Zò té vlé sav...

Kimoun yo té chwazi pawmi sé Juif-la pou véyé tanp-la ? Ka yo té ka fè ègzaktèman ?

Sèwten Lévit ki pa té prèt, té ka fè dòt travay. Pa ègzanp, ni sèwten ki té ka véyé tanp-la é sé kapitèn a tanp-lasa ki té ka dirijé-yo. Mi konsa, Philon, on ékriven juif, ka palé dè travay-la yo té ka fè la : « Yo té ka mèt déotwa Lévit owa sé pòt-la, é sé yo ki té ka wouvè é fèmé sé pòt-la pou fè moun antré é sòti. É ni dòt Lévit ki té ka touvé-yo andidan Tanp-la, anfas a sé chanm sakré la. Si on moun té k’ay rantré adan sé chanm-lasa alòskè i pa té ni dwa, yo té ka anpéché-y rantré menmsi a pa èspré i té k’ay fè sa. Ni dòt Lévit osi ki té ka fè lantou a Tanp-la pou véyé-y. Yo té ka aranjé-yo pou toujou té ni on ékip, lajouné kon lannuit. »

Sé Lévit-lasa té a dispozisyon a Sannédren-la osi. Sé yenki yo sé women-la té bay dwa pòté zàm.

Joachim Jeremias, on èspésyalis a Labib, ka èspliké kè lè yo vin arété Jézi, i mandé sé moun-la ki vin arété-y la poukwa yo pa fè-y pannan i té ka anségné an tanp-la (Mat. 26:55). Si sé boug-lasa pa té ka fè pawti a moun ki té ka véyé tanp-la, Jézi pa té’é mandé-yo sa. É menm èspésyalis-lasa ka pansé kè déotwa tan avan, sé sé menm gad-lasa yo té ja voyé arété Jézi (Jan 7:32, 45, 46). Plita, déotwa gad é kapitèn a yo ay chèché disip a Jézi ba Sannédren-la é sé pétèt yo osi ki trenné Lapòt Pòl pou fè-y sòti an tanp-la (Akt 4:1-3 ; 5:17-27 ; 21:27-30).