LÈSON 45
Kijan nou ka montré kè nou pa’a mélanjé-nou adan zafè a mond-lasa ?
Jézi di kè fò pa disip a-y mélanjé-yo adan mond-lasa (Jan 15:19). Sa vlé di kè yo pa’a mélanjé-yo ni an politik, ni adan sé lagè-la ki ka fèt la. Men fò-nou rèkonnèt kè lèwvwè ni élèksyon oben lèwvwè ni on lagè, sa pa fasil pou nou pa fè pon préférans. Akòz dè sa, moun pé rivé a di bétiz asi nou, oben a fè jé èvè nou. Ka nou pé fè pou nou pa jen mélanjé-nou èvè mond-lasa é pou nou rété fidèl a Jéova ?
1. Pou sé vré krétyen-la, ki valè sé gouvènman-la tini ?
Sé Témwen-la ka rèspèkté sé gouvènman-la. Yo ka fè sa Jézi mandé : yo ka « ba Séza sa ki ta Séza », kivédi yo ka obéyi lwa a péyi-la. Pa ègzanp, yo ka péyé enpo a yo (Mawk 12:17). Labib ka èspliké kè siwvwè sé gouvènman-la ka dirijé adan sistèm-lasa, sé yenki pas Jéova ka pèwmèt-yo fè sa (Women 13:1). Kifè, nou ka kouté Bondyé avan nou kouté-yo. Nou ka konté asi Bondyé é asi Wayòm a-y ki an syèl-la pou réglé pwoblèm a limanité.
2. Kijan nou pé montré kè sé gouvènman a Bondyé tousèl nou ka soutyenn ?
Menmjan ki Jézi, sé Témwen a Jéova la pa’a mélanjé-yo an politik. On jou, Jézi fè on mirak. É lè sé moun-la vwè sa, yo té bizwen mété-y wa, men i rèfizé (Jan 6:15). Poukwa ? Ondòt jou, mi sa Jézi èspliké : « Wayòm an mwen pa adan mond-lasa » (Jan 18:36). Jòdijou, disip a Jézi ka montré kè sé yenki wayòm a Bondyé yo ka soutyenn é yo ka fè sa plizyè fason diféran. Pa ègzanp, yo pa’a fè lagè (li Miché 4:3). Yo ka rèspèkté drapo a nasyon-la, men yo pa’a fè ayen ki ka bay lenprésyon kè sé adoré yo ka adoré-y (1 Jan 5:21). É yo pa’a sipòté pou pon kandida, ni pou pon pawti politik. Lè yo ka fè tousa, é dòt biten ankò, yo ka montré kè yo fidèl a wayòm a Bondyé é kè yo èvè-y a san pou san.
AN-NOU FOUYÉ PI FON
Délè, sa pa fasil pou nou pa mélanjé-nou adan zafè a mond-lasa. An-nou vwè adan ki sitiyasyon. É an-nou vwè osi kijan nou pé pran désizyon ki ké fè Jéova plézi.
3. Disip a Jézi pa ka mélanjé-yo adan zafè a mond-lasa
Jézi é sé prèmyé disip-la lésé on bèl ègzanp ban nou. Li Women 13:1, 5-7 é 1 Pyè 2:13, 14. Aprésa, gadé VIDÉO-la é fè on ti kozé asi sé kèsyon-la ki ka vin la.
Poukwa fò-nou rèspèkté gouvènman-la é rèprézantan a-y ?
Kijan nou pé montré kè nou ka rèspèkté gouvènman-la é rèprézantan a-y é kè nou ka fè sa yo ka mandé ?
Lèwvwè ni lagè, sèwten péyi ka di kè yo pa’a fè pon préférans. Men lè ou byen gadé sa yo ka fè, an réyalité, yo ka soutyenn touséla ki ka goumé la. Alò ka sa vlé di ojis, pa fè pon préférans ? Li Jan 17:16. Aprésa, gadé VIDÉO-la é fè on ti kozé asi kèsyon-la ki ka vin la.
Kijan nou pé montré kè nou pa’a fè pon préférans ?
É si gouvènman-la ka mandé-nou fè on biten ki pa annakò èvè sa ki maké adan Labib, ka pou nou fè ? Li Akt 5:28, 29. Aprésa, gadé VIDÉO-la é fè on ti kozé asi sé kèsyon-la ki ka vin la.
Si gouvènman-la ka ban-nou on lwa ki pa annakò èvè lwa a Bondyé, ki lwa fò-nou kouté ? Ta Bondyé oben ta lézòm ?
Adan ki sitiyasyon on krétyen té’é pé rèfizé obéyi lè gouvènman-la é rèprézantan a-y ka mandé-y fè on biten ?
4. Sa nou ka pansé é sa nou ka fè ka montré kè nou pa pou ponmoun
Li 1 Jan 5:21. Aprésa, gadé VIDÉO-la é fè on ti kozé asi sé kèsyon-la ki ka vin la.
Poukwa Ayenge rèfizé rantré adan on pawti politik é poukwa i rèfizé ba drapo a péyi-la lonnè ?
Ès ou ka di i pran on bon désizyon ?
Adan ki dòt sitiyasyon nou pé ni dimal a pa mélanjé-nou adan zafè a mond-lasa ? Gadé VIDÉO-la é fè on ti kozé asi sé kèsyon-la ki ka vin la.
Lèwvwè ni on konpétisyon a ispò ant plizyè péyi, ka nou pé fè pou nou pa sipòté pou ponmoun, ni pou pon nasyon ?
Lè gouvènman-la ka pran on désizyon, ki i k’ay an sans an nou ki i pa k’ay an sans an nou, kijan nou pé montré kè nou pa’a mélanjé-nou adan sa ?
Ni sèwten jounalis é sèwten moun alantou an nou ki ka palé dè politik toutlè. Si nou pa fè atansyon, ki travay yo té’é pé fè asi nou ?
Adan ki sitiyasyon fò on krétyen montré kè sé yenki wayòm a Bondyé i ka soutyenn ?
MI SA YO TÉ’É PÉ MANDÉ-W : « Poukwa ou pa’a mélanjé-w an politik ? »
Ka ou té’é réponn ?
ON TI RÉZIMÉ
On krétyen pa ka mélanjé-y adan zafè a politik ; anponjan menm ! Sa i ka pansé, sa i ka di é sa i ka fè, dwèt montré sa on mannyè ki klè.
Ka ou woutyenn
An ki mannyè fò-nou aji èvè gouvènman-la é rèprézantan a-y ?
Poukwa on krétyen pa ka mélanjé-y adan zafè a politik ?
Adan sèwten sitiyasyon, sa pa fasil pou nou pa mélanjé-nou adan zafè a mond-lasa. Ki sitiyasyon ésa ?
AY GADÉ SA OSI
Ki sakrifis nou paré a fè pou nou pa mélanjé-nou an politik ?
Kijan on fanmi pé préparé-y pou i pa mélé-y adan zafè a mond-lasa ?
Fò pa nou mélanjé-nou adan zafè a mond-lasa lè nou an piblik (4:25)
Istwa a on nonm ki té ka konprann kè lè on moun ka défann péyi a-y sé pli bèl lonnè ki tini.
Kijan nou pé montré kè nou pa’a mélanjé-nou an zafè a mond-lasa lè fò-nou pran désizyon ki anrapò èvè travay an nou ?
« Chacun portera sa propre charge » (Tou dè Gad a 15 maws 2006 an fransé)