Ieremia

32 Te taeka ae roko iroun Ieremia mairoun Iehova n ana ka-10 n ririki n tautaeka Tetekia are Uean Iuta, n ana ka-18 n ririki n tautaeka Nebukaneta.*+ 2 N te tai anne ao a otabwaninia Ierutarem ana taanga ni buaka ueani Baburon, ao Ieremia are te burabeti e kabureaki irouia taani kaburebure n te auti teuana n Aia Katawanang Taan Tantani+ ae nim ma ana baareti uean Iuta. 3 Bwa e kaburea ikekei Tetekia ae Uean Iuta+ ma ni kangai, “E aera ngkai ko taetae ni burabeti n aron aei? Ko kangai, ‘E kangai ana taeka Iehova: “N na anga te kaawa aei nako nanoni bain ueani Baburon, ao e na taua,+ 4 ao e na aki reke rabanakon Tetekia ae Uean Iuta mairouia I-Kareria, bwa e na bon anga te aba teuaei nako nanoni bain ueani Baburon, ao e na taetae nakoina n itaramata ma ngaia, ao matana a na bon nori matan teuaei.”’+ 5 ‘E na boni kairaanako Tetekia nako Baburon, ao e na tiku ikekei ni karokoa ae I mutiakinna,’ bon ana taeka Iehova. ‘E ngae ngkana kam teimatoa ni buakania I-Kareria ma kam na bon aki tokanikai.’”+

6 E taku Ieremia: “E roko ana taeka Iehova irou, ae kangai, 7 ‘Noria ane e na roko iroum Anamera are natin ai tamam* are Tiarum ao e na kangai: “Kabooa au tawaana are i Anatota bwa am tawaana,+ ibukina bwa boni ngkoe ae iai riaim moa ni manga kabooa.”’”+

8 Ao e a roko irou Anamera are natin ai tamau, n aron are e taku Iehova, nako nanon Aia Katawanang Taan Tantani, ao e taku nakoiu: “Taiaoka ma kabooa au tawaana are i Anatota, are n abani Beniamin, bwa boni ngkoe ae iai riaim n abanna ao ni manga kabooa. Kabooa bwa abam.” Ao I a ataia bwa te baei bon ana taeka Iehova.

9 Mangaia are I kabooa te tawaana are i Anatota mairoun Anamera are natin ai tamau. I katinea te mwane+ nakon teuaei, ae itiua te tiekera* ao tebwina te mwakoro n tirewa. 10 Ao I korea mwina n te beeba ni kakoaua,+ I kanimwa te bwai ni kanikina, ao I weteiia taani kakoaua,+ ao I katinea te mwane n te kainikatine. 11 I anaa te beeba ni kakoaua ibukin te kabooaba, are e kanikinaeaki ni kainaki ni kaineti ma te tua ao taiani kaetieti aika riai i aan te tua, ao n ikotaki naba ma are e aki kanikinaeaki ni kainaki, 12 ao I anga te beeba ni kakoaua ibukin te kabooaba nakoni Baruka+ are natin Neria+ are natini Mateia, i matan Anamera are natin ai tamau, taani kakoaua ake te koraki ake a tiaaina n te beeba ni kakoaua ibukin te kabooaba, ao I-Iutaia ni kabane ake a tekateka n Aia Katawanang Taan Tantani.+

13 Ao I tua nakoni Baruka i mataia, ni kangai: 14 “E kangai ana taeka Iehova ae Atuaia taanga ni buaka,* ae Atuan Iteraera, ‘Anai beeba ni kakoaua aikai, ae te beeba ni kakoaua ibukin te kabooaba are kanikinaeaki ao are teuana are aki kanikinaeaki, ao kaaki i nanon te kaatibu, bwa a aonga ni kawakinaki i nanon te tai ae maan.’ 15 Bwa e kangai ana taeka Iehova ae Atuaia taanga ni buaka, ae Atuan Iteraera, ‘A na manga kabooaki auti ma tawaana ao taiani nne ni kureebe n te aba aei.’”+

