I-Karatia
6 Taari, e ngae ngkana e toua te mwaneka ae kairua te aomata n akea ataakina irouna, ma ngkami aika Kristian aika kam ikawai n te onimaki, kam na kataia ni kaeta te aomata anne n te nano ae nimamannei.+ Ma tataraingkami n tatabemaningkami+ nako bwa kam kaawa ni kaririaki naba.+ 2 Kam na ibuobuoki i marenami ni baika karawawataingkami,+ ao kam na kakororaoa iai ana tua te Kristo.+ 3 Bwa ngkana e iangoia temanna i bon irouna bwa e kakawaki e ngae ngke e aki,+ ao e mwamwanaia i bon irouna. 4 Ma ke e tuoa oin ana mwakuri temanna ma temanna,+ ao e na karekea iai bukini kimwareireina i bon irouna, ma tiaki n te kabotaua ma temanna.+ 5 Bwa ane a na uotii oin uotaia* aomata n tatabemania nako.+
6 Ma ke e ibuokanibwai ni baika raraoi ni kabane, ane e reireinaki n ana taeka te Atua ma ane e anga te aeka n reirei anne.+
7 Tai burebureaki. E aki riai ni bwainnataeaki te Atua, bwa te baere e unikia te aomata, e na manga taia naba uaana.+ 8 Ibukina bwa ane e ununiki ibukin rabwatana e na taia te kamaunaaki man rabwatana, ma ane e ununiki ibukin te taamnei ae raoiroi e na taia te maiu are aki toki man te taamnei.+ 9 Mangaia ae a na aki bwara nanora ni karaoan ae raoiroi, bwa ti na bon taia uaana n taina ae riai ngkana e aki bwara nanora.+ 10 Mangaia ae ti na kakaraoa ae raoiroi nakoia aomata ni kabane ngkai ti anganaki ara tai,* ma e a moamoa riki nakoia ake a katiteuanaaki ma ngaira n te onimaki.
11 Kam na nori manin au koroboki aika bubura aika I korei ni bon oini baiu.
12 Te koraki ni kabane ake a kani kakukureiia aomata* boni ngaiia ake a kataia ni kairoroingkami bwa kam na korotobibiaki, ao a karaoa anne bwa a aonga n aki bwainikirinaki ibukin ana kai ni kammaraki* te Kristo. 13 Bwa a aki naba taua te Tua te koraki ake a korotobibiaki,+ ma a tangiringkami bwa kam na korotobibiaki bwa a aonga ni kamoamoa n te baere karaoaki nakon rabwatami. 14 I bon aki kani kamoamoaai ma tii n ana kai ni kammaraki* ara Uea ae Iesu Kristo,+ bwa n au taratara, ai aron ae e kamateaki* te botannaomata rinanona, ao n aia taratara te botannaomata, ai aron ae I kamateaki ngai. 15 Bwa akea manenan te korotobibi ke te aki korotobibi,+ ma bon iai manenan te karikibwai ae boou.+ 16 Ke a nanoangaaki te koraki ni kabane ake a maiuakina te baire aei ae ana Iteraera te Atua,+ ao e na mena te rau i aoia.
17 Ke e tai karekeai n te kangaanga temanna ni moa mangkai, bwa I uouota te mwaka i aon rabwatau ae kanikinaean ae ana toro Iesu+ ngai.
18 Taari, e na mena iroumi ana akoi ae rianako te Uea ae Iesu Kristo, ngkai kam kaotiota raoiroin nanomi. Amen.