E Kakorakoraa Te Aomata Ae Kua Iehova
“[Iehova] E angangania akana nimamate te kona; ao E kabatiai korakoraia akana aki konamaki.”—ITAIA 40:31.
1. Kaota aron te korakora ae mena inanon bwaai aika a karikaki iroun te Atua.
AKEA tian korakoran Iehova. Ao ai batira te korakora ae memena ni bwaai ake e kariki! A rangi n uangingi taian atom—are a karaoaki mai iai bwaai ni kabane—n te aro are e kona ni mena tebubua te birion birion, mwaitin taian atom inanon teuana te timtim n ran.a A kateimatoaki maiun bwaai ni kabane ake i aon te aonnaba n te korakora ae nako man mwamwakurin bwaai aika mwaakaroiroi ake a mena i aon taai. Ma mwaitira te korakora man taai ae e kainnanoaki ibukin kateimatoan te maiu i aon te aonnaba? Moan te uarereke mwaitin te korakora ae karaoaki man Taai, ae e roota te aonnaba. Ma e ngae n anne, mwakoron korakoran Taai ae moan te uarereke ae e roota te aonnaba, boni moan te korakora riki nakon te korakora ni kabane ae kabonganaki n taabo ni karaobwai ni kabane ake i aon te aonnaba.
2. Tera oin te rongorongo n Itaia 40:28 ibukin korakoran Iehova?
2 Ngkana ti iangoa taekan te atom ke ti kaoka ara iango nakon te iuniweeti ae moan te abwabwaki aei, ao e na bon anaaki nanora iai ni mwaakan Iehova ae moan te kakamaaku. Maroaka ae e kona ni kangai: “Kam na kaeka matami nako karawa, ao tara Ae karaoi baikai, Ae kairiia nako aia taanga ni warekiia: E kabaneia ni weteiia n araia; ngkae e bati mwakana, ngkae E korakora, ao e aki bua temanna mai buakoia”! (Itaia 40:28) Eng, “E korakora” Iehova, ao boni ngaia Nibwan te “korakora” ae e kabonganaki ibukin karikan te iuniweeti ngkoa.
E Kainnanoaki te Korakora ae Raka Riki
3, 4. (a) Baikara bwaai tabeua ake a na kona ni kakuaira? (b) Tera te titiraki ae e riai n rinanoaki iroura?
3 E ngae ngkai akea tian korakoran te Atua, ma a boni kona ni kua aomata. N taabo nako ike ti nako iai, ti noriia aomata aika a kua. A kua ngkana a uti, a kua ngkana a nako ni mwakuri ke n reirei, a kua ngkana a okiri mwengaia, ao ngkana a nang matu ngkanne, a bon aki tii kua, ma a nimamate naba. Tabeman a taku bwa tera ngke a kona n nakon te tabo teuana ma ni karekea motikan rawaia are a kainnanoia iai. Ti namakina naba te kua, ngaira aika ti beku iroun Iehova, bwa korakoran tangiran te Atua iroura e kairira bwa ti na kakorakoraira ni mwakuri. (Mareko 6:30, 31; Ruka 13:24; 1 Timoteo 4:8) Ao a mwaiti riki bwaai ake a anaa korakorara.
4 E ngae ngkai Kristian ngaira, ma tiaki nanona bwa ti na aki rootaki naba ni kangaanga ake a ituia aomata ni kabaneia. (Iobi 14:1) Te aoraki, kangaanga ma te mwane, ke kangaanga tabeua riki n te maiu aei, a kona ni karika te bwara n nano ae e kamamaara te aomata. Irarikin kangaanga aikai, iai naba kataaki ake a riiriki irouia aomata aika a bainikirinaki ibukin tangiran te raoiroi. (2 Timoteo 3:12; 1 Betero 3:14) Ibukin kangaanga aika a riki man te aonnaba aei ao riribakin ara mwakuri n tataekina rongorongon te Tautaeka n Uea, tabeman mai buakora a kona n rangi ni kua, n te aro are ti a namakinna bwa tao ti riai ni karaurau riki n ara beku ibukin Iehova. Irarikin anne, Tatan te Riaboro e kabonganai bwaai ni kabane ake a mena inanoni baina, ni kataia n uruana iai onimakinan te Atua iroura. Ti na kanga ngkanne ni karekea korakorara n taamnei ae ti kainnanoia, bwa ti aonga n aki nimamate ma ni kai toki nanora?
