Itaia
46 E katorobubua Bere+ ao e bobaraaki Nebo.
A katokaaki aia bouannanti i aoia maan, i aoia maan aika taan uabwai,+
N ai aron uota aika karawawataia maan aika kua.
2 A uaia ni bobaraaki ao ni katorobubua.
A aki kona ni kanakoi uota akekei*
Ao a kataenikaiaki ngaiia.
3 “Ongora irou ngkami aika tibun Iakoba, ao ngkami ni kabane aika nikiraia tibun Iteraera,+
Aika I boutokaingkami mangke kam bungiaki ao I uouotingkami mai nanon te biroto.+
4 N na aki bitaki ni karokoa ae kam kara.+
N na teimatoa n uouotingkami ni karokoa ae a iaia irami.
N na tabetabekingkami, N na uouotingkami, ao N na kamaiuingkami, n aron ae I a tia ni karaoia.+
5 Antai ae kam na iangoia bwa ai arou, ke ni katitebooai ma ngaia,+
Ke ni kabotauai ma ngaia, bwa ti aonga n titeboo?+
6 Bon iai te koraki aika kabatiaa ni kaotinakoa te koora man aia bwauti,
A katinea te tirewa n te kainikatine.
A kabooa ana mwakuri te tia mwakuria te biti, ao e karaoia bwa te atua.+
Ao a bobaraaki i aontano, eng, a taromauria.*+
7 A tabekia n aonnangaia+
Ao a uouotia ni kaaki n ana tabo, ao e a bon tei naba ikekei.
E aki kakammwakuri man ana tabo.+
A tang n takarua nakoina, ma e aki kaeka.
E aki kona ni kamaiua temanna man te rawawata.+
8 Ururinga te baei ao kam na ninikoria.
Kaaki i nanomi ngkami aika taani bure.
9 Uringi baike rimoa* ake ngkoangkoa,
Ae bon te Atua ngai ao akea riki.
Bon te Atua ngai ao akea riki temanna ae ai arou.+
10 I a kamani kaotii tokini bwaai man te moantai,
Ao bwaai aika tuai n riki mangkoangkoa.+
11 I a wetea te mannikiba ae kaakang mai ike e oti iai taai,*+
Ao te aomata man te aba ae raroa bwa e na kakororaoa au babaire.*+
I a tia n taekinna ao N na boni karokoa.
I a tia ni baireia ao N na boni kakoroa naba bukina.+
12 Ongora irou, ngkami aika imanono* nanomi,
Aika kam raroanako man te raoiroi.
13 I uota au raoiroi ni kaania.
E aki raroanako,
Ao e na aki baenikai au kakamaiu.+
N na anga te kakamaiu i Tion ao tamaroau nakon Iteraera.”+