Ana Bure te Uea ae Tawita

Ngke e mate Tauro, ao e a riki Tawita bwa te uea ngke 30 ana ririki ni maiu. Tabeua te ririki imwini kaueaana ao e a nora te aine temanna ae baaraoi mai taubukin ana baareti, n te tairiki teuana. E a ataia imwina ae aran neiei boni Batateba ae buun te tautia ae Uria. E tua bwa e na kairaki neiei nakon ana baareti. Ao e wene n taanga ma ngaia ao e a bikoukou. E kataia Tawita ni karabaa te bwai ae e a tia ni karaoia. E tuanga te mataniwi n ana taanga ni buaka bwa e na kaaki Uria mai moa n te buaka ao a na kerikaaki mairouna. Imwini maten Uria n te buaka, e a mare Tawita ma Batateba.

Ma e bon nori baika riki aika buakaka ni kabane Iehova. Tera ae e na karaoia? E kanakoa Iehova te burabeti ae Natan nakon Tawita. E taku Natan: ‘Iai ana tiibu aika bati te mwaane temanna ae kaubwai, ao te mwaane ae maiu ni kainnano bon tii temanna ana tiibutetei are e rangi n tangiria. Ao te mwaane are kaubwai e anaa ana tiibutetei are tii temanna te mwaane are maiu ni kainnano.’ E rangi n un Tawita ao e taku: ‘E riai ni mate te mwaane ane kaubwai anne!’ E taku ngkanne Natan nakon Tawita: ‘Boni ngkoe te mwaane ane kaubwai anne!’ E rawawata nanon Tawita, ao e taku nakon Natan: “I boni bure nakon Iehova.” E karokoi kangaanga aika bati te bure aei i aon Tawita ma ana utu. E katuuaaea Tawita Iehova ma e kariaia bwa e na aki mate ibukina bwa e kaota te koaua ao e nanorinano.

E kani katea te tembora ibukin Iehova Tawita, ma Iehova e rinea natin Tawita ae Toromon bwa e na kateia. E a katauraoi bwaai Tawita ibukin Toromon ao e taku: ‘E na rangi n tamaroa ana tembora Iehova. E uarereke Toromon, ma N na buokia ni katauraoi bwaai ibukina.’ E anga ana bwaintangira Tawita te mwane ae bati ibukin te mwakuri ni kateitei. E karekeia taani kateitei aika mwaatai. E katauraoi koora ma tirewa, ao e karokoi kaai aika tiira mai Turo ao Titon. Ngke e a uakaan tokini maiun Tawita, e angan Toromon taamnein aroni katean te tembora. E taku: ‘E tuangai Iehova bwa N na korei baikai ibukim. E na boni buokiko Iehova. Tai maaku. Ko na korakora ao waakina te mwakuri.’