AWTIK POU ÉTIDYÉ 51
Sa ou ka èspéré pou dèmen ké réyalizé
« Èspérans-la pa ka désèvwa ponmoun » (WOM. 5:5).
KANTIK 142 Nou ka tchenbé fò adan èspwa an nou
ON TI LIDÉ ASI SA NOU KAY VWÈa
1. Poukwa nou pé di kè èspérans-la Abraam té ni la té bazé asi on biten ki solid ?
JÉOVA pwomèt Abraam, zanmi a-y, kè tout sé nasyon-la asi latè ké risivwè on bénédisyon grasa gason a-y (Jén. 15:5 ; 22:18). Abraam té sèten a san pou san kè pwomès-lasa té’é réyalizé pas i té ni onlo fwa. Lè i té ni 100 an é kè madanm a-y té ni 90 an, yo po’o té ni on tigason (Jén. 21:1-7). Poutan, mi sa Labib ka di : « Èspérans a [Abraam] pèwmèt-li ni fwa kè i té’é vin papa a onlo nasyon, kon sa té anonsé » (Wom. 4:18). É kon nou sav, sa Abraam té ka èspéré la réyalizé. I fin pa ni tigason-la i té ka atann la : Izaak. Poukwa Abraam té sèten Bondyé té’é tchenn pwomès a-y ?
2. Poukwa Abraam té sèten kè pwomès a Jéova té’é réyalizé ?
2 Konm i té konnèt Jéova byen menm, i té « sèten a san pou san kè sa Bondyé té pwomèt » té’é réyalizé (Wom. 4:21). Bondyé té kontan-y é i konsidéré kè i té jis grasa fwa a-y (Jak 2:23). Kon Women 4:18 ka montré, fwa a Abraam é èspérans a-y té lyanné. Konnyéla, an-nou ègzaminé sé prèmyé vèwsé-la nou ka touvé la an Women chapit 5 pou nou vwè ka lapòt Pòl di asi èspérans an nou.
3. Ki biten Pòl kay édé-nou konprann anrapò èvè èspérans an nou ?
3 Pòl èspliké poukwa nou pé sèten kè ‘èspérans-la nou ni la pé ké désèvwa-nou’ (Wom. 5:5). Anplisdisa, i édé-nou konprann ka nou pé fè pou nou pi sèten ankò kè sa nou ka èspéré la ké réyalizé. Toupannan nou ka ègzaminé sa Pòl di an Women 5:1-5, pran on ti tan pou réfléchi asi sa voumenm a-w ja viv. Sèten ou ké rann-vou kont kè piti-a-piti, ou vin pi sèten kè sé biten-la ou ka èspéré la ké réyalizé. Nou ké vwè osi kijan ou pé fè fwa-la ou ni la adan èspérans a-w vin pi fò. Men pou koumansé, an-nou palé dè bèl èspérans-la nou ni la. Sé dè èspérans-lasa Pòl té ka palé é i di kè èspérans-lasa pé ké désèvwa-nou.
NOU NI ON BÈL ÈSPÉRANS
4. Ka Women 5:1, 2 ka èspliké-nou ?
4 (Li Women 5:1, 2.) Pòl maké sé pawòl-lasa pou lasanblé a Wòm. Frè é sè a lasanblé-lasa té aprann konnèt Jéova é Jézi, yo té ka montré kè yo té ni fwa adan yo é yo vin krétyen. Alò Jéova té « déklaré kè [yo] sé dé moun ki jis pas [yo té] ni lafwa » é i té voyé lèspri sen a-y asi yo pou yo té vin wen. Sé konsa yo vin ni on bèl èspérans é yo té pé sèten kè sa yo té ka èspéré la té’é réyalizé.
