Ka nou pé fè pou yonn kontinyé enmé lòt fò ?

1-2. a) Poukwa lapòt Pòl di konsa kè lanmou sé kalité-la « ki pi enpòwtan la » ? b) Ka nou ké ègzaminé adan awtik-lasa ?

APRÉ lapòt Pòl palé dè lafwa, lèspérans, é lanmou, i di kè « sila ki pi enpòwtan la pawmi yo, sé lanmou » (1 Kor. 13:13). Poukwa i di sa ? Talè, lèwvwè tout pwomès a Bondyé ké réyalizé adan nouvo mond-la, nou pé’é bizwen ni fwa ankò adan sé pwomès-lasa pas sé biten-la nou té ka èspéré la ké ja réyalizé. Men fò-nou ké kontinyé enmé Jéova é kontinyé enmé lézòt. An réyalité, lanmou-la nou ni pou yo la pé’é jen fin grandi.

² Konm fò yonn ké toujou aji épi lanmou èvè lòt, nou ké ègzaminé 3 kèsyon adan awtik-lasa : 1) Poukwa fò yonn enmé lòt ? 2) Kijan yonn pé aji èvè lanmou épi lòt ? 3) Ka nou pé fè pou yonn toujou kontinyé enmé lòt fò ?

POUKWA FÒ YONN ENMÉ LÒT ?

3. Pou ki rézon fò yonn enmé lòt ?

³ Poukwa sa enpòwtan kè yonn enmé lòt ? Lè yonn ka aji èvè lanmou épi lòt, sa ka montré kè nou sé disip a Kris vréman. Mi sa Jézi di apòt a-y : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:35). Anplisdisa, lè yonn ka aji épi lanmou èvè lòt, sa ka édé-nou rété soudé. Pòl di kè lanmou-lasa « sé on lyannaj ki pawfè pou ini moun » (Kol. 3:14). Men sa enpòwtan kè nou enmé lézòt pou ondòt rézon ankò. Mi sa lapòt Jan maké ba frè é sè a-y : « On moun ki enmé Bondyé dwètèt enmé frè a-y osi » (1 Jan 4:21). An réyalité, lè yonn ka aji épi lanmou èvè lòt, nou ka montré kè nou enmé Jéova.

4-5. Kijan lanmou-la nou ni la pou Jéova lyanné èvè lanmou-la nou ni la pou frè é sè an nou ? Bay on ègzanp.

⁴ Kijan lanmou-la nou ni la pou Jéova lyanné èvè lanmou-la nou ni la pou frè é sè an nou ? Pou nou byen konprann lidé-lasa, an-nou palé dè jan tchè an nou lyanné èvè rèstan a kò an nou. Lè on mèdsen ka tchenbé ponnyèt an nou pou vwè kijan tchè an nou ka bat, i ka rivé sav si tchè an nou malad oben si i pa malad. Ka ègzanp-lasa ka aprann-nou ?

⁵ Lè on mèdsen ka gadé pou vwè kijan tchè an nou ka bat, i ka rivé sav si tchè an nou ka fonksyonné byen konm i fo. Menmjan-la, nou pé sav si nou enmé Bondyé fò lè nou ka gadé jan nou enmé frè é sè an nou. Si nou ka rann-nou kont kè nou pa enmé frè é sè an nou fò kon avan, sa vé di kè nou pa enmé Bondyé fò kon avan osi. Pawkont, siwvwè nou ka aji épi lanmou èvè frè é sè an nou toutlè, sa ké montré kè nou enmé Bondyé fò.

6. Si nou pa enmé frè é sè an nou fò kon avan, poukwa fò sa enkyété-nou ? (1 Jan 4:7-9, 11).

⁶ Siwvwè nou pa enmé frè é sè an nou fò kon avan, fò sa enkyété-nou. Poukwa nou ka di sa ? Pas sa pé vé di kè nou andanjé é kè nou pé rivé a pèd lanmityé an nou èvè Jéova. Lapòt Jan ka di sa on mannyè ki klè lè i ka di : « On moun ki pa enmé frè a-y, kè i ka vwè, pé pa enmé Bondyé, kè i pa ka vwè » (1 Jan 4:20). Ka sa ka aprann-nou ? Nou ké fè Jéova plézi enki siwvwè nou « ni lanmou yonn pou lòt » (li 1 Jan 4:7-9, 11).

KIJAN YONN PÉ AJI ÈVÈ LANMOU ÉPI LÒT ?

7-8. Ka nou pé fè pou montré frè é sè an nou kè nou enmé-yo ?

