“Kam Na Kaania Te Atua”

“Kam na kaania te Atua, ao ane E na kaaningkami.”​—Iakobo 4:8.

1, 2. (a) Tera ae a aki toki n taekinna aomata? (b) Tera te taeka ni kaunganano are e anga Iakobo ao bukin tera ngkai e kainnanoaki?

“E MENA iroura te Atua.” A a tia ni koreaki bwa bwaai ni katamaroa taeka aikai i aon banna aika tei ibukin te aba ao a nonoraki naba i aon aia kaboraoi tautia. E a tia naba te kibuntaeka ae “Ti mwiokoa te Atua,” ni koreaki i aon taiani mwane aika bati aika a kakabonganaki ni boong aikai. E a kabuta irouia aomata taekinan ae iai aia itoman ae kaan ma te Atua. Ko kakoauaa ae reken te itoman anne iroum, e kainnanoa riki ae bati nakon tii tataekinana ke korean taekana n te aro ae e na kai noraki irouia aomata tabemwaang?

² E kaotia te Baibara bwa e kai reke te itoman ma te Atua, ma e kainnanoaki iai te kakorakora. Tabeman Kristian ake a kabiraki n te moan tienture, a kainnanoa naba kakorakoran aia itoman ma te Atua ae Iehova. E riai te mataniwi irouia Kristian ae Iakobo ni kauringia tabeman ni kaineti ma aia kaibwabwaru ao buan te itiaki n te aro n taamnei irouia. I nanon ana tai n anga te reirei i aon anne, ao e anga te taeka ni kaunganano ae korakora aei: “Kam na kaania te Atua, ao ane E na kaaningkami.” (Iakobo 4:1-​12) Tera ae e nanonna Iakobo n te kibuntaeka ae “kam na kaania”?

3, 4. (a) Tao tera ae a kauringaki iai ana tia wareware Iakobo tabeman n te moan tienture, n te kibuntaeka ae “kam na kaania te Atua”? (b) Bukin tera ngkai ti kona ni koaua raoi bwa ti boni kona ni kaania te Atua?

³ A mwaiti mai buakoia taani wareka ana reta Iakobo n te moan tienture, ae a rangi n taneiai ma te kibuntaeka are e kabongana. A anganaki ibonga reirei aika kaineti riki ma aroia ni kona ni “kaania” Iehova rinanon te tua mairoun Mote ibukia ana aomata. (Te Otinako 19:22) A a bae n tia ni kauringaki ana tia wareware Iakobo ae kaanian Iehova bon tiaki te bwai ae e na kakeaaki bongana, bwa e rangi ni kakannato Iehova ao e riai ni karineaki riki nakoni bwaai ni kabane.

⁴ N te itera teuana, e taekinna te tia rabakau temanna i aon te Baibara, bwa “te kaungaunga aei [n Iakobo 4:8] e kaota korakoran kaantaningan te bwai ae raoiroi.” E ataia Iakobo bwa e teimatoa ana tangira Iehova ni kaoia aomata aika aki-kororaoi bwa a na kaaniia. (2 Rongorongo 15:2) E kauka te kawai nakon kaanian Iehova ana karea ni kaboomwi Iesu n akea te nanokokoraki iai. (I-Ebeto 3:11, 12) Ni boong aikai, e a tia n uki te kawai ibukin kaanian te Atua nakoia aomata aika mirion ma mirion mwaitiia! Tera ngkanne ae ti na karaoia ibukin kamateraoan te kakao aei? Ti na iangoi bwaai aika tenua aika ti kona ni kaania iai Iehova ae te Atua.

Kateimatoa “Karekean te Atatai” i aon Taekan Atua

5, 6. E kanga ana katoto te ataeinimwaane ae Tamuera ni kamataataa te bwai ae irekereke ma “karekean te atatai” i aon taekan te Atua?

