2 Rongorongo

6 N te tai anne ao e a taku Toromon: “Iehova, ko taku bwa ko na maeka n te rotongitong ae matenten.+ 2 Ao I a tia ni katea am auti ae karietataaki, ae te tabo ae teimatoa bwa ko na maeka iai n aki toki.”+

3 Ao e tanrikaaki te uea ao e taetae ni kakabwaiaia te botaki n aomata aika tibun Iteraera, ngke a a bane n teirake te botaki n aomata aika tibun Iteraera.+ 4 E taku teuaei: “E bia karaoiroaki Iehova ae Atuan Iteraera, are teuare berita n oini wina nakon tamau are Tawita, ao e a kakoroa bukina n oini baina ni kangai, 5 ‘Man te bong are I kairiia iai au aomata ni kaotinakoia man te aba ae Aikubita, ao I aki rinea te kaawa teuana mai buakon aia baronga nako tibun Iteraera ike N na katea iai te auti bwa e na mena iai arau,+ ao I aki rinea te mwaane temanna bwa e na riki bwa te tia kairiri i aoia au aomata aika tibun Iteraera. 6 Ma I rinea Ierutarem+ bwa e na mena iai arau, ao I rinea Tawita bwa e na kairiia au aomata aika tibun Iteraera.’+ 7 Ao iai nanon tamau are Tawita ni kani katea te auti ibukin aran Iehova ae Atuan Iteraera.+ 8 Ma e taku Iehova nakon tamau are Tawita, ‘Bon iai nanom ni kani katea te auti ibukin arau, ao ko karaoa ae raoiroi ngkai iai nanom iai. 9 Ma ko na bon aki katea te auti, ma natim te mwaane ae e na bungiaki* ae ngaia ae e na katea te auti ibukin arau.’+ 10 E a tia Iehova ni kakororaoa te berita are e karaoia, bwa I a tia n ruamwin tamau are Tawita ao I a tekateka i aoni kaintokanuean Iteraera,+ n aron are e beritanna Iehova.+ I a tia naba ni katea te auti ibukin aran Iehova ae Atuan Iteraera, 11 ao I kaaki iai te Ati are e mena i nanona te berita+ are e karaoia Iehova ma tibun Iteraera.”

12 Ao e tei i matan ana baonikarea Iehova i matan te botaki n aomata aika tibun Iteraera, ao e arori baina.+ 13 (Bwa e karaoa te tabo ae karietaaki Toromon ae te buraati ao e kaaki i nukan te katawanang.+ Bon nimaua te mwanokunibai* abwakina, nimaua te mwanokunibai raababana, ao tenua te mwanokunibai rietana, ao e tei i aona.) Ao e katorobubua i matan te botaki n aomata aika tibun Iteraera, ao e arori baina nako karawa,+ 14 ao e taku: “Ngkoe ae Iehova ae Atuan Iteraera, bon akea te Atua ae ai arom i karawa ke i aon te aonnaba, bwa ko kakawakina te berita ao ko kaotiota te tangira ae koaua* nakoia am toro aika nakonako i matam ma nanoia ni kabane.+ 15 Ko kakawakina te berita are ko karaoia nakon am toro are Tawita are tamau.+ Ko karaoa te berita anne n oini wim, ao ko kakoroa bukina n te bong aei n oini baim.+ 16 Ao ngkai ngkoe ae Iehova ae Atuan Iteraera, kawakina te berita are ko karaoia nakon am toro are Tawita are tamau, ngke ko kangai: ‘E na bon teimatoa n iai i matau temanna mani kanoam ae e na tekateka i aoni kaintokanuean Iteraera, tii ngkana a mutiakina aroia natim mwaane n nakonako n au tua,+ n aron are ko a tia n nakonako iai i matau.’+ 17 Ao ngkai ngkoe ae Iehova ae Atuan Iteraera, e bia kakoroaki bukin te berita are ko karaoia nakon am toro are Tawita.

18 “Ma te koaua bwa e na boni maeka te Atua ma aomata i aon te aba?+ Noria! E aki kona ni kamwaneauako karawa, eng, karawani karawa,+ ao ai karakora riki ngkanne mwaneauam n te auti ae I kateia aei!+ 19 Kakauongo ngkai n ana tataro am toro ao ana bubutii ni kan akoaki, ngkoe ae Iehova ae Atuau, ao ongora n te tang ni kani buokaki ao n ana tataro am toro ae tataroia i matam. 20 A bia ure matam nakon te auti aei ni ngaina ao ni bong, nakon te tabo are ko taku bwa ko na kaaki aram iai,+ bwa ko na ongora te tataro ae e tataroia am toro ni kaitaraa te tabo aei. 21 Ao ongora n ana onnon ni kani buokaki am toro ao n aia onnon am aomata aika tibun Iteraera ngkana a tataro ni kaitaraa te tabo aei,+ ao ko bia ongo man am tabo ni maeka mai karawa,+ eng ko bia ongo ao ni kabwarai buure.+

22 “Ngkana e bure te mwaane temanna nakon raona n aomata, ao e a kairoroaki teuanne bwa e na taetae n tuea* ao e kabaea teuanne i aan te rekenikai ni kaineti ma te taetae n tuea,* ao ngkana e boni mena naba teuanne i aan te taetae n tuea* anne ao e roko i matan am baonikarea n te auti aei,+ 23 ao ko bia ongo mai karawa ao karaoa te bwai teuana, ao motiki taekaia am toro n angan te aomata ae buakaka boon ana mwakuri n arom ni kaoka te baere e a tia ni karaoia nako aon atuna,+ ao n taekina te aomata are raoiroi bwa akea ana bure* ao n anganna kaniwangana ni kaineti ma raoiroina.+