5. Ki èspérans sé krétyen wen la ni ?
5 Plita, Pòl maké on lèt ba sé krétyen wen la ki té ka rété Éfèz la. I palé-yo dè èspérans-la Bondyé ba-yo la é i di-yo kè « i séré la antankè éritaj pou sé sen-la » (Éféz. 1:18). I di sé Kolosyen-la osi ola èspérans a yo té’é réyalizé. I di-yo kè ‘yo mèt èspérans a yo dè koté ba yo an syèl-la’ (Kol. 1:4, 5). Alò sé krétyen wen la ni lèspwa kè yo ké résisité pou yo viv pou touttan an syèl-la, é sé koté-lasa yo ké gouvèné èvè Kris (1 Tés. 4:13-17 ; Rév. 20:6).
Frè Franz di kijan sé krétyen wen la sèten kè sa yo ka èspéré la ké réyalizé (gadé paragraf 6 la).
6. Ka on frè ki wen di anrapò èvè èspérans a-y ?
6 Sé krétyen wen la enmé èspérans a yo toubònman. Frè Frederick Franz sé yonn adan yo é i èspliké sa i té ka rèsanti parapòt a èspérans a-y. Mi sa i di : « Èspérans an nou sèten a san pou san ; i ké réyalizé, é nouchak ki ka fè pawti a sé 144 000 la ké risivwè sa Bondyé pwomèt-nou. É rékonpans an nou ké lontan pi bèl ki tousa nou pé imajiné. » An 1991, sa té ja ka fè bon enpé lanné frè Franz té ka sèvi Jéova é i té fidèl a-y. Mi sa i di : « Nou ka kontinyé ba èspérans an nou onlo valè. […] Pi nou ka atann kè i réyalizé, é pi i ni valè pou nou. Sa vo lapenn kè nou atann-li menmsi fò nou ké atann pannan on milyon lanné ankò. Aprézan, èspérans-lasa ni plis valè pou mwen ki avan é i po’o té jen ni tousa valè pou mwen. »
7-8. Ki bèl èspérans lamajorité a sèwvitè a Jéova ni ? (Women 8:20, 21).
7 Lamajorité a sé moun-la ki ka adoré Jéova jòdila ni ondòt èspérans. Sé èspérans-lasa Abraam té ni osi : viv pou touttan asi latè anba dirèksyon a wayòm a Bondyé (Ébr. 11:8-10, 13). Pòl palé dè sé bon biten-la moun ki ni èspérans-lasa ké trapé (li Women 8:20, 21). Prèmyé fwa ou tann palé dè sa Labib ka pwomèt-nou pou dèmen, ki biten ou té pi présé vwè ? Ès sé té jou-la ou té’é vin pawfè la, kivédi jou-la ou té’é sòti anba jouk a péché-la ? Oben ès ou santi tchè a-w ka bat lè ou vin aprann kè moun ou enmé é ki mò ké résisité é kè yo ké viv adan on paradi asi latè ? Antouka, ou rivé konprann kè grasa ‘èspérans-la’, ou ni onlo bèl biten ki ka atann-vou.
8 Ki nou ni lèspwa dè viv pou touttan an syèl-la, ki nou ni lèspwa dè viv pou touttan asi latè, nou ni on bèl èspérans é i ka ban-nou tchè-kontan. Anplisdisa, nou pé fè ansòt pou nou pi sèten ankò kè sa nou ka èspéré la ké réyalizé. Pòl èspliké ka ki pé édé-nou fè sa. An-nou vwè ka i maké asi sa. Konsa nou ké vin pi sèten kè sa nou ka èspéré la ké réyalizé.
FWA-LA NOU NI LA ADAN ÈSPÉRANS AN NOU PÉ VIN PI FÒ
Fò tout sé krétyen-la atann-yo a jwenn éprèv (gadé sé paragraf 9 é 10 la).
9-10. Kon ègzanp a Pòl ka montré, a ki biten fò sé krétyen-la atann-yo ? (Women 5:3 ; gadé sé imaj-la osi).