⁵ E taku Iesu ni kaineti ma Ioane 17:3, NW: “Aei aron reken te maiu are aki toki, karekean te atatai i aon taekam ngkoe ae te Atua ae tii ngkoe ae koaua, ao teuare ko kanakoa, ae Iesu Kristo.” A bati Baibara ake a raira te kibu aei ao e kaokoro teutana ma are n te Baibara ae te New World Translation. A aki atonga “karekean te atatai” i aon taekan te Atua, ma a korea ae “ataakin” te Atua ke “kinaakin” te Atua. Ma, a bati taan rabakau aika a taekinna bwa nanon te taeka are kabonganaki n te taetae n Erene ngkoa, e nanona ana mwakuri te aomata ae waaki nako, n te aro are e na kona ni karekea ana itoman ae kaan ma te aomata temanna.

⁶ Ataakin te Atua n te aro ae kaan bon tiaki te iango ae boou n ana bong Iesu. N aron anne, ti noria n te Baibara n Ebera bwa “e tuai n ata Iehova Tamuera” ngke te tei ngaia.(1 Tamuera 3:7) E nanonaki n aei bwa e rangi n uarereke ana atatai Tamuera i aon taekan te Atua? E aki. A a boni bae n tia ana karo ao ibonga ni kabatiaa reiakinana. Ma e ngae n anne e taku te tia rabakau temanna bwa te taeka n Ebera are kabonganaki n te kibu anne, e “kona ni kabonganaki ibukin karekean te iraorao ae rangi ni kaan.” N te tai anne e tuai n ataa Iehova Tamuera n te aro ae kaan, ni kabotauaki ma ataakina irouna rimwi riki ngke e a beku bwa ana tia taetae Iehova. Ngke e a ikawairake Tamuera, ao e a bon tibwa ataa raoi Iehova, ao e a reke naba ana itoman ae kaan ma ngaia.​—1 Tamuera 3:19, 20.

7, 8. (a) Bukin tera bwa a aki riai ni bwara nanora n ana reirei te Baibara aika nano? (b) Baikara koaua tabeua aika nano man ana Taeka te Atua aika ti riai n reiakin?

⁷ Ko tabe naba ngkoe ni karekea te atatai i aon taekan Iehova bwa e aonga ni kaan riki am iraorao ma ngaia? Ni karaoan anne, ko riai ni ‘karekea tangiran’ te amwarake n taamnei are e katauraoia te Atua. (1 Betero 2:2) Ko aki riai n tii tabeakini booto n reirei. Kakorakorako naba n ukoukori reirei tabeua aika nano riki man te Baibara. (Ebera 5:12-​14) E bwara nanom n reirei aikai ao ko a iangoia bwa a rangi ni kangaanga? Ngkana ngaia anne, ao ururingnga are Iehova bon te ‘tia Reirei ae Kakannato.’ (Itaia 30:20) E ataa aron karinan te koaua ae nano n aia iango aomata aika aki-kororaoi, ao e kona naba ni kakabwaiaa am kakorakora ni kan taua te reirei are e reireiniko iai.​—Taian Areru 25:4.

⁸ Bukin tera bwa ko aki tuoa aroarom ni kaineti ma tabeua “ana bwai te Atua ake a nano”? (1 I-Korinto 2:10) Bwaai aikai bon tiaki rongorongo aika kabotu n aron, ake tao a mamaroroakinaki irouia taan rabakau ao mataniwin Aaro. Bon reirei aika bongana ake ti kona n reiakin iai baika a rangi ni kakaongora ni kaineti ma ana iango Tamara ae tatangira ao nanona. N te katoto, reirei n aron te kaboomwi, “te bae raba,” ao berita tabeua ake e kabonganai Iehova ni kakabwaiaia iai ana aomata ao ni kakoroi bukin ana kaantaninga, ao reirei riki aika mwaiti n aron aikai, boni bwaai aika rangi ni kakukurei ma n uaana ibukin te ukeuke n reirei i bon iroum.​—1 I-Korinto 2:7.

9, 10. (a) Bukin tera bwa e karuanikai te nanorieta, ao tera ae e na buokira ni kararoaa? (b) Bukin tera bwa ti riai n nanorinano ngkana ti na karekea iroura te atatai i aon taekan Iehova?

