Te Minita
8 Antai ae ai aron te aomata ae wanawana? Antai ae ataa aroni katokan te kangaanga?* Wanawanan te aomata e kaotaa ubuna ao e kabebetea matabubuakana.
2 I taku: “Ongeaba ni baike e tua te uea,+ ibukin am taetae n tuea nakon te Atua.+ 3 Tai waekoa n nako mai matana.+ Tai tei ibukin te bwai teuana ae buakaka,+ bwa e kona ni karaoa te bwai ae e kukurei iai, 4 ibukina bwa e korakora ana taeka te uea.+ Antai ae kona ni kangai nakoina, ‘Tera ae ko karaoia?’”
5 Ane e kakairi n te tua ao e na aki rotaki n te kangaanga,+ ao te nano ae wanawana e na ataa te tai ae riai ma aroni baireani bwaai.*+ 6 Bwa iai taini bwaai nako ao aroni baireaia,*+ ibukina bwa e a rangi ni bati aia kangaanga aomata. 7 Ngkai akea temanna ae ataia bwa tera ae e na riki, antai ae kona n tuangnga bwa e na kangaa n riki?
8 N aron ae akea te aomata ae iai mwaakana i aon te korakora ae te maiu* ke ni kona n taua te korakora ae te maiu, ao ai arona naba bwa akea temanna ae iai mwaakana i aon te bong ni mate.+ N aron ae akea te tautia temanna ae kariaiakaki n oki n tain te buaka, ao ai aron naba te buakaka bwa e na aki kariaia te koraki ake a kakaraoia bwa a na reke birinakoia.*
9 I a tia n nori baikai ni kabane ao nanou e iangoi mwakuri nako ake a karaoaki i aan taai, i nanon te tai are a tautaeka iai aomata i aoia aomata, ni karekea rawawataia.*+ 10 Ao I noriia aomata aika buakaka ni kaiiaki, ake te koraki ake a taneiai n riirin ao n otiotinako man te tabo ae tabu, ma i nanon te tai ae aki maan ao a a mwanuokinaki naba taekaia n te kaawa are a kakaraoa iai anne.+ Bon akea naba manenan te baei.
11 E kakorakoraaki riki nanoia aomata nakoni karaoan ae buakaka+ ibukina bwa e aki waekoa ni karokoaki te tuuaa ibukin te mwakuri ae buakaka.+ 12 E ngae ngke tao e karaoa ae buakaka te tia bure tebubua te tai ao e boni maiu naba i nanon te tai ae maan, ma I ataia ae e na bon nakoraoi aroia te koraki ake a maaka te Atua ae koaua, ibukina bwa a maakua.+ 13 Ma e na aki nakoraoi tokin te aomata ae buakaka,+ ao e na aki naba maan ana bong aika ai aron te nuu,+ ibukina bwa e aki maaka te Atua.
14 Iai te bwai ae akea manenana* ae riiriki n te aonnaba: Iai aomata aika raoiroi aika reke irouia baika tau n reke irouia aomata aika buakaka bwa mwin aia mwakuri,+ ao iai aomata aika buakaka aika reke irouia baika tau n reke irouia aomata aika raoiroi bwa mwin aia mwakuri.+ I taku bwa bon akea naba manenan te baei.
15 Mangaia ae I kamoamoaa te kimwareirei,+ ibukina bwa bon akea te bwai ae raoiroi riki iroun te aomata i aan taai nakon te amwamwarake ao te momoi ao te kimwareirei. E bon riai n reke aei irouna ngkai e mwakuri korakora i nanoni bongini maiuna,+ aika e anganna te Atua ae koaua i aan taai.
16 I motika nanou bwa N na karekea te wanawana ao n nori baika karaoaki* ni kabane aika riki n te aonnaba,+ e ngae ngke akea te mamatu n te ngaina ke n te bong* ibukini baikai. 17 Ao I iangoi ana mwakuri ni kabane te Atua ae koaua, ao I ataia ae a aki kona aomata n ota n te bwai ae riki i aan taai.+ N aki ongei aia kakorakora aomata, ma a bon aki kona n ota iai. E ngae ngke a taku bwa e tau wanawanaia n ataia, ma a bon aki kona n ota raoi iai.+