E Tangiriia Aomata

1, 2. Tera ae e kaotia bwa e korakora tangiraia aomata iroun Iesu?

E KAOTAKI rianakoni wanawanan te Atua ae Iehova ni karikan Natina ae ana moanibung. E boni wanawana ngkai “te tia makuri ae rabakau” ngaia i rarikin Tamana. Ti kona n iangoa kimwareirein ao raun nanona ngke e nora Tamana ni “katauraoa karawa” ao e “angani marawa tiana.” E ngae ngke a nakoraoi baike a karikaki akanne ma e “kukurei [riki] irouia natiia aomata” Natin te Atua ae ana moanibung. (TaeRab. 8:22-31, BG) Eng, e bon tangiriia ke e akoia botannaomata Iesu ni menana i karawa imwain rokona i aon te aba.

² Imwin anne, ibukini kaotan kakaonimakin ana Moanibung te Atua ao tangiran Tamana irouna, n ikotaki naba ma tangiraia “natiia aomata,” e kukurei ni “kaaki oin arona” ao n arona aroia aomata. E karaoa anne bwa e aonga ni “kaboomwi ibukia aomata aika bati.” (IBir. 2:5-8; Mat. 20:28) E boni kaotiota tangiraia te botannaomata! Ni menana i aon te aba, e anganaki te mwaaka iroun te Atua bwa e na karaoi kakai, are e a kaota iai korakoran tangiraia aomata. E boni karaoi mwakuri aika tamaroa ake a na waekoa n noraki i aon te aba ni kabutaa.

3. Tera ae ti na neneria n te reirei aei?

³ Ni menan Iesu i aon te aba ao e “tataekina [naba] te rongorongo ae raoiroi ae taekan ana tautaeka n uea te Atua.” (Ruka 4:43) E ataia bwa e tei te Tautaeka n Uea aei ibukini katabuan aran Tamana ao a na katokaki iai aorakia aomata nako. E bon aki kamimi bwa baike a riki n ana tai ni mwamwananga Iesu n uarongorongo, boni bwaai ni kakoaua ibukin tabeakinaia aomata irouna. E aera bwa e kakawaki aei iroura? N reireiara mai iai, ti a karekea te aki nanokokoraki ao te kakantaninga ibukin taai aika na roko. Ti na neneri ana kakai Iesu aika aua.

‘IAI TE MWAAKA IROUNA NI KATOKI AORAKI’

4. Kabwarabwaraa aron Iesu ngke e boo ma te aomata ae rebera.

⁴ E rangi ni kukurei Iesu n ana mwakuri ni minita ao ana tabo ae e a tibwa karaoia boni aononi Kariraia. E riki te bwai ae kananokawaki n tikuna n te kaawa teuana iai. (Mareko 1:39, 40) E nora te mwaane ae e aorakina te rebera ae kakamaaku. E kabwarabwaraa te taokita ae Ruka bwa e kakaiaki bwa e onrake rabwatana n te “rebera.” (Ruka 5:12) “Ngke e nora Iesu teuaei ao e katorobubua ni bobaraaki i aontano ao e onnonia Iesu ni kangai: ‘Te Uea ko kona ni kaitiakai ngkana ko kani karaoia.’” E aki nanokokoraki teuaei bwa iai te mwaaka iroun Iesu ni katoka aorakina, ma te bwai ae e kan ataia, e bon tangiria Iesu ni kani karaoia? E na kangaa Iesu ni kaekaa te bubutii ma te onnon aei? Tera ae e iangoia ngke e nora te mwaane ae e taraa ni kakunnainga aei? E na katotongia Baritaio ake aki nanoangaiia aomata aika iai irouia te aoraki aei? Tera ae ko na karaoia?

5. Tera ae kaira Iesu bwa e na kangai: “I kani karaoia,” ngke e katoka te aoraki ae te rebera?

⁵ Ni koauana, e a tia teuae e rebera aei ni kakeaa bongan te takakaa ni kangai: “I kamwara, I kamwara,” n aron ae kantaningaaki n te Tua Rinanoni Mote. E aki roko n te un iai Iesu. Ma e kaatuua riki ana iango iroun te mwaane arei ma kainnanona. (NakIbo. 13:43-46, BG) Ti aki ataa raoi ana iango Iesu ma ti ataa ana namakin. E kairaki n te nanoanga ao e a karaoa te kakai. E arora baina ma n ringnga te rebera ao e kakorakoraa n taetae ma te akoi ni kangai: “I kani karaoia. Ko na itiaki.” Ao “e a rina naba n nako reberana.” (Ruka 5:13) Ni koauana, e aki tii mena mwaakan Iehova iroun Iesu ni karaoa te aeka ni kakai anne, ma e kaota naba korakoran tangiraia aomata irouna.—Ruka 5:17.