⁹ Ngkai ko a tabe ni karikirakei ataakin koaua ni kaineti ma bwaai n taamnei aika nano, tarataraiko man te kangaanga are e kona n irekereke ma reken te atatai. Te kangaanga aei bon te nanorieta. (1 I-Korinto 8:1) E karuanikai te nanorieta, bwa e karaureia aomata mairoun te Atua. (Taeka N Rabakau 16:5; Iakobo 4:6) Uringnga are akea te aomata ae riai ni kamoamoa n ana atatai. Ni kabwarabwarana, iangoi taeka aikai aika a mena n te moan taeka n te boki teuana ae kaota rikiraken aia rabakau aomata ni kaineti ma te aonnaba n taai aikai: “Ngkana e a moanna n rikirake rabakaura ao ti a moanna naba n ota bwa e bon uarereke ara atatai . . . A aki kakawaki rongorongon bwaai ake ti a tia n reiakin ni kabotauaki ma bwaai ake ti nang rinanoi n ara reirei.” E kamimi aron te nanorinano iai. Ni kaineti ma te atatai ae te kabanea ni kakawaki ae te atatai i aon taekan Iehova ae te Atua, e bati riki bukina ae ti riai ni bwaina iai te nanorinano. Bukin tera?

¹⁰ Nori kibuntaeka tabeua man te Baibara ibukin Iehova. “Ai nano ra am iango!” (Taian Areru 92:5, BK) ‘Akea tian wanawanan Iehova.’ (Taian Areru 147:5, BK) “A aki kona n ataki ana iango [Iehova].” (Itaia 40:28, BK) “Ai nano ra kaubwain te Atua ma rabakauna ma atataina!” (I-Rom 11:33) E mataata n anne bwa ti bon aki kona n ataa taekan Iehova ni kabane. (Te Minita 3:11) E a tia n reireinira baika bati aika kamimi, ma bon akea tian te atatai are ti na kona n reiakinaki iai. E aki ngkanne kakukureira ma ni kananorinanoira te kaantaninga anne? Ngkai ti reirei iai, ao ti riai ni kabongana ara atatai n taai nako bwa aan kaaniakira riki ma Iehova ao buokaia naba tabemwaang bwa a na kaan ma Ngaia, ma tiaki nanona bwa ti na kamoamoaira iai nakoia aomata.​—Mataio 23:12; Ruka 9:48.

Kaotiota Tangiran Iehova n Am Mwakuri

11, 12. (a) Ti kanga n rotaki n te atatai are ti karekea i aon taekan Iehova? (b) Tera ae e na kaotia bwa e boni koaua raoi tangiran te Atua iroun te aomata?

¹¹ E botau raoi te reitaki are e kaotia te abotoro Bauro i marenan te atatai ao te tangira. E korea ae kangai: “Bon au tataro ba e na raonaki riki ami tangira n te rabakau ma te ataibwai.” (I-Biribi 1:9) A aki riai ni kananorietaira koaua nako aika kakawaki ake ti reiakin ibukin Iehova ma ana kaantaninga, ma a riai ni karikirakea riki ara tangira ibukina.

¹² Ni koauana a bati aika a taku bwa a tangira te Atua ma a bon aki. A na bae n taku aomata aikai bwa a bon namakina te tangira ni koaua ae korakora i nanoia. A raraoi aeka n namakin akanne ao e kona ni kamoamoaki te aomata iai ngkana e nakoraoi ma te atatai ni koaua. Ma a bon aki tangira raoi te Atua. Bukin tera? Nora kabwarabwaran te tangira n ana Taeka te Atua: “Bon tangiran te Atua te baei, ae tauan ana tua i roura.” (1 Ioane 5:3) E boni koaua tangiran Iehova ngkana e kaotiotaki n te mwakuri.

