2 Rongorongo

8 Ni banen ririki aika 20 are e katea iai Toromon ana auti Iehova ao bon oin ana auti,*+ 2 ao Toromon e a manga katei kaawa ake e anga Iram+ nakon Toromon, ao e kamaekaia iai tibun Iteraera. 3 Irarikin anne ao e nako Toromon nako Amatatobaa ao e taua. 4 Ao e katea* Tatemora n te rereua ma kaawa ni kaikobwai ni kabane+ ake e katei i Amata.+ 5 E katea naba Betaoron+ are mai Eta ao Betaoron are mai Nano,+ aika kaawa aika nonoaki aika iai ooia, mataroan ooia, ao kaini kamatoaaia, 6 ao Baarata+ n ikotaki naba ma ana kaawa ni kaikobwai ni kabane Toromon, kaawa ni kabane ake nnen taiani kaa ni buaka,+ kaawa ake nneia taan toka i aoia aoti, ao bwaai ake e kani katei Toromon i Ierutarem, i Rebanon, ao n aaba ni kabane ake e tautaekan.

7 Ni kaineti ngkanne ma aomata ni kabane ake nikiraia tibun Eta, taian Amoraite, taiani Beritaite, taian Iwaite, ao I-Iebuti,+ ake tiaki tibun Iteraera,+ 8 ake kanoaia ake a tiku n te aba, ake te koraki ake a aki kamaunaaki irouia tibun Iteraera,+ e a tua Toromon bwa a na mwakuri ibukina, ni karokoa te bong aei.+ 9 Ma e aki karekeia tooro Toromon mai buakoia tibun Iteraera ibukin ana mwakuri,+ bwa a riki bwa ana tia buaka, mataniwi i aoia mataniwia ana taanga ni buaka, ao mataniwia ana tia toka i aoni kaa ni buaka ma ana tia toka i aoia aoti.+ 10 Ao iai 250 mataniwi i aoia ana mataniwi te Uea ae Toromon, ake taani kairiri i aoia aomata.+

11 Ao Toromon e kaira naba natini Barao te aine+ ni waerake man Ana Kaawa Tawita nakon te auti are e kateia ibukin neiei,+ bwa e kangai teuaei: “E ngae ngke buu neiei, ma e aki riai ni maeka n ana auti te Uea are Tawita are uean Iteraera, bwa a tabu taabo ake e roko iai ana Ati Iehova.”+

12 E a anga ngkanne taiani karea ni kabuekaki+ Toromon nakon Iehova i aon ana baonikarea Iehova+ are e kateia i moan te kaman.*+ 13 E kakairi naba n taiani babaire ni katoabong ao e anga taiani karea ni kaineti ma te tua rinanoni Mote ibukini boongi n Taabati,+ bongin nako otin namwakaina,+ ao tooa ake a baireaki ake tenua te tai n te ririki,+ are te Toa ae te Bwerena ae Aki Karikaki,+ te Toa ae Taiani Wiki,+ ao te Toa ae Umwanrianna.*+ 14 Irarikin anne, e bairei naba aia koraki nako ibonga*+ ni kaineti ma ana tua tamana are Tawita, ao tibun Rewi ibukin aia tabo ake a na beku iai, bwa a na karaoiroa+ te Atua ao ni beku i mataia ibonga ni kaineti ma aroni baireana ni katoabong, ao taan teiakina mataroan te oo n aia koraki nako ibukini mataroan te oo aika kakaokoro nako,+ bwa anne are e tua Tawita are ana aomata te Atua ae koaua. 15 Ao a aki rairakinako man ana tua te uea nakoia ibonga ao tibun Rewi, ni kaineti ma bwaai nako ke ni kaineti ma auti ni kaikobwai. 16 Mangaia are a bane ni barongaaki raoi* ana mwakuri Toromon man te bong are e kaweneaki iai aan ana auti Iehova+ ni karokoa tiana. Mangaia are e a tia ana auti Iehova.+

17 N te tai anne ao e a nako Toromon nako Etionkebera+ ao nako Erota,+ i mataniwin te aba n te aba ae Etom.+ 18 E kanakoi kaibuke nakoina Iram+ ma kaimoa aika mwaatai rinanoia ana toro. A nako naakai ma ana toro Toromon nako Obira,+ ao a anaa mai ikekei 450 te tarena* ni koora+ ao a uotia nakon te Uea are Toromon.+