LÈSON 16
Ka Jézi fè lè i té asi latè ?
Lè onlo moun ka sonjé Jézi, yo ka vwè on tibébé kouché adan on krèch, oben yo ka sonjé on nonm ki ka mò asi on kwa. É pou dòt moun, sé on pwofèt. Ès ou ka di nou pé aprann konnèt Jézi pibyen si nou ka gadé sa i fè lè i vin asi latè ? Jézi fè dé biten èstraòwdinè toubònman ! Adan lèson-lasa, nou kay palé dè déotwa adan yo é nou ké vwè kijan yo pé édé-nou.
1. Ki travay ki té pli enpòwtan ba Jézi ?
Jézi té ka « anonsé bon nouvèl a wayòm a Bondyé » toutlè. Sé travay-lasa ki té pli enpòwtan pou-y (li Lik 4:43). Mi bon nouvèl-la i té ka anonsé la : Bondyé ké mèt on wayòm anplas, kivédi on gouvènman. É gouvènman-lasa ké fè tout pwoblèm a limanité disparèta. Pannan twa lanné é-dèmi, Jézi travay rèd toubònman pou pòté mésaj-lasa ba sé moun-la, on mésaj ki ba-yo onlo kouraj (Matyé 9:35).
2. Pou ki rézon Jézi fè mirak ?
Labib ka palé dè ‘onlo biten èstraòwdinè, dè mirak é dè sign kè Bondyé réyalizé grasa Jézi’ (Akt 2:22). Grasa puisans-la Bondyé ba-y la, Jézi arété on tanpèt, i nouri on foulmoun, i géri onlo malad é i jous résisité moun-mò (Matyé 8:23-27 ; 14:15-21 ; Mawk 6:56 ; Lik 7:11-17). Sé mirak-la Jézi fè la montré on mannyè ki klè kè sé Bondyé ki té voyé-y. Yo montré osi kè Jéova kapab fè tout pwoblèm an nou disparèt.
3. Sa Jézi fè lè i té asi latè ka aprann-nou onlo biten, ki biten ésa ?
Kèlkanswa sitiyasyon-la, Jézi toujou fè sa Jéova té ka mandé-y (li Jan 8:29). Jistan i mò, Jézi toujou kouté Pap’a-y magré yo té ka mèt baton an wou a-y. I montré on mannyè ki klè kè lézimen kapab sèvi Bondyé menmsi yo ka jwenn difikilté. Sé konsa Jézi ‘lésé on modèl pou nou, pou nou suiv-li alatras’ (1 Pyè 2:21).
AN-NOU FOUYÉ PI FON
An-nou vwè kijan Jézi té ka palé dè bon nouvèl-la é kijan i té ka fè sé mirak-la.
4. Jézi préché bon nouvèl-la
Pou i té préché bon nouvèl-la pou on maksimòm dè moun, Jézi fè onpakèt kilomèt apyé asi chimen ki té plen pousyè. Li Lik 8:1 é fè on ti kozé asi sé kèsyon-lasa :
Ès Jézi préché yenki pou moun ki té ka sanblé pou kouté-y ?
Ki mannèv Jézi pòté pou i té rivé préché ba sé moun-la ?
Bondyé anonsé kè Mési-la té’é préché bon nouvèl-la. Li Izayi 61:1, 2 é fè on ti kozé asi sé kèsyon-lasa :
Kijan Jézi réyalizé pwofési-lasa ?
Ès lézimen bizwen tann bon nouvèl-lasa jòdijou ?
5. Jézi anségné onlo vérité ki enpòwtan toubònman
Jézi té ka préché bon nouvèl a wayòm a Bondyé. Men anplisdisa, i té ka aprann sé moun-la dé biten ki té ka édé-yo adan vi a yo touléjou. An-nou vwè déotwa ègzanp kè nou ka touvé adan on sèwmon Jézi fè asi on montangn. Li Matyé 6:14, 34 é 7:12, é fè on ti kozé asi sé kèsyon-lasa :
Ki konsèy itil Jézi bay adan sé vèwsé-lasa ?
Ès sé konsèy-lasa ka sèvi-nou on biten jòdijou ?
6. Jézi fè onlo mirak
Jéova ba Jézi puisans pou i té fè onlo mirak. Si ou vlé sav kijan yonn adan sé mirak-lasa fèt, li Mawk 5:25-34 oben gadé VIDÉO-la. Aprésa fè on ti kozé asi sé kèsyon-la ki ka vin la.
Vidéo-lasa ka palé dè on madanm ki té malad. Dè ki biten i té sèten ?
Ka ki ka touché-w adan mirak-lasa ?
Li Jan 5:36 é fè on ti kozé asi kèsyon-lasa :
Ka sé mirak-la Jézi fè la ka montré-nou ?
Ès ou té sav sa ?
Prèstout enfòwmasyon nou ni si Jézi ka sòti adan kat liv a Labib. Yo ka kriyé sé kat liv-lasa Lézévanjil : Matyé, Mawk, Lik, é Jan. Chak sé nonm-la ki maké sé évanjil-la bay onlo détay diféran anrapò èvè Jézi. Lè nou ka sanblé tout sé détay-lasa, sa ka ban-nou on bèl imaj ki ka édé-nou konprann vi a Jézi pibyen.
MATYÉ
maké Évanjil a-y an prèmyé. I palé onlo dè sa Jézi anségné, siwtou dè sa Jézi anségné anrapò èvè wayòm a Bondyé.
MAWK
maké pli piti Évanjil-la. Lè ou ka li Évanjil a Mawk ou pa’a dòmi. Sa vivan, sa ni onlo enfòwmasyon adan-y é tout biten ka fèt fap-fap.
LIK
ka di-nou kè lapriyè té ni onlo enpòwtans ba Jézi é kè i té janti èvè sé madanm-la.
JAN
ka di-nou dè ki biten Jézi té ka palé lè i té èvè zanmi a-y é lè i té èvè dòt moun.
MI SA MOUN KA DI : « Jézi é Bondyé sé menm moun-la. »
Ka ou ka pansé dè sa ?
ON TI RÉZIMÉ
Jézi préché bon nouvèl a wayòm a Bondyé, i fè mirak é i toujou fè sa Jéova mandé-y kèlkèswa sitiyasyon-la.
Ka ou woutyenn
Lè Jézi té asi latè, ki travay i mèt prèmyé douvan an vi a-y ?
Ka sé mirak-la Jézi fè la ka montré-nou ?
Ki biten itil Jézi anségné ?
AY GADÉ SA OSI
Dè ki biten Jézi té ka palé plis ?
« Le Royaume de Dieu : son importance pour Jésus » (Tou dè Gad a 1é òktòb 2014 an fransé)
An-nou vwè poukwa nou pé di kè sé mirak-la Jézi fè la a pa blag-a-mas.
« Les miracles de Jésus : que vous enseignent-ils ? » (Tou dè Gad a 15 juiyé 2004 an fransé)
An-nou vwè kijan on misyé chanjé vi lè i aprann jan Jézi té ka sousyé-y dè pwochen a-y.
« Je ne vivais que pour moi » (Tou dè Gad a 1é òktòb 2014 an fransé)
Gadé pou vwè ki biten enpòwtan Jézi fè lè i té asi latè.
a Sé lèson 31 a 33 la ké bay plis détay asi wayòm a Bondyé.