13. E na kanga maakakin te Atua ni buokira ni kaotiota ara tangira ibukin Iehova?

¹³ Maakakin te Atua ae Iehova e na buokira bwa ti na ongeaba irouna. Te maaku anne ae irekereke ma karinean Iehova ae korakora, e nako man karekean te atatai i aon taekana, reiakinan arona ae moanibaan te tabu, mimitongina, mwaakana, ana kaetitaeka ae riai, wanawanana, ao ana tangira. E rangi ni kakawaki karekean te aeka ni maaku aei bwa ti aonga ni kaan ma ngaia. Ni koauana, nora ae taekinaki n Taian Areru 25:14: “E mena nanon Iehova ae raba irouia akana makua.” Mangaia are ngkana iai iroura te maaku ae riai ibukin karaoan ae e na aki kukurei iai Tamara ae tangiraki are mena i karawa, ao ti na kona ni kaan iai ma ngaia. Maakan te Atua e na buokira ni mutiakina nanon te reirei ae kawanawanaa te aba ae koreaki n Taeka N Rabakau 3:6 ae kangai: “Ko na ataia n nakonakom ni kabane, ao E na kaeti kawaim.” Tera nanon anne?

14, 15. (a) Baikara motinnano tabeua aika ti kaaitara ma ngaai ni katoa bong? (b) Ti na kanga ni karaoa ara motinnano n te aro ae na kaotiotaki iai arora ni maaka te Atua?

¹⁴ Ko riai ni karaoa am motinnano ni katoa bong ni kaineti ma te bwai ae rawawata ke ae bebete. N te katoto, te aeka ni maroro raa ae ko na maroroakinna ma raom ni mwakuri, raom n reirei ke kaain rarikim? (Ruka 6:45) Ko na mwakuri korakora ni karaoa mwiokoam, ke ko na mwakuri ni kabwarabae? (I-Korote 3:23) Ko na kaaniko ma aomata aika aki kaotiota tangiran Iehova, ke ko na ukoukora kakorakoran am reitaki ma aomata aika tangiri bwaai n taamnei? (Taeka N Rabakau 13:20) Tera ae ko na karaoia, e ngae ngke e uarereke am mwakuri iai, ibukin karikirakean tangiran ana Tautaeka n Uea te Atua? (Mataio 6:33) Ngkana a kaira am motinnano ni katoa bong kiibu aika a taekinaki ikai, ao ni koauana ngkanne ko a bon ‘ataa [Iehova] n nakonakom ni kabane.’

¹⁵ Mangaia are ni katoa tai are ti karaoa iai ara motinnano n te bwai teuana ma teuana, ti riai ni kairaki bwa ti na iangoa ae kangai: Tera ae e tangiria Iehova bwa N na karaoia? Tera te mwakuri ae e na rangi ni kakukureia nanona? (Taeka N Rabakau 27:11) Kaotiotan maakakin te Atua ae Iehova n te itera aei, boni ngaia te kawai ae te kabanea n tamaroa ibukin kaotiotan tangirana. Maakakin te Atua e na kairira naba bwa ti na teimatoa n itiaki n te itera n taamnei, n te aroaro ni maiu, ao n te itera n rabwata. Uringa te kibu naba are e kaumakiia iai Kristian Iakobo ngke e kangai:“Kam na kaania te Atua,” bwa e kaungaunga naba iai ni kangai: “Kam na kaitiaki baimi, ngkami aika taani bure; ao kam na kaitiaki nanomi, ngkami aika kam nanououa.”​—Iakobo 4:8.

16. N ara anganano nakon Iehova tera ae ti aki kona ni kakoroa nanona, ma e ngae n anne tera te bwai ae ti na teimatoa n tokanikai ni karaoia?

¹⁶ Ni koauana kaotiotan tangiran Iehova iroura e nanona riki ae bati nakon tii kararoaan te mwakuri ae buakaka. E kairira naba te tangira bwa ti na karaoa ae raoiroi. N te katoto, ti na kanga ni kabooa mwin korakoran ana atataiaomata Iehova? E korea ae kangai Iakobo: “A bane angabwai aika raraoi ma bwaai n tituaraoi aika moan raraoi n ruo mai eta mairoun Taman taian oota.” (Iakobo 1:17) E koaua bwa ngkana ti angan Iehova ara bwai nako, ao tiaki nanona bwa ti a kabatiaa iai kaubwaina. E a kaman iai irouna bwaai aika raraoi ni kabane ma kaubwai nako. (Taian Areru 50:12) Ao ngkana ti angan Iehova ara tai ma korakorara, tiaki nanona naba bwa ti a katoka kainnanona ae e aki kona n tokanikai i aona. E ngae ngkana ti rawa naba n taekina te rongorongo ae raoiroi ibukin ana Tautaeka n Uea te Atua, ma e kona ni katakaaruaia taian atibu! Ma bukin tera ngkanne ngkai ti na angan Iehova kaubwaira, ara tai, ao korakorara? Ti karaoa anne ibukina bwa ti kaotiota tangirana iroura ma nanora ni kabane, taamneira ni kabane, wanawanara ni kabane ao korakorara ni kabane.​—Mareko 12:29, 30.

