Èsklav fidèl é prévwayan la, sé kimoun ?

Kèlkètan avan i mò, Jézi pran Pyè, Jak, Jan é André a pa, pou i té palé èvè yo. É pannan i té ka èspliké-yo ki sign ki té ké montré i la pannan dènyé jou a sistèm-lasa, i pozé on kèsyon enpòwtan. I mandé : « An réyalité, kimoun ki sé èsklav fidèl é prévwayan la kè mèt a-y plasé asi domèstik a-y pou i ba-yo nouriti a yo o bon moman ? » (Matyé 24:3, 45 ; Mawk 13:3, 4). La konsa, lè Jézi ka palé dè nouriti, fò-nou konprann « nouriti èspirityèl ». Jézi, « mèt[-la] », pwomèt kè i té ké chwazi séla ki té ké ba disip a-y konésans èspirityèl la an tan a lafen. A pa té ké on sèl moun, men on gwoup-moun. Jòdila, an tan a lafen, kimoun ki « èsklav fidèl é prévwayan la » ?

Sé on piti gwoup krétyen-wen. Lè on krétyen « wen », sa vlé di lèspri sen a Bondyé chwazi-y. « Èsklav fidèl é prévwayan la » sé Komité santral a Témwen a Jéova, on piti gwoup krétyen-wen ki ka travay ansanm pou byen a tout sé kongrégasyon-la. Sé li ki ka ba adoratè a Jéova nouriti èspirityèl la. Si pa té ni èsklav-lasa, nou pa té ké risivwè « kantité nouriti-la nou bizwen la o bon moman » (Lik 12:42).

Sé li ki ka pran swen a fanmi a Bondyé (1 Timoté 3:15). Jézi mèt on gwo rèsponsabilité asi zépòl a « èsklav-la » : sé-y ki ka okipé dè tousa ki ka konsèwné òwganizasyon a Jéova asi latè. I ka jéré tout byen a mèt a-y é travay-la ki ni a fè la osi, sètadi préché é anségné sé kongrégasyon-la. Pou ban-nou sa nou bizwen, lè nou bizwen-y, « èsklav fidèl é prévwayan la » ka distribiyé on bon nouriti èspirityèl. Pou sa, i ka ban-nou piblikasyon é i ka anségné-nou lè nou kay réinyon é lè nou kay lasanblé.

« Èsklav[-lasa] fidèl » a vérité-la ki an Bib-la, é i ka akonpli misyon a-y fidèlman pas i ka préché bon nouvèl-la. I « prévwayan » pas i ka jéré sa Jézi ni asi latè èvè onlo sajès (Akt 10:42). Jéova ka béni travay a èsklav-la, paskè toujou ni plis moun ki ka vin Témwen a Jéova é anmenmtan toujou ni onlo nouriti èspirityèl (Izayi 60:22 ; 65:13).

• Kimoun Jézi chwazi pou ba disip a-y nouriti èspirityèl la ?

• An ki sans nou pé di « èsklav-la » « fidèl » é « prévwayan » ?