Taniera

3 Ao e karaoa te boua* ae te koora te uea ae Nebukaneta, ae 60 te mwanokunibai* rietana ao 6 te mwanokunibai* raababana. E kateia i aon te tabo ae aoraoi ae Ruura n aononi* Baburon. 2 E kanakotaeka ngkanne te Uea ae Nebukaneta bwa a na ikotaki taian teterabi,* taani babaire n te tautaeka, kowana, taan anga te taeka n reirei, taani kawakina te mwane, taani moti, bureitiman, ao taan tararua ni kabane n taian aono,* bwa a na roko nakoni katabuan te boua are e kateia te Uea ae Nebukaneta.

3 Mangaia are a a ikotaki taian teterabi, taani babaire n te tautaeka, kowana, taan anga te taeka n reirei, taani kawakina te mwane, taani moti, bureitiman, ao taan tararua ni kabane n taian aono,* nakoni katabuan te boua are e kateia te Uea ae Nebukaneta. Ao a tei i matan te boua are e kateia Nebukaneta. 4 Ao e takarua te tia tuatua ni katanoata ni kangai: “E tua te aba nakoimi ngkami aika botannaomata, natannaomata, ao taian taetae, 5 bwa ngkana kam ongo tangin te buu ae te koro, te kaibwabwaa, te abi ae uarereke, bwaai ni katangitang aika kakaokoro aika iai karaiia, te kaibwabwaa ae bubura, ao ai bwaai ni katangitang n aekaia nako, ao kam riai ni katorobubua ni bobaraaki ma n taromauria te boua are te koora are e kateia te Uea ae Nebukaneta. 6 Ane e aki katorobubua ni bobaraaki ao n taromauri, ao e na karenakoaki ngkai naba nako nanoni nnen te ai ae uramwaaka.”+ 7 Mangaia are ngke a a ongo botannaomata ni kabane tangin te buu ae te koro, te kaibwabwaa, te abi ae uarereke, bwaai ni katangitang aika kakaokoro aika iai karaiia, ao ai bwaai ni katangitang n aekaia nako, ao a a bane naba botannaomata, natannaomata, ao taian taetae, ni katorobubua ni bobaraaki ao n taromauria te boua ae te koora are e kateia te Uea ae Nebukaneta.

8 N te tai anne ao a keerake I-Kareria tabeman ao a bukinia* I-Iutaia. 9 A taku nakon te Uea ae Nebukaneta: “Te uea, ko bia maiu n aki toki. 10 Ngkoe ae te uea, ko tua bwa aomata nako ake a ongo tangin te buu ae te koro, te kaibwabwaa, te abi ae uarereke, bwaai ni katangitang aika kakaokoro aika iai karaiia, te kaibwabwaa ae bubura, ao ai bwaai ni katangitang n aekaia nako, ao a riai ni katorobubua ni bobaraaki ao n taromauria te boua ae te koora. 11 Ao ane e aki katorobubua ni bobaraaki ao n taromauri, e riai ni karenakoaki nako nanoni nnen te ai ae uramwaaka.+ 12 Ma iai I-Iutaia tabeman ake ko mwiokoiia bwa a na tararuaa aononi* Baburon aika Tiateraka, Metiaka, ao Abeteneko.+ Te uea, a aki mutiakiniko mwaane aikai. A aki toro irouia atuam, ao a rawa n taromauria te boua ae te koora are ko kateia.”

13 Ao e tua Nebukaneta ma te un ae korakora bwa a na kairaki Tiateraka, Metiaka, ao Abeteneko. Ngaia are a a kairaki mwaane aikai nako matan te uea. 14 E taku Nebukaneta nakoia naakai: “Bon te koaua ngkami aika Tiateraka, Metiaka, ao Abeteneko, bwa kam aki toro irouia atuau,+ ao kam rawa n taromauria te boua ae te koora are I kateia? 15 Ngaia are ngkana kam a tauraoi ni katorobubua ni bobaraaki ao n taromauria te boua ae I karaoia n te tai are kam ongo iai tangin te buu ae te koro, te kaibwabwaa, te abi ae uarereke, bwaai ni katangitang aika kakaokoro aika iai karaiia, te kaibwabwaa ae bubura, ao ai bwaai ni katangitang n aekaia nako, ao e raoiroi. Ma ngkana kam rawa n taromauri, ao kam na boni karenakoaki ngkai naba nako nanoni nnen te ai ae uramwaaka. Ao antai te atua ae kona ni kamaiuingkami mai nanoni baiu?”+

