2 Rongorongo
23 N te kaitiua n ririki ao e ninikoria Ieoiata ni karaoa te boraraoi* ma mataniwi i aoia kaka tebubua,+ ake Ataria are natin Ieroam, Itimaera are natin Ieoanan, Ataria are natin Obeta, Maateia are natin Ataia, ao Eritiabata are natin Tikeri. 2 Ao a nako ni kabutaa Iuta ao n ikotiia ni kabane tibun Rewi+ mani kaawan Iuta ni kabane, ma mataniwi i aoia aia koraki mairoun tamaia ake tibun Iteraera. Ngke a roko i Ierutarem, 3 ao e karaoa te berita+ te botaki n aomata ma te uea n ana auti te Atua ae koaua, ao imwina e taku Ieoiata nakoia:
“Noria! E na tautaeka natin te uea n aron are e beritanna Iehova ni kaineti ma natin Tawita aika mwaane.+ 4 Aio te bwai ae kam na karaoia: Katenimwakoroia ibonga* ma tibun Rewi ake a na tei+ n te bongi n Taabati a na riki bwa taan teiakina te mataroa.+ 5 Ake te katenimwakoro are te korakina a na mena n ana auti* te uea,+ ao te katenimwakoro ake te korakina riki a na mena ni Mataroan Aana, ao a na bane aomata ni mena n taiani katawanang ake n ana auti Iehova.+ 6 Tai kariaia te aomata temanna bwa e na rin n ana auti Iehova, ma tii ibonga ao tibun Rewi ake a bebeku.+ A kona n rin naakai ibukina bwa bon te koraki aika itiaki,* ao a na bane aomata ni kawakina mwiokoaia nakon Iehova. 7 A riai tibun Rewi n otabwaninia te uea n itera nako, temanna ma temanna ma ana bwai ni buaka i baina. E na kamateaki ane e rin i nanon te auti. Kam na raona te uea n taabo ake e nako iai.”*
8 Ao tibun Rewi ma kaain Iuta ni kabane a karaoa raoi te bwai are e tua Ieoiata are te ibonga. Ao ngaiia n tatabemania nako a kairiia aia rorobuaka ake a tei n te bongi n Taabati, n ikotaki ma ake a aki tei n te bongi n Taabati,+ bwa e aki kamotirawaia koraki akekei+ man aia tei Ieoiata are te ibonga. 9 Ao Ieoiata are te ibonga e a angania mataniwi i aoia kaka tebubua+ taiani kainiwai, otanga aika uarereke,* ao otanga aika mronron ake ana bwai te Uea are Tawita,+ ake a mena n ana auti te Atua ae koaua.+ 10 Ao e kateiia aomata ni kabane, temanna ma temanna ma ana bwai ni buaka* i baina, ni moa man iteran te auti are te angaatai nakon iteran te auti are te angamaing, i rarikin te baonikarea ao i rarikin te auti, n otabwaninia te uea. 11 Imwina ao a a kaira natin te uea+ ni kaotinakoa ma ni katokaa i aona te baunuea ao te Bwai ni Kakoaua*+ ao a kaueaa, ao Ieoiata ma natina a kabira teuaei. Ao a taku: “E na abwabwaki maiun te uea!”+
12 Ngke e ongo karongoaaia aomata ni biri Atariia ma kamoamoaan te uea, ao e a nako naba nakoia aomata ake n ana auti Iehova.+ 13 Ao e a nora te uea n tei ikekei i rarikin ana boua i rarikin te mataroa. A mena i rarikin te uea tooka+ ma taani katangitang n te buu, ao a bane kaain te aba ni kimwareirei+ ao ni katang taiani buu, ao a kaira* te anene n nebonebo taan anene ma bwaai ni katangitang. Ngaia are e a raeuai kunnikaina Atariia ao e takarua ni kangai neiei: “Kam karitei! Kam karitei!” 14 Ma Ieoiata are te ibonga e kaotinakoia mataniwi i aoia kaka tebubua, ake a rineaki bwa mataniwi n te taanga ni buaka, ao e taku nakoia: “Kaotinakoa neienne mai buakoia tautia, ao ngkana iai ane e rimwina ao kamatea n te kabaang!” Bwa e kangai te ibonga: “Tai kamatea neienne n ana auti Iehova.” 15 Mangaia are a taua neierei ao ngke e a roko n te Mataroa n Aoti are n ana auti* te uea, ao a a tiringnga naba ikekei.
16 Ao e karaoa te berita Ieoiata i marenana ma aomata ni kabane ao te uea, bwa a na teimatoa n riki bwa ana aomata Iehova.+ 17 Imwin anne ao a bane aomata n roko n ana auti* Baara ao n urua,+ a kamaeinikuni ana baonikarea ma bouannantina,+ ao a tiringa Maatan are ana ibonga Baara+ i matan taiani baonikarea. 18 Ao Ieoiata e anga te mwakuri n tararua ibukin ana auti Iehova nako nanoni baia ibonga ma tibun Rewi, ake e mwiokoiia Tawita n aia koraki nako n ana auti Iehova bwa a na anganga taiani karea ni kabuekaki ibukin Iehova,+ ni kaineti ma are e koreaki n te Tua Rinanoni Mote,+ n irianaki ma te kimwareirei ao te anene, n aron are e tua* Tawita. 19 E kateiia naba taan teiakina mataroan te oo+ ni mataroan oon ana auti Iehova, bwa e aonga n akea temanna ae kamwara ae e na rin. 20 Ao e ikotiia mataniwi i aoia kaka tebubua,+ bwaanuea, taan tautaeka i aoia aomata, ao kaain te aba ni kabane, ao e kaira te uea man ana auti Iehova. Ao a roko mani mataroan te oo are mai eta nakon ana auti* te uea, ao a katekatekaa te uea i aoni kaintokanuean+ te tautaeka n uea.+ 21 Mangaia are a bane ni kimwareirei kaain te aba ao e a rau te kaawa, bwa a a tia ni kamatea Atariia n te kabaang.