16 Ao imwin anganakini Baruka are natin Neria te beeba ni kakoaua ibukin te kabooaba, ao I tataro nakon Iehova ni kangai: 17 “Akea ngai, ngkoe ae te Uea ae Moan te Rietata ae Iehova! Noria! Ko karaoa karawa ma aonnaba ni mwaakam ae korakora+ ao ni baim ae aroraki. Akea te bwai ae aki kona ni karaoaki iroum, 18 ngkoe are Teuare ko kaotiota te tangira ae koaua* nakoia nga ma nga, ma ni kabooi mwin aia bure taama irouia* natiia ake imwia,+ ngkoe ae te Atua ae koaua, are Teuare kakannato ma ni korakora ae arana Iehova ae Atuaia taanga ni buaka. 19 Ko kakannato n am reirei ni kairiri* ao ko korakora n am mwakuri,+ ngkoe ae a taratarai raoi aroia nako aomata matam,+ bwa ko na angan temanna ma temanna ni kaineti ma kawaina nako ao ni kaineti ma te bwai ae e karaoia.+ 20 Ko karaoi kanikina ma kakai n te aba ae Aikubita, aika ataaki ni karokoa te bong aei, ao ko karekea atongan aram i Iteraera ao i buakoia aomata,+ n aron ae riki n te bong aei. 21 Ao ko kairiia am aomata aika tibun Iteraera ni kaotinakoia man te aba are Aikubita, ni kanikina ma kakai, ao n te bai ae korakora, ao n te bai ae aroraki, ao ni mwakuri aika kakamaaku.+

22 “Imwina riki ao ko a angania te aba aei are ko taetae n tuea bwa ko na angania aia bakatibu,+ ae te aba ae raanga iai rannimamman te man ma aia karewe manibeeru.*+ 23 Ao a rin iai ao a abanna, ma a aki ongo ni bwanaam ke ni kakairi n am tua. A aki karaoa te bwai teuana ae ko tua nakoia bwa a na karaoia, n te aro are ko a karokoa te kabuanibwai aei ni kabane i aoia.+ 24 Noria! A a roko rorobuaka ma ni katei noono ni buaka bwa a na taua te kaawa,+ ao e na boni bwaka te kaawa nako nanoni baia I-Kareria ake a buakanna, ibukin te kabaang+ ma te rongo ma te aoraki ae kamamate,+ bwa a a bane n riki baike ko taekin, n aron ae ko noria. 25 Ma ko tuangai ae kangai, ngkoe ae te Uea ae Moan te Rietata ae Iehova, ‘Kabooa am tawaana n te mwane ao weteiia taani kakoaua,’ e ngae ngke e na bon anga te aba te kaawa nako nanoni baia I-Kareria.”

26 Ao e roko ana taeka Iehova iroun Ieremia, ae kangai: 27 “Aio ngai ae Iehova ae Atuaia aomata ni kabane.* Te koaua bwa iai te bwai ae aki kona ni karaoaki irou? 28 Mangaia ae e kangai ana taeka Iehova, ‘Ae I a anga te kaawa aei nako nanoni baia I-Kareria ao nako nanoni bain Nebukaneta* are Ueani Baburon, ao e na taua.+ 29 Ao a na rin I-Kareria ake a buakana te kaawa aei ao a na kauraa te kaawa aei ao ni kabuekia ni kabwakaa+ n ikotaki ma autina ake a angakarea aomata i aon taubukia nakoni Baara, ao ni kabwaroa iai te karea ae te moi ni karean nakoia atua riki tabeman ni kaunai iai.’+