6. Tera te bwai ae kakawaki n ana kakai Iesu ao tera ae a kaotaki iai?

⁶ E kona ni karaoi kakai aika bati n aekaia nako Iesu Kristo ni mwaakan te Atua. E aki tii katoka te rebera ma aekan aoraki nako naba ao mamaara nako aika ituaki iai aomata. Ti wareka te rongorongo teuana man te Baibara aei: “A kubanako te koraki ngke a noriia aika baennewe bwa a taetae, ao a nakonako mwauku, ao a noraaba mataki.” (Mat. 15:31) E aki kainnanoi bwain rabwataia tabeman Iesu ibukia tabemwaang ngkana e na karaoi mwakuri n nanoanga akanne. E katoki aorakin nako bwain te rabwata ake a kakaiaki rotakia! Ao e katoki ngkekei naba aorakia aomata, e ngae naba ngkana e raroanako ma ngaiia. (Ioa. 4:46-54) Tera ae kaotaki ni katoto aika kamimi aikai? Iai iroun Iesu te mwaaka ngkai e a Uea i karawa ao e tangiria naba ni kani katoka te aoraki. N reiakinan Iesu ni buokia aomata, ti a aki nanokokoraki bwa n te aonnaba ae boou ao e nang kakoroaki nanon te taetae ni burabeti n te Baibara aei: “E na nanoangaiia akana mamara ma akana a kai nanoia.” (TaiAre. 72:13, BG) Eng, e na boni karaoa are e tangiria Iesu ni buokiia ni kabane aika iai mamaaran rabwataia.

“TEIRAKE, TABEKA NNEM NI WENE AO NAKONAKO”

7, 8. Kabwarabwarai baika riki are e a kairaki iai Iesu nakon te mwaane ae mate rabwatana n te nei are Beteteta.

⁷ A tibwa bane tabeua namwakaina imwini katokan aorakin te mwaane ae e rebera iroun Iesu i Kariraia. E mwananga mai Kariraia ao n roko i Iuta n tataekina Ana Tautaeka n Uea te Atua. A ringaki nanoia aomata aika nga ma nga mwaitiia n ana rongorongo ao aroarona. Bon nanona ni kan taekina te rongorongo ae raoiroi nakoia aika maiu ni kainnano, tuangakia taenikai te inaomata ao e kabebeteia aika uruaki nanoia.—Ita. 61:1, 2; Ruka 4:18-21.

⁸ Imwin anne, e a roko te namwakaina ae Nitian. E ongeaba Iesu n ana tua Tamana ao e a mwananga nako Ierutarem ibukin te Toa ae te Riao. E bati te katabetabe n te kaawa irouia aomata ake a roko ibukin te bukamaru ae tabu aei. Iai te nei ae Beteteta i meangin te tembora ao ikanne are e a boo iai Iesu ma te mwaane ae aoraki.

9, 10. (a) Tera ae a kairaki iai aomata nakon te nei ae Beteteta? (b) Tera ae karaoia Iesu n te nei anne, ao tera reireiara mai iai? (Nora te taamnei ni moan te kaongora aei.)

⁹ A uanao aomata aika aoraki ao aika iai mamaaran nako rabwataia ake a botaki i Beteteta. Tera ae e kairiia nakon te tabo aei? Iai bukina tabeua aika aki kona ni kabwarabwaraaki, bwa a kakoauaa ae ngkana e tebo te aoraki n te nei ae koburake ranna anne ao e a bon toki naba aorakina n te aro ae kamimi. Iangoi aia namakin aomata n te tai anne! A bae ni bati ake a kani buokaki ibukin tabeaiangaia, rawawataia ao bwaran nanoia. Ma e aera ngke e mena i buakoia Iesu are kororaoi man akea aorakina? Eng, e kairaki n te tangira bwa e na kawara te mwaane ae e a maan ni wene n aoraki imwain rokon Iesu i aon te aba.—Wareka Ioane 5:5-9.