9 (Li Women 5:3.) Pòl èspliké kè lèwvwè nou ka jwenn on éprèv, fwa-la nou ni la adan èspérans an nou pé vin pi fò. Ès sa ka siwprann-vou ? An réyalité, fò tout disip a Kris mèt an tèt a yo kè yo ké jwenn éprèv. Sonjé ègzanp a Pòl. Mi sa i di sé krétyen-la ki té ka rété Tésalonik la : « Sé vré, lè nou té owa a zòt, nou té ka avèti-zòt kè nou té’é jwenn éprèv, é […] sé sa ki rivé » (1 Tés. 3:4). É mi sa i maké ba sé Korentyen-la : « Frè an nou, nou pa anvi kaché-zòt sé éprèv-la nou jwenn la […] Nou jous konpranndèdi nou té’é mò » (2 Kor. 1:8 ; 11:23-27).
10 Jòdijou osi, sé krétyen-la ké jwenn éprèv. Fò-yo atann-yo a sa (2 Tim. 3:12). Ès yo pèwsékité-w pas ou ni fwa an Jézi é pas ou koumansé suiv-li ? Pétèt kè akòz dè sa, fanmi a-w é zanmi a-w fè jé èvè-w é pétèt yo jous fè-w bon méchansté. Oben pétèt kè kolèg-travay a-w oben kanmarad-lékòl a-w pèwsékité-w pas ou pa’a fè ayen ki malonèt (Ébr. 13:18). Oben pétèt kè koté-la ou ka rété la gouvènman-la ka mèt baton an wou a-w pou anpéché-w préché é palé dè èspérans a-w ? Men Pòl èspliké kè kèlkèswa éprèv-la nou ka jwenn la, fò-nou ni tchè-kontan. Poukisa ?
11. Poukwa fò-nou byen désidé a andiré kèlkèswa éprèv-la nou ka jwenn la ?
11 Lèwvwè nou ka pasé anba on éprèv, nou pé ni tchè-kontan pas nou sav kè sa pé édé-nou travay on kalité ki enpòwtan toubònman. Kon Women 5:3 ka di, « éprèv ka pwodui andirans ». Tout sé krétyen-la ka sibi éprèv, alò fò tout sé krétyen-la ni andirans. Fò-nou byen désidé a andiré kèlkèswa éprèv-la nou ka jwenn la. Sé enki siwvwè nou ka fè sa kè nou ké pé vwè sa nou ka èspéré la réyalizé. Nou vé pa sanm sé moun-la Jézi té ka sonjé la lèwvwè i palé dè sé grenn-la ki té tonbé anlè tè plen wòch la. Yo aksèpté lavérité tousuit é yo té kontan odépa, men « dépi ou vwè on éprèv oben on pèwsékisyon » rivé, yo bigidi (Mat. 13:5, 6, 20, 21). Sé vré, lè nou ka pasé anba on éprèv, i pa mòl é a pa on biten nou enmé nonplis, men lè nou ka andiré é kè nou ka kontinyé sèvi Jéova, sa ka menné onlo bon biten pou nou. Ki biten ésa ?
12. Lè nou ka andiré, ki bon biten sa ka menné ?
12 Jak, disip a Jézi, palé dè byenfé moun pé trapé lè yo ka andiré. Mi sa i di : « Lésé andirans-la fè travay a-y, pou zò pé sa ni tousa ki fo é pou zò pa ni défo adan pon domenn, pou pa manké-zòt ayen » (Jak 1:2-4). Donk adan sé vèwsé-lasa, Jak ka di kè andirans-la ni on travay pou i fè asi nou, fò i atenn on òbjèktif. Lèwvwè nou ka andiré, sa pé édé-nou pou nou pé sa ni plis pasyans, plis fwa é pou nou fè Bondyé konfyans plis ankò. Anplisdisa, lè nou ka andiré sa pé menné ondòt bon biten pou nou ankò é biten-lasa enpòwtan. Ki biten ésa ?