30 “‘Bwa a tii kakaraoa ae buakaka i matau tibun Iteraera ao tibun Iuta, ni moa man aia tai n roro n rikirake,+ ao a teimatoa tibun Iteraera ni kaunai n aia mwakuri baia,’ bon ana taeka Iehova. 31 ‘Bwa bon akea uaan te kaawa aei man te bong are a kateia iai ni karokoa te bong aei, ma tii bwaini kaunau ao kammarakan nanou,+ n te aro are e a riai ni kanakoaki mai matau,+ 32 ibukin te buakaka ni kabane are a karaoia tibun Iteraera ma tibun Iuta ni kaunai iai, ngaiia ma aia uea,+ aia toka,+ aia ibonga,* aia burabeti,+ mwaane aika tibun Iuta, ao ai kaain Ierutarem. 33 A teimatoa n anga akuia nakoiu, ao tiaki moaia,+ e ngae ngke I kataia n okioki n reireinia,* ma bon akea i buakoia ae e kakauongo bwa e na butimwaea te reirei ni kaetieti.+ 34 Ao a kaaki aia bouannanti aika kamwara n te auti are e kaotaki iai arau, bwa a aonga ni kamwaraea.+ 35 Irarikin anne, a katei ana tabo Baara aika rietata n ana Mwarua Natin Innom*+ bwa a aonga ni kabuekiia natiia mwaane ma natiia aine n te ai* nakoni Moreka,+ ae te bwai ae I aki tua nakoia+ ao e aki naba rin i nanou* bwa a na karaoa te aeka ni bwai ane riribaaki anne, ao ni karekeia iai kaain Iuta n te bure.’

36 “Mangaia ae e kangai ana taeka Iehova ae Atuan Iteraera ni kaineti ma te kaawa aei, are kam taku bwa e na anga te aba nako nanoni bain ueani Baburon n te kabaang, n te rongo, ao n te aoraki ae kamamate, 37 ‘Noria, N na ikotiia man aaba ni kabane ike I kamaenakoia nako iai ni bonon nanou ao ni marakin nanou ao n uniu ae korakora,+ ao N na kairiia ni kaokiia nakon te tabo aei ao ni kariaia bwa a na maeka ma te mweraoi.+ 38 Ao a na riki bwa au aomata, ao N na riki bwa Atuaia.+ 39 Ao N na angania te nano ae tii teuana+ ao te aro ae tii teuana, bwa a aonga ni maakai n taai nako bon ibukini kabwaiaia ma kabwaiaia natiia ake imwia.+ 40 Ao N na karaoa te berita ae akea tokina ma ngaiia,+ ae N na aki katoka karaoan ae raoiroi nakoia,+ ao N na karina maakakiu i nanoia, bwa a aonga n aki rairakinako mairou.+ 41 N na kakatonga irouia ni karaoa ae raoiroi nakoia,+ ao N na unikiia ni kamatoaia n te aba aei,+ ma nanou ni kabane ao korakorau ni kabane.’”

42 “Bwa e kangai ana taeka Iehova, ‘N aron ae I karokoa i aoia aomata aikai te kabuanibwai aei ni kabane, ao ai arona naba bwa N na karokoa i aoia te kakabwaia* ni kabane ae I beritanna nakoia.+ 43 Ao a na manga kabooaki tawaana n te aba aei,+ e ngae ngke kam kangai: “Ai bon te aba ae aki kona ni maekanaki ae akea te aomata iai ma te man, ao e a tia n anga te aba nakoia I-Kareria.”’

44 “‘A na kabooaki tawaana n te mwane, ao a na tauaki mwini beeba ni kakoaua ibukin te kabooaba ma ni kanikinaeaki, ao a na weteaki taani kakoaua ake n abani Beniamin,+ ao n taabo ake i rarikin Ierutarem, ao ni kaawa ake i Iuta,+ ao ni kaawa ake n te aono ae maungaunga, ao ni kaawa ake n te aba ae aoraoi,+ ao ni kaawa ake i maiaki, ibukina bwa N na kairiia ni kaokiia aia taenikai,’+ bon ana taeka Iehova.”