Taian Areru
Te kaetieti nakon te mataniwi* n te anene: E na raonaki te anene ni bwaai ni katangitang aika iai karaiia. Ana anene Tawita.
4 Ngkana I wewete, ao kaekaai ngkoe ae Atuau ae ko raoiroi.+
Karekea kawaiu ni birinako* man rawawatau.
Ko na akoai ao ongo n au tataro.
2 Ngkami aika natiia aomata, kam na maanra riki ni bita karineau nakoni kamaamaeau?
Kam na maanra riki n tangira te bwai ae akea manenana ao n ukoukora te kewe? (Tiera)
3 Kam na ataia bwa e na kaotiota te akoi Iehova nakon ane e kakaonimaki ni koaua nakoina,*
Ao e na ongo Iehova ngkana I weteia.
4 Kam na un, ma tai bure iai.+
Kam na taetae i nanomi, i aoni nnemi ni wene, ao teimatoa ni kainabwabu. (Tiera)
5 Kam na anga taiani karea aika raoiroi,
Ao onimakina Iehova.+
6 A bati aika a kangai: “Antai ae e na kaota te bwai teuana ae raoiroi nakoira?”
Ke e oota i aora ootan ubum, ngkoe ae Iehova.+
7 Ko kakimwareireia nanou n te kimwareirei ae rangi ni bati riki
Nakoni kimwareireia te koraki ake a taia te uita* ae bati, ao e bati aia wain ae boou.