2 Rongorongo

34 Boni wanua ana ririki Iotia+ ngke e riki bwa te uea ao e tautaeka i Ierutarem i nanon 31 te ririki.+ 2 E karaoa ae eti i matan Iehova ao e nakonako ni kawain nako Tawita are ana bakatibu, ao e aki rairakinako mai iai nakon te angaatai ke te angamaing.

3 N ana ka-8 n ririki n tautaeka, ngke bon te teei naba ngaia, ao e a moana ukoukoran Atuan Tawita are ana bakatibu,+ ao n ana ka-12 n ririki n tautaeka, ao e a moana kaitiakan Iuta ao Ierutarem+ ni kaaki mai iai taabo aika rietata+ ao kaai aika tabu,* bouannanti aika kaaraki,+ ao bouannanti aika biiti.* 4 Irarikin anne, a kabwakai baonikarean taiani Baara bon i matana, ao e urui ni kabwakai baonikareani baika boiarara aika mena i etaia. E kamaerikiriki naba kaai aika tabu,* bouannanti aika kaaraki, ao bouannanti aika biiti* ao e kamtei raoi, ao e kamraraa i aon ruanimateia te koraki ake a taneiai n angakarea nakoni baikai.+ 5 Ao e kabueki riia ibonga i aon aia baonikarea.+ Mangaia are e kaitiaka Iuta ao Ierutarem.

6 Ao ni kaawani Manate, Eberaim,+ Timeon, ao n rokoroko i Nabetari, ao n taabo ni kabane ake a uruaki, 7 e kabwakai baonikarea ao e kamantintii kaai aika tabu* ma bouannanti aika kaaraki,+ ni kamtei raoi, ao e urui ni kabwakai baonikarea ni kabane aika baonikareani baika boiarara n te aba ae Iteraera ni kabutaa,+ ao imwina e a okira Ierutarem.

8 N ana ka-18 n ririki n tautaeka, ngke e a tia ni kaitiaka te aba ma te tembora,* ao e kanakoa Tiaban+ are natin Aturaia, Maateia are mataniwin te kaawa, ao Ioa are natin Ioaatia are te tia korei mwin rongorongo, bwa a na onobwaia ana auti Iehova ae Atuana.+ 9 A roko naakai iroun Irekia are te ibonga ae rietata* ao a anganna taiani mwane ake a uotaki nakon ana auti te Atua, ake a rikoi tibun Rewi ake a beku bwa taan teiakina te mataroa, mairouia tibuni Manate, Eberaim, ao nikiraia kaain Iteraera ni kabane,+ ao mairouia naba tibun Iuta, Beniamin, ao ai kaain Ierutarem. 10 Ao a anga nakoia te koraki ake a mwiokoaki bwa mataniwi n te mwakuri are karaoaki n ana auti Iehova. Ao a kabongana taani mwakuri n ana auti Iehova, ni manga karaoa iai te auti ao n onobwaia. 11 A anga nakoia taani karaobwai aika mwaatai ao taani kateitei bwa a na kabooi iai atibu aika ekeaki ma kaai ibukini bwaai n tomatoma, ao a na katei tatangan auti ake a kariaia uean Iuta bwa a na bwaka n uruaki.+

12 Ao a karaoa te mwakuri mwaane ma te kakaonimaki.+ A mwiokoaki i aoia naakai tibun Rewi aika Iaata ma Obaria mai buakoia tibuni Merari,+ ao Tekaria ma Meturam mai buakoia tibuni Koata,+ bwa a na beku bwa mataniwi. Ao tibun Rewi ake taani katangitang aika mwaatai ni kabane,+ 13 a tararuaiia tooro* aika bekutata, ao a mataniwi i aoia te koraki nako ake a karaoa te mwakuri n aeka ni beku nako, ao tabeman mai buakoia tibun Rewi bon taani koroboki, mataniwi, ao taan teiakina mataroan te oo.+

14 Ngke a kaotinakoi taiani mwane ake a uotaki nakon ana auti Iehova,+ ao Irekia are te ibonga e a kunea naba bokin ana Tua Iehova+ are e anganaki te aba rinanoni* Mote.+ 15 Mangaia are e taku Irekia nakon Tiaban are te tia koroboki: “I kunea bokin te Tua n ana auti Iehova.” Ai ngaia are e a anga te boki Irekia nakon Tiaban. 16 Ao Tiaban e uota te boki nakon te uea ao e tuangnga ni kangai: “A karaoi bwaai nako am toro ake a mwiokoaki iai. 17 A a tia ni kannai taiani mwane ake a reke n ana auti Iehova, ao a a tia n angania mwaane ake a mwiokoaki ao te koraki ake a karaoa te mwakuri.” 18 E tuanga naba te uea ni kangai Tiaban are te tia koroboki: “Iai te boki ae e anganai Irekia are te ibonga.”+ Ao e a wareware mai iai Tiaban i matan te uea.+

