2 Rongorongo

3 Ao e a moana katean ana auti Iehova+ i Ierutarem Toromon n te Maunga ae Moria,+ are e kaoti iai Iehova nakon tamana are Tawita,+ n te tabo are e katauraoia Tawita i aon ana tabo ni kaaki kun ni uita Orenan+ are te I-Iebuti. 2 E moana ana kateitei ni kauouani bongin te kauoua n namwakaina, n ana kaaua n ririki n tautaeka. 3 Ao aan te kateitei ibukini katean ana auti te Atua ae koaua are e kawenea Toromon bon 60 te mwanokunibai abwakina ao 20 te mwanokunibai raababana,+ n aroni baireana are mai mwaina.* 4 Te kaman* are mai moa bon 20 te mwanokunibai abwakina, ae boraoi ma raababan te auti,* ao rietana bon 20* te mwanokunibai. Ao e kanimwa te koora ni koaua n rabuna nanona.+ 5 E rabuna te ruu* ae bubura n te kai ae te mwaiango, ao imwina e rabuna aona n te koora ae raoiroi,+ ao imwina e katamaroaa n taamnein te aroka ae te baam+ ao taian taurekereke.+ 6 Ao e kanimwi atibu aika tamaroa aika rangi ni kakawaki n te tembora n rabunna iai.+ Ao te koora+ are e kabongana boni koorani Barewaim. 7 E rabuna te tembora, taian oka, taiani kawai n rin, oona, ao mataroana, n te koora.+ Ao e kaari ni katanei aon taian oo n taamneia taiani kerubim.*+

8 Ao e karaoa te Ruu* ae Moan te Tabu.+ Titeboo abwakina ma raababan te auti ae 20 te mwanokunibai, ao raababana 20 te mwanokunibai. Ao e rabunna n te koora ae raoiroi ae 600 te tarena.*+ 9 Rawawatani kooran taian neera bon 50 te tiekera,* ao e rabuni ruu ake i aon te taubuki n te koora.

10 Ao e karaoi katotongani kerubim aika uoman i nanon te Ruu* ae Moan te Tabu, ao e kanimwa te koora n rabuni iai.+ 11 Botan abwakini baia ni kiba kerubim+ akekei bon 20 te mwanokunibai. Bain te moani kerubim ni kiba are teaina bon nimaua te mwanokunibai abwakina ao e roko n oon te auti, ao baina ni kiba are teaina bon nimaua te mwanokunibai abwakina ao e boo ma bain te kerubim ni kiba are temanna. 12 Ao te kerubim are temanna bon nimaua te mwanokunibai abwakini baina ni kiba are teaina ao e boo ma oon te auti are te iterana, ao baina ni kiba are teaina bon nimaua te mwanokunibai abwakina ao e boo ma bain te moani kerubim ni kiba are teaina. 13 Baia ni kiba kerubim aikai aika taakinaki bon 20 te mwanokunibai, ao a tei i aoni waeia ma ubuia ae kaitaraa te Ruu ae Tabu.

14 E karaoa naba te keeten+ man te karai ae buruu, te karai ae beboo ae buraen te tiibu, te karai ae uraroo, ao te kunnikai ae raoiroi, ao a ituaki iai taamneia kerubim.+

15 Ao e karaoi i moan te auti boua aika uaai,+ ae 35 te mwanokunibai abwakia, ao taian tiabita* ake i aon taiani boua boni kaka nimaua te mwanokunibai.+ 16 Ao e karaoi taurekereke aika ai aron taiani mwae n roroa ao e katokai i aon taubukin taiani boua aikai mai eta, ao e karaoi bamkuranete* aika 100 ao e kaaki i aon taurekereke aikai. 17 E katei boua i moan te tembora, teaina n te angaatai* ao teaina n te angamaing.* E arana are teaina are n te angaatai bwa Iakin,* ao are teaina are n te angamaing bwa Boati.*