Ieremia
31 “N te tai anne,” bon ana taeka Iehova, “N na riki bwa Atuaia ana utu ni kabane Iteraera, ao a na riki bwa au aomata.”+
2 E kangai ana taeka Iehova:
“A reke akoaia n te rereua aomata ake a reke maiuia man te kabaang,
Ngke e nakonako Iteraera nakon ana tabo ni motirawa.”
3 E kaoti nakoiu Iehova man te tabo ae raroanako ao e taku:
“I tangiriko n te tangira ae akea tokina.
Anne bukina ae I katikiko nakoiu n te tangira ae koaua.*+
4 Ngaia ae N na manga kateiko, ao ko na boni manga tei.+
Ane ko na manga tabeki am tamboriin* ngkoe ae te teinnaine ae Iteraera,
5 Ane ko na manga ununiki ni nne ni kureebe ni maunga ake i Tamaria.+
A na ununiki taan ununiki ao ni kukurei n aia uaa.+
6 Bwa e na roko te bong are a na takarua iai taan tantani ni maungan Eberaim, ni kangai:
‘Teirake, ti na waerake nako Tion nakon Iehova ae Atuara.’”+
7 Bwa e kangai ana taeka Iehova:
“Takarua nakon Iakoba ma te kakatonga.
Takarua ni kimwareirei ibukina bwa kam mena i aoia natannaomata.+
Katanoataa, aanga te karaoiroi, ao kangai,
‘Iehova, kamaiuia am aomata, ae nikiraia tibun Iteraera.’+
8 Ae I a kaokiia man te aba are i meang.+
N na ikotiia man taabo aika taiani kabanea n raroanako n te aonnaba.+
A na bane ni mena mataki ao mwauku i buakoia,+
Ao te aine ae bikoukou ma te aine ae bung.
A na oki nako ikai bwa te botaki n aomata ae rangi ni bati kaaina.+
9 A na roko ma n tanginiwenei.+
N na kairiia ngkai a bubutii akoaia.
Bwa boni ngai Taman Iteraera, ao bon au karimoa Eberaim.”+
10 Ongora n ana taeka Iehova ngkami aika natannaomata,
Ao katanoataa ae kangai i buakon abamwakoro ake a raroanako:+
“Teuare kamaenakoia tibun Iteraera e na manga ikotiia.
E na tararuaiia n aron te tia kawakintiibu nakoia ana nanai.+
11 Bwa Iehova e na manga kabooa Iakoba,+
Ao ni kamaiua* mai nanoni bain ane e korakora riki nakoina.+
12 A na roko ao n takarua ni kimwareirei i aon te tabo ae rietata i Tion,+
Ao n raneanea ibukin raoiroin* Iehova,
Ao ibukia maan aika ataei mai buakoia tiibu ma kooti.+
13 “N te tai anne ao e na mwamwaie ni kimwareirei te aine ae tuai ni boo ma te mwaane,
Ao rorobuaka naba n ataei n ikotaki ma unimwaane.+
N na bita tangia nakon te kakatonga.+
N na kabebeteia ao n angania te kimwareirei n oneani mwin te nanokawaki.+
14 N na kanuaiia ibonga* n taian amwarake aika bati,*
Ao a na rauaki au aomata n raoiroiu,”+ bon ana taeka Iehova.
15 “E kangai ana taeka Iehova:
‘E ongo te aba te bwanaa i Rama+ ae te bwaebwaeti ma te tanginiwenei ae korakora:
E tanginiwenei Rakera ibukia natina mwaane.*+
E rawa ni kabebeteaki nanona ibukia natina,
Bwa ai akea natina.’”+
16 E kangai ana taeka Iehova:
“‘Taua bwanaam man te tanginiwenei, ao matam man te rannimata,
Bwa iai te kaniwanga ibukin am mwakuri,’ bon ana taeka Iehova.
‘Ane a na oki mai aban te tia kairiribai.’+
17 ‘Ao iai te kantaninga ibukim n te tai ae e na roko,’+ bon ana taeka Iehova.
‘A na oki natim nakon oin aia aono.’”+
18 “I bon ongo ana bwaebwaeti Eberaim,
‘Ko kaetai ao I a eti,
N aron te kao te teei ae tuai ni kataneiaaki.
Kaokai ao N na tauraoi n rairaki,
Bwa bon Atuau ngkoe Iehova.
19 Bwa imwin rairakiu ao I namakina te nanokawaki.+
Ngke I a tia ni kaotaaki, ao I orea boton rangau n te rawawata.
I maamaa ao I bwainrang,+
Bwa I uouota kabuakakaan au bongi n roro n rikirake.’”
20 “Tiaki bon natiu te mwaane ae rangi ni kakawaki irou Eberaim ao te nati ae tangiraki?+
Bwa e ngae ngke I tataetae n ekianako, ma I teimatoa n uringnga.