19 Ngke e ongo naba ngkekei te uea taeka ake n te Tua ao e a raeuai naba kunnikaina.+ 20 Ao e tua ae kangai te uea nakon Irekia ma Aikam+ are natin Tiaban, Abeton are natini Mika, Tiaban are te tia koroboki, ao Ataaia are ana toro te uea: 21 “Naako ao titirakina Iehova ibukiu ao ibukia te koraki ake a tiku i Iteraera ao i Iuta, ni kaineti ma taeka aika n te boki ae kuneaki aei, bwa e korakora unin Iehova ae e na kabwaroaki n ekiranako, ibukina bwa a aki ira ana taeka Iehova ara bakatibu ni kakairi ni bwaai ni kabane aika koreaki n te boki aei.”+

22 Mangaia are e nako Irekia n ikotaki ma te koraki ake a kamwanangaaki iroun te uea, nakon Ureta are te burabeti n aine.+ Neiei boni buun Tiarum are natin Tikewa are natin Areati, are te tia tararuaa te ruu ni kunnikai, ao e mamaeka neiei ni Kauouani Mwakoron Ierutarem, ao a taetae ma neiei ikekei.+ 23 E taku neiei nakoia: “E kangai ana taeka Iehova ae Atuan Iteraera, ‘Tuanga te mwaane are kanakoingkami nakoiu ni kangai: 24 “E kangai ana taeka Iehova, ‘N na karokoa te kabuanibwai i aon te tabo aei ma kaaina,+ ake rekenikai ni kabane ake a koreaki n te boki+ are a warekia i matan uean Iuta. 25 Ibukina bwa a kitanai+ ao a kabueki karea ni kabubui nakoia atua riki tabeman bwa a na kaunai+ n aia mwakuri ni kabane baia, ao e na bwaro uniu ae korakora i aon te tabo aei ao e na aki tiringaki uniu.’”+ 26 Ma kam riai ni kangai nakon uean Iuta are e kanakoingkami bwa kam na titirakina Iehova, “E kangai ana taeka Iehova ae Atuan Iteraera: ‘Ni kaineti ngkanne ma taeka ake ko ongo,+ 27 ao I ongo naba iroum, ibukina bwa e kan ongeaba* nanom ao ko kananorinanoko i matan te Atua ngke ko ongo ana taeka ni kaineti ma te tabo aei ma kaaina, ao ko kananorinanoko i matau ao ko raeuai kunnikaim ao n tang i matau,+ bon ana taeka Iehova. 28 Anne bukina ae N na ikotiko iai ma am bakatibu,* ao ko na kaiiaki n ruanimatem ma te rau, ao matam a na aki nora te kabuanibwai aei ni kabane ae N na karokoa i aon te tabo aei ma kaaina.’”’”+

Ao a uota te kaeka nakon te uea. 29 Ngaia are e a kanakotaeka te uea ao ni weteiia ni kabane unimwaanen Iuta ao Ierutarem.+ 30 Imwin anne ao e a waerake te uea nakon ana auti Iehova ma aomata ni kabane ni moa man ae e uarereke ni karokoa ae e a kara, aika mwaane ni kabane aika tibun Iuta, kaain Ierutarem ni kabane, ibonga, ao tibun Rewi. E wareki nakoia ngke a ongora, taeka ni kabane ake ni bokin te berita are e kuneaki n ana auti Iehova.+ 31 E tei te uea n ana tabo ao e karaoa te berita*+ i matan Iehova, bwa e na kakairi iroun Iehova ao e na kawakin ana tua, ana kauring, ao ana kaetieti, ma nanona ni kabane ao maiuna* ni kabane,+ n arona n toui raoi mwin taeka ake n te berita ake a koreaki n te boki arei.+ 32 Irarikin anne, e tua nakoia te koraki ni kabane ake i Ierutarem ao Beniamin bwa a na kariaia. Ao kaain Ierutarem a karaoa ae boraoi ma ana berita te Atua, are Atuaia aia bakatibu.+ 33 Ao e kanakoi baika riribaaki* ni kabane Iotia mai abaia ni kabane tibun Iteraera,+ ao e kairiia aomata nako ake a mena i Iteraera bwa a na toro iroun Iehova ae Atuaia. A aki roko n te rairakinako man irirakin Iehova ae Atuaia aia bakatibu ni kabane maiun* teuaei.