Ana Utu Iesu Antai Ngaiia?

N TAABO aika mwaiti ni kabutaa te aonnaba, n te namwakaina ae Ritembwa, ao ko na bae n nora bannan te merimeri ae Iesu ae karauaki ni mwanokaaki raoi iroun tinana ae Nei Maria ma tamana are e kaikawaia are Ioteba. Bannaia kaain te utu aei, e kona naba n atika nanoia aomata ake a taku bwa tiaki Kristian ngaiia. Kioina ngkai te banna aei, e a kabotoaki riki i aon Iesu, tera ngkanne ae e tuangira te Baibara ibukin ana utu Iesu i aon te aba?

E bon rangi ni kakannongora rongorongon ana utu Iesu. E boni bungiaki mairoun te kibono ae Nei Maria, mangaia are e a riki iai bwa kaain te utu aei. Ni kaineti ma are e taekinaki n te Baibara, e kamwaingaki maiun Iesu mai karawa nakon biroton Nei Maria rinanon te taamnei ae raoiroi. (Ruka 1:30-​35) E a tia ni kainrouaki Nei Maria ma Ioteba imwain butinakon rongorongon rikin Iesu n te aro ae kamimi, mangaia are e a riki iai Ioteba bwa taman Iesu are e kaikawaia.

Imwin bungian Iesu, a a manga karikiia riki natiia tabeman Ioteba ma Nei Maria, are nanona ngkanne, bwa ai tarin ao ai mwanen Iesu ataei aikai, kioina ngkai tii temanna tinaia. E noraki koauan aei n aia titiraki kaain Natareta rimwi riki ibukin Iesu are e kangai: “Tiaki natin te kabenta teuanne? Ao tiaki Maria aran tinana? Ao uake tarina, tiaki boni Iakobo, Ioteba, Timon ao Iuta? Ao tiaki a bane manena ni mena i buakora?” (Mataio 1:25; 13:55, 56, BK; Mareko 6:3) Mangaia are man aei, ao ti a kona ngkanne n iangoia bwa ana utu-ni-kaan Iesu i aon te aba, bon ana karo, aman tarina, ao uoman mwaanena.

Ma e ngae n anne, ao bon iai naba tabeman ni boong aikai aika a aki kakoauaa bwa iai tarin Iesu ao mwaanena aika natiia Ioteba ma Nei Maria. Tera bukina? E taekinaki n te New Catholic Encyclopedia, bwa “ni moan tein te Aro aei, ao a aki toki n reiakinaki kaaina ae e teimatoa ni kibono Nei Maria. Man te iango aei ngkanne, ao a kakoauaa kaain te Aro aei n akea te nanokokoraki, bwa bon akea riki natin Nei Maria aika riki.” Ao e taekinaki naba n te rongorongo aei, bwa taeka aika “tarina” ao “mwaanena” e kona n nanonaki iai “te aomata ke aomata aika tiaki te koraki ma a katiteuanaki n aia onimaki, ke iai reitakiia n aia Aro ke aaro n irekereke riki tabeua,” ke aia koraki n aron ae ai tariia.

Ma, e koaua anne? Iai naba tabeman taan rabakau n te Aro ni Katorika, aika a aki boraoi n iango ma te reirei n aomata aei, ma a boni boutokaa te iango ae bon iai tarin ao mwaanen Iesu n te aro n rabwata. E korea ae kangai te beretitenti ngkoa n te Catholic Bible Association i Amerika ae John P. Meier: “N te N[uu] T[etemanti], te taeka ae te ‘tari’ n te taetae n Erene, e aki kabonganaki ibukin te aro ni kaikonaki ke te kabotau, ma e kateretereaki raoi iai te aro n reitaki n te utu ke te koraki ae eti i aan tuan te kateiriki, ae nanona bon tarim ni koaua ke ai tarim bwa titeboo tamami ma a kakaokoro tinami, ke titeboo tinami ma a kakaokoro tamami.”a Eng, e taekinaki n te Baibara bwa bon iai tarin Iesu ao mwaanena ake natiia Ioteba ma Nei Maria.

A bon taekinaki naba n taian Euangkerio taekaia ana utu Iesu ake tabeman riki, ma ti na kaatuua riki ara iango ngkai irouia kaain ana utu–ni-kaan Iesu ao ti na noria bwa tera reireiara ae kona n reke mai iai.

[Kabwarabwara ae nano]