2 Rongorongo

32 Imwini baikai ma mwakuri ni kakaonimaki aikai,+ ao e roko Tennakeriba ae Uean Aturia n ninia Iuta. E otabwanini kaawa aika nonoaki, ao e teimatoa n iangoa ae e na nini oon taiani kaawa ao n taui.+

2 Ngke e noria Etekia bwa e a roko Tennakeriba ao e iangoa ae e na buakana Ierutarem, 3 ao imwini marorona ma ana aomata ake tooka ao ana tia buaka ao e a baireia bwa e na katoki ranin koburake n ran ake i tinanikun te kaawa,+ ao a boutokaia. 4 A ikotaki aomata aika bati ao a katoki koburake n ran ni kabane ma te karaanga are raanga rinanon te aba, ao a kangai: “E aera ngkai a na roko uean Aturia ao e na reke irouia te ran ae bati?”

5 Irarikin anne, e motikia bwa e na manga katea te oo are e a tia ni bwaka ni kabane ao ni katei taua i aona, ao e a manga karaoa riki te oo teuana i tinaniku. E karaoa naba uruakin te Miro*+ are n Ana Kaawa Tawita, ao e karaoi bwaai ni buaka* ma otanga aika bati. 6 E mwiokoiia ngkanne mataniwi n te taanga ni buaka i aoia aomata, ao e ikotiia ni maraeni mataroan oon te kaawa ao e kaungaia* ni kangai: 7 “Kam na ninikoria ao kakorakoraingkami. Tai maaku ke ni maakunrang iroun uean Aturia+ ma raona aika mwaitikurikuri ni kabane, bwa a bati riki aika a raonira nakoia ake a raonna.+ 8 E onimakina ngaia korakoraia aomata* ma ngaira bon raora Iehova ae Atuara, bwa e na buokira ao e na buaka n ara buaka.”+ Ao a a kakorakoraaki aomata n ana taeka Etekia ae Uean Iuta.+

9 Imwin aei, ngke e mena te Uea ae Tennakeriba are uean Aturia i Rakiti+ ma ana tautia ni kabane, ao e kanakoia ana toro nako Ierutarem, nakon te Uea ae Etekia are uean Iuta ao nakoia I-Iutaia ni kabane ake i Ierutarem,+ ao a kangai:

10 “E kangai ana taeka Tennakeriba ae Uean Aturia, ‘Kam onimakina tera ngkai kam a tiku i Ierutarem ngkai e a otabwaniniaki?+ 11 Tiaki e mwamwanaingkami Etekia ma n anga ngkami bwa kam na mate n te rongo ma te taka ngkai e kangai: “E na kamaiuira Iehova ae Atuara mai nanoni bain uean Aturia”?+ 12 Tiaki bon Etekia naba aei are e kanakoi ngkoa ana tabo aika rietata Atuami+ ma Ana baonikarea nako+ ao imwina e a kangai nakoia kaain Iuta ao kaain Ierutarem: “Kam riai ni bobaraaki i matan te baonikarea ae tii teuana ao kam riai ni kabueki ami karea i aona ao ni kabubui”?+ 13 Kam aki ataa te bwai are I karaoia ma au bakatibu nakoia botannaomatan nako aaba aikai?+ A kona atuaia natannaomata aika n aaba aikai ni kamaiua abaia mai nanoni baiu?+ 14 Antai mai buakoia atuaia ni kabane natannaomata aikai ake a kamaunaaki irouia au bakatibu ae a kona ni kamaiuia aia aomata mai nanoni baiu, ngkai e na kona Atuami ni kamaiuingkami mai nanoni baiu?+ 15 Ai ngaia are tai kariaia bwa e na mwamwanaingkami Etekia ke ni burebureingkami n aron aei!+ Tai onimakinna, bwa akea atuaia natannaomata ke te tautaeka n uea ae kona ni kamaiuia ana aomata mai nanoni baiu ao mai nanoni baia au bakatibu. Ai karakora riki ngkanne iroun Atuami bwa e na kamaiuingkami mai nanoni baiu!’”+

