AWTIK POU ÉTIDYÉ 25
Sé ansyen-la, pran ègzanp asi Jédéon
« An pé’é ni asé tan mwen rakonté sa Jédéon […] fè » (ÉBR. 11:32).
KANTIK 124 Soyons fidèles
ON TI LIDÉ ASI SA NOU KAY VWÈa
1. Dapré 1 Pyè 5:2, ki bèl privilèj sé ansyen-la ni ?
JÉOVA ba sé ansyen-la on misyon : pran swen a mouton a-y ki ni onlo valè ba-y. Sé nonm-lasa, ki toujou paré a édé lézòt, ka chéri privilèj-la yo ni la dè sèvi frè é sè a yo. É yo ka travay rèd pou yo sé dé ‘bèwjé ki ka pran swen a mouton a Jéova byen konm i fo’ (Jér. 23:4 ; li 1 Pyè 5:2). A pa ti kontan nou kontan ni dé frè konsa adan lasanblé an nou !
2. Ki difikilté sèwten ansyen ka jwenn ?
2 Toupannan sé ansyen-la ka asimé rèsponsabilité a yo, yo ka jwenn onlo difikilté. Pa ègzanp, sa ka mandé onlo travay pou pran swen a on lasanblé. Tony, on ansyen ki ka rété o Zétazini, té oblijé aprann a rèkonnèt limit a-y. I ka èspliké : « Lè pandémi a COVID-19 la koumansé, toujou té ni biten a fè anplis pou òwganizé sé réinyon-la é prédikasyon-la. Alò an éséyé suiv. Men pli an té ka fè, pli té ni biten a fè. Anfinaldikont, an té tèlman okipé kè an pa té ka pran asé tan pou li Labib, étidyé pèwsonèlman é priyé. » Ilir, on frè ki ka rété o Kosovo, jwenn ondòt kalté difikilté. Lèwvwè vin ni lagè koté-la i té ka rété la, i té ni dimal a obéyi a sa lòwganizasyon té ka mandé. Mi sa i ka di : « Lè filyal-la voyé-mwen édé sé frè é sè la on koté ki té danjéré, sa mèt kouraj an mwen aléprèv. An té pè é sé enstriksyon-la té ka sanm sa yo té rèd a mèt an pratik. » Tim, on misyonè yo voyé an Azi, té ka touvé kè sa té rèd dè fè tousa i té ni a fè chakjou. I ka di : « Délè, an té two krazé pou okipé dè sé frè é sè la. » Ka ki pé édé sé ansyen-la ki ka jwenn menm kalté difikilté ki yo ?
3. Ka ègzanp a Jédéon pé aprann-noutout ?
3 Ègzanp a Jédéon, ki té jij, pé aprann sé ansyen-la onlo biten (Ébr. 6:12 ; 11:32). Non sèlman i té ka pwotéjé pèp a Bondyé, men i té ka pran swen a-y osi (Jij 2:16 ; 1 Kron. 17:6). Kon Jédéon, Bondyé chwazi sé ansyen-la pou pran swen a pèp a-y pannan on épòk ki difisil toubònman (Akt 20:28 ; 2 Tim. 3:1). Modèsti a Jédéon, imilité a-y é obéyisans a-y pé aprann-noutout onlo biten. Toupannan i té ka akonpli misyon a-y, i jwenn onlo sitiyasyon ki mèt andirans a-y aléprèv. Ki nou ansyen, ki nou pa ansyen, nou pé aprann a ni plis rèkonésans pou ansyen an nou. Nou pé édé sé frè-lasa ki ka travay rèd é ki ka pran swen an nou adan lasanblé-la (Ébr. 13:17).
LÈ ON SITIYASYON KA MÈT MODÈSTI A-W É IMILITÉ A-W ALÉPRÈV
4. Kijan Jédéon montré kè i té ni modèsti é imilité ?
4 Jédéon té on moun ki té ni modèsti é imilitéb. Lè zanj a Jéova di Jédéon kè yo té chwazi-y pou sové Izrayèl anba men a sé Madyanit-la ki té puisan toubònman, mi sa Jédéon réponn èvè onlo imilité : « Klan an mwen sé-y ki pi piti adan tribi a Manasé, é mwen, an sé sila ki ni mwens valè adan fanmi a pap’an mwen » (Jij 6:15). I pa té ka santi-y alahotè pou akonpli misyon-lasa men Jéova té sav sa i té pé fè. Grasa èd a Jéova, Jédéon réyisi akonpli misyon a-y.
