2 Rongorongo

26 Ao a bane kaain Iuta n anaa Utia+ are ai 16 ana ririki, ao a kaueaa n onea mwin tamana are Amatia.+ 2 E a manga katea Erota+ ao e kaokia nako Iuta imwini kaiiakin te uea* i rarikia ana bakatibu.+ 3 Bon 16 ana ririki Utia+ ngke e riki bwa te uea, ao e tautaeka i Ierutarem i nanon 52 te ririki. Aran tinana Iekoria ae kaain Ierutarem.+ 4 E teimatoa ni karaoa ae eti i matan Iehova, n aron are e karaoia tamana are Amatia.+ 5 Ao e teimatoa teuaei n ukoukora te Atua n ana bong Tekaria, are e reireinna bwa e na maaka te Atua ae koaua. N te tai are e ukoukora iai Iehova ao te Atua ae koaua e katoronibwaia teuaei.+

6 E otinako ao e buakania I-Biritia+ ao e kabwangabwangaa ooni Kate,+ oon Iabenea,+ ao oon Atoto.+ Imwina ao e katei kaawa n aonon Atoto ao i buakoia I-Biritia. 7 E teimatoa te Atua ae koaua ni buoka teuaei ni kaaitaraia I-Biritia, ao ni kaaitaraia I-Arabia+ ake a maeka i Kurabaara, ao ni kaaitaraia taiani Meunim. 8 Ao a anga aia angabwai tibun Ammon+ nakon Utia. N tokina ao e a butanako kakannatona ao e rokoroko i Aikubita, bwa e a rangi ni bati korakorana. 9 Irarikin anne, e katei taua+ i Ierutarem Utia i rarikin te Mataroa ae te Maninganinga,+ te Mataroa ae te Mwarua,+ ao Bouan te Oo, ao e katei nonoia. 10 E katei naba taua+ n te rereua, ao e keni* mwarua n ran aika bati (bwa a bon rangi ni bati ana nanai ni man). E karaoa naba anne n te Tiebira* ao n te tabo ae aoraoi.* Iai ana tia ununiki ao ana tia ribanaa te kureebe n taiani maunga ao i Karemera, bwa e tangira te ununiki.

11 Irarikin anne, iai ana taanga ni buaka Utia ae taubobonga nakon te buaka. A nanako ni buaka n aia koraki aika kakaokoro nako aika baireaki. A warekaki ao a koreaki araia+ iroun Ieeiera are te tia koroboki+ ao Maateia are te mataniwi, i aan ana kairiri Aanania, are temanna irouia ana aomata te uea ake tooka. 12 Mwaitiia ni kabane mataniwi i aoia aia koraki mairoun tamaia, ake a kairiri i aoia taani buaka aika korakora aikai bon 2,600. 13 Mwaitiia kaain te taanga ni buaka aika taubobonga raoi ake a mena i aan aia kairiri naakai bon 307,500 mwaane aika tauraoi nakon te buaka, ae te taanga ni buaka ae rangi ni korakora ae e na boutokaa te uea ni kaitaraa aiana.+ 14 E kataubobongaia kaain te taanga ni buaka ni kabane Utia n taian otanga, kainiwai,+ taiani bwara ni buaka, kunnikai ni buaka,+ kainikatebe, ao taiani bana.+ 15 Irarikina, e karaoi naba mitiin ni buaka i Ierutarem aika karaoaki irouia mwaane aika mwaatai. A katokaaki baikai i aon taian taua+ ao i aoni maninganingan oon te kaawa, ao a kona ni katebenakoi kanoan taiani kainikatebe ma atibu aika totoa. Mangaia are e a butanako kakannatona nako kiraroa ma n raababanako, bwa e karekea te ibuobuoki ae moan te bati ao e a korakora.

16 Ma n te tai are e a korakora iai ao e a kainikatonga naba nanona ni karekea oini kamaunaana, ao e aki kakaonimaki nakon Iehova ae Atuana n arona n rin n ana tembora Iehova, bwa e na kabueki baika boiarara i aoni baonikareani baika boiarara.+ 17 E aki tabwara Ataria are te ibonga* ao 80 riki ana ibonga Iehova aika ninikoria, ma a a bon rin naba n rimwina. 18 A kaitaraa te Uea ae Utia ao a taku nakoina: “Utia, e aki riai bwa ko na kabueki baika boiarara nakon Iehova!+ Bon tii ibonga aika riai ni kabueki baika boiarara, bwa boni kanoan Aaron+ ngaiia, ae te koraki ae a a tia ni katabuaki.* Otinako man te tabo ae tabu, bwa ko a tia n aki kakaonimaki, ao akea karineam ae e na reke mairoun Iehova ae te Atua ibukin aei.”

19 Ma e a rangi n un Utia ao iai i baina te baan ibukini kabuekani baika boiarara+ bwa e na kabuekia, ao ngke e a rangi n un irouia ibonga, ao e a riki naba te rebera+ i ramwana i mataia ibonga n ana auti Iehova, i rarikini baonikareani baika boiarara. 20 Ngke a a rairaki nakon teuaei Ataria are te mataniwi n ibonga* ma ibonga ni kabane, ao a a noria bwa e a rebera ramwana! Ngaia are a ienikuria ni kaotinakoa mai ikekei, ao ngaia e kawaekoaa n otinako, ibukina bwa e a oreia Iehova.

21 E teimatoa n riki te Uea ae Utia bwa te rebera ni karokoa te bong are e mate iai, ao e teimatoa n tiku n te auti ae kaokoro ngkai te rebera ngaia,+ bwa e a tia ni kamwawaaki man ana auti Iehova. E mataniwi i aon ana auti* te uea natina are Iotam, ni momotiki taekaia kaain te aba.+

22 Ao nikiran rongorongon Utia, mai moana ni karokoa tokina, a koreaki mwia iroun te burabeti are Itaia+ are natin Amoti. 23 Ao e a wene ni motirawa Utia i rarikia ana bakatibu, ao a kaiia i rarikia ana bakatibu, ma a kaiia n te tawaana i tinanikuni nneni kaweneaia ueea ake a mate, bwa a taku: “Bon te rebera teuaei.” Ao e a riki natina are Iotam+ bwa te uea n onea mwina.