2 Rongorongo
20 Imwin anne ao a a roko tibuni Moaba+ ma tibun Ammon+ ao tabeman taian Ammonim,* bwa a na buakana Ieotiabata. 2 Mangaia are e tuangaki ae kangai Ieotiabata: “A a roko aomata aika uanao man aonon taari,* are mai Etom+ bwa a na ekikonako, ao a mena i Atatontamata, ae taekan Enikeri.”+ 3 Ao e a maaku Ieotiabata, ao e a kamatoaa nanona* bwa e na ukoukora Iehova.+ Mangaia are e katanoataa te aki mamatam i Iuta ni kabutaa. 4 Ao a bane n ikotaki kaain Iuta bwa a na titirakina Iehova.+ A roko mani kaawan Iuta ni kabane bwa a na titirakina Iehova.
5 Ao e teirake Ieotiabata i buakon te botaki n aomata i Iuta ao i Ierutarem, i nanon ana auti Iehova i matan te katawanang ae boou, 6 ao e taku:
“Iehova ae Atuaia ara bakatibu, tiaki bon te Atua ngkoe i karawa,+ ao tiaki ko bon taui aroia aia tautaeka n uea ni kabane natannaomata?+ E mena i nanoni baim te mwaaka ao te korakora, ao bon akea ae e kona n tei n ekikonako.+ 7 Ngkoe ae Atuara, tiaki ko boni kakioianako ngkoa kaain te aba aei mai mwaia am aomata aika tibun Iteraera, ao ko anga nakoia kanoan* raoraom are Aberaam+ bwa a na teimatoa n abanna? 8 Ao a maeka iai, ao a katea am tabo ae tabu ikekei ibukin aram,+ ao a kangai, 9 ‘Ngkana e roko i aora te kabuanibwai, bwa tao n te kabaang, te motikitaeka ae ribuaka, te aoraki ae kamamate, ke te rongo, ao kariaia bwa ti na tei i matan te auti aei ao i matam (bwa e mena aram n te auti aei),+ ao ti na weweteiko ibukini buokara mai buakon rawawatara, ao ko bia ongo ao ni kamaiuira.’+ 10 Ao a a roko ngkai mwaane aika tibun Ammon, tibuni Moaba, ao ake man te aono ae maungaunga i Teira,+ are ko aki kariaia niniakia ngkoa irouia tibun Iteraera ngke a otinako man te aba are Aikubita. A rairakinako mairouia ao a aki kamaunaia.+ 11 Ao ngkai, a a kabooa mwin ara mwakuri n aroia n rinnako bwa a na kakionakoira mai abam are ko anganira bwa tibwangara.+ 12 Ngkoe ae Atuara, ko aki motiki taekaia?+ Bwa akea korakorara i mataia aomata aika uanao aika a roko n ekiranako aikai. Ao ti aki ataa te bwai ae ti riai ni karaoia,+ ma a kainetiko matara.”+
13 N te tai anne ao a bane kaain Iuta n tei i matan Iehova, n ikotaki ma aia koraki n ataei, buuia, ao natiia.*
14 Ao i buakoia te koraki aika ikotaki, ao e a roko taamnein Iehova i aon Iaatiara are natin Tekaria are natini Benaia are natin Ieeiera are natini Matania are tibun Rewi are temanna i buakoia kanoan Ataba. 15 E taku: “Kakauongo ngkami aika kaain Iuta ni kabane ao ngkami aika kaain Ierutarem ao te Uea ae Ieotiabata! E kangai ana taeka Iehova nakoimi, ‘Tai maaku ke ni maakunrang ibukia aomata aika uanao aikai, bwa tiaki ami bwai te boo ni buaka, ma bon ana bwai te Atua.+ 16 Kam na ruo ningabong n ekiianako. A na roko ni kawain Titi, ao ane kam na noriia i tabon te mwarua i rarikin te rereua ae Ieruera. 17 Kam bon aki riai ni buaka n te boo ni buaka aei. Teei ni nnemi, tai kakammwakuri+ ao nora ana kakamaiu Iehova ibukimi.*+ Tai maaku ke ni maakunrang,+ ngkami aika kaain Iuta ao kaain Ierutarem. Kam na otinako ningabong n ekiianako, ao e na memena iroumi Iehova.’”+
18 E a katorobubua naba ngkekei Ieotiabata ni bobaraaki i aontano, ao a bane naba kaain Iuta ao kaain Ierutarem ni bobaraaki i matan Iehova n taromauria Iehova. 19 Ao a a teirake tibun Rewi ake kanoani Koata+ ao Kora bwa a na karaoiroa Iehova ae Atuan Iteraera n te bwanaa ae rangi ni korakora.+
20 Ao a utimwaaka n te ingabong are imwina ao a otinako nakon rereuan Tekoa.+ Ngke a otinako ao e a teirake naba Ieotiabata ao e taku: “Ongora irou, ngkami aika kaain Iuta ao ngkami aika kaain Ierutarem! Onimakina Iehova ae Atuami bwa kam aonga ni kona n tei n nene.* Onimakinia ana burabeti+ ao ane kam na tokanikai.”
