Taeka N Rabakau

14 E katea ana auti te aine ae wanawana ni koaua,+

Ma te aine ae nanobaba e urua ni kabwakaa n oini baina.

 2 Ane e nakonako i nanon te raoiroi ao e mamaaka Iehova,

Ma ane e mwamwanaa te aba* n arona nako ao e ribaa Teuaei.

 3 E mena ana kai te kainikatonga ni wia akana nanobaba,

Ma a na kamanoaki akana wanawana n oin riaia.

 4 Ike akea iai kaao ao e itiaki nneni kanaia maan,

Ma e karekea te uaa ae bati korakoran te kao mwaane.

 5 E na aki kewe te tia kakoaua ae kakaonimaki,

Ma e tataekini keewe te tia kakoaua ni kewe.+

 6 E ukoukora te wanawana te tia kakaniko ao akea ae e kunea,

Ma e kai reke te atatai iroun te aomata ae ataibwai.+

 7 Kararoako mairoun te mwaane ae nanobaba,

Bwa ko na aki kunea te atatai i aon riana.+

 8 Rinanon te wanawana ao te mwaane ae ataibwai e ataa te kawai ae e nako iai,

Ma a mwamwanaaki* akana nanobaba n nanobabaia.+

 9 A bwainingarea te reke n te bure* akana nanobaba,+

Ma iai te nano ni kan raoiakinaki* i buakoia akana raoiroi.

10 E bon ataa karawawataana te nano,

Ao akea te ianena ae kona n uataboa kimwareireina.

11 E na kamaunaaki aia auti akana buakaka,+

Ma e na toronibwai aia umwanrianna akana raoiroi.

12 Iai te kawai ae taraa n eti iroun te aomata,+

Ma n tokina ao e boni kairiri nakon te mate.+

13 E kona naba te nano n namakina te maraki i buakon te ngarengare,

Ao te kimwareirei e kona n roko n tokina ae te rawawatannano.

14 Ane e tibanako nanona ao e na taia mwin nako arona,+

Ma te mwaane ae raoiroi e na taia kaniwangan aroarona nako.+

15 E kakoauai taeka nako te aomata ae nanoroo,*

Ma e iaiangoa raoi nakonakona te aomata ae ataibwai.+

16 E taratara raoi te aomata ae wanawana ao e rairakinako man te buakaka,

Ma e aki tarabwai* ane e nanobaba ao e riao onimakinana i bon irouna.

17 Ane e waekoa n un ao e bwaina te nanobaba,+

Ma e ribaaki te aomata ae iangoi aroni bwaai nako.*

18 E na bwaibwai n te nanobaba ane e nanoroo,*

Ma a baunaki n te atatai akana ataibwai.+

19 Ane a na bobaraaki aomata aika buakaka i mataia akana raoiroi,

Ao a na bobaraaki akana buakaka ni mataroan aia oo akana raoiroi.

20 E ribaaki te aomata ae maiu ni kainnano irouia raona n aomata,+

Ma a bati raoraon te aomata ae kaubwai.+

21 E bure ane e ribaiia raona n aomata,

Ma e a kukurei ane e nanoangaiia akana mangori.+

23 Iai te kabwaia n aeka ni mwakuri korakora ni kabane,

Ma te taetaenikawai ae akea uaana e kairiri nakon te kainnano.+

24 Aia baunuea akana wanawana boni kaubwaia,

Ma nanobabaia akana nanobaba bon tii te nanobaba.+

25 E kamaiua te aba te tia kakoaua ae koaua,

Ma e tataekina te kewe te tia kakoaua ae mwamwanaa te aba.

26 E korakora te aki nanokokoraki ni maakakin Iehova,+

Ao e na riki anne bwa te tabo ni kamanomano ibukia natina.+

27 Maakakin Iehova boni koburaken te maiu,

Ae e katannakoa te aomata man ana bwai ni kamwane nako te mate.

28 Bon tamaroan te uea aomata aika mwaitikurikuri,+

Ma e bwaka te tia tautaeka ae akea ana aomata aika e tautaekania.

29 Ane e iremwe n un ao e rangi ni bati te ataibwai irouna,+

Ma e kaotiota nanobabana ane e aki taotaona nanona.+

30 E anga te maiu* nakon te rabwata te nano ae rau,

Ma te bakantang bon te mka nakon taian ri.+

31 Ane e babakanikawaia te aomata ae mangori ao e kauna te tia Karaoia,+

Ma ane e kaotiota te nanoanga nakoia akana maiu ni kainnano ao e neboa Teuarei.+

32 E na karinanoaki ane e buakaka n oini buakakana,

Ma ane e raoiroi e na reke kamanoana n etin arona.+

33 E motirawa n rau te wanawana i nanon te aomata ae ataibwai,+

Ma e riai ni kaotiotia i buakoia akana nanobaba.

34 E karietataa te natannaomata te raoiroi,+

Ma te bure bon te bwai ae kabwainranga te botannaomata.

35 E kukurei te uea iroun ana toro ae bwabwaina te ataibwai,+

Ma e korakora unna iroun ane e kamaamaea te aba.+