17. Tera ae e kona ni kairira bwa ti na anganano ma te kukurei nakon Iehova?

¹⁷ Ngkana ti anganano nakon Iehova, ti riai ni karaoa anne ma te kukurei, “ba te Atua E tangira te aomata ae e waerake nanona ni kan angabwai.” (2 I-Korinto 9:7) E kona ni buokira te reirei ae koreaki n Te Tua-Kaua 16:17 bwa ti na anganano ma te kukurei bwa e kangai: “A na bane aomata n anga bwaai n te aro ane a kona iai, n ai aroni kakabaiaam iroun Iehova ae Atuam ae E anganiko.” Ngkana ti kaatuua iangoan ana atataiaomata Iehova nakoira, ti namakina iai nanora ni kan anganano ma te kukurei nakoina. Aeka n anganano aikai a kakukureia nanona, bwa ai bon titeboo naba ma te bwaintangira ae uarereke mairoun te nati ae tangiraki ae kakukureia ana karo. Kaotiotan ara tangira n te aro aei e buokira ni kaania riki Iehova.

Karikirakea te Itoman ae Kaan Rinanon te Tataro

18. Bukin tera bwa e bongana ae ti na iangoa aroni karaoiroan tein ara tataro?

¹⁸ Ara tai n tataro i bon iroura e anganira te tai ae moan te kakawaki ibukin te maroro ae kaan are ti kaota iai nanora ae aki ataaki irouia aomata nakon Tamara are i karawa. (I-Biribi 4:6) Kioina ngkai te tataro bon te kawai ae kakawaki ibukin kaanian te Atua, e bongana ngkanne bwa ti na kainabwabu moa man iangoa raoi tein ara tataro. Tiaki nanona bwa ti riai n rangi ni bwaati ni kakarabakau ma ni bairei raoi bwaai aika ti na taekin n ara tataro, ma nanona bwa bwaai ake ti taekin a riai n nako man te nano ni koaua. Ti na kanga ni karaoiroa riki ara tataro?

19, 20. Bukin tera ngkai ti na kananoa ara iango i aon bwaai tabeua imwain ara tataro, ao baikara bwaai aika riai aika ti na kananoi ara iango i aoia?

¹⁹ Tao ti na kataia ni kananoa ara iango i aon bwaai tabeua imwain ara tataro. Ngkana ti karaoa anne, ao e na mataata iai ma n nakoraoi ara tataro, ao ti na kararoaa naba kaokiokan kibuntaeka ake a kai uringaki. (Taeka N Rabakau 15:28, 29) Tao e na kona n buokira iaiangoan booto n reirei tabeua ake e taekin Iesu n ana tataro, ao kananoan naba ara iango i aoia bwa tera irekerekeia ma aroarora nako. (Mataio 6:9-​13) N te katoto, tao ti kona n titirakinira bwa tera tabera ae uarereke ae ti kani karaoia bwa ara ibuobuoki ibukin karaoan nanon Iehova i aon te aba. Tao ti kona ni kaotiota nanora nakon Iehova bwa ti kani kabonganaki irouna n aron ae ti kona ao ni butiia naba bwa e na buokira ni karaoan ara beku are e a tia n anganira? Ti karawawataki n raraomaeakinan bwaai aika a kainnanoaki ibukin maiura? Baikara buure aika ti kainnanoi kabwarakia, ao antai aika ti riai riki ni kabwarai aia bure? Baikara kataaki aika rotiira, ao ti ataia ae e rangi ni kataweaki kainnanoan ana kamanomano Iehova iai ke tiaki?

