Te Kimwareirei​—Te Aroaro ae Ti Karekea Mairoun te Atua

A TANGIRIA aomata bwa a na kimwareirei ni maiuia. Ma ni kabaneani boong aikai, a kaaitara aomata nako ma kataaki aika “karuanikai.” (2Tim. 3:1) E kona ni bua kimwareireia tabeman teutana imwin teutana ngkana a kaaitara ma te ribuaka, a aoraki, a kabaneaki man aia mwakuri, a rawawata, ke bwaai riki tabeua ake a karika tabeaiangaia ao nanokawakia. A kona naba ana toro te Atua ni bwara nanoia ao ni bua kimwareireia teutana imwin teutana. Ngkana e riki aei nakoim, ko na kangaa ni kaoka kimwareireim?

Ibukini kaekaan anne, ti riai moa n ataia bwa tera te kimwareirei ni koaua ao a kangaa tabemwaang n teimatoa ni kimwareirei n aki ongei kataakia. Imwina, ti na reiakina te bwai ae ti kona ni kateimatoa kimwareireira ke ni kabatiaa.

TERA TE KIMWAREIREI?

Ti riai n ataia bwa e kaokoro te kimwareirei ma te kakatonga ao te ngarengare. E kangai kabwarabwaraana: Ngkana e koro ni manging temanna, e kona ni kabatiaa te ngarengare. Ma ngkana e a toki angin nimana, e a aki manga ngarengare, ao e kona ni manga okira arona are e rangi n nanokawaki ao a bati ana kangaanga. Ngarengarena i nanon te tai ae uarereke, bon tiaki te kimwareirei ni koaua.—TaeRab. 14:13.

N te itera are teuana, te kimwareirei bon te namakin ae tiku i nanon te aomata. E kabwarabwaraaki bwa bon te “namakin ae ueke man reken ke kantaningaan te bwai ae raoiroi.” Te kimwareirei bon te kakatonga ke te kukurei ae ti teimatoa n namakinna n taai aika kakukurei ao aika aki naba. (1Tet. 1:6) Ni koauana, e kona n tabeaianga te aomata ibukin te bwai teuana ma e teimatoa ni kimwareirei i nanona. N te katoto, a oreaki abotoro ibukina bwa a tataekina taekan te Kristo. Ma a “otinako naakai man te Tanirim, ni kimwareirei kioina ngkai a katauaki bwa a na bwainnataeaki ibukin aran Iesu.” (Mwa. 5:41) E teretere bwa a aki kimwareirei ngkai a oreaki. Ma ngkai ana toro te Atua ngaiia, a karekea te kimwareirei ni koaua ibukina bwa a kateimatoa etin aroia i matana.

Ti aki bungiaki ma te kimwareirei anne, ao e aki naba manennanti rekena iroura. Bukin tera? Ibukina bwa te kimwareirei ni koaua bon uaan naba te taamnei ae raoiroi mairoun te Atua. E buokira taamnein te Atua ni karikirakea “te aroaro ae boou,” ae irekereke naba ma te kimwareirei. (IEbe. 4:24; IKar. 5:22) Ao ngkana ti karikirakea te kimwareirei, ti a kona riki n tokanikai i aoni karawawata i nanoni maiura.

KATOTO AIKA TI KANI KAKAIRI IAI

E tangiria Iehova n nori baika raraoi i aon te aba ma tiaki baika bubuaka aika ti nonori ni boong aikai. Ma e ngae n anne, e aki kariaia Iehova bwa e na bua kimwareireina n aia mwakuri aika buakaka aomata. E taku Ana Taeka te Atua: “A mena . . . te korakora ma te kimwareirei n ana tabo ni maeka.” (1Rong. 16:27) Irarikin anne, e ‘kakimwareireia nanon Iehova’ baika raraoi aika a kakororaoi ana toro.—TaeRab. 27:11.

