Taani Motikitaeka

16 N te tai teuana ao Tamton e nako Kaata, ao e nora ikekei te aine temanna ae kakabooaki, ao e rin n ana auti neiei. 2 Ao a tuangaki ae kangai I-Kaata: “E a roko ikai Tamton.” Mangaia are a otabwaninia ma ni karanna ni kangainaa ni mataroan oon te kaawa. A tiku ikekei n aki kakarongoa ni kangainaa, ao a taku i bon irouia: “Ngkana e ngaina, ao ti a tiringnga naba.”

3 Ma e tiku ni wene ikekei Tamton ni karokoa ae nukanibong. Ao e teirake ngke e a nukanibong ao e taui mataroan oon te kaawa, ma bouana ake uaai ake a mena n iterana, ao e koutii n ikotaki ma te kai ni kamatoa. E katokai i aon angana ao e uouotii nako taubukin te maunga are kaitaraa Eberon.

4 Imwin anne ao e a bwaka n tangira te aine ae arana Terira ae mena n te Mwarua ae Toreke.+ 5 Mangaia are a kawara neiei aia toka I-Biritia ao a taku: “Kamwanea*+ ao kakaaea bwa tera ae e reke iai korakorana ane rangi ni korakora anne, ao ti na kangaa n tokanikai i aona ma ni kabaea ao ni kataea ana kai. Ibukin aei, ao ti na bane n anganiko kaka 1,100 te mwakoro n tirewa.”

6 Imwina riki ao e taku Terira nakon Tamton: “Taiaoka ma tuangai bwa e reke ia korakoram ane rangi ni korakora anne, ao tera ae kona ni kabonganaaki bwa ko na kabaeaki iai ao ni kataeaki am kai.” 7 E taku Tamton nakon neiei: “Ngkana a kabaeai n itiai karain te kainikatebe aika menaai aika tuai n tawaaki, ao N na rikirake ni mamaara n aroia mwaane nako.” 8 Mangaia are aia toka I-Biritia akekei a uotii nakon neiei itiai karain te kainikatebe aika menaai aika tuai n tawaaki, ao neiei e a kabaea teuaei ni baikai. 9 Ao a katikuia taani karan n ana ruu riki teuana neiei, ao e takarua neiei nakon teuaei ni kangai: “Tamton, a a ewekiko I-Biritia!” Ao e motiki karain te kainikatebe n te aro ae bebete, n aroni karain te buraekiti* ae moti ngkana e boo ma te ai.+ Ao e aki ataaki aron rekeni korakorana.

10 E taku ngkanne Terira nakon Tamton: “Noria! Ko a tia ni mwamwanaai* ao ni kekeweai. Tuangai ngkai taiaoka bwa tera ae ko kona ni kabaeaki iai.” 11 Mangaia are e taku nakon neiei: “Ngkana a kabaeai n roobu aika boou aika tuai ni kabonganaaki n te mwakuri, ao N na rikirake ni mamaara n aroia mwaane nako.” 12 Mangaia are e anai roobu aika boou Terira ao e kabaea iai teuaei ao e takarua ni kangai: “Tamton, a a ewekiko I-Biritia!” (N te tai anne ao a katukaki taani karan n ana ruu riki teuana neiei.) Ao e motiki ni kabwarai mai anganibaina n aron ae kaanga taiani karai.+

13 Imwin anne ao e taku Terira nakon Tamton: “Ko a tia ni mwamwanaai ni karokoa ngkai ao ni kekeweai.+ Tuangai bwa tera ae ko kona ni kabaeaki iai.” Ao e taku nakon neiei: “Ngkana ko bibirii ma karain te kunnikai, irau aika biraki aika itiai aikai.” 14 Mangaia are e kamatoai neiei n te biin* ao e takarua ni kangai nakoina: “Tamton, a a ewekiko I-Biritia!” Mangaia are e uti mani matuna ao e buuta te biin are kabonganaaki n rarangaan te kunnikai, ma karain te kunnikai.

