Kabanea Nanom ni Mwiokoam ae Ko Anganaki!

TERA am namakin ngkana ko karekea ana reta ni kaungaunga raoraom ni koaua temanna? E karekea te aeka n reta anne Timoteo ae te tia rimwin Kristo mairoun te abotoro Bauro, ae te reta ae ataaki n arana ae 2 Timoteo, ni bokin te Baibara. E bon ingainga Timoteo ni kakaaea te tabo ae rau ibukini warekan ana reta raoraona anne. Tao e bae n iango Timoteo ni kangai: ‘E uara ngkai Bauro? Iai ngkai ana taeka n reirei ibukini buokau ni mwiokoau aika I anganaki? E kona te reta aei ni buokai bwa N na kanakoraoa riki iai au mwakuri ni minita ao ni buokiia naba iai tabemwaang?’ N aron ae ti na noria, a reke kaekaan ana titiraki Timoteo aikai ao aika bati riki i nanon te reta ae kakawaki aei. Ma ti na kaatuua moa ngkai iangoan tabeua taeka n reirei n ibuobuoki i nanon te reta aei.

“I TEIMATOA N NANOMWAAKA NI BWAAI NI KABANE”

Ngke e wareka Timoteo ana moantaeka Bauro ake n te reta, e a ataia naba ngkekei bwa e bon tabeakinna raoi Bauro. E taetae Bauro ma te tangira n aranna bwa “te nati ae tangiraki.” (2Tim. 1:2) Bon 30 tabun ana ririki ni maiu Timoteo ngke e karekea te reta aei, tao n 65 C.E., ao e a maan naba n riki bwa te unimwaane n te ekaretia. E a maan n raoraona Bauro ni mwakuri i nanon tebwi tabun te ririki ao a bati reireiana mairouna.

E bae n rangi ni kaungaaki Timoteo irouni Bauro n arona n teimatoa ni kakaonimaki ao n nanomwaaka i aani kangaanga. E boni kabaeaki n te taurekereke Bauro i Rom, n tataningaa kamateana. (2Tim. 1:15, 16; 4:6-8) E a kona Timoteo n nora ninikorian te abotoro aei, mani warekan ana taeka aikai: “I teimatoa n nanomwaaka ni bwaai ni kabane.” (2Tim. 2:8-13) N aron Timoteo, ti kona naba ni karekea korakorara man ana katoto Bauro ae rianako ibukin te nanomwaaka.

“KAURAA . . . N AI ARON TE AI”

E kaumakaki Timoteo irouni Bauro bwa e na iangoa mwiokoana n ana botaki te Atua bwa e rangi ni kakawaki. E tangiria Bauro bwa Timoteo, e na “‘kauraa ana bwaintituaraoi te Atua . . . n ai aron te ai” are i nanona. (2Tim. 1:6) E kabongana Bauro te taeka ae khaʹri·sma ibukin te taeka ae “bwaintituaraoi.” E nanonaki te taeka ni Kuriiti anne nakon te bwaintituaraoi ae akea boona ao e rianako, ae te bwai ae a a anganaki naake a aki mwakuria karekeana, ao a aki naba tau n anganaki. Ma e karekea te bwaintituaraoi aei Timoteo ngke e a rineaki bwa e na karaoa te mwioko ae okoro n te ekaretia.​—1Tim. 4:14.

Tera aron Timoteo nakon te bwaintituaraoi aei? Ngke e wareka te kibuntaeka ae “kauraa . . . n ai aron te ai,” e bae n iaiangoi auti ake a kaotaia n te ai, are n tabetai a a kona n riki bwa mwaakaro aika ura. A riai mwaakaro akanne n ura ni kakorakora riki te kabuebue. E taekinna te tia rabakau temanna n te rikitinare bwa te weabe ni Kuriiti ae (a·na·zo·py·reʹo) are e kabongana Bauro, e nanonaki iai “kauekea, maiu, iribia bwa e na ura,” are e kona n nanonaki naba iai “te ingainga ao n nanomwaaka ni karaoani mwakuri tabeua.” Ngaia are e bon anga te taeka n reirei Bauro nakon Timoteo ni kangai: ‘Kabanea nanom ni mwiokoam ae ko anganaki!’ Ko na bae ni kakaitau bwa ni boong aikai, ti riai naba ni karaoa ae aron aei​—ae ti na mwakuri korakora ao n ingainga n ara beku.