¹⁰ Ko kona ni kataamneia nanokawakin te mwaane ae aoraki anne ngke e tuangaki iroun Iesu bwa e kani kamarurungaki ke e aki? E kaekaaki ngkekei naba. E kani kamarurungaki teuaei ma e aki ataia bwa n te aro raa, bwa akea ae e na buokia ni karuoa n te nei. Imwina, e tuangaki iroun Iesu te bwai ae kamimi, bwa e na tabeka nnena ni wene ao n nakonako. E boni karaoa are e tuangnga Iesu, e tabeka nnena ni wene ao e a nakonako. Ai kakukureira bannan te bwai ae na karaoia Iesu n te aonnaba ae boou! Ti nora naba ana nanoanga Iesu n te kakai aei. E kakaaeia aika rangi ni kainnanoa buokaia. Ti kaungaaki n ana katoto bwa ti na teimatoa ni kakaaeia n ara aono aomata aika karawawataaki, ni baika bubuaka aika riki n te aonnaba aei.

“ANTAI AE RINGA AU KAUAATAO?”

11. E kangaa ni katuruturuaki ana nanoanga Iesu ni Mareko 5:25-34 ibukia naake a karawawataaki n te aoraki?

¹¹ Wareka Mareko 5:25-34. E ituaki temanna te aine n te aoraki ae kamaama n te maan ae 12 te ririki. E rotaki maiuna iai ao ana taromauri. E ngae ngke “e bati rawawatana irouia taokita aika bati, ao e kabanea kaubwaina iai” ma e tabe ni kakaiaki riki. N te bong teuana, e a reke ana iango ae kaokoro ibukini kamarurungana. E iangoia bwa e na kaania te aomata ae arana Iesu. E ribuakoia aomata aika uanao ao n ringnga ana kauaatao Iesu. (NakIbo. 15:19, 25) E namakinna Iesu bwa e nako te mwaaka mairouna, ngaia are e titiraki bwa antai ae e ringnga. “E maaku neiei ao e rurubenebene,” ngaia are e “katorobubua i matan Iesu ao e tuangnga te koaua ni kabane.” E taetae ma te akoi Iesu ngke e ataia bwa e katokaki aorakin neiei iroun Tamana ae Iehova ao e taku: “Natiu, e kamarurungko am onimaki. Naako ma te rau, ao ko na marurung man aorakim ae kakaiaki.”

12. (a) Ko na kangaa ni kabwarabwaraa aron Iesu man te bwai ae ti reiakinna ngkai? (b) Tera ana katoto Iesu ibukira?

¹² Ai akoira Iesu! Ti noria bwa e ururingia naake a karawawataaki n taian aoraki. E tangiria Tatan bwa ti na kakoauaa ae ti aki tangiraki ao akea bongara. E kaotia Iesu n ana kakai bwa e tabeakinira raoi ma ara kangaanga. Bon te Uea ngaia ao te Ibonga ae Rietata ae nanoanga! (Ebera 4:15) E bae ni kangaanga otara n aia namakin naake a karawawataaki n te aoraki ae wenemaan, moarara riki ngkana ti bon tuai n rinanona. Ti na ururingnga are e nanoangaiia aoraki Iesu, e ngae ngke e aki kona n aoraki. Ti bia kairaki n ana katoto bwa ti na kabanea naba ara konaa ni karaoa anne.—1 Bet. 3:8.

“A TIINAKO RANNIMATAN IESU”

13. Tera ae kaotaki n aroaron Iesu ngke e kauta Rataro?

¹³ E ringaki nanon Iesu ni marakia aomata. E kairaki n aia namakin tabeman ni maten raoraona ae Rataro ao e “ngirangira” man “rawawata nanona.” E namakina ae aron anne, e ngae ngke e ataia bwa e na waekoa ni manga kauta Rataro. (Wareka Ioane 11:33-36.) E aki maama ni kaotii ana namakin. A ataa ana namakin ibukin Rataro ma ana utu, taani mataku. Ai korakorara ana nanoanga Iesu ngke e kabongana mwaakan Atuana ni kauta iai raoraona!—Ioa. 11:43, 44.