5. Bukin tera ngkai e kainnanoaki te korakora ae raka riki nakon korakoraia aomata, ibukin katiaan te mwakuri ni minita ni Kristian?
5 Ti riai ni mwiokoa Iehova ae te tia Karikiriki ae moan te mwaaka, bwa e na kakorakoraira n te aro n taamnei. Te abotoro Bauro e kaotia bwa te mwakuri ni minita ni Kristian e na kainnanoa te mwaaka ae raka riki nakon ae mena irouia aomata aika a aki-kororaoi. E korea ae kangai: “Ao iai i roura te bwai ae kakawaki aei i nanoni maangko aika taano, ba e aonga n ataki te mwaka ae moan te korakora ba mwakan te Atua, ao tiaki mwakara.” (2 I-Korinto 4:7) Kristian aika kabiraki a tabe ni karaoa “te nakoa n raoi,” ao a buokaki iai irouia raoraoia aika a kaantaninga te maiu i aon te aonnaba. (2 I-Korinto 5:18; Ioane 10:16; Te Kaotioti 7:9) Kioina ngkai aomata ngaira aika ti aki-kororaoi ae ti kakaraoa ana mwakuri te Atua i aan bainikirinara, te koaua bwa ti aki kona ni karaoia n oin korakorara. E buokira Iehova rinanon ana tamnei ae raoiroi, mangaia are mamaarara e kaota riki aron korakorana. Ao ai bebetera nanora ngkai n ataakin ae “E kateimatoaia akana raoiroi Iehova”!—Taian Areru 37:17.
‘Iehova boni Korakorara’
6. E a kanga te Baibara ni kakoaua nakoira ae Iehova bon Nibwan korakorara?
6 Tamara are i karawa e bati ni “korakora” ao e bebete irouna bwa e na kakorakoraira. Ni koauana, ti tuangaki ae kangai: “[Iehova] E angangania akana nimamate te kona; ao E kabatiai korakoraia akana aki konamaki. Ane a na bon nimamate ataei ni mwane ma ni kua, ao a na boni bwaka rorobuaka: ma e na manga reke te korakora irouia akana kaantaninga Iehova; a na mwemwe rake ni baiia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.” (Itaia 40:29-31) Ibukin rikiraken taiani kataaki, n taai tabetai ti kona n namakinna ae ti a riki n ai aron te tia biri ae e a kua rangana, ao e a aki kona ni manga biri. Ma ti a kaan ngkai ma tian te kabobirimwaaka ibukin te maiu, ao a aki riai ni bwara nanora iai. (2 Rongorongo 29:11) Ara Kairiribai ae te Riaboro e tiotionako “n ai aron te raian ae bekorara,” ao e tangiria ni katokira man ara mwakuri ibukin Atuara. (1 Betero 5:8) Ti na ururingnga are ‘korakorara ao otangara Iehova,’ ao a bati ana bwai n ibuobuoki ibukin ‘kakorakorakiia akana a nimamate.’—Taian Areru 28:7.
7, 8. Baikara bwaai ni kakoaua ake a kaotia bwa Iehova e kakorakora Tawita, Abakuka, ao Bauro?
7 Iehova e kakorakora Tawita bwa e aonga n nanomwaaka i aan kataakina aika mwaiti. E aki nanououa ao e onimaki raoi Tawita, ao ngaia are e korea ae kangai: “Ti na riki ni korakora iroun te Atua: ba boni Ngaia ae na toutouia aiara.” (Taian Areru 60:12) Iehova e kakorakora naba Abakuka bwa e aonga ni katiaa tabena ni burabeti. E kangai Abakuka 3:19: “Boni korakorau Iehova, ae te Uea, ao e karaoi waeu n ai aroni waeia riia, ao E na kanakonakoai i aon au tabo aika rietata.” E riai naba n taraaki ana katoto Bauro, are e korea ae kangai: “I boni konai bwaai ni kabane ni karaoi iroun [te Atua ae e] kakorakoraai.”—I-Biribi 4:13.