5. Ki sitiyasyon ki pé mèt modèsti é imilité a on ansyen aléprèv ?
5 Sé ansyen-la ka fè tousa yo pé pou yo aji èvè imilité é modèsti adan tout kalté sitiyasyon (Mich. 6:8 ; Akt 20:18, 19). Yo pa ka blagé parapòt a kapasité a yo oben parapòt a sa yo rivé fè é yo pa ka pansé kè yo pa vo ayen nonplis lè yo ka fè érè. Men dépawfwa on ansyen pé jwenn sitiyasyon ki ka mèt imilité a-y é modèsti a-y aléprèv. Pa ègzanp, on ansyen ka aksèpté onlo rèsponsabilité é aprésa i ni dimal a rivé about a tousa i ni a fè. Oben on ansyen jéré on biten é swa yo ka félisité-y swa yo ka kritiké-y parapòt a sa. Kijan ègzanp a Jédéon pé édé sé ansyen-la adan dé sitiyasyon konsa ?
Kon Jédéon, on ansyen ka aji èvè modèsti lèwvwè i ka mandé lézòt on pal ; sé pé pou òwganizé témwagnaj piblik-la èvè prézantwa-la pa ègzanp (gadé paragraf 6 la).
6. Ka modèsti a Jédéon pé aprann sé ansyen-la ? (gadé imaj-la osi).
6 Mandé pou yo édé-w. On moun ki ni modèsti ka rèkonnèt pwòp limit a-y. Jédéon té ni modèsti pas i té ka mandé dòt moun édé-y (Jij 6:27, 35 ; 7:24). On ansyen ki ni sajès ka aji menmjan-la. Talè la nou palé dè Tony. Mi sa i ka èspliké : « Parapòt a jan-la yo lévé-mwen la, an té ni labitid aksèpté plis travay ki sa an té kapab fè. Alò an désidé palé dè lamodèsti adan étid familyal an nou é an mandé madanm an mwen kijan i té ka vwè-mwen adan domenn-lasa. An wouvwè osi vidéo-la Comme Jésus, formons les autres, faisons-leur confiance et rendons-les capables, ki disponib asi jw.org ». Tony koumansé mandé dòt moun ba-y on pal adan sa i té ni a fè. Ka sa bay ? Tony ka di : « Travay a lasanblé-la ka fèt é an ni plis tan pou konsolidé lanmityé an mwen èvè Jéova. »
7. Kijan sé ansyen-la pé imité Jédéon lè yo ka kritiké-yo ? (Jak 3:13).
7 Pa fè kòlè si on moun ka kritiké-w. Ondòt sitiyasyon ki pé mèt sé ansyen-la aléprèv sé lè yo ka kritiké-yo. Ègzanp a Jédéon pé édé-yo adan ka-lasa osi. Konm i té sav i té enpawfè, lè sé boug Éfrayim la kritiké-y, i réponn-yo èvè dousè (Jij 8:1-3). Jédéon pa fè kòlè. I montré i té ni imilité lè i kouté-yo palé dè sa ki té ka enkyété-yo, é i palé ba-yo jantiman, kifè sa kalmé-yo. On ansyen ki ni sajès ka imité ègzanp a Jédéon lè i ka pran tan kouté é lè i ka réponn èvè dousè lè yo ka kritiké-y (li Jak 3:13). Grasa sa, i ka travay pou lapé adan lasanblé-la.
