki moman i ké di « Oméga ». b) Ki garanti nou ka touvé adan Jénèz 2:1-3 ?

¹⁴ Apré Jéova té kréyé Adan é Èv, i di ki pwojé i té ni pou limanité é pou latè. Mi sa Bib-la ka di : « Bondyé béni-yo é i di-yo konsa : “Fè timoun, é miltipliyé-zòt ; ranpli latè, é dominé asi-y” » (Jén. 1:28). A moman-lasa, sé konsi Jéova té di « Alfa ». I té sav ègzaktèman sa i té vé fè : on jou, i té’é fè tout latè touné an paradi, i té’é plen-y èvè désandan a Adan é Èv, yotout té’é pawfè é yotout té’é ka kouté-y. Jou-la sa ké fèt la sé ké konsi Jéova ké di « Oméga ». Anplisdisa, lèwvwè Jéova fin kréyé syèl-la, tè-la é tousa ki anlè a-y, Jéova bay on garanti. Nou ka touvé-y an Jénèz 2:1-3 (li-y). Adan sé vèwsé-lasa, Jéova ka di kè sétyèm jou-la sakré. Ka sa té vlé di ? Sa té vé di kè i chwazi jou-lasa pou i réyalizé pwojé a-y pou limanité. Lè i di kè sétyèm jou-la sakré, sé on garanti i bay, pas sé konsi i té di kè tout pwojé a-y ké réyalizé a san pou san lè sétyèm jou-lasa ké fin.

15. Pétèt Satan té ka pansé kè i té pé anpéché Bondyé réyalizé pwojé a-y pou lézimen. Poukwa ?

¹⁵ Jou-la Adan é Èv ba Bondyé do la, yo vin dé moun ki ka fè péché é sé konsa tout désandan a yo vin touvé-yo anba jouk a péché-la é anba jouk a lanmò (Wom. 5:12). Bondyé té vé ranpli latè èvè moun ki pawfè é ki ka obéyi-y, men akòz dè sitiyasyon-lasa, i té ka sanm sa Satan té rivé anpéché-y réyalizé pwojé a-y. Sé té konsi, akòz dè Satan, Jéova pa té’é janmé pé di « Oméga ». Pétèt Satan té mèt an tèt a-y kè Jéova pa té’é pé tchenn pwomès a-y. Pétèt i pansé kè Jéova té’é tchouyé Adan é Èv é kè i té’é kréyé ondòt misyé é ondòt madanm ki té’é pawfè pou fè sa i té prévwa odépa. Men si Bondyé té fè sa, Dyab-la té’é di kè i sé on mantè. Poukwa ? Pas, kon sa maké an Jénèz 1:28, Jéova té di Adan é Èv kè latè té’é plen èvè désandan a yo.

16. Pétèt Satan mèt an tèt a-y kè i ké pé di Jéova kè i échwé. Poukwa nou ka di sa ?

¹⁶ Pétèt kè Satan té ka pansé kè Jéova té’é pran ondòt désizyon ankò. Ki désizyon ésa ? Pétèt i té mèt an tèt a-y kè Jéova té’é lésé Adan é Èv fè timoun, men kè sé timoun-lasa pa té’é jen vin pawfè (Ékl. 7:20 ; Wom. 3:23). É si sé konsa sa té’é pasé, sèten Satan té’é di kè Jéova échwé é kè pwojé a-y pa réyalizé pas asi latè pa té’é jen ni moun ki pawfè.

17. Kijan Jéova réglé pwoblèm-la Satan, Adan é Èv mèt la lèwvwè yo ba-y do, é ki bon biten sa Jéova prévwa ké menné ? (gadé imaj-la osi).

¹⁷ Lè Satan, Adan é Èv ba Jéova do, sa kréyé on pwoblèm. Men Satan dwèt rété èstèbèkwè lè i vwè kijan Jéova réglé pwoblèm-lasa (Sòm 92:5). Jéova lésé Adan é Èv fè timoun, é lèfètkè i aji konsa, sa montré kè sa i di la té vré. I pa manti. I montré kè pa ni ponmoun ni pon biten ki pé anpéché-y réyalizé pwojé a-y. I kontinyé travay pou pwojé-la i té prévwa la odépa té réyalizé é i chwazi yonn adan « pitit a pitit » a Adan é Èv pou sové tout désandan a yo ki té’é obéyi-y (Jén. 3:15 ; 22:18). É désandan-lasa té’é ofè vi a-y an sakrifis pou sové limanité. Satan pa té ka atann-li a sa ! Poukwa ? Pas ranson-la bazé asi on lanmou ki pa ka chèché pwòp entéré a-y (Mat. 20:28 ; Jan 3:16). É Satan pa ni sa andidan a-y menm pas i égoyis ! Men grasa ranson-la, ki biten ki pé fèt ? Ében lèwvwè sé 1 000 an-la ké fin, tout latè ké on paradi é i ké plen èvè désandan a Adan é Èv ki ké pawfè é ki ké ka obéyi Jéova. Sé ègzaktèman sa Jéova té prévwa fè odépa. Jou-la sa ké fèt la, sé konsi Jéova ké di « Oméga ».

KA NOU PÉ FÈ POU NOU KWÈ PI FÒ ANKÒ ADAN PWOMÈS A PARADI-LA ?

18. Jéova ban-nou 3 garanti. Kilès ? (gadé osi ti karé-la « Twa rézon ki ka fè-nou kwè adan pwomès a Jéova »).

¹⁸ Ni moun ki pa sèten kè latè ké vin on paradi, kijan nou pé sèvi èvè sa nou sòti étidyé la pou édé sé moun-lasa ? Prèmyèwman, sé Jéova limenm ki fè pwomès-lasa. Mi sa liv a Larévélasyon ka di : « Sila ki sizé anlè twòn-la di konsa : “Gadé ! Konnyéla la, an ka fè tout biten vin nèf.” » Jéova ni sajès-la ki fo la, puisans-la ki fo la é i anvi réyalizé pwomès a-y. Dézyèmman, tèlman Jéova sèten kè i ké réyalizé pwomès a-y, pou-y, sé konsi i té ja réyalizé-y. Mi sa i di pou montré sa : « Zò pé ni konfyans adan sé pawòl-lasa é yo vré. […] Yo réyalizé ! » Twazyèmman, lèwvwè Jéova ka koumansé on biten, i toujou k’ay an bout a biten-lasa, é sé pousa i di : « Sé mwen ki Alfa-la é sé mwen ki Oméga-la. » Jéova ké montré kè an réyalité, moun-la ki manti la é ki échwé la, sé Satan.

19. Jéova pwomèt-nou paradi la. Men lèwvwè sé moun-la ni dimal a kwè sa, ka ou pé fè ?

¹⁹ Sonjé kè pi ou ka palé moun dè sa Jéova di pou yo sèten kè sa i pwomèt ké réyalizé, pi ou ké fè Jéova konfyans. Alò pwochen kou, lè ou ké li Révélasyon 21:4 ba on moun é kè i ké di-w konsa kè « sé blag a mas ! », ou té’é pé li sé vèwsé 5 é 6 la ba-y é ou té’é pé èspliké-y sa yo vé di. Ka ou di ? Ou té’é pé montré-y osi kè Jéova pa enki fè-nou on pwomès men i ban-nou on garanti èvè-y osi. Sé konsi sé signé i té signé pwomès-lasa (Iz. 65:16).