8 N ai aron Tawita, Abakuka ao Bauro, ti riai n onimakina ana konaa te Atua ni kakorakoraira, ao mwaakana ni kona ni kamaiuira. Ngkai ti a ataia bwa te Uea ae Moan te Rietata ae Iehova bon Nibwan “te korakora,” ti na iangoi aanga tabeua ake ti kona iai ni karekea kakorakorara n te itera n taamnei, man bwaai n ibuobuoki ake a katauraoaki iroun te Atua, aika a taonako.
Bwaai n Taamnei Ibukin Kakorakorara
9. Tera te ibuobuoki ae reke man booki ni Kristian ibukin nabeakinara n te itera n tamnei?
9 Te botumwaka n ukeuke n reirei n te Baibara ae e reitaki ma kabonganakin ara boki ni Kristian, e kona ni kakorakoraira ma ni kateimatoaira riki. E anene ni kangai te tia areru: “E kabaia te aomata . . . [ae] e matennanoa ana tua Iawe, ao e iaiangoia ni ngaina ao ni bong. E katotonga te kai ae e unikaki i etan te karanga ae e karika uana n taina ao a aki rarai baana: a materaoi ana makuri ni kabane.” (Taian Areru 1:1-3, Baibara ni Katorika) N aron ae ti riai n amwarake ibukin kateimatoan korakoran rabwatara, ao ti riai naba ni karina te amwarake n taamnei ae katauraoaki mairoun te Atua, rinanon ana Taeka ao booki ni Kristian, bwa ti aonga n teimatoa ni korakora n te aro n taamnei. Mangaia are te ukeuke n reirei ae manena ao te iangomwaaka iai, boni bwaai aika a riai ni kakaraoaki.
10. Tao n ningai te tai ae ti kona ni kabongana ibukin karaoan ara ukeuke n reirei ao arora ni iangomwaaka?
10 E boni manena te kaiangomwaaka i aon “ana bwai te Atua ake a nano.” (1 I-Korinto 2:10) Ma n ningai te tai ae ti kona ni kaiangomwaakaira iai? Natin Aberaam ae Itaaka “e oti nako . . . ba e na iango n te tawana n te tairiki.” (Karikani Bwaai 24:63-67) Te tia areru ae Tawita e ‘iangoa taekan te Atua n te tai n tei n te bong.’ (Taian Areru 63:6) Ti kona n ukeuke n reirei n ana Taeka te Atua ma ni kaiangomwaakaira iai n te ingabong, n te bwakantaai, ke te tairiki—ma n te koaua ni koaua, n te tai ae aki akaka. Te aeka n ukeuke n reirei ma ni kaiangomwaaka ae aron anne e kairira nakon ana bwai n ibuobuoki Iehova teuana riki ae e kona ni kakorakora iai te aomata n te aro n taamnei—ae bon te tataro.
11. Bukin tera ngkai ti riai n iangoa te tataro ni katoa tai bwa te bwai ae rangi ni kakawaki?
11 Te tatataro nakon te Atua ni katoa tai bon te bwai n ibuobuoki ae kakorakoraira. Mangaia are ti bia “botumwaka n tataro.” (I-Rom 12:12) N taai tabetai ti riai ni bubutii ibukin karekean te wanawana ao te korakora ae ti kainnanoia ibukin kaitaran te kataaki teuana. (Iakobo 1:5-8) Ti na kaitaua ma n neboa te Atua naba ngkana ti nora kakoroan bukin ana kaantaninga, ke ti noria bwa e a tia ni kakorakoraira bwa ti na waakina ara beku ibukina. (I-Biribi 4:6, 7) Ngkana ti teimatoa n nim ma Iehova n te tataro, ao e na bon aki kona ni kitanira. “Noria,” e anene Tawita, “bon te tia buokai te Atua.”—Taian Areru 54:4.