⁷ Jéova ka di-nou kè « fò yonn enmé lòt » é i ka di-nou sa a plizyè rèpriz (Jan 15:12, 17 ; Wom. 13:8 ; 1 Tés. 4:9; 1 Pyè 1:22 ; 1 Jan 4:11). Men lanmou sé on kalité ki andidan tchè an nou é ponmoun pé pa vwè sa ki ka pasé adan tchè an nou. Alò kijan nou pé montré frè é sè an nou kè nou enmé-yo ? Nou pé montré-yo sa adan sa nou ka di é adan sa nou ka fè.

⁸ Nou pé montré frè é sè an nou kè nou enmé-yo plizyè fason diféran. Mi déotwa ègzanp Labib ka ban-nou : « fò yonn di lòt lavérité » (Zak. 8:16), « fò yonn anpé èvè lòt » (Mawk 9:50), « fò zò toujou prèmyé douvan lè sé pou yonn onoré lòt » (Wom. 12:10), « fò yonn akéyi lòt byen » (Wom. 15:7), « fò yonn kontinyé padonné lòt volontyé » (Kol. 3:13), « fò yonn kontinyé édé lòt pòté sa ki two lou ba-y » (Gal. 6:2), « fò yonn kontinyé konsolé lòt » (1 Tés. 4:18), « fò yonn kontinyé fòwtifyé lòt » (1 Tés. 5:11), é « fò yonn priyé pou lòt » (Jak 5:16).

9. Poukwa lè nou ka konsolé lézòt sé on bon mwayen pou nou montré-yo kè nou enmé-yo ? (gadé imaj-la osi).

⁹ Nou sòti vwè diféran mannyè nou pé montré lézòt kè nou enmé-yo. Aprézan an-nou arété-nou asi yonn adan yo. Pòl di : « Fò yonn kontinyé konsolé lòt. » Poukwa nou pé di kè lè nou ka konsolé lézòt sé on bon mwayen pou montré-yo kè nou enmé-yo ? Dapré on liv ki ka palé dè Labibb, mo-la Pòl itilizé la é ki bay « konsolé » vé di « rété owa on moun pou ankourajé-y toupannan i anba on éprèv ki rèd ». Sa vé di kè lè nou ka konsolé on frè oben on sè ki ka jwenn on bout rèd, sé konsi nou ka lévé-y atè-la é nou ka édé-y pou i kontinyé maché asi chimen a lavi. É chakfwa nou ka konsolé-y, nou ka montré-y kè nou enmé-y (2 Kor. 7:6, 7, 13).

10. Ki lyannaj ki ni ant konpasyon é konsolasyon ?

¹⁰ Lè nou ka konsolé on moun é lè nou ni konpasyon an tchè an nou, sa lyanné. Poukwa nou ka di sa ? Pas lè on moun ni konpasyon, i ka anvi konsolé lézòt é i ka anvi fè on biten pou soulajé-yo. Donk pou nou pé sa konsolé on moun, prèmyé biten pou nou ni pou-y sé konpasyon. Lapòt Pòl ka montré ki lyannaj ki ni ant konpasyon a Jéova é konsolasyon-la i ka bay la. Mi sa i ka di asi Jéova : « Papa-la ki ka pran penn an nou èvè tandrès é Dyé a tout konsolasyon la » (2 Kor. 1:3). Lè Pòl ka di « pran penn an nou èvè tandrès », sé pou palé dè konpasyon kè on moun pé rèsanti. Donk, yo ka di kè Jéova sé Papa-la ki ka pran penn an nou èvè tandrès, kivédi sé adan-y kalité-lasa ka sòti, pas i ni onlo konpasyon pou moun. É lèfètkè i ni konpasyon, sé sa ki ka pousé-y « konsolé-nou adan tout éprèv an nou » (2 Kor. 1:4). Lèwvwè on moun swèf é kè i ka bwè on dlo byen frèch ki sòti adan on sous, sa ka wouba-y fòs. Sé konsa osi Jéova ka wouban-nou fòs é kè i ka konsolé-nou lèwvwè nou an détrès. Men kijan nou pé fè pou nou ni konpasyon pou lézòt é kijan nou pé konsolé-yo kon Jéova ka fè ? On biten nou pé fè, sé fè ansòt pou nou ni sèwten kalité adan tchè an nou é sé kalité-lasa ké pousé-nou a konsolé lézòt tou natirèlman. Men ki kalité ésa ?