16 Ao a taekina ae bati riki ana toro teuaei n ekaanako Iehova ae te Atua ae koaua ao n ekaanako Etekia are ana toro. 17 E korei naba reeta+ bwa e na kauna Iehova ae Atuan Iteraera+ ao n taetae n ekianako ni kangai: “N aroia atuaia natannaomata n aaba aikai ake a aki kona ni kamaiuia aia aomata mai nanoni baiu,+ ao ai aron naba Atuan Etekia bwa e na aki kona ni kamaiuia ana aomata mai nanoni baiu.” 18 A teimatoa n takarua ni wewete n aia taetae I-Iutaia nakoia kaain Ierutarem ake a mena i aon te oo, bwa a na kakamaakuia ao ni kamaakunrangia, bwa a aonga n taua te kaawa.+ 19 A taetae n ekaanako Atuan Ierutarem n aron naba ekakinakoaia atuaia botannaomata n te aonnaba, ake aia mwakuri baia aomata. 20 Ma a teimatoa n tataro te Uea ae Etekia ma te burabeti are Itaia+ are natin Amoti ibukin te baei ao n tang nako karawa ibukin te ibuobuoki.+

21 Ao e kanakoa te anera temanna Iehova ao e kabaneia ni kamaunaia taani buaka aika korakora,+ taani kairiri, ao mataniwi n ana kaembwa uean Aturia, n te aro are e a nako n okira abana ma te bwaibwainrang. Imwina riki ao e a rin n ana auti* atuana, ao ikanne are e a kamateaki iai irouia tabeman natina mwaane n te kabaang.+ 22 Mangaia are e kamaiua Etekia ma kaain Ierutarem Iehova mai nanoni bain Tennakeriba are Uean Aturia, ao mai nanoni baia ake tabemwaang ao e a angania te motirawa mairouia aiaia ni kabane ake i rarikia. 23 Ao a bati aika uotii bwaai n tituaraoi nakon Iehova i Ierutarem ao bwaai aika rangi n raoiroi nakon Etekia are Uean Iuta,+ ao e korakora karineana irouia natannaomata ni kabane imwin anne.

24 Ni boong akekei ao e a aoraki Etekia ao e a kaani mate, ao e tataro nakon Iehova,+ are e a kaekaa ma n anganna te kanikina.*+ 25 Ma e aki kaota te kakaitau Etekia nakon te bwai ae raoiroi are e a tia ni karaoaki ibukina, bwa e a kainikatonga nanona, ao e a karokoa iai te un n ekianako ao n ekaanako Iuta ma Ierutarem. 26 Ma e ngae n anne, e kananorinanoa Etekia ibukini kainikatongan nanona,+ ngaia ma kaain Ierutarem, ao e a aki roko unin Iehova i aoia n ana bong Etekia.+

27 Ao a boni bati kaubwain Etekia ma karineana,+ ao e karaoi ana auti ni kaikobwai+ ibukin te tirewa, te koora, atibu aika rangi ni kakawaki, oeran te batiam, taian otanga, ao ibukini bwaai ni kabane aika tatangiraki. 28 E karaoi naba taabo ni kaikobwai ibukin te uita,* te wain ae boou, ao te oera, n ikotaki naba ma nneia nanai ni man aika kakaokoro nako ao nneia tiibu ma kooti. 29 E karekei naba ana kaawa, ao te nanai ni man ae bati, ao tiibu ma kaao, bwa e anganna te Atua bwaai aika rangi ni bati. 30 Bon Etekia are katoki koburake n ran+ ake mai eta are i Kion+ ao e kabiri rikaaki nako maeaon Ana Kaawa Tawita,+ ao a nakoraoi ana mwakuri nako Etekia. 31 Ma ngke a kanakoaki aia tia taetae tokani Baburon bwa a na titirakina teuaei ibukin te kanikina*+ are e riki n te aba,+ ao e kitanna te Atua ae koaua bwa e na kataia,+ bwa e na atai bwaai nako ake i nanon teuaei.+

32 Ni kaineti ngkanne ma nikiran rongorongon Etekia ao ana mwakuri ni kaotiota ana tangira ae koaua,*+ a koreaki n ana miitara Itaia+ are te burabeti are natin Amoti, n aia Boki Uean Iuta ma Uean Iteraera.+ 33 Ao e a wene ni motirawa Etekia i rarikia ana bakatibu, ao a kaiia n te kawai n ararake nakoni nneni kaweneaia natin Tawita aika mwaane.+ Ao a bane kaain Iuta ma kaain Ierutarem ni karinea ni matena. Ao e a riki natina ae Manate bwa te uea n onea mwina.