Ti kona ni katotonga Iehova n arora n aki rangi n tabeaianga ngkana a aki riki bwaai n aron ae ti kantaningaia. N oneani mwin are ti na kabuaa kimwareireira, ti kona ni kaatuui ara iango i aoni baika raraoi aika iroura ngkai, ao n taotaon nanora ni kantaningai baika raraoi riki aika imwaira.a

Ti kona n nori katoto man te Baibara ni kaineti ma naake a kateimatoa kimwareireia n aki ongei kataakia. Temanna mai buakoia bon Aberaam are nanomwaaka n aki ongei baike a karuanikaia maiuna ao ana kangaanga mairouia tabemwaang. (KBwaai 12:10-20; 14:8-16; 16:4, 5; 20:1-18; 21:8, 9) E kateimatoa kimwareireina Aberaam n aki ongei kangaanga akanne. E kangaa ni karaoa anne? E iaiangoa raoi ana kantaninga are e na maiu n te aonnaba ae boou i aan ana tautaeka te Mesia. (KBwaai 22:15-18; Ebera 11:10) E taku Iesu: “E rangi ni kimwareirei tamami are Aberaam ni kantaningaan ae e na nora au bong.” (Ioa. 8:56) Ti kona ni katotonga Aberaam ngkana ti iaiangoi baika a kakimwareirei aika imwaira.—IRom 8:21.

N aron Aberaam, e kaatuua naba iangoan ana berita te Atua te abotoro Bauro ma raona ni mwakuri are Tira. E korakora aia onimaki naakai, ao a kateimatoa kimwareireia n aki ongei baika riki nakoia aika buakaka. N te katoto, imwin nanomwaakaia ngke a oreaki ni karawataaki ao karinaia n te karabuuti, ao ngke “e a nukanibong, ao a tabe n tataro . . . ao a neboa te Atua n te anene.” (Mwa. 16:23-25) A karekea korakoraia Bauro ma Tira man aia kantaninga ao a kimwareirei naba ibukina bwa a kammarakaki ibukin arani Kristo. Ti kona ni katotonga Bauro ma Tira ngkana ti teimatoa n iaiangoi kakabwaia man te kakaonimaki ni beku ibukin te Atua.—IBir. 1:12-14.

Iai ni boong aikai katoto aika bati ni kaineti ma rongorongoia taari ake a kateimatoa kimwareireia n aki ongei kangaanga. N te katoto, n Nobembwa 2013, a urubekebeke mwengaia utu aika taani Kakoaua aika 1,000 tabun n te angibuaka ae Super Typhoon Haiyan i Biribin. E taku George, are e urubekebeke naba mwengana n te kaawa ae Tacloban: “E ngae ngke a riki baikai ma a teimatoa ni kukurei taari. I aki kona ni kabwarabwaraa aron te kimwareirei are ti namakinna.” Ngkana ti taonaki ni kangaanga aika korakora, ti na teimatoa ni kimwareirei ngkana ti kananoi ara iango i aoni baike e a tia ni karaoi Iehova ibukira. Tera riki ae e a tia ni katauraoia Iehova ae ti kimwareirei iai?

BUKINI KIMWAREIREIRA

Iai bukini kimwareireira ae kakawaki riki bwa bon ara iraorao ma te Atua. Iangoia: Ti kinaa te tia Tautaeka i Aoni Bwaai ni Kabane. Boni ngaia Tamara, Atuara, ao Raoraora!—TaiAre. 71:17, 18.

E kakawaki naba iroura te bwaintangira ae te maiu ao te konaa ni kakukureira iai. (TeMin. 3:12, 13) Ibukina bwa e a tia ni katikira Iehova nakoina, ti a kona n ataa iai ana kantaninga ibukira. (IKoro. 1:9, 10) Mangaia are iai manenani maiura ma ara kantaninga. N te itera are teuana, angia aomata a aki ota raoi bwa tera manenani maiuia. E katuruturua te kaokoro aei te abotoro Bauro ngke e korea ae kangai: “‘Baike e tuai n nori te mata ao e tuai n ongo te taninga, ao a tuai naba n ueke i nanoia aomata, boni baika e katauraoi te Atua ibukia te koraki ake a tangiria.’ Bwa e kaotii nakoira te Atua rinanon taamneina.” (1Kor. 2:9, 10) Ti aki ngkanne kimwareirei n ataakin nanon Iehova ao ana kantaninga?

Iangoia bwa tera riki ae e a tia ni karaoia Iehova ibukia ana aomata. Tiaki bwa ti kukurei ngkai a a kona ni kabwaraaki ara bure? (1Ioa. 2:12) Ibukin ana nanoanga te Atua, ti a kantaningaa te maiu n te waaki ae boou i aon te aba ae e a kaan roko. (IRom 12:12) E anganira naba ngkai Iehova raoraora aika bati aika raora n taromauria. (TaiAre. 133:1) E karaui nanora naba te Baibara bwa e kamanoia ana aomata Iehova mairoun Tatan ma ana taimonio. (TaiAre. 91:11) Ngkana ti iaiangoi kakabwaiaara aikai mairoun te Atua, ti a namakinna iai bwa e a kakorakoraaki ao n ririkirake kimwareireira.—IBir. 4:4.

