2. Ka i ka fèt asi latè dépi 1914 ?

Disip a Jézi mandé-y : « Ki sign ki ké montré kè ou la é kè mond-la kay bout ? » (Matyé 24:3). Jézi réponn-yo é i di-yo kè lè i té’é Wa adan Wayòm-la an syèl-la, tousuit apré, té’é ni onlo biten ki té’é fèt asi latè. I di-yo kè té’é ni lagè, trannmandtè é kè moun té’é mò-fen (li Matyé 24:7). Anplisdisa, Labib anonsé kè pannan sé « dènyé jou-la » sé moun-la té’é ni on mové konpòwtasyon é kè akòz dè sa, sitiyasyon-la té’é « rèd a sipòté » (2 Timoté 3:1-5). Konmdi-konmfèt, dépi 1914, sé sa nou ka vwè.

3. Poukwa mond-la an boulvès konsa dépi wayòm a Bondyé anplas an syèl-la ?

Vin i vin Wa adan Wayòm-la, Jézi fè lagè èvè Satan é sé démon-la. Lagè-lasa fèt an syèl-la é Satan pèd konba. Bib-la ka di kè « yo jété-y asi latè, é yo jété zanj a-y èvè-y » (Révélasyon 12:9, 10, 12). Satan sav yo ké fè-y fè pach é i anrajé toubònman ! Alò, i ka fè onlo malè rivé é i ka fè onlo moun soufè asi latè. Mi sé pousa nou an chiklèt-lasa konnyéla ! Men wayòm a Bondyé ké mèt on milyé adan sa.