Kaotia n aroarom bwa ko aki imanono. Titirakiniko i bon iroum n aikai: ‘A iangoai aomata bwa I aki imanono, I kai bitaki ao ni kariaia aia iango? Ke a iangoai bwa te aomata ngai ae I tuamatoa, I ribuaka, ao I aki kona ni kaetaki? I ongongo irouia tabemwaang ao ni kariaia te baere a tangiria ngkana e riai?’ Ngkana ti kabatiaa te aki imanono, ti a katotonga iai Iehova ao Iesu. E irekereke te aki imanono ma arora ni kaangaraoira ngkana iai bitaki ni maiura. A kona bitaki akanne ni karekei kangaanga aika aki kantaningaaki nakoira. Tao e a karina naba n reke iroura te aoraki ae kakaiaki. Ke e kona n rotaki maiura ni bitaki aika riki ni kaubwain te aba ke te tautaeka n te tabo ae ti mena iai. (TM 9:11) Ti kona naba ni kataaki ngkana e bitaki mwiokoara n ana botaki Iehova. Ti kona ni kaangaraoira nakoni baika boou ngkana ti karaoi mwaneka aika aua aikai: (1) butimwaea te bitaki, (2) iaiangoi kanoan taai aika imwaim, (3) kaatuua am iango i aoni baika raraoi, ao (4) karaoi bwaai ibukia tabemwaang. w23.07 21-22 ¶7-8

E bon ataeinimwaane te burabeti are Taniera ngke e riki bwa aia bure kaaini Baburon imwin te buaka, ao a kairia nakon te tabo ae raroa ma abana. Ma n taraana a anaaki nanoia tautia iroun Taniera. A “nora ae e kona n noria te mata” iroun Taniera bwa ‘akea toabuakani bwain rabwatana, e raraoi taraana,’ ao e nako man te kanoa ni bwaanuea. (1Ta 16:7) Ngaia are a a kataneia teuaei kaaini Baburon bwa e na beku n te baareti. (Tan 1:​3, 4, 6) E tangira Taniera Iehova ibukin te maiu are e rineia te ataeinimwaane aei bwa e na maiuakinna. Ni koauana, tao e a kaan uabwi ke ai 20 tabun ana ririki Taniera, ngke e mwaneweaki arana iroun Iehova ni kamoamoaaki, ngaia ma Noa ao Iobi, aika mwaane aika a a tia ni kabanei ririki aika bati ni kateimatoa aia iraorao ma te Atua. (KB 5:32; 6:​9, 10; Iob 42:​16, 17; Etk 14:14) Ao e teimatoa Iehova n tangira Taniera i nanoni maiuna ae abwabwaki ma ni kakukurei.​—Tan 10:​11, 19. w23.08 2 ¶1-2

Ngkana ko iangoia bwa ko nang kabooa am auti ko boni bae ni kan nenera bwain rabwatan te auti ni kabane i bon iroum. Ti kona ni karaoa ae aron naba anne ngkana ti wareware ao n ukeuke n te Baibara. Ngkana ko a tii warekia nako naba, ko kona n tii reiakini koaua aika bebete ae taekani “moan rongorongo ake mairoun te Atua.” (Ebr 5:12) Ma n aron ae ko riai n rinnako n te auti bwa ko aonga n ataa raoi arona, ko riai naba n ukeuke raoi n te Baibara bwa ko aonga n ota raoi iai. Te anga ae tamaroa ibukin ukeran te Baibara boni kakaaean ae a kangaa n irekereke rongorongo aika kakaokoro ake iai. Tai tii kataia ni kaotako bwa baikara koaua aika ko kakoauai, ma kataia naba n ota bwa bukin tera ngkai ko kakoauai. Ngkana ti na ota raoi ni kanoan te Baibara ni kabane, ti riai n reiakini koaua aika nano ake iai. E kaumakiia Kristian te abotoro Bauro bwa a na ukeuke n reirei raoi n te Baibara bwa a aonga ni “mataata raoi . . . n raababan ao n abwakin ao n rietan ao n nanon” te koaua. Ao ngkanne ane a nang ‘kateimatoaaki ma ni kaneneaki wakaaia’ n aia onimaki. (Ebt 3:​14-19) Ti riai ni karaoa naba anne. w23.10 18 ¶1-3