12. Bukin tera ngkai ti riai ni butiia te Atua bwa e na anganira tamneina ae raoiroi?
12 Tamara are i karawa e kamwaakaira ma ni kakorakoraira rinanon taamneina ae raoiroi are nanona mwaakana ae mwammwakuri. E korea ae kangai Bauro: “Ma ngaia are I katorobubua nakon te Tama, . . . ba E na anganingkami, n ai aroni baikorakini mimitongina, te kakorakoraki i nanomi n te mwaka iroun Tamneina.” (I-Ebeto 3:14-16) Ti riai n tataro ni bubutii reken te taamnei ae raoiroi iroura, n aki nanououa bwa e na boni kakabwaiaira Iehova n anganira. E kairiia aomata Iesu bwa a na iango ngke e kangai: Ngkana te tei e bubutii te ika, ao te koaua bwa te tama ae tatangira e na anganna te naeta? E na bon aki. Mangaia are e motika ana iango ni kangai: “Ma ngaia aei, ngkai kam [itiuaki n te bure ma kam] ata te angania natimi baika raraoi, ngkami akana kam buakaka, ao tiaki e maiti riki iroun Tamami are i karawa te kan anga te Tamnei are Raoiroi nakoia akana butiia?” (Ruka 11:11-13) N aron anne ti na tataro n akea te nanououa iroura, ma n ururingnga are ana toro aika kakaonimaki te Atua a kona ni “kakorakoraki” n te mwaaka rinanon tamneina.
Te Ekaretia—Te Bwai n Ibuobuoki ae Kakorakoraia Aomata
13. Tera ae ti riai n iangoia ibukin botaki ni Kristian?
13 Iehova e kakorakoraira rinanon botaki ake a karaoaki n te ekaretia ni Kristian. E kangai Iesu: “Ba ike a botaki iai uoman ke teniman n arau, ao Ngai I mena naba iai i buakoia.” (Mataio 18:20) Ngke e taekina te berita anne Iesu, e maroroakin bwaai ake a riai n tabeakinaki irouia taani kairiri n te ekaretia. (Mataio 18:15-19) Ma Ana taeka aikai a kaineti naba nakon ara botaki n te ekaretia, ruunga, ao bwabwaro ni kabane, ake a kaukaki ao a kainaki n te tataro rinanon arana. (Ioane 14:14) Mangaia are bon te kakabwaia teuana, te kona ni kaei botaki ni Kristian aikai, e ngae ngkana tii tabeman ake a roko iai, ke ngkana a roko iai aomata aika ngaa ma ngaa mwaitiia. Mangaia are ti bia kaota ara kakaitau ibukin botaki aikai aika a karaoaki ibukin kakorakorara n te itera n taamnei, ao a kaungai nanora nakon te tangira ao mwakuri aika raraoi.—Ebera 10:24, 25.
14. Tera te kabwaia ae ti kona ni karekea man aia kekeiaki ni mwakuri unimwaane ni Kristian?
14 Unimwaane aika Kristian a kakarekea te ibuobuoki n taamnei ao te kaunganano nakoia aomata. (1 Betero 5:2, 3) Bauro e buokiia ma ni kaungai nanoia ekaretia ake e beku iai, n aron ae a karaoia mataniwi aika a mwamwananga ni boong aikai. Ni koauana, e ingainga nanona ni kani botaki ma raoraona n onimaki, bwa a aonga ni uaia n i kaunganano imarenaia. (Mwakuri 14:19-22; I-Rom 1:11, 12) Ti bia kaota ara kakaitau ibukia unimwaanen ara ekaretia ao mataniwi aika Kristian ni kabane, ake a rangi ni bubura aia mwakuri ibukin kakorakorara n te itera n taamnei.