²⁰ N reitaki ma anne, tao ti riai n iangoia aomata ake ti kinaia ake a rangi ni kainnanoa ana ibuobuoki Iehova. (2 I-Korinto 1:11) Ma ti na bon aki mwanuoka taekan te kakaitau. Ngkana ti karekea ara tai teutana n iangoa anne, ao ti na kona n nora bukina bwa e aera ngkai ti riai ni karabwaa Iehova ao n neboia ni katoa bong ibukin korakoran ana atataiaomata. (Te Tua-Kaua 8:10; Ruka 10:21) Karaoan anne e na boni buokira ni karekea te kaantaninga ae raoiroi, ma ni kakaitau ibukin maiura aei.

21. Rinanoakin katoto raa man te Baibara ae tao a kona ni buokira ngkana ti na kawara Iehova n te tataro?

²¹ E kona naba ni katamaroaa ara tataro te ukeuke n reirei. Iai tataro aika rianako tamaroaia ae aia tataro aomata aika kakaonimaki ae a koreaki n ana Taeka te Atua. N te katoto, ngkana iai te kangaanga ae kakaiaki ae ti kaaitara ma ngaia ae karekea nakoira te tabeaianga ma raraomaeakinan marurungira, ke te koraki ake ti tangiriia, ao tao ti kona ni wareka ana tataro Iakoba ni kaineti ma te tai are e nang kaitiboo iai ma tarina ae te tia karekekai ae Etau. (Karikani Bwaai 32:9-​12) Ke tao ti kona n rinanon ana tataro te Uea ae Ata ngke a a kakamaakaki ana aomata te Atua irouia ana taanga ni buaka I-Tiobia ae teuana te mirion mwaitiia. (2 Rongorongo 14:11, 12) Ngkana ti karawawataki n te kangaanga ae e na kakamaakuira bwa ti aonga ni kabuakakaa raoiroin aran Iehova, ao e na manena ngkanne iaiangoan ana tataro Eria are karaoia i mataia taan taromauria Baara i aon te Maunga are Karemera, ao ai aron naba ana tataro Neemia ni kaineti ma buakakan aroia kaain Ierutarem. (1 Uea 18:36, 37; Neemia 1:4-​11) Te wareware ao kananoan te iango i aon tataro aikai, a kona ni kakorakoraa riki ara onimaki ao n anganira iango aika kaineti ma aron kawaran Iehova ma tabeaiangara ake a karawawataira.

22. Tera te kibu ibukin te ririki 2003, ao baikara bwaai aika ti na aki toki n titirakinira iai i nanon te ririki aei?

²² E mataata bwa akea riki te kakabwaia teuana, ke te tia ae tamaroa riki nakon mutiakinan ana reirei Iakobo are kangai: “Kam na kaania te Atua.” (Iakobo 4:8) Ti bia karaoa anne rinanon karikirakean ara atatai i aon taekan te Atua, kamwaitan riki ara tangira ibukina, ao karikirakean naba ara itoman ae kaan ma ngaia n ara tataro. Rinanon te ririki 2003 ngkai ti teimatoa n uringa kanoan te kibu ibukin te ririki aei ae Iakobo 4:8, ao ti bia kateimatoa tuoakin arora bwa ti kaania raoi Iehova ke ti aki. Tera kabanean taekan te kibu anne? E na kanga ‘ni kaaniko’ Iehova ao baikara kakabwaia aika kona n reke? E na maroroakinaki kaekaan anne n te kaongora are imwina.

Ko Uringnga?

• Bukin tera ngkai kaanian Iehova bon te bwai ae riai n nanonaki raoi?

• Baikara tiia tabeua aika ti riai n uaiakin ni kaineti ma karekean te atatai i aon taekan Iehova?

• Ti na kanga ni kaotia bwa iai tangiran Iehova ni koaua iroura?

• Baikara kawai ake ti na kona ni karikirakea riki iai ara itoman ae kaan ma Iehova n te tataro?

[Kabwarabwaraan n iteraniba 12]

E kangai te kibu ibukin te ririki ae 2003: “Kam na kaania te Atua, ao ane E na kaaningkami.”​—Iakobo 4:8.

[Taamnei n iteraniba 12]

Ana tataro Eria i aon te Maunga are Karemera bon te bwai ni katoto ae raoiroi nakoira