LÈSON 51
Kijan nou pé fè Jéova plézi lè nou ka palé ?
Lè Jéova kréyé-nou, i fè-nou on bèl kado toubònman : lang-la. Ès i ka gadé jan nou ka sèvi èvè-y ? Asirésèten ! (li Jak 1:26). Alò, kijan nou té’é pé sèvi èvè lang an nou on mannyè ki ka fè Jéova plézi ?
1. Kijan nou pé sèvi èvè lang an nou byen konm i fo ?
Mi sa Labib ka di : « Fò yonn kontinyé ankourajé lòt é fò yonn kontinyé fòwtifyé lòt » (1 Tésalonisyen 5:11). Ès ou konnèt on moun moral a-y a zéwo ? Ka ou pé fè pou ankourajé-y ? Ou pé di-y kè i ni onlo valè pou-w é kè ou byen enmé jan a-y. Pétèt ou ka sonjé on pasaj an Bib-la ki té’é pé fè-y dibyen. Ni onlo vèwsé kè ou té’é pé pran pou ou pé sa ankourajé-y. É on biten pou ou pa jen oubliyé, sé kè jan-la ou ka palé ba-y la ni enpòwtans a-y osi. Alò, toujou fè éfò pou palé jantiman é èvè dousè (Pwovèb 15:1).
2. Ki kalité pawòl on krétyen pa dwètèt di ?
Mi sa Bib-la ka di : « Fò pa pon vyé pawòl sòti an bouch a zòt » (li Éfézyen 4:29). Sa vlé di kè fò pa pon vyé pawòl sal sòti an bouch an nou, é fò pa nou voyé pon vyé pawòl pou ponmoun nonplis. Anplisdisa, fò pa nou malpalé moun é fò pa nou manti asi moun pou fè-yo ditò (li Pwovèb 16:28).
3. Ka nou pé fè pou nou rivé palé on mannyè ki ka ankourajé lézòt ?
Byensouvan, sa nou ka di ka montré sa nou ni andidan tchè an nou é an lèspri an nou (Lik 6:45). Sé pousa, fò-nou pran labitid ‘réfléchi asi tousa ki jis, ki pwòp, ki mérité yo enmé-y é ki ni on bon répitasyon’ (Filipyen 4:8). Pou nou rivé fè sa, fò-nou chwazi zanmi an nou é anmizman an nou byen (Pwovèb 13:20). Sé on bon biten osi, lè nou ka touné lang an nou 7 fwa an bouch an nou avan nou palé. Anplisdisa, fò-nou éséyé vwè ka sé moun-la ké rèsanti lè yo ké tann sa nou ka di-yo. Mi sa nou ka li an Bib-la : « Pawòl moun ka di san réfléchi ka touvé-yo kon koudépé, men lang a moun ki saj ka géri moun » (Pwovèb 12:18).
AN-NOU FOUYÉ PI FON
An-nou vwè dòt détay pou nou sav kijan pou nou palé on mannyè ki ka fè Jéova plézi é ki ka ankourajé lézòt.
4. Sa nou pé fè pou nou rivé métrizé lang an nou
Sa ka rivé noutout dè di on biten é dè règrété sa apré (Jak 3:2). Li Galat 5:22, 23 é fè on ti kozé asi sé kèsyon-lasa :
Pou métrizé lang a-w pibyen, ou pé priyé Jéova pou i édé-w travay sé kalité-lasa. Ki kalité ou té’é anvi Jéova édé-w travay ? Adan ki sitiyasyon sé kalité-lasa pé itil ba-w ? Poukwa ou ka di sa ?
Li 1 Korentyen 15:33 é fè on ti kozé asi kèsyon-lasa :
Sa ou ka fè pou anmizé-w é moun ou ka frékanté pé détenn asi jan ou ka palé. Kijansa ?
Ki biten ki té’é pé aji asi jan nou ka palé ?
Li Éklézyas 3:1, 7 é fè on ti kozé asi kèsyon-lasa :
Ni délè, vométan ou pa di ayen oben vométan ou atann bon moman-la pou ou palé. Adan ki sitiyasyon pou ou aji konsa ?
5. Lè ou ka palé dè moun, palé dè yo anbyen
Ka nou pé fè pou nou pa di ayen ki té’é pé kontraryé on moun oben ki té’é pé fè-y mal ? Gadé VIDÉO-la é fè on ti kozé asi sé kèsyon-la ki ka vin la.
Dè ki biten frè-la rann-li kont ?
Ka i fè pou i té chanjé ?
Li Éklézyas 7:16 é fè on ti kozé asi kèsyon-lasa :
Lè nou ka santi kè nou kay malpalé on moun, ka fò-nou sonjé ?
Li Éklézyas 7:21, 22 é fè on ti kozé asi kèsyon-lasa :
Si on moun ka malpalé-nou, kijan sé vèwsé-lasa pé édé-nou pa fè kòlè ?
6. Palé ba fanmi a-w jantiman
Adan on fanmi, Jéova vlé kè yonn palé ba lòt jantiman é èvè onlo lanmou. Gadé VIDÉO-la é fè on ti kozé asi kèsyon-la ki ka vin la.
Ka ki ké édé-w palé jantiman ba fanmi a-w ?
Li Éfézyen 4:31, 32 é fè on ti kozé asi kèsyon-lasa :
Kijan ou pé palé ba fanmi a-w pou yo santi kè ou enmé-yo ?
Jéova di Jézi sa i té ka rèsanti pou-y. Li Matyé 17:5 é fè on ti kozé asi kèsyon-lasa :
Lè ou ka palé èvè fanmi a-w, ka ou pé fè pou imité Jéova ?
Chèché a félisité.
MI SA MOUN KA DI : « Mwen, an ka di sa an ka pansé. Si on moun pa kontan, sa sé pwoblèm a-y ! »
Ès ou dakò èvè sa ? Poukwa ?
ON TI RÉZIMÉ
Sa nou ka di pé swa fè lézòt dibyen, swa fè-yo mal. Kifè, fò-nou réfléchi avan nou palé. É anplisdisa, fò-nou chwazi bon moman-la pou nou palé é fò-nou palé jantiman.
Ka ou woutyenn
Kijan nou pé sèvi èvè lang an nou pou fè lézòt dibyen ?
Ki kalté pawòl ou vé pa di anponjan ?
Ka nou pé fè pou nou palé jantiman é on mannyè ki ka ankourajé lézòt ?
AY GADÉ SA OSI
Twa konsèy ki ké édé-nou di pawòl ki pozitif.
Kijan ou pé arété di pawòl malélivé ?
« Ès vréman sé on mové biten lè nou ka di pawòl malélivé ? » (on awtik ki asi jw.org)
Sa nou pé fè pou nou pa malpalé moun.
Gadé kijan Jéova édé on misyé pou i té métrizé lang a-y.
« J’ai sérieusement réfléchi à ce que je faisais de ma vie » (Tou dè gad a 1é out 2013 an fransé)