15 E taku ngkanne neiei nakoina: “Ko kangaa ni kangai, ‘I tangiriko,’+ ngkana bon akea nanom irou? Ko a tia ni mwamwanaai n taai aika tenua aikai, ao ko tuai n tuangai nibwani korakoram ane rangi ni korakora anne.”+ 16 E a rangi ni kua teuaei* n te aro ae kaanga e a kaani mate, ibukina bwa e teimatoa neiei ni kabinekaau nakon teuaei ni katoabong ao ni kairoroa.+ 17 Mangaia are e a kaotii bwaai ni kabane ake i nanona nakon neiei ao e taku: “E tuai man roko te mwariro i aon atuu, ibukina bwa bon ana Natiraite te Atua ngai mani moani bungiakiu.*+ Ngkana e koreaki irau ao e na kitanai korakorau, ao N na rikirake ni mamaara ma n riki bwa kaanga bon aroia mwaane nako.”

18 Ngke e noria Terira bwa e a tia ni kaotii nakoina bwaai ni kabane ake i nanona, ao e aki tabwara ma e a weteiia naba aia toka I-Biritia,+ ao e kangai: “Nakomai n te tai aei, bwa e a tia ni kaotii nakoiu bwaai ni kabane ake i nanona.” Mangaia are a a kawara neiei aia toka I-Biritia aikai, ao a uota te mwane. 19 Ao neiei e kamatua teuaei i aoni bubuaniwaena, ao e wetea te mwaane temanna ao e tuangnga bwa e na korei irana aika biraki ake itiai. Imwin anne ao e a moanna n taua taekan teuaei, bwa e a nako korakoran teuaei mairouna. 20 Ao e takarua ni kangai: “Tamton, a a ewekiko I-Biritia!” E uti teuaei mani matuna ao e taku: “N na otinako n aron taai ake tabeua+ ao n ioioai bwa I aonga ni bwara.” Ma e aki ataia teuaei ae e a tia ni kitanna Iehova. 21 Mangaia are a taua teuaei I-Biritia ao a autii kanoani matana. Imwina ao a kairia n ruo nako Kaata ao a kabaea ni bwaai ni kabaewae aika uaai aika taiani buraati, ao e riki teuaei bwa te tia kabuta te atibu ni kamantinti uita* n te karabuuti. 22 Ma a a manga bwebwerake irannatuna imwini koreakina.+

23 Ao a bane n ikotaki aia toka I-Biritia bwa a na anga taiani karea aika bati nakon atuaia ae Takon+ ao a na bukamaru, bwa a taku: “E a tia atuara n anga Tamton ae aiara nako nanoni baira!” 24 Ngke a nora teuaei aomata ao a karaoiroa atuaia ao a taku: “E a tia atuara n anga nako nanoni baira aiara are e urua abara,+ ao e tiringia aika rangi ni bati mai buakora.”+

25 Ao ibukini kakatongan nanoia ao a taku: “Wetea Tamton bwa e na kakukureira.” Mangaia are a wetea Tamton ni kaotinakoa man te karabuuti bwa e na kamatakuia, ao a kateia i marenan taiani boua. 26 E taku ngkanne Tamton nakon te teinimwaane are tautaua baina: “Kariaia bwa N na ringi taiani boua ake kautokoan te auti, bwa I aonga n rarai.” 27 (E onrake te auti anne irouia mwaane ma aine. A bane ni mena ikanne aia toka I-Biritia, ao tao 3,000 mwaane ma aine aika mena i aon te taubuki, ake a matakuakina Tamton ngke e kakukureiia.)

28 Ao e takarua Tamton+ nakon Iehova ni kangai: “Te Uea ae Moan te Rietata ae Iehova, uringai taiaoka, ao kakorakoraai+ taiaoka tii n te tai aei ngkoe ae te Atua, ao kariaia bwa N na irantangaai ni karekei kaia I-Biritia ibukin teuana mai buakoni matau aika uoua.”+

29 Ao Tamton e taui boua ake uaai ake i nuka ake kautokoan te auti ao e rarai, baina are te atai i aon are teaina ao baina are te maing i aon are teaina. 30 Ao e takarua Tamton ni kangai: “Kariaia bwa N na mate ma I-Biritia!” Ao e ineakini boua akekei ma korakorana ni kabane, ao e bwaka te auti i aoia ueea ma aomata ni kabane ake i nanona.+ Mangaia are e tiringia aika bati riki ni matena nakon are e a tia n tiringia n ana tai ni maiu.+

31 Imwina riki ao a a ruo rikaaki tarina ma ana utu ni kabane tamana n anaia ni kaokia. A uotia ni waerake ao a kaiia i marenan Toraa+ ao Etitaora n ruanimaten tamana are Manoa.+ E a tia ni momotiki taekaia tibun Iteraera i nanon 20 te ririki.+