Ioane

14 “Tai karawawatai nanomi.+ Onimakina te Atua+ ao onimakinai naba. 2 A mwaiti taabo ni maeka n ana auti Tamau. N na aki tuangingkami ngke arona bwa tiaki te koaua, ma e boni koaua ibukina bwa N nangi nako ni katauraoa te tabo ibukimi.+ 3 Ao ngkana I nako ni katauraoa te tabo ibukimi, ao N na manga roko ni butimwaeingkami, bwa ike I mena iai ao kam na mena naba iai.+ 4 Ao kam ataa te kawai are N na nako iai.”

5 E taku Toma+ nakoina: “Te Uea, ti aki ataa ike ko na nako iai. Ti na kangaa n ataa te kawai?”

6 E taku Iesu nakoina: “Boni ngai te kawai+ ao te koaua+ ao te maiu.+ Akea ae e na nakon te Tama ma tii ane e rirou.+ 7 Ngkana kam ataai, ao kam na ataa naba Tamau. Mangkai ao kam a ataia ao kam a tia n noria.”+

8 E taku Biribo nakoina: “Te Uea, kaota te Tama nakoira ao e a tau naba ibukira.”

9 E taku Iesu nakoina: “Biribo, ko tuai man ataai e ngae ngke I a rangi ni maan i rarikimi? Ane e a tia n norai ao e a tia naba n nora te Tama.+ E aera ngkai ko kangai, ‘Kaota te Tama nakoira’? 10 Ko aki kakoauaa ae I katiteuanaaki ma te Tama, ao te Tama e katiteuanaaki ma ngai?+ Baike I atongi nakoimi, I aki taekin i bon irou,+ ma bon te Tama are e katiteuanaaki ma ngai ae e karaoi ana mwakuri. 11 Kakoauaai ngkai I taku bwa I katiteuanaaki ma te Tama, ao e katiteuanaaki te Tama ma ngai. Ma ngkana kam aki ao kakoauaa ibukin au mwakuri.+ 12 I tuangingkami raoi te koaua, bwa ane e onimakinai ao e na karaoi naba mwakuri ake I karaoi, ao e na karaoi mwakuri aika kakannato riki nakon aikai,+ ibukina bwa I a nakon te Tama.+ 13 Ao te bwai naba ane kam bubutii n arau, ao N na karaoia, bwa e aonga n neboaki te Tama rinanon te Nati.+ 14 Ngkana kam bubutii te bwai teuana n arau, ao N na karaoia.

15 “Ngkana kam tangirai ao kam na kakairi n au tua.+ 16 Ao N na butiia te Tama ao e na anganingkami riki te tia ibuobuoki* ae e na memena iroumi n aki toki,+ 17 are te taamnei ae raoiroi ae kaota te koaua,+ ae a aki kona kaain te aonnaba ni karekea irouia, ibukina bwa a aki noria ao a aki ataia.+ Kam ataia ngkami ibukina bwa e titiku iroumi ao e mena i nanomi. 18 N na aki motika roomi.* N na boni manga roko iroumi.+ 19 Ai tii teutana riki ao a aikoa naba manga norai kaain te aonnaba, ma kam na norai+ ibukina bwa I maiu ao kam na maiu naba ngkami. 20 N te bong anne ao ane kam nang ataia bwa I katiteuanaaki ma Tamau, ao kam katiteuanaaki ma ngai ao I katiteuanaaki ma ngkami.+ 21 Ane e butimwaei au tua ma ni kakairi iai, ao e tangirai te aomata anne. Ao ane e tangirai e na tangiraki naba iroun Tamau, ao N na tangiria ao N na kaotai raoi nakoina.”

22 E taku nakoina Iuta+ are tiaki Itekariota: “Te Uea, tera ae riki ngkai ko nang kaotiko raoi nakoira ao tiaki nakoia kaain te aonnaba?”

23 E kaeka Iesu ni kangai nakoina: “Ngkana iai ae e tangirai, ao e na kakairi n au taeka,+ ao e na tangiria Tamau, ao ti na kawaria ao ti na maeka irouna.+ 24 Ane e aki tangirai ao e aki kakairi n au taeka. Te taeka are kam ongo tiaki au taeka, ma bon ana taeka te Tama are kanakomaiai.+

25 “I taekini baikai nakoimi ngkai I mena ma ngkami. 26 Ma e na reireiningkami bwaai ni kabane te tia ibuobuoki are te taamnei ae raoiroi are e na kanakomaia te Tama n arau, ma ni kauringingkami bwaai ni kabane ake I a tia n tuangingkami.+ 27 I katuka te rau iroumi, I anganingkami au rau.+ I aki anganingkami ni katotongia kaain te aonnaba ngkana a anga. Tai kariaia nanomi bwa a na rawawata ke ni maaku. 28 Kam ongo ngkoa are I kangai nakoimi, ‘N na nako ao I a manga okiringkami.’ Ngkana kam tangirai ao kam na kimwareirei bwa I a nakon te Tama, bwa e kakannato riki te Tama nakoiu.+ 29 Mangaia are I a tia ngkai n tuangingkami imwain rikina, bwa e aonga n ae ngkana e riki, ao kam na kakoauai au taeka.+ 30 N na aki manga rangi n taetae ma ngkami, bwa e a nakomai te tia tautaekania kaain te aonnaba,+ ao akea mwaakana i aou.+ 31 Ma I karaoa nanon te tua are e anganai te Tama,+ bwa a aonga n ataia kaain te aonnaba ae I tangira te Tama. Teirake, ti a nako mai ikai.