“KAWAKINA TE BWAI AE KAKAWAKI AEI”

Ngke e tabe Timoteo n reitaanako warekan ana reta raoraona arei, e a manga boo ma te kibuntaeka teuana ae e na buokia ni kanakoraoa riki ana mwakuri ni minita. E korea aei Bauro: “Ko na kawakina te bwai ae kakawaki aei ae ko mwiokoaki iai rinanon te taamnei ae raoiroi ae memena i nanora.” (2Tim. 1:14) Tera te bwai ae kakawaki anne? Tera are e mwiokoaki iai Timoteo? N te kibu are imwain anne ao e nanona Bauro “taeka aika koaua,” aika nako man te Koroboki ae Tabu. (2Tim. 1:13) Ngkai te Kristian Timoteo, e riai n tataekina te koaua i nanon ao i tinanikun naba te ekaretia. (2Tim. 4:1-5) Ao e mwiokoaki naba bwa te unimwaane, ae e na kawakina ana nanai te Atua. (1Bet. 5:2) E boni kawakina mwiokoana aei Timoteo ae taekan te koaua are e tataekinna, ngke e onimakina te taamnei ae raoiroi are mairoun Iehova ao Ana Taeka.​—2Tim. 3:14-17.

Ni boong aikai, ti mwiokoaki naba bwa ti na tataekina te koaua ao n tibwaia nako n ara mwakuri ni minita ni Kristian. (Mat. 28:19, 20) Ti kona ni kateimatoa ara kakaitau n te mwioko ae kakawaki aei, n arora n teimatoa n tataro ao ni karikirakea te anua ae te ukeuke n reirei man Ana Taeka te Atua. (IRom 12:11, 12; 1Tim. 4:13, 15, 16) Ti kona naba n anganaki te mwioko riki teuana ae te beku bwa te unimwaane n te ekaretia ke kabwaninan te tai n te mwakuri ni minita. Anganakira te mwioko ae aron aei, e na kairira bwa ti na nanorinano ao n onimakina naba te Atua ibukini buokara. Ngaia are ti kona ni kawakina ke ni kamanoa mwiokoara, man arora n iangoia bwa e kakawaki ao n onimakina ana ibuobuoki Iehova iai.

“KO NA MWIOKOIIA MWAANE AIKA KAKAONIMAKI NI BAIKE KO ONGO”

A aki tii kaineti nakon Timoteo mwiokoana ake e anganaki. A irekereke naba iai tabemwaang. Anne bukina ngke e kaumakaki irouni Bauro ni kangai: “‘Ko na mwiokoiia mwaane aika kakaonimaki ni baike ko ongo irou, . . . ao mwaane aikai a na tau n reireinia aomata tabemwaang.” (2Tim. 2:2) Eng, e na karekea naba reireiana Timoteo mairouia tarina n te onimaki ao e na reireinia naba. E kakawaki bwa a riai ni bane taani kairiri n te ekaretia ni Kristian ni kakorakoraia ni karaoa naba anne. Te tia kairiri ae tamaroa, e aki rawa n tibwaa nako mwaataina n te mwioko are e anganaki. Ma e na reireinia tabemwaang bwa a na mwaatai ni karaoa te mwioko anne. E aki riai n iangoia bwa aongkoa a atatai riki nakanne nakoina ke e nakoraoi riki aia mwakuri nakoina. Ngaia are e aki riai te tia kairiri n tii reireinia mwaneka aika kakawaki ibukin te mwakuri teuana. E riai ni buokiia naake e reireinia ni kataneiaia bwa a na wanawana ao n ataibwai bwa a aonga n rikirake n te onimaki. N te aro anne, “mwaane aika kakaonimaki” ake e reireinia, a na mwaatai ao ni manena riki nakon te ekaretia.

Maroaka are e rangi ni kakawaki iroun Timoteo ana reta mairoun Bauro anne. Ti kona ni kataamneia Timoteo n okioki ni wawareka ao ni kananoa ana iango n te reirei ni kairiri ae kakawaki are iai, ao arona ni kabanea ana konaa ni maiuakinna ni mwiokoana are e anganaki.

Ti tangiria ni maiuakina te reirei ni kairiri naba aei. Ma n te aro raa? Ti na kauraa i nanora te bwaintituaraoi aei n ai aron te ai, ti na kawakinna, ao n reireinia naba tabemwaang mwiokoara ao ara atatai. N te aro anne, n aron are e taekinna Bauro nakon Timoteo, ti a kona iai ni “kakororaoa raoi [ara] mwakuri ni minita.”​—2Tim. 4:5.