LÈSON 23
Lèbatèm ka pwokiré-w onlo bénédisyon
Jézi di kè fò sé krétyen-la pran lèbatèm (li Matyé 28:19, 20). Men lèbatèm, ka sa yé ojis ? Ki éfò on moun dwèt fè pou i pé sa pran lèbatèm ?
1. Lèbatèm, ka sa yé ojis ?
Lèmo « batèm » ka vin dè on mo grèk ki vlé di « plonjé » anba dlo. Lè Jan batizé Jézi, i plonjé tout kò a-y adan Jouden-la. Aprésa, Jézi ‘sòti anba dlo-la’ (Matyé 3:13, 16). Lè sé vré krétyen-la ka pran lèbatèm, yo ka plonjé tout kò a yo anba dlo-la, menmjan ki Jézi.
2. Lè on moun ka pran batèm, ka i ka montré ?
Lè on moun ka pran lèbatèm, i ka montré kè i ba Jéova vi a-y. Kijan on moun ka fè pou ba Jéova vi a-y ? I ka fè on priyè tousèl a-y dè koté a-y é i ka di Jéova i vlé sèvi-y pou touttan. I ka pwomèt Jéova kè sé-y tousèl i ké sèvi é kè i ké mèt volonté a-y prèmyé douvan an vi a-y. Moun-lasa ka désidé « rènyé-y limenm a-y » é i ka désidé osi kè i ké ‘toujou kontinyé suiv’ ansègnman a Jézi é ègzanp-la i lésé la (Matyé 16:24). Lè on moun ka ba Bondyé vi a-y é i ka pran lèbatèm, i ka vin pibon zanmi èvè Jéova é èvè sélézòt moun-la ki ka adoré-y la.
3. Ka on moun dwèt fè avan i pran lèbatèm ?
Avan ou pran lèbatèm fò ou aprann konnèt Jéova é fò ou aprann fè-y konfyans piti-a-piti (li Ébré 11:6). Pi ou ké konnèt Bondyé é ou ké fè-y konfyans, pi ou ké enmé-y osi. Aprésa, ou ké anvi préché é ou ké anvi viv annakò èvè sé prensip-la ki an Bib-la (2 Timoté 4:2 ; 1 Jan 5:3). Pi souvan ki rarman, lè on moun ‘ka onoré Jéova é ka fè-y vréman plézi’, i ka anvi ba-y vi a-y é i ka pran lèbatèma (Kolosyen 1:9, 10).
AN-NOU FOUYÉ PI FON
An-nou vwè ka batèm a Jézi ka aprann-nou é ka on moun pé fè pou préparé-y avan i pran lèbatèm.
4. Batèm a Jézi ka aprann-nou onlo biten
Li Matyé 3:13-17 pou vwè kijan batèm a Jézi pasé. Aprésa fè on ti kozé asi sé kèsyon-lasa :
Ès Jézi té tibébé lè Jan batizé-y ?
Kijan Jézi batizé ? Ès sé tibwen dlo tousèl yo vidé asi fon a-y ?
Dépi Jézi té pran lèbatèm, i koumansé akonpli misyon-la Pap’a-y té ba-y la. Li Lik 3:21-23 é Jan 6:38, é fè on ti kozé asi kèsyon-lasa :
Apré batèm a-y, ki travay Jézi mèt prèmyé douvan an vi a-y ?
5. Lèbatèm a pa on biten ki two fò pou-w
Lè ou ka sonjé kè fò ou ba Jéova vi a-w é fò ou pran lèbatèm, sa pé ka fè-w pè. Men piti-a-piti ou ké pwogrésé, é on jou ou ké santi-w paré a pran désizyon enpòwtan lasa. Gadé ka déotwa moun ki ja pran lèbatèm ka di. Gadé VIDÉO-la.
Li Jan 17:3 é Jak 1:5, é fè on ti kozé asi kèsyon-lasa :
Ka ki pé édé on moun préparé-y pou i pran lèbatèm ?
Lè on moun ka ba Jéova vi a-y, i ka priyé-y pou di-y kè i vlé sèvi-y pou touttan.
Lè nou ka pran lèbatèm, nou ka montré toutmoun kè nou ba Jéova vi an nou.
6. Lè nou ka batizé, nou ka rantré an fanmi a Jéova
Lè nou ka pran lèbatèm, nou ka rantré adan on fanmi entèwnasyonal ki soudé. Kèlkanswa la yo sòti é la yo ka rété, tout Témwen a Jéova ki batizé ka kwè adan menm biten-la é ka rèspèkté sa ki maké an Bib-la. Li Sòm 25:14 é 1 Pyè 2:17, é fè on ti kozé asi kèsyon-lasa :
Dapré sé vèwsé-lasa, ki byenfé sa ka pwokiré-nou lè nou ka pran lèbatèm ?
MI SA MOUN KA DI : « An po’o paré pou pran lèbatèm. »
Si vou osi ou ka santi ou po’o paré, ès ou ka pansé sé on biten ki vo lapenn kanmenm ?
ON TI RÉZIMÉ
Jézi di kè fò sé krétyen-la pran lèbatèm. Avan on moun pran lèbatèm, fò i konsolidé fwa a-y, fò vi a-y annakò èvè sa ki maké an Bib-la, é fò i ba Jéova vi a-y.
Ka ou woutyenn
Lèbatèm, ka sa yé ojis ? É poukwa sé on biten ki enpòwtan ?
Ki rapò ki ni ant ‘ba Jéova vi a-w’ é ‘pran lèbatèm’ ?
Ka on moun dwèt fè avan i ba Jéova vi a-y é avan i pran lèbatèm ?
AY GADÉ SA OSI
Dòt enfòwmasyon anrapò èvè lèbatèm.
Déotwa konsèy ki byen itil pou édé on moun pwogrésé jistan i pran lèbatèm.
« Si ou enmé Jéova é si ou ni rèkonésans pou-y sa pé ba-w anvi pran batèm » (Tou dè Gad a maws 2020)
An-nou vwè ka ki ba on misyé anvi pran lèbatèm.
« Ils voulaient que je découvre la vérité par moi-même » (Tou dè Gad a 1é févriyé 2013 an fransé)
Lè on moun ka woulé pou pran lèbatèm, poukwa sé on bon biten ? Kijan ou pé préparé-w pou pran lèbatèm ?
a Si on moun ja batizé adan ondòt rèlijyon, fò i woubatizé ankò. Poukwa sa ? Paskè rèlijyon-la i té adan-y la pa ka anségné vérité-la ki an Bib-la (gadé Akt 19:1-5 é lèson 13 la).