Anne bukina ae e a ueke au namakin* ibukina,+
Ao N na bon nanoangaia,” bon ana taeka Iehova.+
21 “Katei am kanikina n te kawai,
Ao katei boua aika kanikina.+
Mutiakina te kawai ae totouaki are te kawai ae ko na nako iai.+
Ko na oki ngkoe ae te teinnaine ae Iteraera, nakon am kaawa aikai.
22 Ko na maanra riki n nanokokoraki ngkoe ae te nati te aine ae ko aki kakaonimaki?
Bwa e karika te bwai ae boou n te aonnaba Iehova:
Ae te aine ae e na ingainga ni kaea te mwaane.”
23 E kangai ana taeka Iehova ae Atuaia taanga ni buaka* ae Atuan Iteraera: “Ane a na manga taekin taeka aikai i Iuta ao ni kaawana nako, ngkana I ikotiia aia taenikai ni kaokiia: ‘E bia kakabwaiako Iehova, ngkoe ae te tabo ni maeka ae ko raoiroi,+ ngkoe ae te maunga ae tabu.’+ 24 Ao a na bane ni maeka iai Iuta ma kaawana nako, taan ununiki ao te koraki ake a kaiririia nanai.+ 25 Bwa N na kanuaa ane e nimamate, ao N na katibutauaia akana mamaara n tatabemania nako ibukin te bora ni baki.”+
26 Ibukin aei ao I a uti naba ma ni kaurei matau, ao e rangi ni kakukurei matuu aei irou.
27 “Noria! A a roko boong,” bon ana taeka Iehova, “ae N na kamwaitiia iai tibun Iteraera ao tibun Iuta. N na kamwaitiia naba aia nanai ni man.”+
28 “Ao n aron are I tarataraiia bwa N na taeki wakaaia, N na kabwakaia, N na uruia, N na kamaunaia, ao N na kammarakiia,+ ao ai arona naba bwa N na tarataraiia bwa N na kateiia ao n unikiia,”+ bon ana taeka Iehova. 29 “Ni boong akanne ao a na aki manga kangai, ‘Bon taama aika kang kureebe aika mangingi, ma a mangingi* iai wia naati mwaane.’+ 30 Ma e na mate temanna ma temanna ibukin oin ana bure. Te aomata ae kang kureebe aika mangingi, e na boni mangingi iai wina.”
31 “Noria! A a roko boong,” bon ana taeka Iehova, “ae N na karaoa iai te berita ae boou ma tibun Iteraera ao tibun Iuta,+ 32 ae tiaki aekakin te berita are I karaoia ngkoa ma aia bakatibu n te bong are I taui baia iai ni kairiia ni kaotinakoia man te aba are Aikubita,+ ‘are au berita are a urua,+ e ngae ngke bon aia toka ni koaua* ngai,’ bon ana taeka Iehova.”
33 “‘Bwa aio te berita ae N na karaoia ma tibun Iteraera imwini boong akanne,” bon ana taeka Iehova. “N na karina au tua i nanoia+ ao N na koreia i nanoia.+ Ao N na riki bwa Atuaia, ao a na riki bwa au aomata.”+
34 “Ao akea temanna ae e na manga reireina raona n aomata, ke temanna ae e na reireina tarina ni kangai: ‘Ko na ataa Iehova!’+ bwa a nangi bane n ataai, mairoun ae te kabanea ni mangori ni karokoa ae te kabanea ni kakannato i buakoia,”+ bon ana taeka Iehova. “Bwa N na kabwarai aia kairua, ao N na aki manga uringi aia bure.”+
35 E kangai ana taeka Iehova
Ae anga taai ibukin te oota n te ngaina,
Ao tuua* ibukin namwakaina ma itoi ibukin te oota n te tairiki,
Are teuare kamarebua taari ao ni karurungaea naona,
Ae arana Iehova ae Atuaia taanga ni buaka:+
36 “‘Ngkana a bwaka kaetieti aikai,’ bon ana taeka Iehova,
‘Ao e nang toki ngkanne kanoan Iteraera n riki bwa te natannaomata ae memena i matau n taai nako.’”+
37 E kangai ana taeka Iehova: “‘Ngkana e kona ni baireaki abwakini karawa i eta ao a kona n neneraki aan te aonnaba i nano, ao I a tibwa kona ngkanne n rawa nakoia kanoan Iteraera ni kabane ibukini bwaai ni kabane ake a karaoi,’ bon ana taeka Iehova.”+
38 “Noria! A a roko boong,” bon ana taeka Iehova, “ae e nang kateaki iai te kaawa+ nakon Iehova, man Ana Taua Ananera+ nakon te Mataroa ae te Maninganinga.+ 39 Ao e na otinako te kora ni baire+ ni kaineta te tabuki ae Kaareba, ao e na rairaki ni kaineta Kooa. 40 Ao e na riki bwa te bwai ae tabu nakon Iehova+ te mwarua* ni kabutaa are nnen rabwataia maate ma taiani mannang,* ao rabee ni kabane ni karokoa te Mwarua ae Kiteron,+ ni karokoa maninganingan te Mataroa n Aoti+ are i mainiku. E na aki manga taewakaaki ke n uruakaki.”