2 I-Korinto

13 Ai te katentai aei, ae N na kawaringkami iai. “A na kaetaki bwaai nako n aia kaotioti* taani kakoaua aika uoman ke teniman.”+ 2 E ngae ngke I aki mena i rarikimi, ma butimwaea au taeka n aron ae kaanga I mena i rarikimi n te kauatai. Mangaia ae I a manga anga au kauring nakoia te koraki ake a bure ngkoa n ikotaki ma te koraki ni kabane, n aron are I a tia ni karaoia, bwa ngkana I a manga roko, ao N na aki nanoangaiia ake a kakaraoa ae bure, 3 kioina ngkai kam ukoukora kakoauaan are e taetae Kristo rinanou, ae Kristo ae aki mamaara nakoimi ma e korakora i buakomi. 4 Bwa e boni kamateaki i aon te kai ibukini mamaarana, ma e a maiu ngkai ibukini mwaakan te Atua.+ E koaua bwa ti mamaara naba ma ngaia, ma ti na uaia ni maeka ma ngaia,+ ibukini mwaakan te Atua are mwamwakuri naba i buakomi.+

5 Teimatoa n tuoingkami bwa kam mena n te onimaki ke kam aki ao teimatoa n tuoingkami bwa tera aromi.+ Bwa kam aki ataia ae kam a katiteuanaaki ma Iesu Kristo? Ma tii ngkana kam aki tau i matan te Atua. 6 Bon au kantaninga bwa kam na ataia ae ti bon tau i matan te Atua.

7 Ma ti tataro nakon te Atua bwa kam aonga n aki karaoa ae kairua. Tiaki au kantaninga bwa ti na taraa n tau ni karaoan aei, ma au kantaninga iai bwa kam na kakaraoa ae raoiroi, e ngae ngkana tao ti taraa n aki tau i matan te Atua. 8 Bwa akea te bwai ae ti kona ni karaoia ni kaitaraa te koaua, ma tii ibukini boutokaan te koaua. 9 Ti boni kimwareirei ngkana ti mamaara ma kam korakora ngkami. Ao ti tatataro bwa kam na kaetii ami iango. 10 Anne bukina ae I korei iai baikai ngkai I aki mena i rarikimi, bwa ngkana I a mena i rarikimi, ao N na aki kairimatoa ni kabongana mwiokoau are e anganai te Uea,+ ae N na kateimatoaingkami ao tiaki ni kakekerikaakingkami.

11 Ni kabaneana, I kaungaingkami taari bwa kam na teimatoa ni kimwareirei, ni kaetietii aromi, ni butimwaea kabebeteami,+ n uaia ni boraoi n iango,+ ni mamaeka n rau,+ ao e na memena iroumi te Atua ae nibwan te tangira ma te rau.+ 12 Kamauri i marenami n tatabemaningkami nako n te kaboria* ae itiaki. 13 A kamauringkami te koraki aika itiaki* ni kabane.

14 Ke e mena iroumi ni kabane ana akoi ae rianako te Uea ae Iesu Kristo, ma ana tangira te Atua ao te taamnei ae raoiroi are ti uaia ni kabwaia mai iai.