Te Minita
6 Iai riki te bwai ae kananokawaki* ae I a tia n noria i aan taai, ao e taabangaki irouia aomata: 2 E anga te kaubwai te Atua ae koaua nakon te aomata temanna, ma taiani bwaikoraki, ao te karineaki, n te aro bwa e na aki tare n te bwai ae e tangiria, ma te Atua ae koaua e aki anganna te konaa ni kakukureia ni baikai, e ngae ngke e kona ni kakukureia ni baikai te ianena. Bon akea manenan te baei ao bon te karawawata ae korakora. 3 Ngkana e karikiia natina aika tebubua mwaitiia te mwaane temanna, ma ni maiu i nanon ririki aika bati ao n roko n te roro ni kara, ma e aki kakukureia n ana bwai aika raraoi imwain rokona n te ruanimate,* N na taekinna ngkanne bwa e a kabwaia riki nakoina te teei ae bungiaki ni mate.+ 4 Bwa bon akea bongan rokona ao e buanako n te rotongitong, ao e rabunakinako arana n te rotongitong. 5 E ngae ngke e aki nora taai ke n ataa te bwai teuana, ma e boni kabwaia riki* nakon teuare mai mwaina.+ 6 Tera manenan ae e maiu i nanon uoua tenga te ririki, ma e aki reke kimwareireina? Tiaki a bane n nakon te tabo ae tii teuana?+
7 Ana mwakuri korakora ni kabane te aomata bon ibukini kanoani birotona,+ ma e ngae n anne e aki kona n rauaki nanona. 8 Bwa tera nakoraoin riki aron te aomata ae wanawana nakon te aomata ae nanobaba,+ ke tera kabwaian te aomata ae maiu ni kainnano ngkai e ataa aroni karekeani maiuna i bon irouna?* 9 E raoiroi riki iroun te aomata bwa e na kakukureia n te baere a kona n noraki ni maata, nakon ukoukorani baika e tangiri. Bon akea naba manenan te baei bwa boni kaean te ang.
10 Bwaai nako aika ai kaman iai a a tia n ataaki n araia, ao e a tia ni kaotaki aroia raoi aomata. E aki kona te aomata ni kaota koauan ae e aki bure, i matan teuare mwaaka riki nakoina. 11 Kabatiaan te taeka* boni kabatiaan naba baika akea manenaia, ngaia are tera nakoraoin iai aron te aomata? 12 Antai ae ataa te bwai ae te kabanea n raoiroi ae e na karaoia te aomata ni maiuna, i nanoni bongini maiuna aika karako ae akea manenana ake e kabanei n ai aron te nuu?+ Bwa antai ae kona n tuanga te aomata bwa tera ae e na riki i aan taai imwina ngkana ai akea ngaia?