16 Ao a kaekaa te uea ni kangai Tiateraka, Metiaka, ao Abeteneko: “Ngkoe ae Nebukaneta, akea bukina ae ti na kaekako iai n taekan te baei. 17 Ngkana ngaia anne te uea, ao e boni kona Atuara ae ti toro irouna ni kamaiuira mani nnen te ai ae uramwaaka, ao ni kamaiuira naba mai nanoni baim.+ 18 Ma ngkana e aki, ao ke e ataaki iroum te uea, bwa ti na bon aki toro irouia atuam ke n taromauria te boua ae te koora are ko kateia.”+

19 Ao e a rangi n un Nebukaneta irouia Tiateraka, Metiaka, ao Abeteneko, n te aro are e a bitaki* tein ubuna nakoia naakai, ao e a tua bwa e na karakaaki riki kabuebueni nnen te ai arei itiua te tai nakon are bon arona. 20 Ao e tua nakoia mwaane tabeman aika korakora man ana taanga ni buaka bwa a na kabaeia Tiateraka, Metiaka, ao Abeteneko, ao a na karenakoia nako nanoni nnen te ai ae uramwaaka.

21 Ngaia are a a kabaeaki mwaane aikai ma aia kauaatao i aoia, kunnikaia, bwaraia, ao ai kunnikaia riki ake tabeua, ao a a karenakoaki nako nanoni nnen te ai ae uramwaaka. 22 Ibukina bwa e rangi ni matoatoa te bwai are e tua te uea ao e a rangi n riao kabuebueni nnen te ai, ao a a mate n uran te ai mwaane ake a kairiia Tiateraka, Metiaka, ao Abeteneko. 23 Ma a bwaka ni bae i nanoni nnen te ai ae uramwaaka mwaane aika teniman aikai aika Tiateraka, Metiaka, ao Abeteneko.

24 Ao e a maaku te Uea ae Nebukaneta ao e waekoa n teirake ao e taku nakoia ana mataniwi aika rietata: “Tiaki ti kabaeia mwaane aika teniman ao ti karenakoia nako nanon te ai?” A kaekaa te uea ni kangai: “Eng, te uea.” 25 E taku: “Taraia! I a noriia mwaane aika aman n ririaki i buakon te ai ao a a bwara, ao akea ikoakia, ao are te kaaman, kaanga taraan temanna natiia atua.”

26 E keerake Nebukaneta nakoni mataroani nnen te ai ae uramwaaka ao e taku: “Tiateraka, Metiaka, ao Abeteneko, ngkami aika ana toro te Atua ae Moan te Rietata,+ otinako ao nakomai!” Ao a otinako Tiateraka, Metiaka, ao Abeteneko, mai buakon te ai. 27 Ao a noria taian teterabi, taani babaire n te tautaeka, kowana, ao ana mataniwi aika rietata te uea ake a ikotaki ikekei+ bwa akea rotakin rabwataia mwaane aikai n te ai,*+ ao e aki roko n te bue irannatuia teaina, ao a aki bue aia kauaatao ao a aki naba buaiai teutana.

28 E taekina ngkanne ae kangai Nebukaneta: “E na karaoiroaki Atuaia Tiateraka, Metiaka, ao Abeteneko,+ are e kanakoa ana anera ao e kamaiuia ana toro. A onimakinna ao a ekaanako te baere e tua te uea, ao a kukurei riki ni mate* nakon ae a na toro ke n taromauria te atua temanna, ma tii Atuaia.+ 29 Mangaia ae I tua bwa ngkana iai botannaomata, natannaomata, ao taian taetae, aika a taekina te bwai teuana n ekaanako Atuan Tiateraka, Metiaka, ao Abeteneko, ao a riai ni korokoreaki rabwataia ni kamaenakoaki, ao a na riki aia auti bwa aia tabo n nakotaari* aomata, bwa akea riki te atua temanna ae ai aron aei ae e kona ni kakamaiu.”+

30 Ao te uea e karikirakeia* Tiateraka, Metiaka, ao Abeteneko, n aononi* Baburon.+