24 “Ao ngkana a konaaki am aomata aika tibun Iteraera irouia aiaia ibukina bwa a teimatoa ni bure nakoim,+ ao a a manga oki ao a neboa aram+ ao a tataro+ ma ni bubutii akoaia i matam n te auti aei,+ 25 ao ko bia ongo mai karawa+ ao kabwarai aia bure am aomata aika tibun Iteraera, ao kairiia ni kaokiia nakon te aba are ko angania ma aia bakatibu.+

26 “Ngkana e a kainaki karawa ao ai akea te karau+ ibukina bwa a teimatoa ni bure nakoim,+ ao a tataro ni kaitaraa te tabo aei ao n neboa aram, ao n rairaki man aia bure ibukina bwa ko karinanoia,*+ 27 ao ko bia ongo mai karawa ao kabwarai aia bure am toro, aika am aomata aika tibun Iteraera, bwa ane ko na reireinia te kawai ae raoiroi ae a riai n nakonako iai,+ ao ko na karokoa te karau+ i aon abam are ko angania am aomata bwa tibwangaia.

28 “Ngkana e roko te rongo n te aba,+ ke te aoraki ae kamamate,+ ke a a rai aroka man te kabuebue ao a mannaoraki,+ ke e roko te nna n rokati, ke rokati* aika riao amwamwarakeia,+ ke ngkana a otabwaniniaki irouia aiaia ni kaawan nako te aba,+ ke ngkana e roko te aeka n rekenikai riki teuana ke te aoraki,+ 29 ao ngkana e karaoaki te tataro teuana+ ke te bubutii ni kan akoaki+ iroun te mwaane temanna ke irouia am aomata aika tibun Iteraera ni kabane, (bwa a ataa rawawatan nanoia ao marakia n tatabemania nako)+ ao ngkana a arori baia nakon te auti aei,+ 30 ao ko bia ongo mai karawa are am tabo ni maeka,+ ao ko bia kabwarai buure+ ao n angan temanna ma temanna kaniwangana ni kaineti ma arona ni kabane, bwa ko ataa nanona (bon tii ngkoe ae ko ataa raoi nanon te aomata),+ 31 bwa a aonga ni maakuko n aroia n nakonako ni kawaim i nanoni boong ni kabane ake a maeka iai n te aba are ko angania ara bakatibu.

32 “Ao ni kaineti naba ma te ianena ae tiaki temanna i buakoia am aomata aika tibun Iteraera, ao e roko man te aba ae raroa ibukin aram* ae kakannato+ ao baim ae korakora ao baim ae aroraki, ao e roko ao e tataro ni kaitaraa te auti aei,+ 33 ao ko bia ongora mai karawa are am tabo ni maeka, ao karaoi bwaai ni kabane ake e bubutiiko iai te ianena anne, bwa a aonga n ataa aram+ ao ni maakuko botannaomata ni kabane n te aonnaba, n aroia am aomata aika tibun Iteraera, ao a bia ataia ae e mena aram i aon te auti ae I kateia aei.

34 “Ngkana a nako ni buaka am aomata ni kaaitaraia aiaia n aron ae ko kanakoia iai,+ ao a tataro+ nakoim ni kaitaraa te kaawa are ko rineia, ao ni kaitaraa te auti are I kateia ibukin aram,+ 35 ao ko na ongo mai karawa aia tataro ao aia bubutii ni kan akoaki, ao karaoa te motikitaeka ibukia.+

36 “Ngkana a bure nakoim (bwa akea te aomata ae aki bubure),+ ao e a rangi ni maraki nanom irouia ao ko a kitania ni katikuia irouia aiaia, ao a a kairakinako bwa taenikai irouia taani kataenikaiia nakon te aba ae raroa ke ae kaan,+ 37 ao a a manga oki aia iango n te aba are a kairaki nako iai bwa taenikai, ao a a manga okiriko ao ni bubutiiko akoaia n te aba are a riki iai bwa taenikai, ni kangai, ‘Ti a tia ni bure ao ni karaoa ae kairua, ti karaoa ae buakaka,’+ 38 ao a a manga okiriko ma nanoia ni kabane+ ao maiuia* ni kabane n te aba are a kairakinako iai bwa taenikai,+ ao a tataro ni kaitaraa abaia are ko angania aia bakatibu, ao te kaawa are ko rineia+ ao te auti are I kateia ibukin aram, 39 ao ko na ongo mai karawa are am tabo ni maeka, aia tataro ao aia bubutii ni kan akoaki, ao ko na karaoa te motikitaeka ibukia+ ao ni kabwarai aia bure am aomata ake a bure nakoim.

40 “Ao ngkai ngkoe ae Atuau, taiaoka ma a bia ure matam ao katanimaia taningam nakon te tataro ae tataroaki n* te tabo aei.+ 41 Ao ngkai ngkoe ae Iehova ae te Atua, ko na waerake nakon am tabo ni motirawa,+ ngkoe ma te Ati ae kaotia bwa iai iroum te mwaaka. A bia kunnikaiaki n te kakamaiu am ibonga* ngkoe ae Iehova ae te Atua, ao ke a kimwareirei n am raoiroi am aomata aika kakaonimaki ni koaua.+ 42 Ngkoe ae Iehova ae te Atua, tai rawa nakon* teuare am kabiraki.+ Ko bia uringa am tangira ae koaua* nakon Tawita are am toro.”+