Etita

2 Imwini baikai ngke e a kerikaaki korakoran unin te Uea are Aatueruti,+ ao e a uringa te baere e karaoia Watiti+ ao te baere e motikaki ibukin neiei.+ 2 Ao a taku ana toro te uea ake a bebeku i matana: “A riai ni kakaaeaki ibukin te uea, aine aika baaraoi aika tuai ni boo ma mwaane. 3 Ao ke e rineiia taan tei te uea man aono* ni kabane ake e tautaekan,+ bwa a na kairiia ni kabane aine aika baaraoi aika tuai ni boo ma mwaane aikai nako Tiutian* ae te tabo ae nonoaki,* nakon te auti n aine. Ao ke a tararuaaki iroun Ekai+ are ana iunaki te uea ao te tia tararuaiia aine, ao ke a katamaroaaki.* 4 Ao e na riki te ateiaine are rangi ni kimwareirei irouna te uea bwa te ueannaine n onea mwini Watiti.”+ E kakukureia te uea te iango anne, ao anne te bwai are e karaoia.

5 Ao iai te mwaane temanna ae te I-Iutaia ae mena i Tiutian*+ ae te tabo ae nonoaki,* ae arana Moretekai+ are natin Iaira are natin Timei are natini Kiti, ae tibuni Beniamin,+ 6 are kairakinako ngkoa mai Ierutarem bwa te taenikai n ikotaki ma aomata ake a kanakoaki ma Iekonia*+ are Uean Iuta, are e kairia Nebukaneta are Ueani Baburon bwa te taenikai. 7 Teuaei bon te tia tararuaa* Ataatia,* ae taekan Etita, are natin tarin tamana,+ bwa akea taman neiei ke tinana. E teiraoi rabwatan te ateiaine aei ma ni baaraoi, ao ngke e mate tamana ma tinana ao e a anaia naba Moretekai bwa natina. 8 Ngke e a katanoataaki ana taeka ao ana tua te uea, ao ngke a a bane ni kairaki ateiaine aika mwaiti nako Tiutian* ae te tabo ae nonoaki* i aan ana tararua Ekai,+ ao e kairaki naba Etita nakon ana auti* te uea i aan ana tararua Ekai are te tia tararuaiia aine.

9 Ao e kukurei teuaei iroun te ateiaine aei ao e reke akoana* iroun teuaei, mangaia are e waekoa teuaei ni bairei bwaai ibukini katamaroaan*+ neiei ma kanana, ao e anganna ateiainen ana auti te uea aika itiman aika raraoi. E kamwainga naba neiei ma ateiaine ake ana toro nakon te tabo ae te kabanea n tamaroa n te auti n aine. 10 E aki taekina te bwai teuana Etita ibukia ana aomata+ ke ana koraki, bwa e tuangnga Moretekai+ bwa akea temanna ae e na kaongoa.+ 11 E katoabong Moretekai n ririaki i matani katawanangin te auti n aine, n ongongora aron Etita bwa e uara ao baike a riki nakoina.

12 Iai aia tai ateiaine n tatabemania nako n nakon te Uea are Aatueruti, ni koron namwakaina ake 12 ibukin te katamaroa are e katauaki ibukia aine. Aio aroni kakororaoani katamaroaaia,* bwa onoua namwakaina n te bwaa ae te mura,*+ ao onoua namwakaina n te bwaa ae te batiam+ ma aeka ni kabira riki tabeua ibukin te katamaroa.* 13 Ao n te tai are e a tauraoi iai te ateiaine n rin nakon te uea, ao e na anganaki te bwai are e bubutii n te tai are e a nako iai man te auti n aine nakon ana auti te uea. 14 E na rinnako n te tairiki, ao e na oki n te moaningabong nakon te auti n aine are te kauoua are e mena i aan ana tararua Tiaatikati are ana iunaki te uea,+ are te tia tararuaiia buuna ni kewe.* Ao e na aki manga rin neienne nakon te uea ma tii ngkana e boni kukurei irouna te uea ao ni weteaki n arana.+

15 Ao ngke e a boo ana tai n rin nakon te uea Etita are natin Abiaira are ai tamani Moretekai are e anaa neiei bwa natina,+ ao bon akea te bwai ae bubutii neiei ma tii te bwai are e tua Ekai are ana iunaki te uea, are te tia tararuaiia aine. (N te tai anne ao e reke akoan Etita irouia aomata nako ake a noria.) 16 E kairaki Etita nakon te Uea are Aatueruti n ana auti n uea n te katebwina n namwakaina, ae te namwakaina ae Tebeta,* n ana kaitiua n ririki+ n tautaeka teuaei. 17 Ao te uea e a tangira riki Etita nakoia aine ake tabemwaang, ao e akoaki riki neiei ma ni butimwaeaki iroun teuaei nakoia aine ake tabemwaang. Mangaia are e katokaa teuaei te baunuea* i aon atun neiei ao e karikia bwa te ueannaine+ n onea mwini Watiti.+ 18 Ao te uea e karaoa te baka n amwarake ae bubura ibukia ni kabane ana aomata ake tooka ao ana toro, ae te baka n amwarake ibukin Etita. Imwina ao e a katanoataa te inaomata nakon taian aono,* ao e teimatoa n anganga bwaintangira ni kaineti ma are e kona n reke iroun te uea.

19 Ngke a a manga bane ni kairaki n te kauatai aine*+ aikai, ao e a tekateka Moretekai ni mataroan ana oo te uea. 20 E aki roko Etita n te taekinia ana koraki ao ana aomata,+ n aron are e tuangnga Moretekai. E teimatoa Etita ni karaoa te baere e taku Moretekai, n arona ngkoa ngke e mena i aan ana tararua teuaei.+

21 Ni boong akanne ngke e tekateka Moretekai ni mataroan ana oo te uea, ao a a un Bikitan ma Taretia ake mataniwi n ana auti te uea aika uoman, ake taan teiakina te mataroa, ao a baireia bwa a na katiaa aron* te Uea are Aatueruti. 22 Ma e ataa taekan te baei Moretekai, ao e waekoa n tuanga te Ueannaine are Etita. Ao e taetae Etita nakon te uea n arani Moretekai.* 23 Mangaia are e a karaoaki te kakaae i aon te baei ao n tokina e a kakoauaaki, ao a a uaia n tauraki mwaane aikai i aon te kai, ao a bane ni koreaki mwini baikai i matan te uea n te boki are rongorongon taai akekei.+