8. Kijan sé ansyen-la dwèt réyaji lè yo ka félisité-yo ? Bay on ègzanp.
8 Ba Jéova tout sé louwanj-la. Lè yo félisité Jédéon pas i té gangné sé Madyanit-la, i ba Jéova tout glwa-la (Jij 8:22, 23). Kijan sé ansyen-la pé imité Jédéon ? Yo pé ba Jéova louwanj pou sa i ka pèwmèt-yo fè (1 Kor. 4:6, 7). Pa ègzanp, si yo ka félisité on ansyen pas kò a-y bon pou anségné lézòt, i pé di moun-la kè sé Pawòl a Bondyé ki ka anségné-nou oben kè sé òwganizasyon a Jéova ki ka fòwmé-nou. Fò sé ansyen-la mandé-yo dè tanzantan si yo ka anségné on mannyè ki ka onoré Jéova, oben si yo ka chèché a fè moun vwè-yo. An-nou vwè sa ki rivé on ansyen non a-y sé Timothy. Lè yo té sòti nonmé-y ansyen, Timothy té enmé fè diskou. Mi sa i ka di : « An té ka koumansé diskou an mwen èvè granjan dè fraz é an té ka sèvi èvè granjan dè ègzanp. Souvantfwa yo té ka félisité-mwen pou sa. Malérèzman, sa té ka plis atiré atansyon a sé moun-la asi mwen ki asi Labib oben asi Jéova. » Piti-a-piti, Timothy vwè kè sa té nésésè kè i chanjé mannyè i té ka anségné pou évité kè lézòt pòté-y anlè (Pwov. 27:21). Ka sa bay ? Mi sa i ka èspliké : « Aprézan, lè frè é sè ka vin owa an mwen pou di-mwen mèsi, yo ka di-mwen jan diskou an mwen édé-yo fasadé èvè on pwoblèm, andiré on éprèv, oben rapwoché-yo dè Jéova. An ni plis jwa lè an ka tann sé komantè-lasa ki lè yo té ka félisité-mwen ni kèlkètan dè sa. »
LÈ ON SITIYASYON KA MÈT OBÉYISANS A-W É KOURAJ A-W ALÉPRÈV
Jédéon kouté Jéova : i woté moun adan lawmé a-y pou lawmé-la té vin pi piti é i lésé enki 300 sòlda adan pas yo montré kè yo té véyatif (gadé paragraf 9 la).
9. Ki sitiyasyon ki mèt obéyisans a Jédéon é kouraj a-y aléprèv ? (gadé imaj-la ki anlè po a jounal-la).
9 Apré yo nonmé Jédéon jij, i jwenn sitiyasyon ki mèt obéyisans a-y é kouraj a-y aléprèv. I rèsèvwa on misyon ki té danjéré toubònman. Fò i té détwi lotèl-la kè pap’a-y té fè pou adoré Baal (Jij 6:25, 26). Plita Jédéon sanblé on lawmé é aprésa, Jéova ba-y lòd dè diminyé kantité sòlda ki té adan lawmé-lasa a 2 rèpriz (Jij 7:2-7). Finalman, Jéova mandé-y ataké kan a sé lènmi-la anmitan lannuit (Jij 7:9-11).
10. Ki sitiyasyon ki pé mèt obéyisans a on ansyen aléprèv ?
10 Sé ansyen-la ‘dwèt paré pou yo obéyi’ (Jak 3:17). On ansyen ki paré pou obéyi ka soumèt-li fasilman a sa Lézékriti ka di é a dirèksyon-la kè òwganizasyon a Bondyé ka bay la. Lè i ka fè sa, i ka ba lézòt on bèl ègzanp. É poutan, i pé jwenn sitiyasyon ki ka mèt obéyisans a-y aléprèv. Pa ègzanp, i pé ni dimal a suiv dirèksyon-la i ka rèsèvwa la. Délè, i pé ka mandé-y si sèwten enstriksyon vréman ka tchenn kont dè sitiyasyon-la oben si yo vréman saj. Oben yo pé konfyé-y on rèsponsabilité é akòz dè sa yo pé rivé a arété-y. Kijan sé ansyen-la pé imité obéyisans a Jédéon adan dé sitiyasyon konsa ?
11. Ka ki pé édé sé ansyen-la obéyi ?
11 Kouté sé enstriksyon-la byen é apliké-yo. Bondyé di Jédéon kijan pou i té détwi lotèl a pap’a-y, i di-y ola pou i té konstwi on nouvo lotèl pou Jéova é ki zannimo pou i té sakrifyé asi-y. Jédéon pa kritiké sé enstriksyon-la i té rèsèvwa la, i fè ègzaktèman sa Jéova té mandé-y fè. Jòdijou, òwganizasyon a Jéova ka ba sé ansyen-la enstriksyon pou sékirité an nou é pou édé-nou rété toupré Jéova. Pou fè sa, i ka sèvi èvè lèt, èvè kominikasyon é èvè dòt mwayen ankò. Nou enmé ansyen an nou pas yo ka suiv fidèlman dirèksyon a lòwganizasyon. Sa ka fè tout lasanblé-la dibyen (Sòm 119:112).