21 Ngke e tia n taetae ma aomata, ao e a rineiia naba mwaane bwa a na anene+ nakon Iehova n anga aia nebonebo ma kunnikaia aika katamaroaaki aika tabu, ngke a otinako n rimoaia mwaane ake a uabwai ni buaka, ao a kangai: “Katituaraoa Iehova bwa e teimatoa n aki toki ana tangira ae koaua.”*+
22 Ngke a a moana aia anene n nebonebo ma te kimwareirei, ao e a katikuia Iehova taani karan n ekiianako mwaane aika tibun Ammon, tibuni Moaba, ao kaain te aono ae maungaunga i Teira, ake a ninia Iuta, ao a kamateia n tatabemania nako i bon i marenaia.+ 23 Ao a rairaki tibun Ammon ao tibuni Moaba n ekiianako kaain te aono ae maungaunga i Teira+ bwa a na kamateia ao ni kamaunaia. Ao ngke a a tia ni kamaunaia kaain Teira, ao a a manga boni buoka kamatean temanna ma temanna.+
24 Ma ngke a a roko kaain Iuta n te taua n tantani are n te rereua+ ma n taraiia aomata aika uanao akekei, ao a nori rabwataia aomata aika mate ni bwaka i aontano,+ ao akea temanna ae reke maiuna. 25 Mangaia are e a roko Ieotiabata ma ana aomata bwa a na uotiinako bwaai ni kuri mairouia, ao a kunei i buakoia bwaai aika rangi ni bati, kunnikai, ao bwaai aika tatangiraki, ake a buutii mai aon rabwataia maate bwa aia bwai ni karokoa ae a aikoa kona n uotii.+ E bane tenibong n urakinani bwaai ni kuri akekei bwa e a bon rangi ni bati. 26 N te kaaua ni bong ao a bane n ikotaki n te Mwarua* ae Beraka, bwa a karaoiroa* Iehova ikekei. Anne bukina ae a arana iai te tabo arei bwa te Mwarua ae Beraka,*+ ni karokoa te bong aei.
27 Ao a bane mwaane aika tibun Iuta ao Ierutarem ma Ieotiabata are ririmoaia, n oki nako Ierutarem ma te kimwareirei, bwa e a tia Iehova ni kakimwareireiia n tokanikaia i aoia aiaia.+ 28 Mangaia are a rinnako i Ierutarem ma bwaai ni katangitang aika iai karaiia, taian abi,+ ao taiani buu,+ ao a nakon ana auti Iehova.+ 29 Ao e roko maakakin te Atua i aoia tautaekan nako aaba, ngke a ongo ae e buaka Iehova n ekiianako aiaia tibun Iteraera.+ 30 Ngaia are e aki kakiriweaki ana aono Ieotiabata are e tautaekanna, ao e teimatoa Atuana n anganna te motirawa mairouia aiana ni kabane ake i rarikina.+
31 Ao e teimatoa n tautaeka Ieotiabata i aon Iuta. Bon 35 ana ririki ngke e riki bwa te uea, ao e tautaeka i Ierutarem i nanon 25 te ririki. Aran tinana Atubaa are natin Tirei.+ 32 E teimatoa n nakonako ni kawain tamana are Ata.+ E aki rairakinako mai iai, ao e kakaraoa ae eti i matan Iehova.+ 33 Ma a aki kanakoaki taabo aika rietata,+ ao aomata a tuai ni kaeta nanoia nakon Atuaia aia bakatibu.+
34 Ni kaineti ngkanne ma nikiran rongorongon Ieotiabata mai moana ni karokoa tokina, a koreaki i buakon ana taeka Ieu+ are natin Aanani,+ ake a karinaki naba n aia Boki Uean Iteraera. 35 Imwin aei ao e a karaoa te boraraoi te Uea are Ieotiabata are uean Iuta, ma te Uea are Aatia are uean Iteraera, ae kakaraoa ae buakaka.+ 36 Mangaia are e karikia bwa toana ni kabai kaibuke bwa a na nanako Taretiti,+ ao a kabai kaibuke i Etionkebera.+ 37 Ma e taetae ni burabeti Erietera are natin Totawaiu mai Maretia n ekaanako Ieotiabata ni kangai: “Ibukina bwa ko karaoa te boraraoi ma Aatia, ao e na urui am mwakuri Iehova.”+ Mangaia are a a urubekebeke kaibuke,+ ao a aikoa kona n nako Taretiti.