13-14. Ka ki ka rivé lèwvwè nou ka andiré é kijan sa ka aji asi èspérans an nou ? (Women 5:4).
13 (Li Women 5:4.) Adan vèwsé-lasa, Pòl di kè lè on moun ka andiré, moun-lasa ka « fè Bondyé plézi ». Alò, lè ou ka andiré, ou ka fè Bondyé plézi. Sa vé pa di kè Jéova kontan lèwvwè ou anba éprèv oben anba difikilté. Sé vou ki ka fè Bondyé plézi ! Lèwvwè ou ka andiré é kè ou ka rété fidèl, i ka kontan toubònman. A pa ti ankourajé sa ka ankourajé-nou dè sav sa ! (Sòm 5:12).
14 On biten pou-w sonjé, sé kè Abraam jwenn éprèv é davwa i andiré sé éprèv-lasa é kè i rété fidèl, i fè Jéova plézi. Pou Jéova, Abraam ka fè pawti a zanmi a-y é Jéova té ka vwè-y kon on moun ki jis (Jén. 15:6 ; Wom. 4:13, 22). Nou osi, Jéova pé vwè-nou menmjan-la. A pa pas nou ka fè onlo biten pou-y oben pas nou ni rèsponsabilité kè i kontan-nou. Men sé pas nou ka andiré é nou fidèl a-y. Kèlkèswa laj an nou, sitiyasyon an nou oben kapasité an nou, noutout nou pé andiré. Èskè ou ka jwenn on éprèv alèla é ou ka kontinyé rété fidèl a Jéova ? Si sé sa, sonjé kè Jéova kontan-w toubònman. Lè nou ka rann-nou kont kè nou ka fè Bondyé plézi, fwa-la nou ni la adan èspérans an nou ka vin pi fò, kivédi nou ka pi sèten ankò kè Jéova ké réyalizé sa i pwomèt-nou.
ON ÈSPÉRANS KI PA KA DÉSÈVWA-NOU
15. Dapré Pòl, ki biten sa ka pwokiré-nou lè nou ka fè Bondyé plézi, é poukwa sa té’é pé siwprann sèwten moun ?
15 Kon Pòl èspliké, Jéova kontan-nou lè nou ka rété fidèl a-y é kè nou ka andiré sé éprèv-la nou ka jwenn la. Gadé sa Pòl di apré : « Fè Bondyé plézi ka bay lèspérans. É èspérans-la pa ka désèvwa ponmoun » (Wom. 5:4, 5). Sé pawòl-lasa té’é pé siwprann sèwten moun. Poukwa ? Pas kon nou vwè an Women 5:2, Pòl té ja di sé krétyen-la ki té ka rété Wòm la kè yo té ni on èspérans, « èspérans-la dè gouté glwa a Bondyé ». Alò sèwten moun té’é pé mandé-yo : « Si sé krétyen-lasa té ja ni on èspérans, poukwa Pòl ka woupalé dè èspérans-la sé krétyen-la ni la an Women 5:4, 5 ? »
Piti-a-piti, ou vin pi sèten kè sa ou ka èspéré la ké réyalizé. Ou pi présé vwè-y réyalizé ki avan é ou ni onlo rèkonésans pou sa (gadé sé paragraf 16 é 17 la).
16. Ka nou pé fè pou fwa-la nou ni la adan èspérans an nou vin pi fò ? (gadé sé imaj-la osi).
16 Pou nou rivé konprann sa Pòl té vlé di, fò pa nou jen oubliyé kè pi tan ka pasé, pi fwa an nou adan èspérans an nou pé vin fò. Ès ou ka sonjé prèmyé fwa ou tann palé dè bèl èspérans-la Pawòl a Bondyé ka ban-nou la ? Pétèt kè jou-lasa, ou di an tchè a-w kè viv adan on paradi pou touttan sa té’é byen bèl men ou pa’a kwè kè sa ké fèt. Men aprésa, ou aprann konnèt Jéova, ou étidyé sé pwomès-la ki an Bib-la é ou ay an nannan a yo. Kifè, ou vin sèten a san pou san kè sa nou ka èspéré la ké réyalizé.
