Taani Motikitaeka
14 E a ruo rikaaki ngkanne Tamton nako Tiimna, ao e nora te aine* temanna ae te I-Biritia i Tiimna. 2 Ao e waerake ao e tuanga tamana ma tinana ni kangai: “I nora te aine temanna ae te I-Biritia i Tiimna, ao I tangiringkami bwa kam na anaia bwa buu.” 3 Ma a taku tamana ma tinana nakoina: “E aki kona n reke iroum te aine temanna i buakoia am buu ao i buakoia ara koraki ni kabane?+ E riai bwa ko na nako ao ni karekea buum mai buakoia I-Biritia aika aki korotobibiaki?” Ma e taku Tamton nakon tamana: “Anaa neiei ibukiu, ibukina bwa bon te aine ae tau ibukiu.”* 4 A aki ataia tamana ma tinana ae mairoun Iehova te baei, bwa E ukoukora te anga ae e na ekiianako iai I-Biritia, bwa a tautaeka I-Biritia n te tai anne i aoia tibun Iteraera.+
5 Mangaia are e a ruo rikaaki Tamton ma tamana ao tinana nako Tiimna. Ngke e roko n taiani nne ni kureebe i Tiimna, ao akea bwa e a roko te raian temanna ni bekorara nakoina. 6 Ao taamnein Iehova e kakorakoraa teuaei+ ao e raeuaa te raian nakon uamwakoro, n aron te aomata ae raeuaa te kooti ae ataei nakon uamwakoro ni baina. Ma e aki tuanga tamana ma tinana te baere e a tia ni karaoia. 7 Ao e ruo rikaaki ao e taetae nakon te aine arei, ao e bon teimatoa naba neiei n riki bwa te aine ae tau i matan Tamton.+
8 Imwina riki ngke e a oki rikaaki bwa e na kaira neiei nakoni mwengana,+ ao e rairaki n taraa rabwatan te raian are mate, ao e mena te nna ni manibeeru ma aia karewe i rabwatan te raian are mate. 9 Mangaia are e kaara aia karewe manibeeru ni kanakoa nako nanoni baina ao e kanna ngke e nakonako. Ngke e a manga kaitiboo ma tamana ao tinana, ao e angania teutana bwa a na kanna. Ma e aki tuangia ae e kaara aia karewe manibeeru anne man rabwatan te raian are mate.
10 E ruo rikaaki taman teuaei nakon te aine arei, ao e karaoa te baka n amwarake Tamton ikanne, bwa anne ae a taneiai ni karaoia rorobuaka n ataei. 11 Ngke a nora teuaei aomata ao a kairiia mwaane aika 30 aika taani katoa bwa a na raonna. 12 E taku ngkanne Tamton nakoia: “Taiaoka ma kariaia bwa N na taekina nakoimi te kamwaninga teuana. Ngkana e reke iroumi i nanoni bongin te baka n amwarake aika itibong ao kam tuangai rekena, ao N na anganingkami kunnikai aika rinen aika 30, ao onea aika 30. 13 Ma ngkana kam aki kona n tuangai te reke, ao kam na anganai kunnikai aika rinen aika 30, ao onea aika 30.” Ao a taku: “Tuangira am kamwaninga, bwa ti kan ongo.” 14 Mangaia are e taku nakoia:
“E otinako te amwarake mairoun te tia amwarake,
Ao e otinako te bwai ae karewe mairoun ane e korakora.”+
Ao e aki kona n reke reken te kamwaninga irouia i nanon tenibong. 15 N te kaaua ni bong ao a taku nakoni buun Tamton: “Kamwanea buum+ bwa e aonga n tuangira reken te kamwaninga. Bwa ti kaawa ni kabuekiko ma ana auti tamam n te ai. Kam kaoira n nakomai bwa kam na anai ara bwai?” 16 Mangaia are e tang buun Tamton nakon teuaei ao e taku: “Ko ribaai ao ko aki tangirai.+ Ko taekina te kamwaninga nakoia au koraki, ma ko tuai n tuangai rekena.” Ao e taku nakon neiei: “Noria, I aki tuanga oin tamau ma tinau! E riai bwa N na tuangko?” 17 Ma e teimatoa n tang neiei nakon teuaei i nanon nikirani bongin te baka n amwarake ake itibong. N tokina ao e a tuanga neiei n te kaitiua ni bong, ibukina bwa e a rangi ni kammaraka nanona. Imwina ao neiei e a tuangia ana koraki reken te kamwaninga.+ 18 Mangaia are n te kaitiua ni bong imwaini bungin taai,* ao a taku mwaanen te kaawa nakoina:
“Tera ae karewe riki nakon aia karewe manibeeru,
Ao tera ae korakora riki nakon te raian?”+
E kaekaia ni kangai teuaei:
“Ngke kam aki kamarautano ma au kao aine ae ataei,+
Ao e na bon aki reke iroumi reken au kamwaninga.”
19 Ao taamnein Iehova e kakorakoraa teuaei,+ ao e ruo rikaaki nako Atikeron+ ao e kamateia aia mwaane aika 30, ao e anai aia kunnikai ao e anga onea aikai nakoia te koraki ake a kaekaa te kamwaninga.+ E rangi ni maraki nanona ao e waerake n oki rikaaki nakon ana auti tamana.
20 Ao buun Tamton+ e a riki bwa buun te mwaane temanna mai buakoia ana tia katoa ake a raonna.+