12. Ka ki pé édé sé ansyen-la apliké Ébré 13:17 lè òwganizasyon a Jéova ka mandé-yo fè sèwten biten ondòt jan ?
12 Fò ou paré a fè chanjman. Sonjé kè Jéova té mandé Jédéon woté plis ki 99 % a sé moun-la ki té adan lawmé a-y la (Jij 7:8). I dwèt mandé-y : « Ès chanjman-lasa vréman nésésè ? Ès sa ké maché ? » Magrésa Jédéon obéyi. Jòdijou, sé ansyen-la ka imité Jédéon lèwvwè yo ka obéyi lè lòwganizasyon ka mandé-yo fè sèwten chanjman (li Ébré 13:17). Pa ègzanp, an 2014, Komité santral la chanjé mannyè i ka finansé sé pwojé-la pou konstwi sal di Wayòm é sal a lasanblé (2 Kor. 8:12-14). Avan, lòwganizasyon té ka prété sé lasanblé lokal la lajan pou konstwi é aprésa, sé lasanblé-lasa té ka ranbousé-y. Men alè, lòwganizasyon ka sanblé ofrann a sé lasanblé-la ki toupatou asi latè pou konstwi batiman dé koté sa nésésè menmsi sé tibwen lajan tousèl sé lasanblé-lasa pé bay pou pawtisipé adan pwojé-lasa. Lè José vin dékouvè chanjman-lasa, i mandé-y si sa té’é maché. É mi sa i di an tchè a-y : « Yo pé’é jen konstwi pon sal di Wayòm. A pa konsa sa ka fèt kotésit. » Ka ki édé José soutyenn chanjman-lasa ? Mi sa i di : « Pawòl a Pwovèb 3:5, 6 fè-mwen sonjé kè fò-mwen fè Jéova konfyans. É sé rézilta-la té èstraòwdinè ! Non sèlman nou ka konstwi plis sal di Wayòm, men anplis, nou ka aprann sèvi èvè don an nou pou toutmoun vin a menm nivo-la kèlkèswa péyi-la. »
Menm sé koté-la yo ka entèwdi aktivité an nou, nou pé kontinyé préché èvè kouraj (gadé paragraf 13 la).
13. a) Dè kibiten Jédéon té sèten ? b) Kijan sé ansyen-la pé imité-y ? (gadé imaj-la osi).
13 Fè volonté a Jéova èvè kouraj. Jédéon obéyi Jéova magré i té pè é magré misyon a-y té danjéré (Jij 9:17). Lè Jéova rasiré-y, Jédéon vin sèten a san pou san kè Bondyé té’é soutyenn-li toupannan i té ka pwotéjé pèp a-y. Sé ansyen-la ki ka rété dé koté yo ka entèwdi aktivité an nou ka imité Jédéon. Yo prèmyé douvan adan sé réinyon-la é adan prédikasyon-la magré yo pé arété-yo, magré yo pé entérojé-yo, magré yo pé fè-yo pèd travay a yo oben ba-yo kouc. Pannan gwo tribilasyon-la, sé ansyen-la ké bizwen ni kouraj pou obéyi sé enstriksyon-la yo ké rèsèvwa la menmsi sa danjéré. Pa ègzanp, pétèt yo ké rèsèvwa enstriksyon anrapò èvè kijan pou nou préché on mésaj a jijman ki ké sanm lagrèl. Oben, pétèt osi kè sé enstriksyon-lasa ké anrapò èvè sa pou nou fè pou nou rété vivan lè Gòg dè Magòg ké ataké-nou (Ézék. 38:18 ; Rév. 16:21).
LÈ ON SITIYASYON KA MÈT ANDIRANS A-W ALÉPRÈV
14. Ki sitiyasyon ki mèt andirans a Jédéon aléprèv ?
14 Fò Jédéon té travay rèd toubònman pou akonpli misyon-la i té ni la antankè jij. Lèwvwè Jédéon té ka goumé èvè sé Madyanit-la pannan lannuit, sé Madyanit-la chapé kò a yo. Men Jédéon kouri dèyè do a yo dépi ravin a Jézréèl pou rivé jous an Jouden-la. Koté-lasa dwèt té lantouré èvè onlo pyébwa (Jij 7:22). Ès Jédéon arété douvan Jouden-la ? Non ! Menmsi yo té las, li é sé 300 nonm-la ki té èvè-y la travèsé é yo kontinyé kouri dèyè yo. Finalman, yo ratrapé sé Madyanit-la é yo gangné-yo (Jij 8:4-12).
15. Ka ki pé mèt andirans a on ansyen aléprèv ?
15 Difètkè i ka pòté bon mannèv pou pran swen a lasanblé a-y é pou pran swen a fanmi a-y, on ansyen pé ka santi-y krazé toubònman. Adan dé sitiyasyon konsa, kijan sé ansyen-la pé imité Jédéon ?