11. Kon Kolosyen 3:12 é 1 Pyè 3:8 ka montré, ki kalité fò-nou ni pou nou kontinyé montré frè é sè an nou kè nou enmé-yo é pou nou kontinyé konsolé-yo ?

¹¹ Fò yonn kontinyé enmé lòt é fò yonn « kontinyé konsolé lòt » touléjou Bondyé fè jou. Men ka ki ké édé-nou fè sa ? Pa ègzanp, fò-nou pran penn a yo, fò nou aji èvè lanmou é èvè bonté épi yo (li Kolosyen 3:12 ; 1 Pyè 3:8). Kijan sé kalité-lasa ké édé-nou ? Lè nou ni konpasyon pou frè é sè an nou é kè nou anvi pran swen a yo vréman, sa ka ban-nou anvi konsolé-yo toubònman lèwvwè yo ka soufè. Mi sa Jézi èspliké : « Pas sa ki ka sòti adan bouch a on moun ka montré sa ki andidan tchè a-y. » É mi sa i di apré : « On moun ki bon ka woté bon biten adan bon biten ki séré andidan a-y » (Mat. 12:34, 35). Sa vréman enpòwtan kè nou montré frè é sè an nou kè nou enmé-yo lè nou ka konsolé-yo.

KA NOU PÉ FÈ POU NOU KONTINYÉ ENMÉ FRÈ É SÈ AN NOU FÒ ?

12. a) Poukwa sa enpòwtan kè nou montré-nou véyatif ? b) A ki kèsyon nou ké réponn alèla ?

¹² Bondyé vé kè ‘yonn kontinyé enmé lòt’, é sé sa noutout vé kontinyé fè osi (1 Jan 4:7). Men on biten pou nou pa jen oubliyé, sé kè Jézi té ja di kè ‘lanmou a lamajorité a sé moun-la té’é rèfwadi’ (Mat. 24:12). Lè Jézi di sa, i pa té vé di kè lamajorité a sé disip-la té’é arété aji épi lanmou yonn èvè lòt. Men adan mond-lasa, yonn pa ka aji èvè lanmou épi lòt. Alò, fò-nou rété véyatif pou nou pa lésé konpòwtasyon a sé moun-lasa détenn asi nou. Sé pousa, sa enpòwtan kè nou réponn a kèsyon-lasa : kijan nou pé sav si nou enmé frè é sè an nou fò ?

13. Ka ki pé édé-nou sav si lanmou an nou pou frè é sè an nou fò ?

¹³ Pou nou sav si nou enmé frè é sè an nou fò toubònman, fò-nou analizé-nou pou nou vwè jan nou ka réyaji adan sèwten sitiyasyon (2 Kor. 8:8). Pa ègzanp, lapòt Pyè palé dè on sitiyasyon konsa lèwvwè i di : « Plis ki pondòt biten, fò zò ni on lanmou ki fò toubònman yonn pou lòt, pas lanmou ka kouvè onpakèt péché » (1 Pyè 4:8). Donk, lèwvwè frè é sè an nou ka fè on érè oben kè yo ka fè on biten ki ka fè-nou mal, mannyè nou ka réyaji pé édé-nou sav si nou enmé-yo fò toubònman.

14. Dapré 1 Pyè 4:8, ki kalté lanmou pou nou ni pou frè é sè an nou ? Bay on ti èsplikasyon.

¹⁴ An-nou pran on ti tan pou ègzaminé sé pawòl-la Pyè di la. 1^é mòso a vèwsé 8 la ka montré ki kalité lanmou yonn dwètèt ni pou lòt : « on lanmou ki fò toubònman ». Mo-la Pyè sèvi èvè-y la é ki bay « fò toubònman » vé di « wouvè tout grandè a-y ». 2^èm mòso a vèwsé-la, li, ka montré kijan nou ké aji lèwvwè nou ni on lanmou ki fò toubònman pou frè é sè an nou. Lanmou-lasa ké édé-nou kouvè péché a frè é sè an nou. Sé konsidiré lanmou an nou té on mòso twèl ki ni lastik adan kè nou ka kenbé èvè 2 men an nou é kè nou ka wouvè tout grandè a-y. Nou ka halé chak koté a twèl-la pou kouvè péché a moun. Men a pa on ti péché oben dé ti péché tousèl i ka kouvè men i ka kouvè « onpakèt péché ». Adan vèwsé-lasa, lè yo ka sèvi èvè lèmo « kouvè », sé pou di padonné. Menmjan on mòso twèl pé kouvè on tach, sé konsa lanmou an nou ka kouvè défo a frè é sè an nou é érè a yo.