15. A kanga raoraora n onimaki aika kaain ara ekaretia ni kona n riki bwa ‘taani kabebetei naano’?
15 Raao n onimaki ake a kaaina ara ekaretia a kona naba n riki bwa ‘taani kabebetei nanoia aomata.’ (I-Korote 4:10, 11) Kioina ngkai ‘raao ni koaua’ nakai, a kona ni buokira n tain karawawatara. (Taeka N Rabakau 17:17) N aron anne, ngke taani beku iroun te Atua aika 220 mwaitiia a kaotinakoaki man te auti ni kaikain are ni kaawan Sachsenhausen i aan aia tararua tautia aika Nazi n 1945, a kaitara ma te mwananga ae raroana 120 te maire. A mwananga ni botaki, ao ake a aintoa riki a katiki kaa aika uarereke tabeua, ake a toka iai taari ake a mamaara riki. Tera uaan anne? N te mwananga are a mate iai kaain te auti ni kaikain ake a raka mwaitiia nakon 10,000, bon akea temanna kaain Ana Tia Kakoaua Iehova are e mate iai. Rongorongo n aron akanne ake a boreetiaki n ana boki te Watch Tower ai aron te Yearbook of Jehovah’s Witnesses ao Jehovah’s Witnesses—Proclaimers of God’s Kingdom, a kakoaua ae te Atua e kakorakoraia ana aomata, n te aro ae a na aki bwara nanoia.—I-Karatia 6:9.b
Kakorakoraki Rinanon Ara Mwakuri n Tataekina te Rongorongo
16. E a kanga te kakaonimaki n ira te mwakuri ni minita ni kona ni kakorakoraira riki n te itera n taamnei?
16 Te kakaonimaki n ira tataekinan rongorongon te Tautaeka n Uea e kakorakoraira n te aro n taamnei. Te mwakuri aei e buokira bwa ti na katuua riki ara iango i aon ana Tautaeka n Uea te Atua, ma n iaiangoa te maiu are aki toki ao kakabwaia ake a kona n reke iai. (Iuta 20, 21) Berita ake a mena n te Baibara ake ti maroroakin n ara mwakuri ni minita a kakorakora riki ara kaantaninga ao a kona ni kateimatoai riki nanora, n ai aron te burabeti are Mika, are e kangai: “Ti na nakonako n aran Iehova ae Atuara n aki toki ao n aki toki.”—Mika 4:5.
17. Baikara reirei ake a taekinaki ni kaineti ma kairan reirei n te Baibara ma aomata?
17 E a kakorakoraki riki ara iraorao ma Iehova ngkana ti kabatiaa kabonganan te Baibara n reireinia aomata tabemwaang iai. N aron anne, ngkana ko kairi reirei n te Baibara n reitaki ma kabonganan te boki ae Ko Kona Ni Maiu n Aki Toki n Te Baretaiti i aon Te Aonnaba, e raoiroi ngkana a warekaki ma ni maroroakinaki kiibu tabeua ake a kaotaki iai. Karaoan anne, e buoka te aomata are e reireiaki, ao e kabatiaa naba ootara i aon bwaai n taamnei. Ngkana iai ana kangaanga te aomata are e reireiaki n aron otan te koaua teuana ae kaotaki n te Baibara, ke tao aron ataakin nanon te kabotau teuana, e kona ni katiaaki maroroakinan te mwakoro teuana man te boki ae te Maiu n Aki Toki inanon tabeua te tai, ao tiaki tii teuana te tai. Ai kukureira ngaira ngkana ti katauraoira raoi ma ni kekeiaki riki ni kataia ni kairiia aomata tabemwaang bwa a na kaania te Atua!
18. Kaota aron materaoin kabonganan te boki ae te Knowledge?
18 Ni katoa ririki, te boki ae te Knowledge That Leads to Everlasting Life e kamanenaki raoi ibukin buokaia aomata aika ngaa ma ngaa mwaitiia bwa a na riki bwa ana toro Iehova ake a katabuaki nakoina, ao a buokaki naba iai aomata ake a tuai n taneiai n te Baibara. N aron anne, ngke e uarereke, te mwaane ae kaain te Aro n Intu i Sri Lanka, e ongora n ana karaki te tia Kakoaua temanna ngke e taekina te Baretaiti. Tabeua te ririki imwin anne, teuaei e a manga kawara riki te tia Kakoaua arei, ao e a waekoa bun te tia Kakoaua ni moana te reirei n te Baibara ma teuaei. Ni koauana, te rorobuaka aei e a roroko n reirei ni katoa bong, ao e a bane naba te boki ae te Knowledge n te tai ae waekoa. E a moanna ni kakaei botaki ni kabane, e a raurenako ma ana Aro rimoa, ao e a riki bwa te tia uarongorongo ibukin te Tautaeka n Uea. Ngke e a babetitoaki, e a bon tia n reke ngkanne ana reirei n te Baibara are e kairia ma raoraona temanna.