Grasa fòs-la Jéova ka ba-yo la, ansyen ki plen lanmou ka rivé ankourajé frè é sè a yo ki bizwen rékonfò (gadé sé paragraf 16 é 17 la).
16-17. a) Ka ki édé Jédéon andiré ? b) Dè kibiten sé ansyen-la pé sèten ? (Izayi 40:28-31 ; gadé imaj-la osi).
16 Fò ou sèten kè Jéova ké rann-vou fò. Jédéon té sèten kè Jéova té’é ba-y fòs é Jéova pa désèvwa-y (Jij 6:14, 34). On jou, Jédéon é lawmé a-y té ka kouri apyé dèyè 2 wa Madyanit alòskè sé wa-lasa dwèt té asi do a chamo (Jij 8:12, 21). Men Bondyé édé sé Izraélit-la trapé-yo é gangné konba-la. Menmjan-la, sé ansyen-la pé konté asi Jéova ki « pa’a jen las, é ki pa jen about-souf ». I ké ba-yo fòs lèwvwè yo ké bizwen (li Izayi 40:28-31).
17 An-nou palé dè Matthew ki adan on komité pou fè lyannaj èvè sé lopital-la. Ka ki ka édé-y andiré ? Mi sa i ka èspliké : « A plizyè rèpriz, an santi kè Jéova ban-mwen fòs-la Filipyen 4:13 ka palé la. Souvantfwa, lè an té ka santi kè an té two krazé é kè an pa té pé ankò, an té ka mèt jounou atè é an té ka sipliyé Bondyé pou i té ban-mwen énèwji-la an té bizwen la. An té ka mandé-y édé-mwen osi pou an té byen désidé a soutyenn frè é sè an mwen. Adan sé moman-lasa, an santi kè lèspri sen a Jéova té ka ban-mwen fòs é té ka édé-mwen andiré. » Kon Jédéon, ansyen an nou ka travay rèd toubònman pou pran swen a twoupo a Jéova menmsi sa pa toujou fasil. On biten ki sèten, sé kè fò-yo rèkonnèt limit a yo é fò-yo mèt an tèt a yo kè a pa toutlè yo ké rivé fè tousa yo té’é anvi fè. Men yo pé sèten ké Jéova ké tann lè yo ké kriyé-y é i ké ba-yo fòs pou yo andiré (Sòm 116:1 ; Filip. 2:13).
18. Kijan sé ansyen-la pé imité Jédéon ?
18 Ègzanp a Jédéon pé aprann sé ansyen-la onlo biten toubònman. Fò sé ansyen-la ni modèsti é imilité, non sèlman parapòt a kantité travay yo ka aksèpté fè men osi lè lézòt ka félisité-yo oben ka kritiké-yo. Konm fen a mond-la ka vin vit, sé alè pou sé ansyen-la montré-yo obéyisan é pou yo ni kouraj. É fò-yo sèten kè kèlkèswa difikilté yo ka jwenn, Bondyé pé ba-yo fòs. Asirésèten, nou ka chéri sé bèwjé-lasa ki ka travay rèd é nou ka ‘kontinyé enmé dé nonm kon yo èvè onlo tandrès’ (Filip. 2:29).
KANTIK 120 Imitons la douceur du Christ
a Jéova chwazi Jédéon pou gidé é pou pwotéjé pèp a-y pannan on péryòd ki té difisil toubònman adan istwa a pèp a Izrayèl. Jédéon akonpli misyon-lasa fidèlman pannan plis ki 40 an. Men i jwenn onlo difikilté. Nou ké vwè kijan ègzanp a-y pé édé sé ansyen-la jòdijou lèwvwè yo ka jwenn éprèv.
b Modèsti é imilité lyanné toubònman. Nou ka montré kè nou ni modèsti lèwvwè nou ka vwè-nou noumenm an nou on mannyè ki rézonab é lè nou ka rèkonnèt kè ni dé biten kè nou pé pa fè. Nou ka montré nou ni imilité lèwvwè nou ka rèspèkté lézòt é kè nou ka vwè-yo kon moun ki ni plis valè ki nou (Filip. 2:3). Byensouvan, on moun ki ni modèsti ni imilité osi.
c Gadé awtik-la « Kontinyé sèvi Jéova, menm lè yo ka entèwdi aktivité an nou » adan niméwo a juiyé 2019 a Tou dè Gad la paj 10 é 11, paragraf 10 a 13.