15. Si nou enmé frè é sè an nou fò, ka nou ké rivé fè ? (Kolosyen 3:13).

¹⁵ Fò lanmou-la nou ni la pou frè é sè an nou pousé-nou a padonné-yo, é fò-nou fè sa menm lèwvwè sa difisil toubònman (li Kolosyen 3:13). Lè nou ka rivé fè sa, sa ka montré kè nou enmé frè é sè an nou onlo toubònman é kè nou vé fè Jéova plézi. Ki dòt biten ki pé édé-nou pou nou padonné lézòt lèwvwè yo ka fè érè é pou nou pa lésé mwenn ti biten yo ka fè fè-nou fè kòlè ?

16-17. Lèwvwè on frè oben on sè fè on biten ki fè-nou mal, ki dòt biten nou pé fè pou pasé asi sa ? Bay on ègzanp (gadé imaj-la osi).

¹⁶ Konsantré-w asi bon biten frè é sè a-w ka fè é pa rété asi mové biten yo ka fè. An-nou pran on ègzanp. Imajiné kè ou adan on ti fèt èvè frè é sè a-w. Zò pasé on bèl moman toubònman é avan zò rantré akaz a zòt, ou ka pran on ti foto. Konm ou pa sèten kè foto-lasa byen sòti, ou ka pran dézòt ankò. Kifè, ou ka touvé-w èvè 3 foto a gwoup-la. Men ou ka rann-vou kont kè asi on foto, ni on frè ki pa’a souri. Ka ou ké fè èvè foto-lasa ? Ou ké woté foto-la asi aparèy a-w pas asi sé dézòt la tout moun-la ka souri é jous frè-la ka souri osi.

¹⁷ Nou pé konparé sé foto-la nou désidé gadé la èvè sé biten-la nou ka chwazi dè pa oubliyé la. An jénéral, nou ka sonjé bèl moman nou ka pasé èvè frè é sè an nou. Men imajiné kè on jou, on frè oben on sè ka di-nou oben ka fè-nou on biten ki pa tèlman janti. Ès nou ké kontinyé sonjé sa ki pasé ? Nou pé éséyé woté sa an mémwa an nou menmjan nou ka woté on foto ki pa bon adan aparèy an nou (Pwov. 19:11 ; Éféz. 4:32). Anplisdisa, pou kantité bon moman nou ja pasé èvè frè an nou oben èvè sè an nou é kè nou ni adan mémwa an nou, a pa ti biten-lasa nou ké ni dimal a woté adan mémwa an nou. Sa nou vé kontinyé sonjé, sé sé bèl ti moman-la nou pasé la èvè frè é sè an nou é nou vé ba-yo onlo valè.

POUKWA SÉ JÒDILA POU YONN ENMÉ LÒT PLIS KI A PONDÒT MOMAN ?

18. Ki lidé enpòwtan nou vwè adan awtik-lasa ?

¹⁸ Poukwa nou vé kontinyé enmé frè é sè an nou fò ? Pas, kon nou vwè, lè nou ka montré frè é sè an nou kè nou enmé-yo, nou ka montré Jéova kè nou enmé-y osi. Kijan pou nou montré frè é sè an nou kè nou enmé-yo ? On mannyè nou pé fè sa, sé lè nou ka konsolé-yo. ‘Yonn ké kontinyé konsolé lòt’ si yonn ni konpasyon pou lòt. É kijan nou pé kontinyé enmé frè é sè an nou fò ? Sé lè nou ka padonné-yo menm lèwvwè sa pa fasil.

19. Jòdijou poukwa sa enpòwtan kè yonn montré lòt kè i enmé-y ?

¹⁹ Jòdijou poukwa sa enpòwtan kè yonn montré lòt kè i enmé-y ? Mi sa Pyè ka di-nou anrapò èvè sa : « Tout biten toupré fin. [Alò], fò zò ni on lanmou ki fò toubònman yonn pou lòt » (1 Pyè 4:7, 8). Talè mond méchan lasa kay bout. Ka ki ké fèt apré ? Mi sa Jézi té anonsé anrapò èvè disip a-y : « Tout sé nasyon-la ké hay-zòt akòz dè non an mwen » (Mat. 24:9). Pou nou pé sa rété fidèl menmsi mond-lasa hay-nou, fò-nou rété soudé. Si nou enmé frè é sè an nou, Satan pé’é pé séparé-nou yonn dè lòt pas lanmou « sé on lyannaj ki pawfè pou ini moun » (Kol. 3:14 ; Filip. 2:1, 2).