ARONI KARIKIRAKEAN RIKI KIMWAREIREIMI

E kona te Kristian ae e a kamani kimwareirei ni karikirakea riki kimwareireina? E taku Iesu: “I atongi baikai nakoimi, bwa e aonga n reke iroumi te kimwareirei ae irou, ao e na kakororaoaki kimwareireimi.” (Ioa. 15:11) E kaotaki n aei bwa ti kona ni karikirakea riki kimwareireira? Ko kona ni kabotaua am kakorakora ni karikirakea kimwareireim ma kauramwakaan te ai. Ko riai ni karekarea kanaan te ai bwa e aonga n rangi ni kabuebue riki. N aron anne, ko riai naba ni kakorakoraa am onimaki bwa e aonga n rikirake riki kimwareireim. Ururinga aei: E kakorakoraa te kimwareirei taamnein te Atua. Ngaia are ko kona ni karikirakea riki kimwareireim ngkana ko katoatai ni bubutii ana ibuobuoki taamnein Iehova ao ni kananoa am iango i aon ana Taeka ao n tataroakinna.—TaiAre. 1:1, 2; Ruka 11:13.

Te bwai riki teuana ae kona ni karikirakea riki kimwareireira bon teimatoara ni karaoi mwakuri aika kakukureia Iehova. (TaiAre. 35:27; 112:1) Bukin tera? Ibukina bwa ti karikaki bwa ti na “maaka te Atua ae koaua ao [ni] kawakin ana tua, bwa bon aei te bwai ae moan te kakawaki iroun te aomata.” (TeMin. 12:13) N taeka riki tabeua, ti karikaki bwa ti na kakaraoa nanon te Atua. Ngaia are ngkana ti beku ibukin Iehova, e na reke iai maiura ae moan te kakimwareirei.b

KAKABWAIA AIKA REKE MAN TE KIMWAREIREI

Ngkai ti karikirakea te kimwareirei are mairoun te Atua, ti na boni karekei kakabwaia aika bati riki. N te katoto, e na rangi ni kukurei riki Tamara are i karawa ngkai ti kimwareirei ni beku ibukina n aki ongei kangaanga aika ti kona ni kaaitarai. (TuaKau. 16:15; 1Tet. 5:16-18) Ngkana e reke iroura te kimwareirei ni koaua, ti na rarawa nakoni bwaikorakin te maiu aei. Ma ti na ukeri aanga ake ti na kukurei ni kakeaira iai ibukin Ana Tautaeka n Uea te Atua. (Mat. 13:44) Ngkana ti nori kakabwaia aika reke man arora aei, e na rikirake iai kimwareireira, raun nanora, ao ti na kakukureiia riki tabemwaang.—Mwa. 20:35; IBir. 1:3-5.

“Ngkana ko kukurei ao e rau nanom ni maium ngkai, ko na bae ni marurung riki n taai aika imwaim.” Anne are e koreia te tia kakaae temanna n te Kuura ae Rietata i Nebraska n te United States, imwin ana ukeuke i aoni kukune aika bati i aon te marurung. E boraoi aei ma ana taeka te Baibara ae kangai: “Bon te bwainnaoraki ae raoiroi te nano ae kimwareirei.” (TaeRab. 17:22) Eng, ngkai ko a karikirakea riki kimwareireim, ko na bae ni marurung riki.

E ngae ngkai ti a maeka n taai aika rangi ni karawawata, ma ti kona ni karikirakea te kimwareirei ni koaua ae teimatoa n taai aikai, ngkai ti karekea te taamnei ae raoiroi rinanon te tataro, te ukeuke n reirei, ao kananoan ara iango n Ana Taeka Iehova. Ti karikirakea naba kimwareireira ngkana ti iaiangoi kakabwaiaakira n taai aikai, ti kakairi n aia onimaki tabemwaang, ao n ukera nanon te Atua. Ngkana ti karaoi baikai ni kabane, ti a kona iai n inanoi ma te koaua ae n Taian Areru 64:10 ae kangai: “A na kimwareirei iroun Iehova akana raoiroi, ao a na kamanoia irouna.”