Taani Motikitaeka

4 Ma imwini maten Euta ao a a manga karaoa naba ae buakaka tibun Iteraera i matan Iehova.+ 2 Mangaia are e anga ngaiia* Iehova nako nanoni bain Iabin are ueani Kanaan,+ are e tautaeka i Atiora. Te mataniwi n ana taanga ni buaka bon Titera, ae maeka i Aroteta+ ae aia kaawa natannaomata.* 3 A tang tibun Iteraera nakon Iehova,+ ibukina bwa iai ana kaa ni buaka Iabin* aika 900, aika a otinako kabaang mani wiraia,*+ ao e kabatiaa karawawataaia tibun Iteraera+ i nanon 20 te ririki.

4 Ao Tebora ae te burabeti n aine+ ae buun Rabitota, e momotiki taekaia tibun Iteraera n te tai anne. 5 E taneiai n tekateka i aan arokan Tebora ae te baam i marenan Rama+ ma Betaera+ n aonon Eberaim ae maungaunga, ao a waewaerake nakoina tibun Iteraera ibukin ataakin ana motikitaeka te Atua. 6 E kanaanako neiei bwa e na weteaki Bwaraka+ are natin Abinoam mai Ketetinabetari,+ ao e taku nakon teuaei: “Tiaki e a tia n tua Iehova ae Atuan Iteraera? ‘Naako ao mwananga nakon* te Maunga ae Tabora, ao kairiia mwaane aika 10,000 mai buakoia tibun Nabetari ao tibun Teburun bwa raom. 7 N na kaira Titera nakoim, are mataniwin ana taanga ni buaka Iabin, n ikotaki ma ana kaa ni buaka ao ana taanga ni buaka, nako rarikin te karaanga* ae Kition,+ ao N na anga ngaia nako nanoni baim.’”+

8 Ao e taku Bwaraka nakon neiei: “Ngkana ko irai ao N na nako, ma ngkana ko aki irai ao N na aki nako.” 9 Ngaia are e taku neiei: “N na bon iriko. Ma e na aki karekea kamoamoaam mwanangam anne, bwa Iehova e na anga Titera+ nako nanoni bain te aine.” Ao e teirake Tebora ao e nako ma Bwaraka nako Keteti.+ 10 Ao Bwaraka e weteiia tibun Teburun ao tibun Nabetari+ nako Keteti, ao a a iria mwaane aika 10,000. E iria naba Tebora.

11 Ao Eebere are te Kenaite e a kaman raurenako ma taiani Kenaite,+ ake kanoan Obaba, are tamani buuni Mote,+ ao e tei ana umwanrianna i rarikin te aroka ae bubura i Taanannim, are i Keteti.

12 A kaongoa Titera ae e a tia ni waerake Bwaraka are natin Abinoam, nakon te Maunga ae Tabora.+ 13 E aki tabwara Titera ma e a botii naba ana kaa ni buaka, aika kaa ni buaka aika 900 aika a otinako kabaang mani wiraia,* n ikotaki ma ana taanga ni buaka ni kabane ake raona mai Aroteta ae aia kaawa natannaomata, ao a nakon te karaanga* ae Kition.+ 14 Ao e taku Tebora nakoni Bwaraka: “Teirake, bwa aio te bong are e na anga iai Titera nako nanoni baim Iehova. Tiaki e bon otinako Iehova n rimoam?” Ao e ruo Bwaraka man te Maunga ae Tabora ma mwaane ake a iria aika 10,000. 15 Ao Iehova e kamangaoa Titera ma ana kaa ni buaka ni kabane ao te taanga ni buaka ni kabane,+ ao ni kamaunaia n ana kabaang Bwaraka. N tokina ao e a ruo Titera mai aon ana kaa ni buaka ao e a birinako i aoni waena. 16 E rimwin taiani kaa ni buaka Bwaraka ma te taanga ni buaka ni karokoa Aroteta ae aia kaawa natannaomata. Mangaia are a bwaka ana taanga ni buaka ni kabane Titera n te kabaang, akea temanna ae tiku ni maiu.+

17 Ma e birinako Titera i aoni waena nakon ana umwanrianna Iaera+ are buun Eebere+ are te Kenaite, bwa iai te raoi i marenan Iabin+ are uean Atiora ma kaaini batan Eebere are te Kenaite. 18 Ao e otinako Iaera ni butimwaea Titera ao e taku nakon teuaei: “Rinnako au toka, rinnako ikai. Tai maaku.” Mangaia are e rin teuaei i nanon ana umwanrianna neiei, ao e rabuna teuaei n te rabuna. 19 Ao e taku nakon neiei: “Taiaoka n anganai teutana te ran bwa N na moi, bwa I a bwatakataka.” Mangaia are e kauka te kunniman ae kanoana rannimamman te man, ao e angan teuaei bwa e na moi,+ ao rimwi e a manga rabunna. 20 E taku teuaei nakon neiei: “Teei i rarikini mataroan te umwanrianna, ao ngkana iai ae e roko ma n titirakiniko ni kangai, ‘Iai ikai te mwaane?’ ao kangai, ‘Akea!’”

21 Ma e anaa kain rooan te umwanrianna ao te aama Iaera are buun Eebere. Ao ngke e a matunako teuarei bwa e a rangi ni kua, ao e waerikiriki nakon teuaei ao e ewara borana ni kain rooan te umwanrianna, ao e oreia ni karibua nako aontano, ao e mate teuaei.+

22 E roko ikekei Bwaraka bwa e kaea Titera, ao e otinako Iaera ni kawara teuaei ao e taku: “Nakomai ao N na kaota nakoim te mwaane ae ko kakaaea.” E rinnako ma neiei, ao e nora Titera ni wene ni mate, ma kain rooan te umwanrianna ni borana.

23 Mangaia are e a kataenikaia Iabin are ueani Kanaan te Atua n te bong anne, i mataia tibun Iteraera.+ 24 Ao e ririkirake ni bwakarawata baia tibun Iteraera n ekaanako Iabin are ueani Kanaan,+ ni karokoa ae a a boni kamauna Iabin are ueani Kanaan.+