17. Kijan fwa-la ou ni la adan èspérans a-w ka kontinyé vin fò menm apré ou pran lèbatèm ?
17 Menm apré ou pran lèbatèm, pi ou té ka aprann sa Labib ka anségné é ou té ka vin bon zanmi èvè Bondyé, pi ou té ka kwè fò adan èspérans a-w (Ébr. 5:13 – 6:1). Ou vwè sé pawòl-la ki maké an Women 5:2-4 réyalizé an 2 zyé a-w. Ou jwenn diféran kalté éprèv, men ou andiré-yotout é Jéova montré-w jan i té kontan-w. Jòdila, konm ou sèten kè ou ka fè Bondyé plézi, sa ka édé-w fè-y konfyans é sa ka édé-w atann kè i réyalizé pwomès a-y. Ou té ja ka kwè adan èspérans-la ou ni la men alèla ou ka kwè pi fò adan-y ki odépa. Ou pi sèten kè i ké réyalizé. I vin èspérans a-w ki ta-w. I ka touché tchè a-w lontan plis ki avan. Adan on sans, i ka aji asi tout domenn a vi a-w ; i ka aji asi jan ou yé èvè fanmi a-w, asi sé désizyon-la ou ka pran la é i jous ka aji asi jan ou ka sèvi èvè tan a-w.
18. Ki garanti Jéova ka ban-nou ?
18 Pòl ka di ondòt biten enpòwtan anrapò èvè èspérans-la kè ou ni la davwa ou ka fè Bondyé plézi. I ka ba-w lagaranti kè sa ou ka èspéré la ké réyalizé, kè sa pé’é désèvwa-w. Dayè, garanti-lasa, sé Bondyé ki ka ban-nou-y. Mi sa Bondyé fè Pòl maké pou sé krétyen-la : « Èspérans-la pa ka désèvwa ponmoun, pas grasa lèspri sen la i ban-nou la, tchè an nou ranpli èvè lanmou a Bondyé » (Wom. 5:5). Kifè, ou ni onpakèt rézon pou ou sèten kè èspérans-la Jéova ka ba-w la, èspérans a-w ki ta-w, a pa on èspwa a malpapay.
19. Dè kibiten ou pé sèten ?
19 An-nou wouvin asi ègzanp a Abraam : Jéova fè-y on pwomès, i fè-y sav kè i té kontan-y é pou-y, Abraam té zanmi a-y. Sa Abraam té ka èspéré la réyalizé. Mi sa Labib ka di : « Apré Abraam montré kè i té ni pasyans, yo fè-y pwomès-lasa » (Ébr. 6:15 ; 11:9, 18 ; Wom. 4:20-22). Nou pé sèten sa pa désèvwa-y. Vou osi, ou pé sèten kè si ou ka rété fidèl, ou ké risivwè rékonpans-la ou ka èspéré la. Ou pé ni tchè-kontan toubònman pas ou sèten kè sa ou ka èspéré la ké réyalizé é sa pé’é désèvwa-w ! (Wom. 12:12). Pou fin, mi sa Pòl maké : « An ka swété kè Bondyé-la ki ka bay lèspérans ranpli-zòt èvè on jwa é on lapé total, davwa zò ka fè-y konfyans, pou zò ni èspérans adébòdé grasa puisans a lèspri sen » (Wom. 15:13).
KANTIK 139 Imajiné-w adan mond nouvo la
a Adan awtik-lasa, nou ké vwè ki èspérans nou ni é nou ké vwè osi poukwa nou pé sèten kè sa nou ka èspéré la ké réyalizé. Women chapit 5 ké édé-nou vwè ki diférans ki ni ant fwa-la nou ni la adan èspérans an nou alèla é tala nou té ni la lè nou vin konnèt lavérité.