14, 15. (a) Tera ae kaotaki iai bwa e tangiria Iehova ni kamaunai baike a karawawataaki iai aomata? (b) Tera ae irekereke ma te taeka ae “ruanimate”?

¹⁴ E kabwarabwaraaki Iesu n te Baibara bwa “boni katotongan raoi [aroaron te tia Karikiriki.]” (Ebera 1:3) Ngaia are man ana kakai, e a kaotia bwa e tangiria ma Tamana ni kamauna te aoraki, te maraki ao te mate. E na raababanako karaoan aei nakoni kautiuti tabeua ake n te Baibara. E taku: “E na roko te tai are a na bane iai n ongo bwanaana aomata ake a mena i nanon taian ruanimate ao a na otinako.”—Ioa. 5:28, 29.

¹⁵ E tonu raoi kabonganaan te taeka ae “ruanimate” iroun Iesu bwa e irekereke iai ma ana ururing te Atua. E kona te Atua ae Moan te Mwaaka ae Ngaia are e karika te iuniweeti ae totoakaei, n uringia ni kabane ara koraki aika tangiraki ake a tia ni mate n ikotaki naba ma aroaroia. (Ita. 40:26) Ma e aki tii kona n ururing Iehova ma e tangiria naba ma Natina bwa a na karaoia. E taekinaki n te Baibara kautan Rataro ao kautiuti riki tabeua ake a na kakoroaki bukia ni katobibia ara aonnaba aei n te waaki ae boou.

REIREIARA MAN ANA KAKAI IESU

16. Tera kakabwaiaaia Kristian aika kakaonimaki ma te nano ae eti, ni boong aikai?

¹⁶ Ngkana ti teimatoa ni kakaonimaki n te aro ae eti, ti kona n nora te kakai teuana ae moan te kakawaki mai buakoni kakai ni maiura, ae boni kamaiuara n te rawawata ae korakora. Imwin Aremaketon, a na noraki riki kakai aika bati ike a kaokaki iai marurungia aomata nakon te kororaoi. (Ita. 33:24; 35:5, 6; TeKao. 21:4) Iangoia aomata aika karenakoi maata ni wareware, okoia mataki ao mwauku, kaa aika kokokaki, bwaai ni kakauongo ao a bati riki. Iai bukina ae raoiroi iroun Iehova are e na angania te marurung ao te korakora naake a kamaiuaki n Aremaketon. Iai aia mwakuri ae a na karaoia. A ingainga ni kani karababaa ara aonnaba ae ana bwaintituaraoi te Atua, bwa e na bwaretaiti.—TaiAre. 115:16.

17, 18. (a) Bukin tera ngke e karaoi kakai Iesu? (b) E aera bwa ko kakorakorako ni kani kaaina ana aonnaba ae boou te Atua?

¹⁷ A kaungaaki te “koraki ae uanao” ni boong aikai n ana kakai Iesu rimoa, ao a kimwareirei ni kantaningaan ae a nang katokaki aoraki ni kabane. (TeKao 7:9) A kaotiota korakoran ana namakin ao ana tangira ae bati ibukia te botannaomata, ana moanibung Natin te Atua. (Ioa. 10:11; 15:12, 13) E kaotaki n ana nanoanga Iesu bannan ana tangira Iehova ibukia ana toro ni kabane.—Ioa. 5:19.

¹⁸ A ngirangira ngkai te botannaomata, e korakora marakia ao a mate. (IRom 8:22) Ti kainnanoa ana aonnaba ae boou te Atua are e beritanna, are a nang akea iai aorakin nako te rabwata. Ti anganaki te kantaninga ni Maraki 4:2, (BG) are a na “ewewe n takakaro n ai aroia kao aika ataei” ma te kukurei ao te kimwareirei naake a toki aorakia, ngkai a kainaomataaki man te aki kororaoi. Ti bia kakaitau nakon te Atua man onimakini ana berita, ike tia kaungaaki ngkai bwa ti na karaoa ae tangiraki ibukini kaainakin te aonnaba ae boou anne. Ai karaunanora ataan ae ana kakai Iesu ni menana i aon te aba, boni bannan tokin aia kangaanga te botannaomata are e na waekoa n noraki i aan ana kairiri te Mesia!