Mwakuri
11 N te tai aei ao a a ongo abotoro ao taari ake i Iutaia bwa a a butimwaea naba ana taeka te Atua aomata aika tiaki I-Iutaia. 2 Ngaia are ngke e a nako Ierutarem Betero, ao a a tiribureia* naake a nano n te korotobibi,+ 3 ni kangai: “Ko rin n aia auti mwaane ake a aki korotobibiaki ma n amwarake ma ngaiia.” 4 Ngaia are e a waaki Betero ni kabwarabwaraa raoi taekan anne nakoia ni kangai:
5 “I mena n te kaawa ae Iobe n tataro, ao I nora n te miitara te bwai ae nnaaki rikaaki mai karawa ae ai aron te kunnikai ae te rinen ae raababa ae a bae maninganingana ake aua, ao e ruo raoi nako matau.+ 6 Ngke I karaua n taraa nanona ao I noriia iai maan aika kaka aai waeia ma maan aika moaanti ma maan aika kawakawa i aontano ao mannikiba. 7 I ongo naba te bwanaa ae kangai: ‘Teirake Betero, ao tiringi ma ni kang!’ 8 Ma I taku: ‘Te Uea, bon tiaki ngaia anne, ibukina bwa e tuai man rin i wiu te bwai ae kamwara ke ae aki itiaki.’ 9 E kaeka ni kangai te bwanaa mai karawa n te kauatai: ‘Katoka atongani baike e a tia ni kaitiakii te Atua bwa a kamwara.’ 10 Ao e a manga taetae naba te bwanaa n te katentai ao a bane baikekei ni manga atikakirake nako karawa. 11 Ao ni bon te tai naba anne, a a tei i rarikin te auti are ti mena iai teniman mwaane ake a kanakoaki nakoiu mai Kaitareia.+ 12 Ao e a tuangai te taamnei bwa N na iriia n aki nanokokoraki naba teutana. Ma a irai naba taari aika onoman aikai, ao ti rin n ana auti teuarei.
13 “E karakinna teuaei nakoira bwa e nora te anera ae tei n ana auti ao e kangai: ‘Ko na kanaanako nako Iobe ao kawaekoaa Timon ae arana naba Betero,+ 14 ao e na tuangko baike e na reke iai kamaiuam ao kamaiuaia kaaini batam ni kabane.’ 15 Ma ngke I a moana taetaeu, ao e a ruonia naba te taamnei ae raoiroi n aron are e ruonira naba n te moantai.+ 16 Ikanne are I a uringa iai ana taeka te Uea are tataekinna ni kangai: ‘E bwabetito Ioane n te ran,+ ma kam na bwabetitoaki ngkami n te taamnei ae raoiroi.’+ 17 Mangaia are ngkana e angania te Atua te bwaintituaraoi ae akea boona are e anganira naba ngaira aika ti kakoauaa te Uea ae Iesu Kristo, ao antai ngai bwa N na tuka te Atua mani karaoan nanona?”*+
18 Ngke a ongo baikai, ao a a kariaia* ma n neboa te Atua ni kangai: “Nanona e a tia te Atua n angania naba aomata aika tiaki I-Iutaia aia tai n rairi nanoia bwa a aonga ni maiu.”+
19 Ao te koraki ake a kamaenakoaki+ n te karawawataaki are ueke imwini maten Tetebano, a rokoroko naba i Boinike ao i Kubero ao i Antioka, ma a tii tataekina te rongorongo nakoia I-Iutaia.+ 20 Ma iai i buakoia te koraki anne, tabeman mwaane mai Kubero ao Kurene ake a roko i Antioka ao a moana aia taetae nakoia aomata ake a kabongana te taetae ni Kuriiti, n tataekina te rongorongo ae raoiroi ae taekan te Uea ae Iesu. 21 Ao e mena bain Iehova* irouia, ao e a korakora mwaitiia aomata ake a a riki bwa taan onimaki ake a a rairaki nakon te Uea.+
22 A ongo taekaia naakai kaain te ekaretia are i Ierutarem, ao a kanakoa Barenaba+ nako Antioka. 23 Ngke e a roko Barenaba ma n nora ana akoi ae rianako te Atua, ao e kimwareirei iai ao e a kaungai nanoia ni kabane bwa a na teimatoa ni kakaonimaki nakon te Uea ma nanoia ni koaua.+ 24 Bon te mwaane ae raoiroi Barenaba ae on n te taamnei ae raoiroi ao e korakora ana onimaki, ao ibukin anne a a mwaiti aomata aika kakoauaa te Uea.+ 25 Mangaia are e nako Tareto teuaei bwa e na ukoukora Tauro.+ 26 Ngke e a reke irouna ao e kairia nako Antioka. Ngaia are a ikotaki ma ngaiia n te ekaretia i nanon teuana te ririki ae bwanin, ao a reireinia aomata aika uanao. A moan aranaki taan rimwin Iesu bwa Kristian,+ i Antioka man ana babaire te Atua.
27 Ni boong akanne ao a mwananga burabeti+ mai Ierutarem nako Antioka. 28 E teirake temanna i buakoia ae arana Akabo+ ao rinanon te taamnei ae raoiroi e taetae ni burabetina ae e nang roko te rongo ae korakora n te aonnaba+ ni kabutaa, ae e boni koro bukina n ana tai Keraurio. 29 Mangaia are a baireia taan rimwin Iesu bwa a na kanakoa aia ibuobuoki+ n aron are a kona ni karekea+ n tatabemania nako, nakoia taari ake a maeka i Iutaia, 30 ao a karaoa aei ni kanakoi nakoia unimwaane, ni baia Barenaba ma Tauro.+