19. Ngkana ti moanibwaia te Tautaeka n Uea, ao tera te bwai ae ti kona n onimakinna raoi?
19 Moanibwaian te Tautaeka n Uea e karika te kimwareirei iroura ao e kamatoaa riki nanora. (Mataio 6:33) E ngae ngkai ti rinanon kataaki aika kakaokoro, ma ti kukurei n tataekina te rongorongo ae raoiroi ma te ingainga n nano. (Tito 2:14) A mwaiti ibuakora ake a boraoi aroia ma ae tangiraki irouia aomata aika a kabwanina aia tai n te mwakuri ni bwaiania, ao tabeman a beku n taabo ike a kainnanoaki riki iai taan ua rongorongo. Ngkana ti kukurei ni boutokoa ana mwakuri te Tautaeka n Uea n aaro aikai ke aaro riki tabeua, ao ti na onimakina Iehova, bwa e na aki mwaninga ara mwakuri ao tangiran arana ae ti kaotiotia.—Ebera 6:10-12.
Nanomwaaka ni Korakoran Iehova
20. Ti na kanga ni kaotia bwa ti mwiokoa Iehova ibukin korakorara?
20 Ti na kabanea nanora ni kaotia bwa ti mwiokoa Iehova ma n onimakinna ibukin kakorakorara. Ti kona ni karaoa anne n te aro ae ti kabonganai ibuobuoki i aon bwaai n taamnei ni kabane ake e karekei rinanon “te toro ae kakaonimaki.” (Mataio 24:45) Te ukeuke n reirei n ana Taeka te Atua ma te ibuobuoki ni booki ni Kristian, aika ti karaoi ibon iroura ke n are e waakinaki ni botakin te ekaretia, te tataro ma nanora ni koaua, te ibuobuoki n te aro n taamnei mairouia unimwaane, katoto aika raraoi ake a karaoia raoraora n onimaki, ao te kakaonimaki ni karaoa te mwakuri ni minita, bon tabeua mai buakon bwaai n ibuobuoki ake a kakorakora riki ara iraorao ma Iehova, ao a kakorakoraira bwa ti na nanomwaaka n ara beku ibukina.
21. A kanga abotoro aika Betero ao Bauro ni kaota aron kainnanoan karekean te korakora mairoun te Atua?
21 E ngae ngkai ti mamaara, ma e na kakorakoraira Iehova bwa ti na karaoa nanona ngkana ti mwiokoia ibukin buokara. E ataa kainnanoakin te aeka n ibuobuoki aei te abotoro Betero ngke e korea ae kangai: “Ngkana e akoa te aba temanna, ao e na akoia n ai aron te konaa ae E anganna te Atua.” (1 Betero 4:11) Ao Bauro e kaota arona n onimakina te korakora ae reke mairoun te Atua ngke e kangai: “Ma ngaia ae I kukurei n taiani mamara, ma taian taetaebuakaki, ma taiani kai n nano, ma taiani bainikirinaki, ma taiani maraki, i bukini Kristo: ba ngkana I mamara, ao I a korakora iai.” (2 I-Korinto 12:10) Ti bia kaota te onimaki ae ai aron anne ma n neboa Iehova ae te Uea ae Moan te Rietata, ae e kakorakoraia aomata aika a nimamate.—Itaia 12:2.
[Kabwarabwara ae nano]
a N te warebwai ae kabonganaki n te U.S., te nambwa aei e koreaki bwa 100,000,000,000,000,000,000.
b E boreetiaki iroun te Watchtower Bible and Tract Society of New York, Inc.
Tera Am Kaeka?
• Bukin tera ngkai ana aomata Iehova a kainnanoa te korakora ae raka riki?
• Tera te kakoaua man te Baibara ae kaotia bwa te Atua e kakorakoraia ana toro?
• Baikara bwaai n ibuobuoki n tamnei ake e a tia ni katauraoia Iehova ibukin kakorakorara?
• Ti na kanga ni kaotia bwa ti mwiokoa te Atua ibukin korakorara?
[Taamnei n iteraniba 12]
Ara iraorao ma Iehova e kakorakoraki ngkana ti kabongana te Baibara ibukin reiakinaia aomata tabemwaang